Misy Fitondram-panjakana Maharitra Afaka Hitondra An’ity Tanintsika ity Ve? Inona no Lazain’ny Baiboly?

Be dia be ny fitondrana mikorontana eran-tany. Na ny fitondrana any amin’ny tany hoatran’ny hoe milamina aza atahorana ho rava, satria manao zavatra manala baraka ny mpanao politika, kely fotsiny ny elanelan’ny voka-pifidianana, misara-bazana ny olona noho ny politika, ary eo koa ny ady an-trano.

Milaza ny Baiboly hoe fitondram-panjakana iray ihany no maharitra, na tsy ho rava mihitsy. Efa naheno momba azy io angamba ianao. Io ilay Fanjakana noresahin’i Jesosy Kristy tao amin’ilay vavaka modely.

•  “Hoatr’izao àry lazaina rehefa mivavaka: ‘Rainay izay any an-danitra, hohamasinina anie ny anaranao! Ho tonga anie ny Fanjakanao! Hatao etỳ an-tany anie ny sitraponao, tahaka ny any an-danitra!’”​—Matio 6:9, 10.

Inona no lazain’ny Baiboly momba an’io Fanjakana io?

Fitondram-panjakana tsy ho rava mihitsy

Avy any an-danitra io Fanjakana io no hitondra.

•  Nantsoin’i Jesosy hoe “ny Fanjakan’ny lanitra” izy io. (Matio 4:17; 5:3, 10, 19, 20) Izany no nahatonga azy hiteny hoe: “Tsy anisan’izao tontolo izao ny Fanjakako.”​—Jaona 18:36.

Hisolo ny fitondran’olombelona rehetra io Fanjakana io.

•  Izao no lazain’ny Baiboly: “Hotorotoroin’io fanjakana io sy hofoanany ireo [fanjakan’olombelona] rehetra ireo, fa izy irery ihany no haharitra mandrakizay.”​—Daniela 2:44.

Tsy ho rava mihitsy io Fanjakana io, ary i Jesosy Kristy no Mpanjakany.

•  Izao no resahin’ny Baiboly: “Ny fitondrany dia fitondrana haharitra mandrakizay fa tsy handalo fotsiny, ary ny fanjakany tsy ho rava.”​—Daniela 7:13, 14.

Hitondra fiadanana sy filaminana eto an-tany io Fanjakana io.

•  Izao no lazain’ny Baiboly: “Samy hipetrapetraka amim-piadanana eny ambanin’ny voalobony sy ny aviaviny ny olon-drehetra, ary tsy hisy hampatahotra azy.”​—Mika 4:4, Fandikan-tenin’ny Vaovao Tsara, anglisy.

Miezaha hahafantatra kokoa momba an’io Fanjakana io

Natokan’i Jesosy hitoriana ny “vaovao tsaran’ilay Fanjakana” ny ankamaroan’ny fotoanany, tamin’izy tetỳ an-tany. (Matio 9:35) Nilaza koa izy hoe:

•  “Hotorina maneran-tany ity vaovao tsaran’ilay Fanjakana ity, ho vavolombelona amin’ny firenena rehetra, vao ho tonga ny farany.”​—Matio 24:14.

Any amin’ny tany 240 mahery izao no itoriana ny vaovao tsaran’ilay Fanjakana. Manasa anao izahay mba hianatra bebe kokoa momba an’io fitondram-panjakana io sy izay azonao atao mba handray soa avy amin’ny fitondrany ianao.

Jereo ilay video hoe Inona moa ny Fanjakan’Andriamanitra?