Mo’nn Servi Zeova Pandan Preske 70 An dan Kiba

Mo rapel kouma lavi dan nou ti vilaz ti extra trankil. Nou ti res pre ar nou bann matant, nou bann tonton, ek nou bann gran-paran. Nou ti ena ase manze ek ase kas pou viv enn zoli ti-lavi.

Kan mo ti ena apepre sink an, mo bann paran ti koumans etidie Labib avek Walton Jones. Li ti bien devwe dan predikasion. Li ti pe mars apepre di-z-erd’tan zis pou ariv dan nou vilaz. Sak fwa li ti vini, plizir manb nou fami ti pe zwenn ansam kot mo bann gran-paran, ek pandan plizir lertan nou ti pe etidie Labib ansam avek li. Mo bann paran, ansam avek mo tonton Pedro ek mo matant Ela, ti kontan seki zot ti pe aprann. Bien-vit, zot ti pran batem ek zot ti vinn bann Temwin Zeova. Ela pre pou gagn 100 an ek li touzour enn pionie dan Kiba.

Sa lepok-la, bann Temwin Zeova ti lib pou ador Zeova dan Kiba. Bann dimounn dan Kiba ti konn bien bann Temwin Zeova parski nou ti abitie prese lakaz-lakaz. Nou sak ti touletan ranpli ar bann piblikasion ek nou ti mars extra boukou. Mo ena bann zoli souvenir lor kouma nou ti pe kapav servi Zeova pandan mo lanfans. Sa ti bann “lepok favorab”! Me bann “lepok difisil” ti pe vini.—2 Tim. 4:2.

BANN LEPOK DIFISIL KOUMANSE

Kan mo ti ena apepre sink an, mo papa ek mo tonton ti al asiste enn lasanble dan enn lot landrwa dan Kiba. Selman, pandan sa vwayaz-la, zot ti bwar enn delo ki ti kontamine, ek toule-de ti tom bien malad. Mo rapel ki apre ki zot ti retourne, mo tonton ti koumans perdi tou so seve. Apre inpe letan, mo papa ti mor. Li ti ena zis 32 an.

Apre lamor mo papa, mo mama ti pran desizion pou nou demenaze ek al res kot so gran frer ki ti res dan vilaz Lombillo. Savedir ki nou ti bizin kit tou nou bann fami, mem nou bann gran-paran ki nou ti bien kontan. Me selman, mo mama, mo bann ser, ek mwa nou ti kontign servi Zeova.

Le 26 Out 1957, mo ti pran batem dan enn rezervwar pre ar Lombillo. Mo ti ena di-z-an. Mo pa ti kone ki dan mwins ki de-z-an, lavi bann Temwin Zeova dan Kiba ti pou sanze net. An 1959, enn gouvernman kominist ti pran pouvwar ek zot ti met gouvernman ki ti anplas deor.

Pou sa nouvo gouvernman-la, servis militer ti extra inportan. Ek akoz bann Temwin Zeova ti gard zot netralite, ki li dan bann zafer politik ouswa militer, sa ti rann nou lavi extra difisil. Anplis, tigit-tigit, nou ti nepli ena otan liberte pou ador Zeova kouma avan. Apre inpe letan, gouvernman ti interdi nou bann aktivite, ek bann santenn frer ki fidel ti al dan prizon. Sertin frer souvan ti pe gagn bate dan prizon ek zot pa ti pe gagn ase manze. Parfwa, ti ena disan dan bann manze ki zot ti gagne, ek dapre Labib, nou pa gagn drwa manz disan.

Mem si ti ena linterdiksion, nou ti kontign zwenn ansam avek nou bann frer ek ser pou ador Zeova. (Ebre 10:25) Nou ti mem fer bann lasanble dan bann laferm ouswa dan bann landrwa kot nou pa ti panse nou ti pou fer enn lasanble. Mo rapel enn fwa, enn frer ti donn nou permision pou servi enn gran lekiri ki lor so laferm pou nou fer enn lasanble. Li ti gard so bann mouton dan sa lekiri-la. Malerezman, nou pa ti reisi netway lekiri-la ek met bann mouton-la deor. Me kanmem sa, nou ti fer lasanble-la. Alor, pandan sa lasanble-la, ti ena bann vre mouton ek bann mouton Zeova ansam!—Mish. 2:12.

Nou ti bien rekonesan anver bann frer ki ti travay dir pou ki nou kapav gagn manze spiritiel sa lepok-la. Par exanp, bann frer ti pe anrezistre bann diskour pou lasanble. Lerla, ti avoy sa lanrezistreman-la tou bann Temwin Zeova partou dan Kiba. Parfwa, ti ena zis de frer ki ti prepar ek fer tou bann diskour enn lasanble, ek zot ti bizin osi anrezistre zotmem. Ek parski zot ti pe anrezistre sa bann diskour-la dan bann plas kasiet, parfwa nou ti pe tann bann kok pe sante ouswa bann lezot son ki bizar dan bann lanrezistreman. Si pa ti ena kouran kot nou ti pou fer lasanble, enn frer ti bizin pedal enn bisiklet anplas pou ki nou kapav gagn kouran gras-a enn dinamo. Koumsa, nou ti pou gagn kouran pou ekout lanrezistreman-la ek tann bann diskour-la. Nou pa ti lib pou prese ek pou asiste bann renion, ek nou pa ti ena tou bann piblikasion ki nou bann frer ek ser dan bann lezot pei ti ena. Selman, zame nou ti mank manze spiritiel. Ek nou ti ena lazwa pou servi Zeova ansam avek nou bann frer ek ser.—Ne. 8:10.

