Ekout Bien Pandan Bann Renion

1-2. (a) Kouma Zeova pran swin so bann serviter azordi? (Psom 23:1, 2, 5) (b) Ki nou pou examine dan sa lartik-la?

AZORDI, Zeova donn nou tou seki nou bizin pou ki nou kapav konpran bann lansegnman ki ena dan Labib. Sirman nou dakor ar David, ki ti dir: “Zeova Li mo Berze. Mo pa pou mank nanye.”—Lir Psom 23:1, 2, 5.

² Enn fason ki Zeova ansegn nou se pandan bann renion. Dan renion, souvan nou examinn bann kitsoz ki nou deza kone. Selman, mem si sa fer lontan ki nou bann Temwin Zeova ek ki nou konn bien Labib, nou bizin kontign examinn sa bann kitsoz-la, mem si nou deza konn zot bien. (2 Pier 1:12) Eski to trouv sa difisil pou ekout bien pandan renion kan pe re-examinn bann kitsoz ki to’nn tande plizir fwa? Si wi, sa lartik-la kapav ed twa. Dan sa lartik-la, nou pou trouve kifer nou bizin ekout bien pandan bann renion. Nou pou trouve osi kouma bann ki fer bann size dan renion kapav ed nou pou ki nou ekout pli bien. Ek nou pou trouve seki nou kapav fer pou nou ekout pli bien dan renion. Me pou koumanse, anou reponn sa kestion-la: Kisann-la ki pe ansegn nou pandan bann renion?

PA BLIYE KI SE ZEOVA KI PE ANSEGN NOU

3. Kouma Zeova ansegn nou, ek kouma so bann serviter servi bien Labib kan zot ansegn lezot?

³ Zeova servi so Parol Labib pou ansegn nou. (2 Tim. 3:16, 17) Zezi ti konn sa. Se akoz sa ki li ti servi bien Parol Bondie pou ansegn bann dimounn. Bann dimounn ki ti ekout Zezi ti inpresione, ek zot ti dir: “Kouma sa zom-la konn bann Lekritir bien koumsa alor ki li pa’nn etidie dan bann lekol relizie?” (Zan 7:15) Bann dimounn ki ti ena limilite ek ki ti anvi aprann konn Zeova, ti bien kontan kan zot ti tann Zezi explik Parol Bondie. Dan premie siek, bann Kretien osi, kouma par exanp lapot Pol ek Apolos, ti servi bien Parol Bondie kan zot ti ansegn lezot. (Zist. 17:2, 3; 18:24, 28) Azordi, nou bann Temwin Zeova, nou kone ki bann lansegnman ki ena dan nou bann lartik, nou bann video, ek nou bann diskour, zot sorti dan Labib. Kan bann dimounn vinn Lasal pou premie fwa, souvan zot inpresione parski nou servi bien Labib dan nou bann renion. Bann ki fer bann size servi Labib pou ansegne. Zot pa zis lir Labib, me zot osi ed lasistans pou konpran ek pou met an pratik seki zot pe aprann.—Lik 24:32.

4. Kan Labib servi mo “ekoute” ek “tande,” souvan ki sa vedir?

⁴ Dan Labib, mo “ekoute” ek “tande” souvan vedir obeir enn kikenn. Kan nou tann bann kitsoz ki sorti dan Labib pandan bann renion, se koumadir Zeova pe ansegn nou pou nou konpran seki Li anvi nou fer ek kifer nou bizin fer sa. Koumsa, li pli fasil pou nou obeir Li. Alor, kan nou ekout bien dan renion ek ki nou met an pratik seki nou tande, nou kapav sir ki sa fer Li plezir.—Prov. 27:11.

KIFER NOU BIZIN EKOUT BIEN PANDAN BANN RENION?

5. Kan nou kontan Zeova, ki sa motiv nou pou fer? (Zan 4:23, 24; 1 Zan 5:3)

⁵ Nou ekout bien pandan bann renion parski nou kontan Zeova. (Mat. 22:37) Plis nou aprann konn Zeova, plis nou kontan Li. Ek parski nou kontan Li, nou anvi ekout bien seki Li ansegn nou dan Labib, nou anvi obeir Li, ek nou anvi ador Li dan fason ki Li Li anvi.—Lir Zan 4:23, 24; 1 Zan 5:3.

