Aprann ar Nou “Bondie Ki Konsol Bann Dimounn dan Tou Kalite Sitiasion”

1. Kifer nou bizin rekonfort lezot?

NOU tou nou “tris akoz diferan leprev.” Akoz sa, parfwa nou bizin rekonfor ek lankourazman. (1 Pier 1:6) Nou bien kontan ek nou rekonesan kan lezot ankouraz nou, pa vre! Alor, nou osi nou bizin pa tarde pou rekonfort lezot kan zot pe soufer. (Mat. 7:12) Labib dir ki Zeova, Li “Bondie ki konsol bann dimounn dan tou kalite sitiasion,” ek Li montre nou kouma nou kapav “konsol lezot ki dan tou sort kalite difikilte.” Alor, nou kapav swiv so lexanp kan nou “rekonfort sakenn [nou] kamarad.” (2 Kor. 1:3, 4; 1 Tes. 4:18) Avredir, nou rekonfort nou bann frer ek ser parski nou kontan zot, pa parski nou oblize fer li. Dan sa lartik-la, nou pou gete (1) dapre Labib, ki savedir konsol lezot, (2) kouma nou kapav rekonfort lezot, ek (3) seki nou kapav fer kan nou bizin rekonfor.

DAPRE LABIB, KI SAVEDIR KONSOL LEZOT?

2. Dapre Labib, ki savedir “konsol” lezot?

² Dan Labib, mo Grek ki’nn servi pou tradir “konsol” vedir plizir kitsoz. Li kapav vedir “ankouraze,” “konseye,” ouswa “sipliye.” (Rom. 12:8) Lexpresion Grek ki’nn servi dan sa verse-la pou mo “konsol” vedir “enn kikenn ki pe debout akote enn lot dimounn pou ki li kapav ed li.” Sa fer nou mazinn enn kikenn ki pe vini vit-vit pou li ed so kamarad ki pe soufer. Li kapav ed so kamarad dan plizir fason, selman li pou touletan fer sir ki so kamarad santi li pli bien.

3. Kouma Barnabas ti rekonfort lezot? (Get zimaz osi.)

³ Anou get enn lexanp dan Labib. Enn Kretien ki ti apel Zozef ti touletan ed ek rekonfort lezot. Se akoz sa ki bann zapot ti koumans apel li Barnabas, ki vedir “Garson Konsolasion.” (Zist. 4:36) Sa nom-la ti dekrir li telman bien ki zame pa finn apel li Zozef ankor dan Labib. Labib dir osi ki Barnabas souvan ti ed bann frer ek ser kan zot ti bizin led. Par exanp, inpe apre ki li ti vinn enn Kretien, Sol ti al Zerizalem ek li ti anvi zwenn bann Kretien ki ti laba. Selman, bann-la ti per li, parski zot ti kone ki li ti persekit boukou frer ek ser dan lepase. Parkont, Barnabas ti fer Sol konfians ek li “ti amenn li kot bann zapot.”—Zist. 9:26-28.

KOUMA NOU KAPAV REKONFORT LEZOT?

4. Sit enn parmi bann pli bon fason ki nou kapav rekonfort lezot. (Romin 1:11, 12)

⁴ Si sa posib, al vizit zot. Zeova servi so bann serviter pou rekonfort lezot. Par exanp, kan profet Eliya ti tris ek dekouraze, Zeova ti avoy enn anz pou rekonfort li. (1 Ler. 19:4-7) Lapot Pol osi ti anvi vizit so bann frer ek ser pou ankouraz zot parski li ti kone ki gras-a sa, zot ti pou kapav ankouraz sakenn zot kamarad. (Lir Romin 1:11, 12.) Alor, kan to al vizit enn kikenn, pas ase letan avek li pou ki to kapav rekonfort li. (1 Kor. 16:7) Selman, mem si to pa kapav al vizit zot, to ankor kapav rekonfort zot kan to ekrir zot enn let, to fer enn kart pou zot, ouswa to avoy zot enn mesaz. Zeova anvi servi twa pou rekonfort lezot. Eski to pou les Zeova servi twa pou fer sa?

