Amelior To “Kapasite pou Ansegne”

1. Ki kapasite nou bizin devlope, ek kifer? (2 Timote 4:2) (Get zimaz osi.)

ZEZI ti dir so bann disip: “Ansegn zot pou vinn mo bann disip . . . , ansegn zot pou obeir tou bann kitsoz ki mo’nn donn zot lord pou fer.” (Mat. 28:19, 20) Bann parol Zezi montre ki tou bann Kretien bizin ansegn lezot. Li vre ki se Zeova ki atir bann dimounn ki ena “enn bon kondision leker” ek ki se bann anz ki gid nou ver sa kalite dimounn-la. (Zist. 13:48; Zan 6:44; Rev. 14:6) Selman, nou osi nou bizin fer nou par. Anou get lexanp lapot Pol ek Barnabas. Labib dir ki kan zot ti pres dan enn sinagog dan Ikoniom, zot ti “koz telman bien ki enn gran lafoul bann Zwif ek bann Grek toule-de ti vinn krwayan.” (Zist. 14:1) Alor, li kler ki Pol ek Barnabas ti devlop zot “kapasite pou ansegne.” (Lir 2 Timote 4:2.) Nou osi, nou bizin fer parey!

2. Kifer sertin panse ki zot pa kapav vinn bann bon ansegnan?

² Sertin panse ki zot pa kapav vinn bann bon ansegnan parski zot pena ase ledikasion ouswa parski zot pa konn explik bien bann kitsoz. Labib koz lor sertin dimounn ki ti ena sa santiman-la. (Ex. 4:10; Zer. 1:6) Ena lezot ki panse ki zot pa konn ansegn bien, parski zot pena okenn letid Labib ouswa parski zot pa gagn bann bon rezilta parey kouma lezot. Biensir, pa tou dimounn ki nou zwenn ki pou anvi konn plis lor bon nouvel. Anplis, pou ki enn dimounn ekout nou, sa pa depann zis lor si nou enn bon ansegnan ouswa non. Parey kouma nou’nn trouve dan paragraf avan, se Zeova ek bann anz ki ed nou pou trouv bann dimounn ki ena enn leker sinser. Kanmem sa, kan nou pres bon nouvel, nou bizin fer sa dan pli bon fason ki nou kapav. Dan sa lartik-la, nou pou trouv trwa kitsoz ki kapav ed nou pou vinn bann pli bon ansegnan.

INTERES TWA AR LEZOT

3. Kifer Zezi ti reisi tous leker bann ki ti pe ekout li?

³ Labib dir ki Zezi “ti kone ki ena dan leker bann dimounn.” (Zan 2:25) Savedir ki li ti kone seki bann dimounn panse ek ki li ti konn zot lintansion. Zezi ti reisi tous leker bann dimounn parski li ti konpran seki zot ti bizin. Li ti kone ki zot ti bizin enn gid ek rekonfor, parski bann sef relizie ti pe met boukou lalwa ek ti pe rann zot lavi difisil. (Mat. 9:36; 23:4) Se akoz sa ki dan so Sermon lor Montagn, Zezi ti koz lor bann kitsoz ki ti pou ed bann dimounn pou ena enn pli bon lavi. Ek bann dimounn ti bien kontan ekout Zezi parski li ti koz lor bann kitsoz ki ti pe trakas zot.

4. Kouma nou kapav montre ki nou interese ar bann dimounn ki nou zwenn? (Get zimaz osi.)

⁴ Nou osi, nou kapav montre ki nou interese ar bann dimounn ki nou zwenn kan nou fer zefor pou konpran seki pe trakas zot. Ena boukou move kitsoz ki pe arive dan sa lemond-la. Alor, sak dimounn ki nou zwenn bizin ena enn problem ki pe trakas li ouswa ki pe fer li soufer. Kan nou rapel sa, li pou pli fasil pou nou ed zot. Par exanp, kitfwa nou’nn tann enn kitsoz ki’nn arive dan nou landrwa ek bann dimounn trakase akoz sa. Sertin paran kitfwa trakase pou sekirite zot zanfan dan lekol. Ouswa, dan landrwa kot nou reste, kitfwa li difisil pou bann dimounn gagn enn travay. Alor, nou kapav sey mazine kouma lavi sa bann dimounn-la bien difisil, sirtou ki zot pa konn lespwar ki Labib done.—2 Tim. 3:1; Iza. 65:13, 14.

