Ahoana no Ampiofanana ny Vavolombelon’i Jehovah mba Hahavitany ny Fanompoany?

Ampiofanina foana ny Vavolombelon’i Jehovah mba hahavitany ny zavatra rehetra tokony hataon’ny Kristianina, anisan’izany ny hoe mitory sy mampianatra ny vaovao tsaran’ny Fanjakan’Andriamanitra. Izany no mantsy no asa nasain’i Jesosy ataon’ny mpanara-dia azy. (Matio 24:14; 28:19, 20) Miara-mivory izahay isan-kerinandro ary manao fivoriambe isan-taona, dia amin’ireny izahay no ampiofanina. Mahazo fampiofanana fanampiny izay Vavolombelon’i Jehovah manana andraikitra ao amin’ny fiangonana na eo anivon’ny fandaminana. Misy karazana sekoly ara-baiboly manokana natao hampiofanana azy ireny.

Ho hitantsika ato hoe:

• Inona no fampiofanana azon’ny Vavolombelon’i Jehovah?

• Sekoly ara-baiboly natao ho an’ny Vavolombelon’i Jehovah

• Avy aiza ny zavatra ianaran’ny Vavolombelon’i Jehovah mandritra an’ilay fampiofanana?

• Mila mandoa vola ve ny Vavolombelon’i Jehovah amin’ilay fampiofanana?

• Inona no soa azon’ny Vavolombelon’i Jehovah avy amin’ny fampiofanana an-dry zareo?

Inona no fampiofanana azon’ny Vavolombelon’i Jehovah?

Fivorian’ny fiangonana: Miara-mivory indroa any amin’ny toerana antsoina hoe Efitrano Fanjakana izahay isan-kerinandro. Amin’ny andavanandro matetika no atao ny fivoriana iray, dia ny iray amin’ny faran’ny herinandro. Azon’ny rehetra atrehina ilay izy, ary tsy misy fanantazan-drakitra.

• Fivoriana andavanandro: Ianarana mandritra an’ilay izy hoe ahoana no hatao mba hanatsarana ny fahaizana mamaky teny, miresaka, miresaka eny imason’olona be dia be, mitory, ary mampianatra. Misy lahateny any, na fiaraha-midinika sy fampisehoana ary video. Amin’ny alalan’ireny no atao ilay fampiofanana. Manampy anay hahita vokatra kokoa izany rehefa mampita ny hafatra ao amin’ny Baiboly amin’ny hafa izahay, na mampianatra Baiboly an’izay olona liana. Mandray soa avy amin’izany fampiofanana izany daholo izay manatrika an’ireo fivoriana ireo. Vao mainka koa izahay matoky an’Andriamanitra sy tia azy sy ny mpiara-mivavaka aminay, vokatr’ireny fivoriana ireny, ary izay no tena zava-dehibe.

• Fivoriana amin’ny faran’ny herinandro: Mizara roa ilay izy. Lahateny miorina amin’ny Baiboly no arahina amin’ny tapany voalohany, ary natao manokana ho an’ny besinimaro izy io. Fiaraha-midinika amin’ny alalan’ny fanontaniana sy valiny kosa no atao mandritra ny tapany faharoa. Lahatsoratra iray ao amin’ny Tilikambo Fiambenanaa gazety fianarana no dinihina. Foto-kevitra sy torolalana avy ao amin’ny Baiboly no resahina sy hazavaina ao amin’ireny lahatsoratra ireny, ary manampy anay amin’ny fiainanay andavanandro sy rehefa mitory ilay izy.