6. Dan nou bann renion, kouma nou aprann pou ed lezot?

⁶ Nou ekout bien pandan bann renion parski nou ‘kontan nou prosin.’ (Mat. 22:39) Dan nou bann renion, Zeova montre nou kouma nou kapav ed nou bann frer ek ser, ek osi bann dimounn ki pankor konn Li. Par exanp, brosir Lamour Motiv Nou—Pou Fer Bann Disip inn ed nou pou devlop bann kalite pou ki nou vinn pli efikas dan predikasion. Eski to trouv sa difisil pou koumans enn konversasion amikal ar lezot? Si wi, ekout bien fason ki nou bann frer ek ser fer zot bann demonstrasion pandan renion lasemenn.

7. Kifer li bien inportan ki nou obeir Zeova?

⁷ Nou ekout bien pandan bann renion parski nou anvi ena enn zoli lavi depi aster-la mem ek nou anvi viv pou touletan. Parey kouma Zeova ti dir so bann serviter dan lepase, si nou anvi ena enn zoli lavi ek viv pou touletan, nou bizin obeir Li. (Det. 32:44-47) Kan nou ekout bien pandan bann renion, nou gagn lankourazman ki nou bizin, nou aprann kouma pou andir nou bann difikilte, ek kouma pou atann avek pasians ki lemond nouvo arive. (Rom. 8:25) Azordi, parski nou pe viv dan bann dernie zour, li bien inportan ki nou obeir Zeova ek ki nou res bien okipe dan nou servis pou Li.—Mat. 24:42-44; Rev. 1:3.

KOUMA NOU KAPAV ED LEZOT POU EKOUT BIEN PANDAN BANN RENION?

8. Kifer bann frer ki fer bann size dan renion bizin fer zefor pou vinn bann pli bon ansegnan?

⁸ Bann frer ki fer bann size lor lestrad, sirtou bann frer ki fer bann diskour piblik, bizin kontign fer zefor pou vinn bann pli bon ansegnan. Kan enn frer pran letan pou prepar bien so bann size ek pou fer sir ki li pe servi bien Labib, li kapav ed bann dimounn ki pankor vinn dan laverite pou aprann bann lansegnman inportan. Li kapav osi ed bann ki deza dan laverite pou konpran pli bien bann lansegnman Labib ek pou kontign met zot an pratik. Kan to ena enn size dan renion, pa bliye ki to size kapav fer lezot boukou dibien. Alor, kan to ena enn size, reflesi kouma bann sizesion ki ena dan bann prosin paragraf kapav ed twa pou vinn enn pli bon ansegnan. Mem si sa bann sizesion-la zot plis pou bann frer ki fer bann diskour piblik, nou kapav swiv zot pou ninport ki size ki nou fer.—2 Tim. 4:2; Tit 1:9.

9. Kan to fer enn diskour, ki to bizin fer pou ki lezot konpran twa fasilman?

⁹ Organiz bien to bann lide. Kan to fer enn diskour, lasistans bizin konpran seki to pe dir ek zot bizin kapav swiv fasilman bann lide ki to pe devlope. Si seki to pe dir li tro konplike, zot pou gagn difikilte pou res konsantre. Alor, kouma to kapav organiz to bann lide? (1) Dan koumansman to diskour, sit bann pwin prinsipal ki zot pou examine. (2) Pran letan ki bizin pou koz lor sak pwin. Fer enn poz apre ki to fini koz lor enn pwin, ek fer lasistans kone ki prosin pwin zot pou examine. (3) Dan to konklizion, repet bann pwin prinsipal.

10. Kifer to bizin fer zefor pou kontan bann lide lor ki to pou koze?

¹⁰ Fer zefor pou kontan bann lide lor ki to pou koze. Si to kontan enn size, to pou kontan pou koz lor la. Lerla, bann dimounn ki pou ekout twa pou resanti sa. (Prov. 2:4, 5; Zist. 4:20) Si to pran letan pou reflesi lor bann verse ek bann referans to size, sa pou ed twa pou kontan bann lide lor ki to pou koze. Enn frer ki res Letazini ek ki ena plis ki 70 an, rapel enn diskour ki li ti tande kan li ti ankor zenn. Li dir: “Mo ankor rapel kouma sa orater-la ti ankouraz nou pou pran letan pou reflesi kan nou lir Labib. Dan enn fason bien kler, li ti explik nou kouma nou kapav fer sa, ek mo ti trouve ki sa ti vremem inportan pou li. Sa diskour-la ti sanz mo lavi net! Gras-a sa diskour-la, mo’nn aprann kouma pou gagn bann bienfe ar mo lektir Labib, ek sa finn fer mwa vinn pli pros ar Zeova.”

