Kontign Fer To Lamitie Avek To Konzwin Vinn Pli For

1. Kifer nou kapav dir ki bann bon kamarad zot enn kado Zeova?

BANN bon kamarad, zot enn kado Zeova. (Zak 1:17) Bann bon kamarad se bann dimounn ki kontan Bondie, ek zot kontan nou. Zot kontan kan nou zwaye, zot rekonfort nou kan nou tris, ek zot donn nou bann bon konsey kan nou bizin. Zot touletan ed nou, ek nou kapav fer zot konfians. Bann kamarad koumsa, zot vremem “fer leker kontan”!—Prov. 27:9.

2. Kifer li inportan ki bann konzwin kontign fer zot lamitie vinn pli for? (Matie 19:6)

² Li inportan ki enn mari ek so fam, zot bann bon kamarad. Fode pa ki zot konsider zot lamitie pou zot konzwin kouma enn kitsoz ki pa inportan. Zot bizin fer zefor pou zot fer zot lamitie vinn pli for. Si zot pa fer bann kitsoz ki pou ed zot res pros ar zot konzwin, zot kapav koumans santi zot tousel, zot malere, ek zot mem ankoler. Parkont, si zot kontign fer zefor pou vinn pros ar zot kamarad, zot pou ena pli gran lamitie ki de dimounn kapav ena. (Lir Matie 19:6.) Dan sa lartik-la, nou pou gete kouma bann konzwin kapav fer zot lamitie vinn pli for. Me avan, nou pou gete kouma bann Kretien ki selibater kapav swazir enn konzwin ki pou vinn zot pli bon kamarad toutlong zot lavi.

SWAZIR ENN KONZWIN KI POU VINN TO PLI BON KAMARAD

3-4. Ki kitsoz pou ed enn kikenn pou swazir enn bon konzwin? (Proverb 18:22)

³ Avan ki nou pran enn desizion inportan dan nou lavi, nou bizin reflesi lor bann bon kitsoz ek bann move kitsoz ki kapav arive si nou pran sa desizion-la. Bann desizion ki nou pran kapav ena enn gran lefe lor nou lavi. Alor, li inportan ki nou reflesi bien avan ki nou pran sa bann desizion-la.

⁴ Swazir enn konzwin, se enn parmi bann desizion pli inportan ki nou kapav pran dan nou lavi. Kifer? Parski nou pe swazir enn kikenn ki pou vinn nou kamarad toutlong nou lavi. Ek parski se Zeova ki’nn kree maryaz, li normal ki nou rod so direksion avan ki nou swazir enn konzwin. Avredir, Zeova touletan kone seki pli bon pou nou. Li anvi ki enn misie gagn enn bon madam, ek ki enn madam gagn enn bon misie. (Lir Proverb 18:22; Iza. 48:17, 18) Akoz sa, bann prinsip ki ena dan Labib kapav ed enn Kretien pou trouv enn kikenn ki pou enn bon konzwin pou li.

5. Kifer li inportan ki to marye ar enn kikenn ki batize?

⁵ Kan nou pran batem, nou vinn kamarad Zeova. (Ps. 25:14) Alor, si to pe pans pou marye, to bizin swazir enn kikenn ki enn kamarad Zeova li osi. (1 Kor. 7:39) Kan to fer sa, to montre ki to respekte bann prinsip Zeova, ek ki to konsider to fitir konzwin kouma enn kado Zeova. (Prov. 19:14) To pou evit osi bann problem ki to kapav gagne kan to marye avek enn kikenn ki pa kontan Zeova. (2 Kor. 6:14) Mem si to pa pe trouv okenn Temwin avek ki to kapav marye, li pou enn erer si to panse ki to kapav marye avek enn kikenn ki pa kontan Zeova. Li pou enn erer osi si to panse ki si to frekant enn kikenn ki pa Temwin, avek letan li kapav interese ar laverite ek vinn enn Temwin.

6-7. Si to interese avek enn kikenn, ki bann kestion li bon to poz tomem?

⁶ Biensir, sa pa vedir ki ninport ki Temwin ki batize pou enn bon konzwin pou twa. Alor, si to interese avek enn kikenn, li bon ki to poz tomem sertin kestion. Demann tomem: ‘Kouma eski li tret bann manb so fami? Eski li zanti ek li ena respe anver lezot? Kisann-la so bann kamarad? Kouma eski li reazir kan lezot pena mem lopinion ki li? Eski li kontan fer bann kitsoz kouma li li anvi, ouswa eski li dispoze pou ekout lopinion lezot kan sa pa al kont okenn prinsip Labib? Kouma eski li konsider kas?’

⁷ To kapav osi poz tomem sa bann kestion-la: ‘Eski li ena enn gran lamour pou Zeova? Eski li pe fer zefor pou met “nouvo personalite” lor li? (Kol. 3:9, 10) Eski li pou ed mwa pou kontign servi Zeova pli bien? Eski nou ena bann mem lobzektif spiritiel? Eski nou pou vinn bann pli bon kamarad?’ Si to enn ser, demann tomem: ‘Eski sa frer-la pou enn bon kamarad pou mwa ek enn bon sef fami?’ (1 Kor. 11:3) Si to enn frer, demann tomem: ‘Eski sa ser-la pou soutenir mwa ek respekte bann desizion ki mo pou pran, mem si mo pou fer bann erer?’ Bizin letan pou gagn repons sa bann kestion-la. Alor, pandan zot frekantasion, pran letan pou aprann konn zot kamarad pli bien.

