Nou Group Predikasion Kapav Ed Nou dan Plizir Fason

1-2. Explike seki sertin resanti pou zot group predikasion.

ESKI to ankor rapel sa zour ki to ti vinn proklamater la? Sirman to ti extra kontan, parski depi sa zour-la, to’nn form parti dan fami Zeova, enn gran group dimounn ki pe loue nom Zeova. (Ps. 148:1, 2, 12, 13) Selman, depi sa zour-la, kitfwa to’nn osi form parti enn pli tipti group, setadir enn group predikasion. Enn group predikasion se enn ti group kot ena sertin frer ek ser ki dan to lasanble. Avredir, kan nou form parti dan enn group predikasion, sa ed nou pou obeir lord ki Zezi ti donn so bann disip pou pres bon nouvel “partou kot bann dimounn reste lor later.”—Mat. 24:14.

² Ki to resanti pou to group predikasion? Enn ser ki apel Wendya dir: “Mo group predikasion inn ed mwa dan plizir fason. Par exanp, mo’nn vinn enn pli bon proklamater ek enn pli bon ansegnan, mo’nn gagn lankourazman pou fer bann kitsoz ki kapav ed mwa pou vinn pli pros ar Zeova, ek mo’nn gagn bann bon kamarad.” Enn frer ki apel Rich, dir: “Servi kouma responsab enn group predikasion se enn responsabilite bien inportan. Souvan, bann proklamater kapav ed enn kikenn pou progrese ziska batem. Me enn responsab group, li gagn lokazion pou ed sa dimounn-la pou kontign progrese pandan plizir lane, mem apre so batem.” Enn ser ki apel Dinah, dir: “Form parti dan enn group predikasion, li extra top! Pou mwa, mo group predikasion se mo fami.”

3. Ki nou pou examine dan sa lartik-la?

³ Dan sa lartik-la, nou pou gete ki responsabilite enn responsab group ek so adzwin ena, ek kouma zot kapav ed bann ki dan zot group. Apre sa, nou pou gete kouma sakenn parmi nou kapav soutenir ek ed bann frer ek ser ki dan nou group predikasion. Ek an dernie, nou pou gete kouma nou kapav gagn bann bienfe gras-a sa dispozision ki ranpli ar lamour la.

RESPONSAB GROUP EK SO ADZWIN

4. (a) Ki responsabilite enn responsab group ena? (b) Kouma enn responsab group kapav pran swin bann manb so group? (Get lankadre “Bann Sizesion ki Kapav Ed enn Responsab Group.”)

⁴ Enn responsab group se enn ansienb ki ena responsabilite pou ed bann frer ek ser ki dan so group predikasion pou vinn pli pros avek Zeova. Li kapav osi ed zot pou vinn bann pli bon proklamater ek bann pli bon ansegnan. Kouma li fer sa? Premierman, li interes li personelman avek sak frer ek ser ki dan so group. (Prov. 27:23) Enn responsab group fer zefor pou konn bien tou bann proklamater ki dan so group, ek li res an kontak avek zot pou li gagn zot nouvel. Kan li fer sa, sa ed li pou ankouraz zot lor plan spiritiel, pou soutenir zot lor plan emosionel, ek pou donn zot enn led pratik. (Prov. 12:25; Iza. 32:2; Zak 2:15-17) Deziemman, li ankouraz tou bann frer ek ser ki dan so group pou res bien okipe dan travay predikasion. Li fer so maximum pou pres ansam avek so group sak semenn, sirtou dan wikenn. Li fer zefor osi pou pres regilierman avek sak proklamater ki dan so group pou ki li ankouraz zot ek form zot. Selman, li kapav arive ki responsab group la pa reisi zwenn so group pou predikasion. Dan sa ka-la, li pou organize pou ki so adzwin ouswa enn lot frer ki kalifie kapav okip so group. Trwaziemman, li form bann frer pou ki zot asim bann responsabilite dan lasanble. (1 Tim. 3:1) Li felisit sa bann frer-la pou zot bann zoli kalite, li donn zot bann konsey ki sorti dan Labib, ek li form zot pou ki zot vinn bann serviter lasanble ouswa bann ansien. Tousala montre ki travay enn responsab group li bien inportan. Alor, kan enn komite ansien bizin swazir enn frer pou vinn enn responsab group, zot rod enn ansien ki pou fer sa travay-la bien.