5. Kifer Zezi ti bien diferan ar bann sef relizie? (Matie 11:28-30)

⁵ Zezi ti kontan bann dimounn, ek bann-la ti kone ki li ti interese ar zot parski li ti tret zot bien. Zezi ti bien diferan ar bann sef relizie. Bann sef relizie ti panse ki zot ti pli siperyer ki lezot, ek souvan zot ti maltret bann ti dimounn. (Mat. 23:13; Zan 7:49) Parkont, Zezi ti tret lezot ar bonte ek respe. Li ti “ena enn karakter dou ek . . . limilite,” ek sa ti ed li pou li vinn enn bon ansegnan. (Lir Matie 11:28-30.) Nou osi, nou bizin tret bann dimounn ki ekout nou avek bonte ek respe.

6. Kouma nou kapav montre bonte ek respe anver bann ki pa ekout nou mesaz?

⁶ Kan bann dimounn pa ekout nou mesaz ouswa kan zot ankoler ar nou, kouma nou bizin reazir? Zezi inn ansegn nou ki fode pa nou azir dan enn move fason ar zot. Okontrer, li dir ki nou bizin “fer seki bien anver bann ki ena laenn pou [nou],” “beni bann ki donn [nou] malediksion,” ek mem “priye pou bann ki insilte [nou].” (Lik 6:27, 28) Avredir, si nou rapel ki bizin ena enn rezon pou kifer bann dimounn pa anvi ekout nou, li pou pli fasil pou nou montre nou bon anver zot. Li vre ki ena sertin dimounn ki vremem anvi fer nou aret prese. Selman, lezot kitfwa trakase akoz enn problem ki ena dan zot fami ouswa akoz bann lezot kitsoz. Se kitfwa akoz sa ki zot pa anvi ekout nou. Ouswa, kitfwa nou’nn zis pas dan enn move ler. Antouka, mem si bann dimounn azir dan enn move fason ar nou, “fode ki [nou] parol fer touzour plezir pou tande, asezone ar disel, pou ki [nou] kone kouma [nou] bizin reponn sak dimounn.” (Kol. 4:6) Kan nou interese ar lezot ek ki nou fer zefor pou konpran seki zot bizin, nou pa pou ofanse vit ek sa kapav ed nou pou vinn bann pli bon ansegnan.

SERVI LABIB POU ANSEGN LEZOT

7. Ki kitsoz Zezi ti servi kan li ti pe ansegn bann dimounn? (Zan 7:14-16)

⁷ Zezi ti servi Parol Bondie kan li ti ansegn bann dimounn; li pa ti ansegn so prop lide. Anplis, li ti ansegn zot dan enn fason bien sinp. Gras-a sa, zot ti konpran pli bien ek zot ti rapel bann leson ki li ti ansegn zot. Labib dir ki Zezi ti “ansegn zot kouma enn kikenn ki ena lotorite, ek pa kouma bann exper Lalwa.” Bann dimounn “ti inpresione” par so lansegnman. (Mark 1:22) Sa lepok-la, bann exper Lalwa ti pe ansegn bann dimounn seki bann gran-gran sef relizie ti dir. Parkont, Zezi ti ansegn bann dimounn seki Parol Bondie ti dir. Zezi ti Garson Bondie ek li ti pe res dan lesiel avan ki li vinn lor later, alor li ti kapav servi so gran konesans pou inpresionn lezot ouswa pou fer zot santi ki zot pa konn nanye. Selman, li pa ti fer sa. Olie sa, li ti servi Parol Bondie pou ansegn bann dimounn seki Zeova ti anvi zot fer. (Lir Zan 7:14-16.) Zezi inn les enn zoli lexanp pou nou, pa vre!

8. Kouma Pier ti swiv lexanp Zezi?

⁸ Bann disip Zezi osi ti servi Parol Bondie kan zot ti ansegn bann dimounn. Par exanp, Pier ti servi Parol Bondie kan li ti ansegn enn lafoul dimounn zour Lapantkot lane 33 Nou Lepok. Ek mem si li pa ti ena boukou ledikasion, li ti reisi tous leker bann dimounn kan li ti explik zot bann profesi ki Zezi ti realize. (Zist. 2:14-37) Gras-a sa, “bann ki ti aksepte so parol avek lazwa, ti pran batem, ek sa zour-la anviron 3,000 dimounn ti vinn disip zot osi.”—Zist. 2:41.