8-9. Ki kitsoz kapav ed enn kikenn ki pe frekante pou pran enn bon desizion? (Get zimaz osi.)

⁸ Si to pe frekante, to pou kapav pran enn pli bon desizion si to esey kone kouma dimounn-la ete vremem. Esey kone ki lezot panse lor li. To kapav demann lezot ki bann kalite li ena, ek osi demann sertin dan so lasanble seki zot panse lor li. Par exanp, eski lezot konn li kouma enn kikenn ki ena limilite, ki zanti, ek ki rezonab? Sarah, enn ser ki res dan Gwiyann, ek ki’nn marye avek enn frer ki apel Daniel, dir: “Mo ti demann lezot seki zot ti panse lor Daniel. Par exanp, mo ti koz ar enn frer ki ti res dan mem lapartman ki li, ar enn ansien, ek ar bann ser dan so lasanble. Mo ti osi koz ar nou bann kamarad ki konn nou bien.” Avek zantiyes, demann sa dimounn-la si ena kitsoz ki’nn ariv li dan lepase, ouswa si ena kitsoz ki pe arive dan so lavi aster-la, ki li bon ki to kone. Kitfwa li inportan ki to konn sa bann kitsoz-la, pou ki sa pa kree bann problem plitar dan to maryaz.

⁹ Kitfwa to ena bann dout ki sa dimounn-la pou enn bon konzwin pou twa. Ouswa, kitfwa bann frer ek ser ki ena lexperyans inn dir twa ki zot inn remark sertin defo ki sa dimounn-la ena. Dan sa ka-la, fode pa to ferm lizie lor bann kitsoz ki to pe trouve ouswa tande. Sa kapav ed twa pou deside si to pou kontign frekant sa dimounn-la ouswa non.a Aster-la, nou pou gete seki bann koup kapav fer pou ki zot lamitie vinn pli for.

PAS LETAN ANSAM

10. Kifer li bon ki bann konzwin pas letan ansam?

¹⁰ Bann konzwin kapav fer zot lamitie ek zot maryaz vinn pli solid, kan zot pas letan ansam mem si zot bien okipe. Kan zot pas letan ansam, sa donn zot lokazion pou koz lor seki’nn pase pandan lazourne, pou dir zot kamarad seki zot panse ek resanti, pou montre lamour anver sakenn zot kamarad, ek pou fer bann kitsoz interesan ansam.

11. Ki kitsoz kapav danzere pou enn koup?

¹¹ Bann konzwin ki bann bon kamarad, zot kontan pas letan ansam olie ki zot tousel. Biensir, zot pa pou kapav touletan ansam. Selman, si zot res tousel pandan tro boukou letan, sa kapav danzere pou zot maryaz. Par exanp, sertin finn aksepte enn travay dan enn lot pei, ek akoz sa, zot finn bizin res lwin ar zot fami pandan plizir mwa. Bann travay koumsa kapav fer bann koup gagn plis kas. Selman, parski zot lwin ar zot fami, sa kapav kree boukou problem dan zot lavi maryaz.

12-13. (a) Ki kitsoz sertin koup Kretien inn fer pou ki zot kapav pas letan ansam? (Get zimaz osi.) (b) Ki valer to lamitie avek to konzwin bizin ena pou twa? (Get lankadre “Ki Valer Mo Konzwin Ena pou Mwa?”)

¹² Anou gete seki sertin koup inn fer pou ki zot fer sir ki zot pas letan ansam. Leah, ki res Gwam, dir: “Mo misie ek mwa, nou kontan fer enn ta kitsoz ansam. Bien rar nou fer bann kitsoz ouswa aksepte enn linvitasion san nou konzwin.” Roxanne, ki res Letazini, dir: “Akoz nou toule-de bien okipe, nou fini organiz alavans bann moman kot zis nou toule-de pou ansam, parey kouma nou fer pou bann lezot levennman inportan.” (Konpar ar Amos 3:3.) Damien, ki res Lafrans, dir: “Nou’nn konpran ki li inportan ki nou interes nou ar bann kitsoz ki nou konzwin kontan fer. Avek letan, nou’nn aprann pou vremem kontan fer sa bann kitsoz-la.” (Mat. 7:12) Ek Katie, ki res Letazini, dir: “Parfwa, nou met nou telefonn dekote pou ki nou kapav donn nou konzwin tou nou latansion.”