5. Ki bann difikilte nou pou gagne?

⁵ Plis lafin pe koste, plis li pou vinn deplizanpli difisil pou vizit nou bann frer ek ser ki bizin rekonfor. Anou gete seki nou kapav aprann ar lexanp Onesifor, ki ti res dan lavil Efez. Kan Pol ti anprizone dan Rom, Onesifor ti anvi rekonfort li. Alor, li ti al rod Pol mem si sa ti bien danzere, parski bann dimounn ti kapav met li dan prizon ouswa mem touy li akoz sa. (2 Tim. 1:16-18) Parey kouma Onesifor, nou bann frer ek ser dan Larisi pe rekonfort sakenn zot kamarad kan zot gagn persekision. Kan enn frer ouswa enn ser bizin pas lakour, bann lezot frer ek ser al lakour pou ankouraz li, mem si zot kone ki lotorite kapav met zot osi dan prizon. Si to bann frer ek ser pe pas par bann sitiasion difisil, kouma to kapav prepar twa pou rekonfort zot? Kitfwa to kapav etidie lor lexanp bann Temwin Zeova dan lepase ek dan nou lepok, ki finn montre kouraz ek rekonfort sakenn zot kamarad malgre bann persekision. To kapav aprann osi seki zot inn fer pou zot res zwaye dan sa bann sitiasion-la.

6. Kouma nou kapav imit Zeova kan nou rekonfort lezot? (Get zimaz osi.)

⁶ Ekout zot. Kan profet Eliya ti santi ki so lavi ti an danze, li ti priye Zeova ek li ti dir Li seki li ti resanti. Zeova ti kone par ki sitiasion Eliya ti pe pase, ek Li ti kone ki li ti bien trakase. Me kanmem sa, nou Bondie ki ena lamour, Zeova, ti ekout li bien, ek Li ti kontign ekout Eliya mem si plizir fwa li ti dir Li mem kitsoz! (1 Ler. 19:9, 10, 14) Profet Abakouk ti dir Zeova seki li ti resanti konsernan bann soufrans ek bann move kitsoz ki li ti trouve. Zeova ti ekout Abakouk osi avek pasians ek Li pa ti ankoler kan Abakouk ti anvi kone kifer Li ti pe permet ki bann move kitsoz arive. (Abak. 1:2, 3) Dan mem fason, azordi, Zeova ekout bien nou bann lapriyer, mem si Li deza kone seki nou bizin. Alor, kan nou bann frer ek ser pe koze, nou kapav imit Zeova kan nou ekout zot bien ek nou montre respe anver zot. Kouma nou kapav fer sa? Fode pa ki nou anpes zot koze pou ki nou nou dir seki nou anvi dir. Ek mem si zot koz brit ar nou, fode pa nou ankoler ar zot, ek si zot dir mem kitsoz plizir fwa, nou bizin dispoze pou ekout zot.—Zak 1:19; Ekle. 7:9.

7. Kouma nou kapav kone seki nou kapav fer pou ed enn kamarad?

⁷ Esey kone seki to kapav fer pou ed zot. Nou pa kapav lir dan leker bann dimounn parey kouma Zeova. Alor, se zis kan nou ekout bien seki enn kikenn pe dir nou, ki nou kapav rekonfort li. Fode pa to panse ki to kone seki to kamarad bizin. Kifer? Parski nou tou nou diferan. Seki kapav rekonfort twa dan enn sertenn sitiasion, kitfwa pa pou rekonfort to kamarad ki pe pas par mem sitiasion. Alor, pran letan pou ekout bien to kamarad kan li koze, ek avek zantiyes, poz li bann kestion pou ki to kone seki to kapav fer pou ed li.—Prov. 20:5.

8. Kan Lazar ti mor, kouma Zezi ti rekonfort Mart ek Mari? (Get zimaz osi.)

⁸ Anou gete kouma Zezi ti rekonfort Mart ek Mari kan zot frer Lazar ti mor. Toule-de ti bien tris parski zot ti perdi zot frer. Selman, Zezi pa ti rekonfort zot dan mem fason. Kan Mart ti koz avek li, Zezi ti koz lor rezireksion ek li ti ed Mart pou ena plis lafwa dan rezireksion. Parkont, kan Mari ti vinn get Zezi ek ti pe plore, Labib pa dir ki Zezi ti koz lor rezireksion. Olie sa, Zezi ti plore ansam avek Mari ek li ti demann li kotsa lekor Lazar ti ete. (Zan 11:20-35) Ki leson nou aprann ar sa de lexanp-la? Kan nou rekonfort bann ki pe soufer, nou bizin fer zefor pou konpran seki kapav ed zot, olie ki nou esey rekonfort tou dimounn dan mem fason.