Fivoriambe: Manao fivoriambe intelo isan-taona izahay, ary fiangonana maromaro no miara-manatrika ny fivoriambe tsirairay. Mahafinaritra be ilay izy. Foto-kevitra ara-baiboly nofidina manokana no tena resahina mandritra an’ilay izy, dia misy lahateny, fampisehoana, fanadinadinana, ary video koa. Manampy anay hahafantatra kokoa an’izay lazain’ny Baiboly ireny fivoriambe ireny, hoatran’ny fivorian’ny fiangonana ihany. Lasa mahay mitory sy mampianatra kokoa ny vaovao tsara àry izahay vokatr’izany. Afaka manatrika an’ireny fivoriambe ireny koa ny olona rehetra, ary tsy misy fanantazan-drakitra any.

Sekoly ara-baiboly natao ho an’ny Vavolombelon’i Jehovah

Tiana hampiofanina kokoa ny Vavolombelon’i Jehovah sasany, dia asaina manatrika sekoly ara-baiboly. Inona avy izany sekoly izany? Inona no tanjon’ilay izy ary maharitra hafiriana ilay izy? Iza no manatrika an’ilay izy?

Sekolin’ny Fanompoan’ny Mpisava Lalana

• Tanjona: Hampiofana mpitory manontolo andro antsoina hoe mpisava lalana,b mba hahita vokatra kokoa rehefa mitory sy mampianatra. Misy fiaraha-midinika andraisan’ny iray kilasy anjara amin’ilay izy, dia misy fampisehoana sy lahateny ary fanazaran-tena.

• Faharetany: Enina andro.

• Ny olona afaka manao an’ilay izy: Izay efa nanao mpisava lalana nandritra ny herintaona no asaina hanatrika an’io sekoly io. Mety hasaina hiverina hanao azy io koa ny mpisava lalana efa ela nefa tsy nanao an’ilay izy tao anatin’ny dimy taona.

Sekolin’ny Mpitory Ilay Fanjakana

• Tanjona: Hanome fampiofanana manokana ho an’ireo mpitory manontolo andro efa za-draharaha. Vao mainka manatsara ny fahaizana mitory sy mampianatra io sekoly io. Mandalina foto-kevitra avy ao amin’ny Baiboly ry zareo. Rehefa vita ilay sekoly, dia maromaro no asaina ho any amin’ny toerana ilana mpitory betsaka kokoa.

• Faharetany: Roa volana.

• Ny olona afaka manao an’ilay izy: Misy fepetra sasany takina. Afaka mameno fangatahana hanao an’ilay izy izay mpisava lalana mahafeno an’izany, sady afaka mandeha any amin’izay toerana mila mpitory.

Sekolin’ny Anti-panahy

• Tanjona: Hanampy ny anti-panahyc hamita tsara ny andraikiny ao amin’ny fiangonana, anisan’izany ny hoe mampianatra sy mampahery ny mpiray finoana aminy. Natao hanampiana ny anti-panahy ho tia kokoa an’i Jehovah sy ny mpiara-mivavaka aminy koa io sekoly io.​—1 Petera 5:2, 3.

• Faharetany: Dimy andro.

• Ny olona ampiofanina amin’ilay izy: Izay vao voatendry ho anti-panahy, ary ny anti-panahy efa za-draharaha tsy nanatrika an’ilay izy tao anatin’ny dimy taona.

Sekolin’ny Mpiandraikitra ny Faritra sy ny Vadiny

• Tanjona: Hampiofana an’ireo mpitory antsoina hoe mpiandraikitra ny faritra,d mba hahavita tsara ny andraikiny. Mitety toerana maromaro ry zareo. (1 Timoty 5:17) Manampy an’ireny anti-panahy ireny sy ny vadiny hahazo tsara kokoa ny Soratra Masina koa ilay fianarana.

• Faharetany: Iray volana.

• Ny olona afaka manao an’ilay izy: Asaina hanao an’io sekoly io ny mpiandraikitra ny faritra vaovao sy ny vadiny, herintaona aorian’ny nanombohany ny fanendrena azy. Asaina hanao an’ilay izy indray ry zareo avy eo, isaky ny dimy taona eo ho eo.