11. Kan to fer enn diskour, kifer li bon ki to donn bann lankourazman ek bann konsey ki presi? (1 Timote 4:13-16)

¹¹ Reflesi ki kitsoz pou vremem ed zot ek explik zot kouma zot kapav met an pratik seki to pe ansegn zot. Olie ki to zis dir bann kitsoz lao-lao, servi Labib pou donn bann lankourazman ek bann konsey ki presi. Par exanp, kan Timote ti dan lasanble Efez, lapot Pol ti donn li bann konsey ki presi, ek sa ti ed li pou res for lor plan spiritiel. (Lir 1 Timote 4:13-16.) Kan to fer enn diskour, reflesi ki kitsoz lasistans vremem bizin ek explik zot seki zot bizin fer pou ki zot kapav met an pratik seki to pe ansegn zot.

12. Kan to fer enn diskour, kifer li pli bon ki to koz dan enn fason natirel?

¹² Repet to diskour plizir fwa ek fer li for, pou ki to kapav tande si to pe koz dan enn fason natirel. Si to koz dan enn fason natirel, olie ki to lir mo pou mo seki to’nn ekrir, bann ki pe ekout twa pou kapav konpran ek swiv to diskour pli bien. Brosir Amelior To Lektir ek To Lansegnman dir: “Koz dan enn fason ki sinser ek natirel. Sa pou montre seki to vremem resanti lor sa size-la ek pou bann ki ekout twa.” Si to koz avek to leker, lezot pou plis anvi ekout twa ek met an pratik seki zot pe aprann.

13. Kifer bann frer ki fer bann diskour bizin rod konsey ar bann orater ki ena lexperyans? (Get zimaz osi.)

¹³ Rod konsey ar enn orater ki ena lexperyans. Kouma to kapav fer sa? Avan ki to fer to diskour, montre frer-la to bann lide ek esey swiv bann konsey ki li donn twa pou to amelior to diskour. Demann li pou ekout twa bien kan to pe fer diskour-la ek pou konsey twa lor fason ki to’nn fer diskour-la. Sa pou ed twa pou vinn enn pli bon ansegnan. (Prov. 1:5) Parfwa, to kapav panse ki to diskour li kler ek fasil pou konpran, me kitfwa sa li fos. Sa frer-la kapav ed twa pou explik to bann lide dan enn fason ki fasil pou konpran ek fasil pou met an pratik. Nou vremem anvi vinn bann pli bon ansegnan pou ki nou kapav ed lezot pou konpran pli bien bann zoli lansegnman ki ena dan Labib ek pou met zot an pratik!a

KOUMA NOU KAPAV EKOUT PLI BIEN PANDAN BANN RENION?

14. Kifer nou bizin fer zefor pou ena mem latitid ki ekrivin Psom 119? (Psom 119:24, 111, 167)

¹⁴ Si nou rapel ki bann lansegnman Zeova zot bien inportan, sa pou ed nou pou nou ekout pli bien pandan bann renion. Dan sa “lepok kritik, difisil pou siporte” ki nou pe viv la, nou bizin bann lansegnman Zeova pou ki nou kapav fer fas ar bann difikilte ki nou gagne. (2 Tim. 3:1) Alor, mem si nou re-tann enn kitsoz ki nou’nn tande plizir fwa, nou bizin fer zefor pou ena mem latitid ki ekrivin Psom 119 konsernan “bann rapel” Zeova.—Lir Psom 119:24, 111, 167.