¹³ Seki pli inportan, se ki bann koup pas letan ansam dan zot servis pou Zeova. Myriam, ki res Lafrans, dir: “Nou koumans nou lazourne par nou lektir Labib. Apre sa, nou partaz ar nou kamarad seki nou’nn kontan dan nou lektir ek bann pwin ki nou ti pou kontan met an pratik dan nou lavi. Mo extra kontan sa bann moman-la.” Myriam dir osi: “Mo bien kontan osi kan nou priye ansam, ek mo kontan kan mo trouve ki kantite mo misie kontan Zeova.” Katie, ki nou ti mansione avan, dir: “Moman ki nou plis kontan se kan nou prese ansam. Kan nou tann nou kamarad koz lor Zeova, sa fer nou vinn pli pros ar nou kamarad, ek lerla nou kontign aprann bann nouvo kitsoz lor nou kamarad.”—Prov. 27:17.

RES PROS AR TO KONZWIN MEM SI ZOT GAGN BANN PROBLEM

14-15. Kifer enn koup bizin fer tou seki zot kapav pou regle bann problem ki zot kapav gagne dan zot lavi maryaz? Donn enn lexanp.

¹⁴ Labib dir ki “bann ki marye pou gagn bann problem dan zot lavi.” (1 Kor. 7:28) Kifer? Parski zot bann dimounn ki inparfe. Enn not pou letid pou sa verse-la dir, ki lexpresion ki’nn servi dan sa verse-la pe koz lor bann problem ki bann koup marye gagne an zeneral. Kan bann problem koumsa arive, bann konzwin bizin fer zefor pou regle sa bann problem-la ansam ek pou res pros ar zot kamarad. Kifer?

¹⁵ Anou pran enn lexanp pou konpran sa. Fer koumadir enn batiman ouswa enn tablo ki bann dimounn bien kone, inn andomaze. Proprieter-la ouswa artis-la pou fer tou seki li kapav pou li repar li. Kitfwa li pou pas boukou letan ek li pou investi boukou kas pou repar sa batiman-la ouswa sa tablo-la. Ek mem si sa pou pran boukou lane, li pa pou bes lebra. Kifer? Parski sa batiman-la ouswa sa tablo-la, ena boukou valer pou li. Dan mem fason, sak maryaz ena boukou valer. Mem si dan enn koup, bann konzwin zot bien pros ar zot kamarad, zot pou ena bann problem ek bann dezakor. Selman, parey kouma kapav repar enn batiman ouswa enn tablo ki’nn andomaze, enn koup kapav regagn lamitie ki zot ti ena avan. Kitfwa zot pou bizin fer boukou zefor, ek sa pou pran boukou letan. Selman, kan bann konzwin fer tou seki zot kapav pou fer zot lamitie vinn pli for ek ki zot kontign res ar zot kamarad, sa fer Zeova plezir. (Mal. 2:16) Anplis, kan zot fer sa, zot pa zis montre lamour ek respe ki zot ena pou zot konzwin, me sirtou pou Zeova, ki’nn kree maryaz.

16. Dapre 1 Korintien 13:4-8a, ki kitsoz kapav ed enn koup ki pe gagn bann problem grav dan zot maryaz? (Get zimaz ek osi lankadre “Ki Kitsoz Kapav Ed Twa pou Fer To Lamitie Avek To Konzwin Vinn Pli For?”)

¹⁶ Si to pe gagn bann problem grav dan to maryaz, fode pa ki to rod separe vit-vit. (1 Kor. 7:10, 11) Olie sa, demann tomem, ‘Ki kitsoz ankor mo kapav fer pou ki mo lamitie avek mo konzwin vinn pli for?’ Etidie seki Labib dir konsernan fason ki nou kapav montre lamour, ek reflesi lor kouma to kapav amelior tomem dan sa domenn-la. (Lir 1 Korintien 13:4-8a.) Olie ki to pans pou kit to konzwin, fer tou seki to kapav pou revinn pros ar li. Konsantre twa lor seki twa to kapav fer pou ki to regagn sa bon lamitie ki to ti ena avek li la. Priye Zeova pou ki Li ed twa. Fer bann resers dan bann piblikasion ek get bann video ki kapav ed twa pou kone seki to kapav fer. To kapav osi rod konsey ar bann ansien ek bann lezot frer ek ser ki pe met an pratik bann prinsip Labib dan zot lavi maryaz. Labib dir ki maryaz, li kouma enn “lakord trwa brin,” ek se Zeova ki brin ki pli for ek ki pli inportan dan to maryaz. Alor, kan to fer bann kitsoz dan fason ki Zeova anvi, to maryaz pou vinn pli solid.—Ekle. 4:12.

17. Kouma bann ki pe pans pou marye ek bann ki’nn fini marye kapav ere?

¹⁷ Zeova anvi ki tou so bann serviter ere, mem bann ki pe pans pou marye ek bann ki’nn fini marye. Alor, si to enn selibater ki pe pans pou marye, swazir to konzwin bien parski li pou vinn to pli bon kamarad. Ek si to enn kikenn ki marye, kontign fer zefor pou ki to lamitie avek to konzwin vinn pli for. Kontign kont lor Zeova pou ki to kapav regle bann problem ek bann dezakor ki to gagne dan to maryaz. Kan to fer tousala, to pou kapav ‘profit to lavi’ avek to konzwin ki to bien kontan!—Ekle. 9:9.