RANONAFERO

Ranoka avoakan’ny aty, ary voatahiry ao anatin’ny afero, izay kitapo kely miendrika poara. Eo ambanimbany, eo amin’ny ilany havanana amin’ny aty, no misy ny afero. Mahazaka ranonafero intelon’ny sotro lehibe eo ho eo ny afero. Mavo na somary maitso ny ranonafero, ary faran’izay mangidy. Ilaina amin’ny fandevonan-kanina izy io. Nanjary nilazana zavatra mangidy na misy poizina ny hoe ranonafero, ary toy izany no ampiasan’ny Baiboly an’io teny io.​—As 8:23.

Mafy sy mangidy tamin’i Joba ny nanjo azy, ka nilaza izy fa toy ny hoe nararaka tamin’ny tany ny aferony. (Jb 16:1, 13) Nampiasa teny an’ohatra i Zofara tatỳ aoriana, rehefa nanendrikendrika an’i Joba ho nanao ratsy, ary nilaza fa ho toy ny “aferon’ny” (Prot.) na “poizin’ny kôbrà” (TV) ny ‘sakafo’ tao an-kibon’i Joba. Nampitandrina azy i Zofara fa hisy fitaovam-piadiana hiboroaka “avy eo amin’ny aferony.” (Jb 20:1, 14, 25) Iray tarika ny teny hebreo nadika hoe “afero” sy ilay nadika hoe “mangidy.”​—De 32:32; Jb 13:26.

Kôle no teny grika nadika hoe ranonafero.​—Jereo ZAVAMANIRY MISY POIZINA.