9. Kifer nou bizin servi Labib kan nou ansegn bann dimounn?

⁹ Se zis Labib ki ena pouvwar pou tous leker bann dimounn ek ed zot pou fer bann sanzman pou zot fer Zeova plezir. (Ebre 4:12) Alor, nou bizin servi Labib kan nou ansegn bann dimounn. Nou bizin “pres laparol,” pa nou prop lide. (2 Tim. 4:2) Proverb 2:6 dir: “Zeova Limem donn sazes; konesans ek bon zizman sorti dan so labous.” Alor, kan nou servi Labib pou ansegn bann dimounn, se koumadir nou pe les Zeova koz ar zot. (Mal. 2:7) Nou anvi ki bann dimounn kone ki bann konsey ki ena dan Labib, zot boukou pli bon ki bann konsey ki bann dimounn done. Seki Labib ansegne, li sorti kot nou Kreater Zeova, ek li kapav ed nou pou fer Li plezir ek pou ena enn zoli lavi.—2 Tim. 3:16, 17.

10. Kan to pe etidie Labib ar enn kikenn, kouma to kapav atir so latansion lor seki Labib ansegne?

¹⁰ Kan to pe prepar twa pou etidie Labib ar enn kikenn, rod bann fason pou atir so latansion lor seki Labib ansegne. Mem si to pou servi bann zimaz ek bann video pou ansegn li bann leson, li bizin konpran ki Labib se zouti prinsipal ki nou servi pou ansegne. Alor, kan to pe fer so letid, servi bann verse ki pou ed li pou konpran pli bien bann pwin inportan, ek ed li pou reflesi lor bann leson ki li kapav aprann ar sa bann verse-la. Kan to servi bann zimaz ek bann video pou ansegn li, fer sir ki li konpran bann prinsip Labib ki ena ladan. Aster-la, sa pa vedir ki to bizin koz boukou ouswa lir tou bann verse ki ena dan enn leson. Kan to lir enn verse, donn to etidian ase letan pou li reflesi lor la ek pou li konpran li. Ek parfwa, kitfwa zot pou bizin relir mem verse plizir fwa. Kan to ansegn to etidian dan sa fason-la, to pa pou ansegn seki enn video, enn zimaz, ouswa enn liv dir, me to pou ansegn li seki Labib dir.—1 Kor. 2:13.

11-12. (a) Kouma nou kapav ena pasians ar nou etidian Labib? (Zistwar Bann Zapot 17:1-4) (Get zimaz osi.) (b) Ki kitsoz sertin pa kone lor Labib, ek kouma nou kapav ed zot?

¹¹ Si to etidian trouv sa difisil pou aksepte enn lansegnman, rapel ki to bizin “pres laparol . . . avek boukou pasians.” Tou dimounn pa fer bann progre mem vites. Si pou nou, sertin lansegnman fasil pou konpran, pou sertin etidian Labib kitfwa zot pou bizin plis letan pou konpran sa. Par exanp, bann Zwif dan Tesalonik pa ti konpran deswit seki Pol ti ansegn zot. Se apre ki li ti al get zot plizir fwa ek ki li ti explik zot seki bann Lekritir ti dir, ki sertin parmi zot ti konpran seki li ti pe ansegn zot.—Lir Zistwar Bann Zapot 17:1-4.

¹² Enn lot fason ki nou montre ki nou ena pasians ar nou etidian Labib, se kan nou poz li bann kestion ek nou donn li letan pou reponn. Fode pa ki nou koz tro boukou. Ekout li bien kan li koze, ek esey konpran kifer li pans koumsa. Apre sa, lir ek koz lor bann verse presi ki kapav ed li pou konpran fason panse Zeova. Anplis, sertin dimounn kitfwa zame pa’nn trouv enn Labib avan ek zot pa kone ki ena ladan. Alor, kitfwa li pou bon ki to montre zot kouma enn Labib inprime ete. To kapav osi servi seksion “Mo Koumans Lir Labib,” ki lor kouvertir andan dan liv Viv Ere pou Touletan! ouswa brosir “Anou Dekouver Seki Ena dan Parol Bondie” pou montre to etidian bann size inportan lor ki Labib koze. To kapav servi enn-de verse ki ena dan kestion 15 sa brosir-la, pou montre li kouma Labib kapav ed li pou li ere. Si to ed to etidian pou trouve ki kantite valer Labib ena, li pou met an pratik seki li pe aprann ek li pou anvi konn plis.