5. Ki difikilte sertin responsab group gagne?

⁵ Enn responsab group kitfwa kapav gagn difikilte pou pran swin bann manb so group. Anou pran lexanp Jörg, enn frer ki enn responsab group dan Lalmagn. Parey kouma boukou ansien, Jörg ena bann lezot responsabilite dan lasanble. Li dir: “Li pa touletan fasil kan to responsab enn group ek ki anmemtan to ena bann lezot responsabilite dan lasanble. Souvan, mo gagn difikilte pou pran kontak ar tou bann ki dan mo group predikasion.” Abel, enn ansien ki ena 70 an ek ki res Ouganda, dir: “Dan nou lasanble, nou ena bien tigit ansien ek serviter lasanble. Akoz sa, nou ena bann gran group predikasion. Alor, li extra difisil pou mo travay ansam avek sak proklamater ki dan mo group ek pou ankouraz zot.” Obed, enn ansien ki res Surinam, dir: “Mo kontan form lezot. Selman, sa demann boukou letan ek lenerzi, ek souvan mo pa trouv lefe ki sa formasion-la ena deswit. Akoz sa, souvan mo pa reisi form lezot.” Ki kitsoz kapav ed bann ansien ki pe gagn sa bann difikilte-la?

6. Kan bann group predikasion zot tipti, kouma sa ed bann responsab group pou pran swin zot group?

⁶ Kan sa li posib, li bon ki bann group predikasion zot pa tro gran. Koumsa, bann responsab group pou kapav konn pli bien bann proklamater ki dan zot group ek ed zot pou res pros ar Zeova. Selman, dan sertin lasanble, pena boukou ansien. Alor, olie ki zot fer bann gran group predikasion kot bann responsab group pa kapav pran swin zot group kouma bizin, sertin komite ansien kapav deside ki enn serviter lasanble okip enn group. Kan pena tro boukou proklamater dan enn group, enn responsab group pou kapav okip pli bien travay ki pli inportan, setadir ed bann frer ek ser so group pou res fidel ar Zeova ek pou andir bann difikilte ki zot gagne.

7. Dan bann lasanble kot pena boukou ansien, ki kitsoz bann responsab group kapav fer pou pran swin tou bann manb zot group? (1 Pier 5:2) (Get zimaz osi.)

⁷ Si to dan enn lasanble kot pena boukou ansien, form to adzwin pou ki li kapav ed twa pou pran swin bann frer ek ser ki dan to group. (Lir 1 Pier 5:2.) Donn to adzwin sertin travay ki li kapav fer pou zot group. Par exanp, parfwa to kapav demann li pou fer renion predikasion ek pou organiz predikasion. Li inportan osi ki to koz avek li lor kouma zot toule-de zot kapav ed bann manb zot group pou res pros ar Zeova ek pou amelior zot bann kapasite pou prese. Amenn to adzwin avek twa kan to pe al vizit ek ankouraz bann frer ek ser ki dan zot group. Avan ki zot fer vizit-la, koz avek to adzwin lor kouma zot toule-de zot kapav donn bann lankourazman. Ek apre vizit-la, dir li seki li’nn bien fer, ek osi seki li kapav ameliore. Avek letan, gras-a sa bann formasion-la, to adzwin pou kapav vinn enn responsab group li osi. (2 Tim. 2:2) To kapav osi demann bann ki ena lexperyans dan to group pou form lezot proklamater. Par exanp, bann pionie ek bann lezot frer ek ser ki lontan dan laverite kapav travay ansam avek bann ki nouvo ek bann ki ena mwins lexperyans. Zot kapav montre lezot kouma pou koumans bann konversasion, pou fer bann vizit, ek pou fer bann letid Labib. Aster-la, anou get trwa kitsoz ki nou tou nou kapav fer pou soutenir nou group predikasion.

KOUMA TO KAPAV SOUTENIR TO GROUP PREDIKASION?