9. Kouma nou kapav servi Labib pou rekonfort enn kikenn? (Romin 15:4, 5)

⁹ Servi Labib. Kan enn kikenn pe soufer ek ki nou partaz avek li bann verse Labib ki kapav rekonfort li, sa kapav ed li pou ena plis konfians dan bann promes Zeova. (Lir Romin 15:4, 5.) Ek plis li ena konfians ki Zeova kontan li ek ki Li pou pran li swin, plis sa pou rekonfort li ek ankouraz li. (Iza. 40:31) Kouma to kapav rod enn verse ki pou ankouraz enn kikenn? Sertin frer ek ser ekrir bann verse ki zot kapav servi pou rekonfort lezot. Par exanp, to kapav trouv bann verse interesan dan liv Bann Verse pou Nou Lavi Kretien, dan size “Rekonfor.” To kapav osi demann Zeova pou ed twa servi Labib dan enn pli bon fason, pou ki to kapav rekonfort lezot. Gras-a so lespri sin, Zeova kapav fer nou rapel bann verse ki apropriye kan nou bizin rekonfort lezot.—Zan 14:26.

10. Kan nou pe ankouraz enn kikenn, kifer nou bizin koz avek zantiyes?

¹⁰ Koz avek zantiyes. Dan so lang orizinal, mo ki’nn servi pou “konsol” kapav osi vedir “konseye” ouswa “sipliye.” Parfwa, kan to pe rekonfort enn kikenn, kitfwa to pou bizin konsey li ouswa sipliy li pou ki li sanz so fason panse. Alor, kan to bizin fer sa, reflesi bien lor seki to pou dir avan ki to koze. Kifer? Parski apre ki to’nn fini koz ar li, sa dimounn-la pou bizin santi li pli bien, olie ki li dekouraze. (Prov. 12:18) Nou kapav imit fason ki Zeova ti ed Eliya. Eliya ti panse ki zis li tousel ti ankor pe servi Zeova ek ki li pa ti reisi fer so travay profet kouma bizin. Selman, avek zantiyes, san ki Li dir li ki li ti ena tor, Zeova ti ed Eliya pou sanz so fason panse. (1 Ler. 19:15-18) Twa osi, to kapav ed to bann frer ek ser si to zanti ek to reflesi bien lor seki to pou dir zot. Kan to pe fer bann diskour ouswa kan to donn bann repons pandan bann renion, to bizin fer sir ki seki to dir, li zanti ek pozitif. Koumsa, sa pou ankouraz to bann frer ek ser.

11. Kan nou bann kamarad pe soufer, souvan ki kitsoz zot bizin? (1 Zan 3:18)

¹¹ Donn zot enn led pratik. Kan nou bann kamarad pe soufer, kitfwa nou pou bizin fer kitsoz pou ed zot ek pa zis dir zot bann kitsoz ki pou ankouraz zot. (Lir 1 Zan 3:18.) Barnabas enn zoli lexanp dan sa domenn-la, parski li ti vann so terin ek li ti donn sa kas-la bann zapot pou ki zot kapav ed bann frer ek ser ki ti pov. (Zist. 4:36, 37) Azordi osi, bann Kretien swiv lexanp Barnabas kan zot ed zot bann frer ek ser ek zot donn zot seki zot bizin. Gabriela, ki res Pologn, ti bien trakase ek dekouraze kan enn inondasion ti detrir so lakaz. Li dir: “Mo bann paran ek mwa, nou ti bien per ek trakase. Mo pa ti kone kouma nou ti pou repar nou lakaz. Selman, bann frer ek ser dan bann lasanble ki pre ar nou, ti vini ek ti repar nou lakaz dan enn sel zour. Sa lexperyans-la ti ogmant mo lafwa ek ti montre mwa ki Zeova pe diriz so pep pou rekonfort bann ki pe soufer.”