ED LEZOT POU KONTAN ZEOVA

13. Kan nou ansegn enn kikenn, lor kisann-la nou bizin atir latansion? Donn enn lexanp.

¹³ Nou lobzektif se pou ed bann dimounn ki pe ekout nou pou aprann konn Zeova ek pou vinn pros ar Li. (Zak 4:8) Anou pran enn lexanp. Pandan enn pies teat, ena enn dimounn ki okip lekleraz, ek so travay se pou fer sir ki lalimier bann prozekter zot lor bann akter ki lor lasenn. Sa dimounn-la zame pa pou met bann prozekter-la lor li! Dan mem fason, kan nou ansegn enn kikenn, fode zame ki nou atir latansion lor nou-mem. Nou bizin touletan atir latansion lor Zeova.

14. Kouma to kapav ed to etidian pou aprann kontan Zeova ek pou fer Li plezir?

¹⁴ Kan to etidie Labib ar enn kikenn, ed li pou aprann kontan Zeova. Lerla, li pou anvi fer Li plezir. (Prov. 27:11) To bizin pa zis ansegn li pou fer seki bon ek pou aret fer seki pa bon, pou ki li reisi vinn enn Temwin Zeova. Li bizin fer bann sanzman parski li anvi fer Zeova plezir, ek to kapav ed li pou fer sa. Par exanp, si to etidian pe gagn difikilte pou aret fer enn kitsoz ki Zeova pa kontan, poz li bann kestion kouma: “Kifer Zeova deteste sa kitsoz-la? Mem si to kontan sa kitsoz-la, kifer Zeova anvi ki to aret fer li? Kan Zeova demann twa pou aret fer sa kitsoz-la, kouma sa montre ki Li kontan twa?” Kan to ed to etidian pou reflesi lor bann zoli kalite ki Zeova ena, to pe ed li pou konpran ki kantite Zeova kontan li. Lerla, li pou aprann kontan Zeova ek li pou anvi fer Li plezir.

KONTIGN AMELIOR TO KAPASITE POU ANSEGNE

15. Ki nou bizin fer pou nou kontign amelior nou kapasite pou ansegne?

¹⁵ Nou bizin priye Zeova ek demann Li pou ed nou pou trouve seki nou bizin ameliore pou ki nou kapav vinn bann pli bon ansegnan. (1 Zan 5:14) Apre sa, pou nou azir an-akor ar nou lapriyer, nou bizin swiv bien bann renion, parski se pandan bann renion ki Zeova form nou pou nou vinn bann pli bon ansegnan. Nou kapav osi invit enn kikenn ki enn bon ansegnan Labib, pou asiste enn letid ki nou pe fer, ek nou kapav demann li bann konsey pou ki nou amelior fason ki nou ansegne. Pa bliye ki, mem si twa to konn bien bann size ki zot pou etidie ansam, to etidian li li pa kone. Alor, met twa dan so plas ek esey konpran li. Pandan letid, ed li pou trouve kouma bann promes Zeova ek bann kitsoz ki li pe aprann, kapav ed li. Si to fer sa, to pou ed to etidian pou vinn kamarad Zeova ek pou ena enn zoli lavi.—Ps. 1:1-3.

16. Kifer nou bizin fer zefor pou vinn bann pli bon ansegnan?

¹⁶ Enn parmi bann pli gran lazwa ki nou kapav ena, se ansegn enn kikenn pou kontan Zeova. Dan lemond nouvo, nou pou bizin ansegn pli boukou dimounn ankor. Alor, anou kontign interes nou ar lezot, kontign servi Labib pou ansegn zot, ek kontign ed zot pou kontan Zeova. Kan nou fer sa, nou pou vinn bann pli bon ansegnan.