8. Kouma to kapav soutenir to group predikasion? (Romin 1:12)

⁸ Pres ansam avek to group. Kan to pres ansam avek to group, to ankouraz to bann frer ek ser ek zot osi zot ankouraz twa. (Lir Romin 1:12.) Kan to pres ansam ar to group, to pou plis an sekirite kan to pres dan sertin landrwa ek to pou santi twa mwins strese kan to bizin koz avek bann dimounn. Si to travay pe anpes twa pou soutenir to group predikasion, eski to kapav demann to patron pou sanz to program travay? Kitfwa to pou etone ar repons ki li pou donn twa. (Ne. 2:4-6) Si to enn kikenn ki aze ouswa ki malad, ek ki to pa pe reisi prese ansam ar to group predikasion, eski to kapav koz sa avek to responsab group? Kitfwa li kapav organize pou ki to zwenn ar to group predikasion lor Zoom, ouswa pou ekrir bann let ek pres par telefonn avek bann lezot frer ek ser ki dan to group. Eski to enn kikenn ki zenn ek ki an bonn sante, me kanmem sa, to trouv sa difisil pou prese regilierman? Si wi, kitfwa to kapav organiz twa sak semenn pou pres avek enn kikenn ki dan to group. Kitfwa li bon osi ki to reflesi lor seki pli inportan dan to lavi ek lor kouma to kapav servi to letan pli bien. (Rom. 12:11; Kol. 4:5) Sak zefor ki to fer, li vo lapenn. Priye Zeova pou ki Li ed twa. Li kapav donn twa “dezir ek lafors toule-de pou azir.”—Fil. 2:13.

9. Kouma nou kapav ede pou ki ena lamour ek enn bon lanbians dan nou group predikasion? (Romin 12:13)

⁹ Montre lospitalite. Nou ede pou ki ena lamour ek enn bon lanbians dan nou group predikasion kan nou “ena labitid pou montre lospitalite.” (Lir Romin 12:13.) Par exanp, nou kapav fer bann ansien kone ki nou ti pou kontan ki fer bann renion predikasion lakaz kot nou. Dan sertin lasanble, bann diferan group predikasion pran bann dispozision pou montre lospitalite anver bann orater ki vinn fer diskour kot zot sak semenn. Kan se zot tour pou montre lospitalite, sertin frer ek ser ki dan enn group predikasion zwenn ansam pou pran enn repa ek pou ankouraz sakenn zot kamarad. Zot fer sa mem si orater-la pa reste pou manze. Sarah, enn pionie spesial, dir: “Kan mo invit lezot kot mwa, mo bien strese. Alor, mo prefer fer enn ti kitsoz bien sinp. Olie ki mo gagn traka pou fer enn gran manze, mo plito fer zefor pou aprann konn lezot.” Kan nou ede pou ki ena enn bon lanbians dan nou group predikasion ek ki nou montre lospitalite, sa ed nou pou vinn pli pros ar Zeova ek ar sakenn nou kamarad.—Ne. 8:10; Zist. 20:35.

10. Ki nou kapav fer si nou anvi vinn enn pli bon proklamater ek enn pli bon ansegnan? (Proverb 1:5; 27:17) (Get zimaz osi.)

¹⁰ Fer zefor pou vinn enn pli bon proklamater ek enn pli bon ansegnan. Plis nou fer zefor pou amelior nou bann kapasite pou prese ek ansegne, plis nou pou anvi pres avek nou group predikasion. Eski ena enn kitsoz ki to anvi ameliore pou vinn enn pli bon proklamater ek enn pli bon ansegnan? Kitfwa to kapav rod led avek enn kikenn ki ena lexperyans ouswa avek enn pionie ki dan to group. (Lir Proverb 1:5; 27:17.) Fer to responsab group kone ki kitsoz to anvi ameliore dan to predikasion. Li pou fer so maximum pou ed twa. To kapav osi demann enn kikenn ki dan to group pou ed twa. Se seki Heather, enn ser ki bien timid, inn fer. Li dir: “Mo ti demann enn pionie pou ed mwa fer mo bann vizit. Li ti montre boukou lamour ek li ti bien zanti avek mwa. Li ti organize pou ki nou pres souvan ansam. Li ti mem ed mwa pou koumans enn letid Labib avek enn mo bann vizit. Mo extra kontan ki mo’nn demann li pou ed mwa parski gras-a sa mo’nn regagn lazwa pou prese.” Tousala montre ki ena boukou kitsoz ki nou kapav fer pou soutenir nou group predikasion.

KOUMA TO GROUP PREDIKASION KAPAV ED TWA?

11-12. Kouma nou group predikasion kapav ed nou lor plan spiritiel? Rakont enn lexperyans.