15. Kifer nou bizin kontign ogmant nou rekonesans pou bann lansegnman ki nou gagne pandan renion?

¹⁵ Li bien inportan ki nou kontign trouv bann lansegnman ki nou gagne pandan bann renion kouma enn kado ki Zeova donn nou. Nou kapav tir leson ar seki ti ariv bann Izraelit kan zot ti dan dezer ek ki Zeova ti donn zot lamann. (Ex. 16:15, 31) O-koumansman, zot ti bien kontan lamann parski se Zeova ki ti donn zot sa, li ti ena bon gou, ek li ti ed zot pou res vivan. Me avek letan, zot ti plin ar manz lamann toulezour. (Nonb 21:5) Ki leson nou aprann? Fode zame ki nou konsider bann lansegnman ki nou’nn tande plizir fwa kouma bann kitsoz ki pa inportan. Okon­trer, nou bizin rapel ki se Zeova ki donn nou sa. Nou bizin rapel osi ki lesklav fidel ek saz pran letan pou reflesi ek pou prepar bann manze spiritiel ki nou gagne dan renion. Anplis, seki nou aprann pandan bann renion, kapav ed nou pou pran bann bon desizion ek fer nou gagn lavi pou touletan.—Prov. 3:13, 16-18; Zan 17:3.

16. Ki kitsoz inn ed sertin frer ki pe servi Zeova depi lontan pou swiv bien pandan bann renion? (Get osi lankadre “Bann Sizesion pou Ekout Bien.”)

¹⁶ Nou pou ekout pli bien pandan bann renion si nou swiv sa bann konsey-la. Anou gete seki’nn ed sertin frer ki pe servi Zeova depi lontan pou swiv bien pandan bann renion. Ashley, ki pe servi Zeova depi plis ki 30 an, dir: “Li bien inportan ki nou prepar bien nou bann renion. Kan mo pa prepar mwa bien, mo gagn difikilte pou reponn ek mo pans bann lezot kitsoz.” József, ki pe servi Zeova depi 52 an, dir: “Mem si mo deza konn enn lansegnman, mo bien kontan kan rekoz lor la dan renion. Kan mo tann bann diferan diskour ek bann repons nou bann frer ek ser lor sa lansegnman-la, mo touletan aprann bann nouvo kitsoz.” József dir osi: “Kan enn frer ki pa enn bon orater fer enn diskour, mo fer zefor pou konsantre plis lor so lansegnman, ki lor so fason ansegne. Avredir, seki li pe ansegne sorti dan Labib, savedir ki sa lansegnman-la sorti kot Zeova.”

17. Ki to kapav fer pou to ekout pli bien pandan bann renion? (Get zimaz osi.)

¹⁷ Sa bann sizesion-la osi kapav ed twa pou ekout pli bien pandan bann renion: (1) Pa manz boukou avan ki to vinn Lasal, koumsa to pa pou gagn somey. (2)  Vinn Lasal boner ek fini rod to plas avan ki renion koumanse. (3) Met to bann laparey elektronik lor silans, koumsa zot pa pou deranz twa pandan renion. (4) Esey devinn bann pwin lor ki orater-la pou koze. (5) Get orater-la ek res konsantre lor seki li pe dir. Pa les twa dekonsantre par seki pe pase otour twa. (6) Pran bann ti not, ouswa desinn bann lide inportan. (7) Reflesi lor bann verse Labib ki mansione ek esey trouve ki lien ena ant zot. (8) Demann tomem, ‘Kouma mo kapav servi seki mo’nn aprann dan renion pou ed enn kikenn dan lasanble ouswa dan predikasion?’ (9) Avan enn lasanble, pran letan pou get program lasanble la ek lir tem sak zour, bann tit diskour, ek bann verse Labib ki’nn done kouma referans. (10) Asiz trankil pou ekout lamizik ouswa get bann video ki zwe avan ki lasanble koumanse, koumsa kan lasanble pou koumanse to pou pare pou les Zeova ansegn twa.

KONTIGN EKOUT ZEOVA KAN LI PE ANSEGN TWA

18. Kifer nou bizin kontign ekout bien pandan bann renion?

¹⁸ Nou bizin kontign ekout bien pandan bann renion. Si nou fer sa, Zeova pou kapav ed nou pou mars “lor bann semin lazistis.” (Ps. 23:3; 31:3) Nou bizin ki Zeova gid nou pou ki nou kapav kontign fer seki drwat. Alor, anou “fer atansion ar fason ki [nou] ekoute” ek anou kontign met an pratik seki nou tande pandan bann renion. (Lik 8:18) Tou bann ki ekout Zeova, depi aster-la mem zot ere, ek dan lavenir zot pou gagn lavi pou touletan.—Ps. 119:2, 14.