MO MADAM EK MWA VINN PIONIE EK PARAN

Kan mo ti ena 18 an, mo ti koumans servis pionie permanan dan lavil Florida. Apepre enn an apre, mo ti nome pionie spesial dan lavil Camagüey, pli gran lavil dan sa parti Kiba la. Se laba mem ki mo ti zwenn Emilia, enn zoli ser ki sorti Santiago de Cuba. Nou ti koumans frekante, ek dan mwins ki enn an, nou ti marye.

Mo ti koumans travay aplintan dan enn moulin disik ki ti pou gouvernman. Emilia ek mwa, nou ti nepli kapav kontign nou servis pionie, me kanmem sa, nou ti anvi fer tou seki nou kapav pou servi Zeova. Dan travay, mo ti organiz mwa pou travay depi trwa-z-er dimatin ziska onz-er. Mo pa ti kontan lev boner koumsa. Me selman, sa ti ed mwa pou res aktif dan predikasion ek pou asiste tou bann renion ansam avek Emilia.

An 1969, nou ti gagn nou premie garson, Gustavo. Pandan sa moman-la, bann frer ti demann mwa pou koumans servi kouma responsab sirkonskripsion. Sa lepok-la, servi kouma responsab sirkonskripsion ek anmemtan pran swin enn fami, ti enn kitsoz normal dan Kiba. Pandan sa bann lane-la, mem si nou ti ena extra boukou kitsoz pou fer, nou ti bien zwaye. Pou Emilia ek mwa, servi nou bann frer ek ser dan sa fason-la, ti enn gran privilez. Pandan ki nou ti pe servi dan sirkonskripsion, nou garson Obed ti ne. Apre sa, nou garson Abner ti ne, ek apre de-trwa lane, nou tifi Mahely ti ne.

Kan mo reflesi lor sa bann lane ki nou’nn pase dan servis sirkonskripsion la, sa rann mwa ere pou trouve kouma Zeova inn pran swin so pep dan Kiba. Li’nn osi ed nou pou ansegn nou bann zanfan pou kontan Li. Les mo rakont zot kouma lavi ti ete pou Emilia ek mwa kan nou ti dan servis sirkonskripsion.

SERVIS SIRKONSKRIPSION PANDAN LINTERDIKSION

Dan bann lane 60 ek 70, pli ale sa ti vinn pli difisil pou asiste renion ek pou prese. Gouvernman ti fer ferm bann Lasal Renion. Zot ti deport nou bann misioner. Zot ti aret boukou zenn frer ek ti avoy zot dan prizon, ek biro nasional ki ti dan La Havane ti ferme.

Akoz linterdiksion, nou ti kapav vizit bann lasanble zis dan wikenn. Alor, nou ti vizit sak lasanble pandan de wikenn aswiv. Kan nou ti pe al vizit bann lasanble, nou pa ti amenn boukou kitsoz avek nou, ek souvan, pou pa atir latansion lapolis ouswa bann lezot dimounn, nou ti al lor bisiklet. Biensir, pa ti fer okenn lanons konsernan nou bann vizit. Nou ti bizin fer koumadir nou ti pe vizit nou bann fami, ek sa pa ti konplike pou fer. Avredir, telman sa ti koumadir nou ti pe vizit nou bann fami, ki parfwa nou ti preske bliye ki nou ti pe vizit bann lasanble. (Mark 10:29, 30) Kanmem sa, nou ti bizin fer bien atansion, parski lapolis souvan ti pe swiv nou ek zot ti pe poz nou bann kestion. Si lapolis ti dekouver seki nou ti pe fer, mem bann frer ek ser kot ki nou ti pe reste ti kapav al dan prizon.—Rom. 16:4.

Pandan sa lepok-la, mem si bann frer ek ser pa ti ena boukou kas, zot ti bien zenere anver nou. Dan sertin landrwa, ti ena moustik plis ki dimounn. Me nou bann frer ek ser pa ti ezite pou donn nou zot sel moustiker pou ki nou kapav dormi bien aswar. Lezot ti akeyir nou mem si zot pa ti ena boukou manze. Avredir, kan nou ti al res kot bann frer ek ser, parfwa nou ti amenn nou prop manze pou partaz avek zot.