¹¹ Li kapav ed twa lor plan spiritiel. Nou group predikasion kapav ed sakenn parmi nou lor plan spiritiel. Par exanp, Zeova servi bann group predikasion pou pran swin ek pou ankouraz bann ki Li bien kontan, kouma par exanp, bann vev, bann orfelin, ek bann frer ek ser ki aze. (1 Tes. 2:8; Zak 1:27) Kan nou pres ansam avek nou group predikasion, sa kapav ed nou pou vinn bann pli bon proklamater ek bann pli bon ansegnan. Bann frer gagn bann formasion pou ki zot kapav fer plis pou ed lasanble.—1 Tim. 3:10.

¹² Anou gete kouma Wendy, ki nou ti mansione inpe avan, inn gagn bann bienfe gras-a so group predikasion. Li dir: “Akoz mo papa ti opoze ar laverite, souvan sa ti difisil pou mo mama pou al lor randevou ki ti ena dan wikenn pou so group predikasion. Kanmem sa, mo papa ti les mwa al prese. Dan mo group, ti ena enn vie ser pionie ki ti vinn mo kamarad, ek souvan li ti pres ansam ar mwa. Li ti form mwa pou vinn enn pli bon proklamater ek li ti ed mwa pou fer plis dan lasanble. Avek boukou lamour ek zantiyes, mo responsab group plizir fwa ti donn mwa bann konsey ki sorti dan Labib. Mo pa bliye sa bann konsey-la ek zot ankor ed mwa azordi.”

13. Kouma nou group predikasion kapav ed nou lor plan emosionel? (Get zimaz osi.)

¹³ Li kapav ed twa lor plan emosionel. Kan nou travay “kot-a-kot” avek bann manb nou group predikasion, nou vinn bann bon kamarad avek zot. (Fil. 1:27) Kan enn group predikasion li tipti, mem bann ki timid ouswa ki strese kan ena boukou dimounn, kapav fer kamarad ar lezot pli fasilman. (2 Kor. 6:13) Bann manb nou group kapav ed nou osi kan nou malad, kan nou tris, kan nou trakase, ek mem kan enn kikenn ki nou kontan mor. (1 Tes. 5:14) Plis gran soufrans pe koste, plis nou pou bizin bann bon kamarad. (Mat. 24:21) Nou bann problem kitfwa pa pou disparet, me li pou pli fasil pou nou andir zot kan nou kone ki nou bann frer ek ser kontan nou ek soutenir nou.—Prov. 17:17.

14. Kan ena enn katastrof natirel ouswa enn irzans, kouma nou group predikasion kapav ed nou dan bann fason pratik?

¹⁴ Li kapav ed twa dan bann fason pratik. Nou group predikasion kapav ed nou kan ena enn pandemi, enn katastrof natirel, enn irzans medikal, persekision, ek bann kriz ekonomik. Kan bann kitsoz koumsa arive, bann responsab group pre pou ed nou. Par exanp, kan ena enn katastrof, zot pou kontakte sak fami ki dan zot group predikasion pou gete seki zot bizin. Kitfwa nou pou bizin bann swin medikal, manze, delo, linz, ouswa enn plas pou reste. Kan nou responsab group konn sa, li kapav fer nou gagn led ki nou bizin. Li pou osi koz sa avek Komite Servis Lasanble pou gete kisann-la dan so group ki plis bizin led. Lerla, zot pou organize pou ed sa bann frer ek ser la. Wi, kan nou fer fas ar enn katastrof natirel ouswa ar enn irzans, nou group predikasion kapav ed nou!

15. Ki kitsoz tou bann serviter Zeova anvi?

¹⁵ Kouma nou ti mansione avan, Zeova so fami bien gran; Li ena boukou serviter dan lesiel ek lor later. Dan lesiel, ena bann milyar anz ki bien fidel. Ek lor later, ena plis ki nef milyon dimounn ki pe servi Zeova, ek sa pe kontign ogmante sak zour. (Zaka. 8:23; Rev. 5:11) Ki li lor later ouswa dan lesiel, tou bann serviter Zeova anvi ki maximum dimounn tann sa bon nouvel lor Rwayom la! (Rev. 14:6, 7) Alor, anou fer tou seki nou kapav pou soutenir nou group predikasion. Nou group predikasion kapav ed nou dan plizir fason, me sirtou li kapav ed nou pou loue nou Bondie Zeova!—Ps. 111:1.