Sekolin’ny Fanompoana Ilay Fanjakana

• Tanjona: Hanampy ny anti-panahy sy ny mpikarakara fiangonanae hahavita ny andraikiny, mifanaraka amin’ny zava-misy sy ny fiovana ary ny zavatra ilain’ny fiangonana. (2 Timoty 3:1) Isaky ny roa na telo taona no atao io sekoly io.

• Faharetany: Miovaova, fa matetika iray andro.

• Ny olona afaka manao an’ilay izy: Mpiandraikitra ny faritra, anti-panahy, mpikarakara fiangonana.

Sekolin’ny Fanompoana ao Amin’ny Betela

• Tanjona: Hanampy ny olona manompo ao amin’ny Betelaf hahavita ny asany sy vao mainka ho tia an’Andriamanitra sy hifankatia.

• Faharetany: Dimy andro sy tapany.

• Ny olona afaka manao an’ilay izy: Tsy maintsy manao an’io sekoly io ny olona vaovao manompo ao amin’ny Betela. Mety hasaina hanatrika azy io koa ny Betelita efa ela tsy nanao an’ilay izy tao anatin’ny dimy taona.

Sekoly Ara-baibolin’i Gileada

• Tanjona: Natao hanampiana ny mpianatra ho tia sy hahazo kokoa ny Tenin’Andriamanitra sy hampihatra ny zavatra ianarany. (1 Tesalonianina 2:13) Vao mainka azon’ny fandaminana ampiasaina tsara ny lehilahy sy vehivavy matotra ara-panahy manao an’io sekolin’i Gileada io. Lasa afaka manampy be amin’ilay fampianarana Baiboly hatao maneran-tany koa ry zareo. Mety ho voatendry hanompo eny amin’ny saha na ao amin’ny biraon’ny sampana ny mpianatra avy nanao an’ilay sekoly. Tsy voatery ho any amin’ny tany niaviany izany, fa mety ho any an-tany hafa.

• Faharetany: Dimy volana.

• Ny olona afaka manao an’ilay izy: Ny biraon’ny sampana no mifidy an’izay mpitory manontolo andro afaka mangataka hanao an’io sekoly io. Any amin’ny Foibem-pampianaran’ny Tilikambo Fiambenana any Patterson, any Etazonia, ilay izy no atao.

Sekolin’ireo Anisan’ny Komitin’ny Sampana sy ny Vadiny

• Tanjona: Natao hampiofanana an’ireo anisan’ny Komitin’ny Sampanag izy io. Manampy azy ireo ilay sekoly mba hahay hiandraikitra ny asa atao ao amin’ny biraon’ny sampana sy ny asan’ny Vavolombelon’i Jehovah ao amin’ny tany misy an’ilay sampana na ao amin’izay tany hafa notendrena hokarakarainy.

• Faharetany: Roa volana.

• Ny olona afaka manao an’ilay izy: Ny Foiben’ny Vavolombelon’i Jehovah no mifidy hoe iza amin’ireo anisan’ny Komitin’ny Sampana no hanatrika an’ilay sekoly miaraka amin’ny vadiny. Any amin’ny Foibem-pampianaran’ny Tilikambo Fiambenana any Patterson, any New York, ilay izy no atao.

Avy aiza ny zavatra ianaran’ny Vavolombelon’i Jehovah mandritra an’ilay fampiofanana?

Ny Baiboly foana no tena hakana ny fampiofanana azon’ny Vavolombelon’i Jehovah. Mino mantsy izahay hoe avy amin’ny fanahy masin’Andriamanitra izy io, ary ao no misy ny torohevitra tsara indrindra momba ny fiainan’ny Kristianina rehetra.​—2 Timoty 3:16, 17.

Mila mandoa vola ve ny Vavolombelon’i Jehovah amin’ilay fampiofanana?

Maimaim-poana ilay izy ka! Fanomezana an-tsitrapo no anohanana an’izay zavatra ataon’ny Vavolombelon’i Jehovah.​—2 Korintianina 9:7.