Kan nou ti vizit bann lasanble, nou pa ti kapav amenn tou nou bann zanfan avek nou. Nou ti amenn enn sel zanfan. Lerla, mo mama ek mo ser ti vinn lakaz pou okip bann lezot zanfan. Ofet, kan nou ti pe vwayaz avek enn ti-baba, sa ti protez nou. Ena fwa, lapolis ti fouy nou bann zafer, me zot pa ti trouv nanye parski nou ti kasiet nou bann piblikasion dan sak kot gard bann kous sal, enn plas kot nou ti kone zot pa ti pou fouye.

Mo bien rekonesan anver Emilia pou tou seki li’nn fer pou okip nou bann zanfan ek pou soutenir mwa pandan tou sa bann lane ki nou dan servis aplintan la. Mwa, mo’nn kapav travay dan moulin ek anmemtan servi kouma responsab sirkonskripsion. Kouma? Parfwa, mo ti fer overtime enn-de fwa par semenn, pou ki mo pa bizin travay dan wikenn. Me plitar, mo travay ti sanze. Mo ti vinn responsab enn lekip ek mo ti sipoze travay enn semenn net. Mo pa ti kapav refize. Me mo ti konpran ki, tanki mo ti donn mo lekip ase travay pou fer pandan wikenn, zot ti pou kapav kouver mwa pandan ki mo ti pe vizit bann lasanble. Ek dapre seki mo kone, mo bann patron zame pa’nn remarke ki mo pa ti pe vinn travay dan wikenn!

RES ZWAYE PANDAN BANN SANZMAN

An 1994, bann frer dan Kiba ti demann toule 80 responsab sirkonskripsion pou asiste enn renion spesial dan La Havane. Nou ti extra kontan pou zwenn nou bann kamarad apre tou sa bann lane-la! Dan renion-la, nou ti pe koz lor bann sanzman ki ena dan lorganizasion. Ek apre, bann frer ti anons nou enn kitsoz ki ti fer nou gagn sok. Zot ti dir nou ki zot ti pou donn gouvernman nou nom. Kifer zot ti pou fer sa?

Zot ti explike ki zot ti ena bann renion avek bann fonksioner gouvernman parski zot ti anvi amelior relasion ki ena ant gouvernman ek bann Temwin Zeova. Bann lotorite ti demann enn lalis nom tou bann responsab sirkonskripsion ek nou tou nou ti dakor pou donn nou nom. Depi sa zour-la, tou bann renion ki nou ti gagne avek bann ofisie gouvernman ti donn bann bon rezilta.

Avek letan, nou ti nepli bizin kasiet pou prese ek asiste bann renion, mem si legalman pa ti ankor rekonet nou kouma enn relizion. Plitar, nou’nn aprann ki bann lotorite ti deza konn nom sertin bann responsab sirkonskripsion, me zot ti anvi ki nou konfirm avek zot bann linformasion ki zot ti deza ena lor nou.

An Septam 1994, gouvernman ti donn nou permision pou reouver nou biro nasional ek nou ti kapav servi mem batiman ki nou ti pe servi 20 an avan.

Lerla, an 1996, Emilia ek mwa nou ti gagn enn call telefonn. Enn frer dan Betel ti invit nou pou vinn servi dan Betel. Mo ti gagn sok! Mo ti rapel bann frer ki mo ti ena de zanfan ki ti ankor anba mo responsabilite. Bann frer ti reflesi lor nou sitiasion, ek plitar zot ti dir nou ki zot ti touzour anvi ki nou vinn servi Betel. Nou ti aksepte ek nou ti koumans organiz nou pou demenaze an fami pou al La Havane.

Avredir, o-koumansman, mo pa ti tro kontan pou servi dan Betel. Mo ti pas telman boukou lane dan servis sirkonskripsion, ki mo ti vremem kontan sa servis-la. Anplis, mo pa ti kontan fer travay biro. Me mo bann kamarad dan Betel, ek sirtou mo madam Emilia, ti ed mwa pou sanz mo fason panse. Avek letan, mo’nn regagn mo lazwa, ek aster-la, mo kontan pou servi dan Betel.

Emilia ek mwa, nou nepli zenn. Me selman, nou ena boukou lazwa kan nou pans tou bann frer ek ser ki nou’nn gagn privilez pou kone ek ar ki nou’nn travay pandan tou sa bann lane-la. Nou ena lazwa sirtou kan nou trouv nou bann zanfan, ek mem nou bann ti-zanfan, ki pe servi Zeova. Nou ena mem santiman ki lapot Zan, ki ti dir dan so vie zour: “Nanye pa kapav fer mwa plis kontan ki sa: ki mo tann dir ki mo bann zanfan pe kontign mars dan laverite.”—3 Zan 4.

Sa fer preske 30 an ki Emilia ek mwa nou pe servi dan Betel. Ek mem si nou pe vinn vie ek ki nou ena bann problem lasante, nou touzour pe fer tou seki nou kapav pou asim bann responsabilite ki bann frer inn donn nou. Pandan tou sa bann lane ki nou’nn servi Zeova la, nou’nn konn bann difikilte, me selman nou zwaye parski nou’nn kapav servi sa “Bondie ere” la pandan preske 70 an isi, lor lil Kiba!—1 Tim. 1:11; Ps. 97:1.