12. Kan to gagn bann leprev ek ki to res fidel ar Zeova, kouma sa kapav ed to bann frer ek ser?

¹² Res fidel ar Zeova. Pol ti dir bann Kretien dan Tesalonik ki li ti regagn lafors ek ki sa ti bien ankouraz li, kan li ti aprann ki bann-la ti pe res fidel mem si zot ti pe gagn persekision. (1 Tes. 3:5-8) Pol ti kone ki bann zefor ki li ti fer pou ankouraz zot pa ti “tom dan delo.” Li ti kone osi ki si li ti res fidel ar Zeova, mem si li gagn bann leprev, sa ti pou ankouraz so bann frer ek ser pou fer parey. (Kol. 2:1, 2) Dan mem fason, kan nou bann frer ek ser trouve ki nou pe res fidel ar Zeova mem si nou pe gagn bann leprev, sa kapav ankouraz zot boukou. Sa kapav fer zot ena konfians ki Zeova pou ed zot kan zot gagn bann leprev, parey kouma Li’nn ed nou.

13. Ki nou bizin kontign fer pou nou ankouraz lezot?

¹³ Ena pasians. Si enn frer ouswa enn ser bien dekouraze, kitfwa li pa pou santi li bien deswit mem si nou fer boukou zefor pou rekonfort li. Selman, Labib dir nou ki nou bizin “kontign ankouraz sakenn [nou] kamarad.” Sa vedir ki nou bizin kontign fer zefor pou ankouraz lezot plizir fwa. (1 Tes. 5:11) Alor, kan nou rekonfort bann ki dekouraze ek ki bizin led, nou bizin ena pasians. (1 Tes. 5:14) Me parfwa, nou osi nou bizin ki lezot rekonfort nou. Ki kitsoz nou kapav fer kan nou bizin rekonfor?

SEKI NOU KAPAV FER KAN NOU BIZIN REKONFOR

14-15. Kan nou santi nou tris ouswa nou trakase, ki nou kapav fer?

¹⁴ Priye Zeova. Kan to tris ouswa to trakase, priye Zeova ek dir Li ki to bizin so led pou ki to santi twa bien. (Ps. 94:19) Fer bann lapriyer presi ek devid to leker ar Li. (Ps. 62:8) Li vre ki Zeova deza kone seki to pe resanti avan mem ki to priye Li. Selman, kan to dir Li seki to resanti, sa montre ki to kone ki Li kontan twa ek ki Li ekout to bann lapriyer. Anplis, Zeova Li touletan ed bann dimounn ki ena lafwa dan Li ek ki priye Li. (Mark 11:24) Filipien 4:6, 7 ankouraz nou pou “demann Bondie seki [nou] bizin; ek lape Bondie ki depas tou seki [nou] kapav konpran pou protez [nou] leker ek [nou] lespri.”

¹⁵ Pa ezite pou rod led ar lezot. Koz ar enn kamarad ouswa enn ansien ki to fer konfians, ek dir li seki to resanti. To bann frer ek ser kapav rekonfort twa. Selman, si to pa dir zot seki to resanti ek seki to bizin, zot pa pou kapav ed twa. (Prov. 14:10) To kapav demann zot pou ekout twa kan to exprim to bann santiman, ek demann zot pou partaz avek twa enn verse ouswa enn lartik ki’nn rekonfort zot.

16. Ki kitsoz kapav arive kan to bann frer ek ser esey ankouraz twa, ek ki kitsoz fode pa to bliye?

¹⁶ Ena pasians ek pardonn lezot. Kan nou bann frer ek ser esey ankouraz nou, kitfwa zot kapav fer bann erer. Par exanp, kitfwa zot kapav dir ouswa fer enn kitsoz ki dekouraz nou, olie ki sa ankouraz nou. Si sa arive, montre pasians anver zot. (1 Kor. 13:4, 7) Rapel osi bann parol ki trouv dan Zak 3:2, ki dir: “Si enn dimounn pa fer erer kan li koze, li enn dimounn parfe.” Pa bliye ki to bann frer ek ser ena bann bon lintansion ek ki zot anvi ed twa. Pa bliye osi ki parey kouma twa, zot anvi fer seki bon, selman parfwa zot fer bann erer.—Mat. 26:41.

17. Ki nou bien deside pou fer?

¹⁷ Nou pe viv dan bann dernie zour, alor nou tou nou bizin rekonfor ek lankourazman. Plis lafin pe koste, plis nou lavi pou vinn deplizanpli difisil ek nou pou gagn plis persekision ar bann ki opoz zot ar Bondie. Alor, anou bien deside pou fer tou seki nou kapav pou nou rekonfort sakenn nou kamarad.