Tena Ilaina ve Ireo Namana Kristianina?
1 “Ny firaisan-kina no hery.” Io ohabolana malagasy io, dia mamerina fotsiny izay voalazan’ny Baiboly, momba ny zavatra fototra ilain’ny olombelona, dia ny namana. (Ohab. 18:1) Azontsika izany, satria eo ireo namana kristianina. Amin’ny fomba mahasoa inona avy?
2 Eny amin’ny fanompoana: Anisan’ireo soa lehibe indrindra ny fomba anatanjahan’ireo rahalahintsika sy anohanany antsika eny amin’ny fanompoana ho an’ny besinimaro. Nirahin’i Jesosy hitory “tsiroaroa” ny mpianany. (Marka 6:7; Lioka 10:1) Rehefa miara-miasa eny amin’ny saha fanompoana isika, mifanaraka amin’izany ohatra izany, dia hitantsika fa tena marina ny voalazan’ny Mpitoriteny 4:9, 10. Rehefa miara-manao fanompoana isika, ny finoana sy ny fankatoavana ary ny fitiavana asehon’ireo namantsika dia manome antsika herim-po sady manavao indray ny zotom-pontsika.
3 Fanampiana manokana: Mahazo fampaherezana sy tari-dalana koa isika avy amin’ny fianakavian’ny mpirahalahy, mba hiatrehantsika ny fanerena sy hanoherana fakam-panahy. Mety hampiseho amintsika andinin-teny mahakasika ny zava-manahirana antsika manokana, ny namana kristianina. Mety hivavaka ho antsika mihitsy aza izy ireo, toy ny ivavahantsika ho azy ireny koa. (2 Kor. 1:11) Ary azo antoka fa manosika antsika hanao asa tsara, sy manatanjaka antsika, ny ohatra tsara asehon’izy ireny.
4 Any am-pivoriana: Rehefa manatrika tsy tapaka ny fivorian’ny fiangonana isika, dia tsapantsika fa fitahiana ny manana fisakaizana kristianina. (Heb. 10:24, 25) Betsaka ny fampianarana ara-panahy ao anatin’ny fandaharana, ary mihazona antsika ho akaiky an’ireo mpiray finoana amintsika ny fahatongavantsika mivory. Any isika dia afaka mandre ireo rahalahintsika sy anabavintsika maneho ny finoany. Tsy avy eny amin’ny lampihazo ihany, fa avy amin’ny mpanatrika koa. (Rom. 1:12) Mihamafy ny fisakaizantsika, arakaraka ny ifampiresahantsika, aloha sy aorian’ny fivoriana. Azontsika resahina amin’izany ireo zavatra niainantsika mampitombo finoana. Misy vokany tsara amin’ny toetrantsika ny fifandraisantsika amin-kalalahana amin’ny olona tia an’i Jehovah sy ny Teniny, ary ny asany sy ny vahoakany.—Fil. 2:1, 2.
5 Ilaintsika ireo namana kristianina. Raha tsy eo izy ireo dia ho sarotra kokoa amintsika ny handeha eo amin’ny lalana ety mankany amin’ny fiainana. Noho ny fitiavana sy ny fampaherezana avy amin’izy ireo anefa, dia afaka manohy isika mandra-pahatongantsika any amin’ny tontolo vaovao sy marin’i Jehovah.—Matio 7:14.