Trouv To Bann Difikilte dan Bon Fason

1-2. Pou ki nou reisi fer fas ar nou bann difikilte, ki nou bizin fer? (Get zimaz osi.)

ZEOVA bien kontan so bann serviter. Selman, pou boukou parmi nou, nou lavi “ranpli ar maler ek sagrin.” (Ps. 90:10) Sertin serviter Zeova gagn persekision ar zot fami parski bann-la anvi ki zot aret servi Li. Ena lezot ki pe gagn persekision ouswa zot dan prizon parski zot pe pres bon nouvel. Ena boukou ki pe soufer parski zot malad ouswa zot pe vinn vie. Ek ena ki pe soufer parski enn kikenn ki zot kontan inn mor, ouswa parski inn ariv zot enn move kitsoz. Eski twa osi to trakase ouswa to pe soufer parski inn ariv twa enn move kitsoz?

² Pou ki nou reisi fer fas ar nou bann difikilte, nou bizin trouv zot dan enn bon fason. Ki nou pe rod dir? Anou pran enn lexanp pou explik sa. Bann difikilte ki nou gagne dan nou lavi, zot koumadir bann danze ki kapav ena lor nou sime kan nou roul nou loto. Pou sertin danze, kitfwa nou pou bizin vir dan drwat ouswa dan gos, ralanti, ouswa mem aret nou loto. Selman, pou nou kone seki nou bizin fer, nou bizin trouv bien ki danze ena devan nou. Parkont, si nou parbriz li sal ouswa li flou, nou pa pou reisi trouv danze-la. Dan mem fason, pou ki nou reisi fer fas ar nou bann difikilte, nou bizin trouv zot dan fason ki Zeova anvi nou trouv zot. Lerla, nou pou kapav res kalm ek andir difikilte-la. Dan sa lartik-la, nou pou trouve (1) kouma nou kapav trouv nou bann difikilte dan enn bon fason, (2) kouma kan nou trouv nou bann difikilte dan enn move fason, sa kapav fer nou ditor, ek (3) seki nou bizin fer pou ki nou trouv nou bann difikilte dan fason ki Zeova anvi nou trouv zot.

TROUV TO BANN DIFIKILTE DAN BON FASON

3. Kifer nou pa kapav evit gagn bann problem dan sa lemond-la?

³ Dan sa move lemond-la, nou pa kapav evit gagn bann problem. Tanki nou inparfe ek ki Satan diriz sa lemond-la, nou pou kontign gagn bann problem. Ek plis nou koste ar lafin sa lemond-la, plis nou lavi pou vinn difisil. Kitfwa pou ena plis katastrof osi, kouma par exanp bann tranbleman-deter ek bann inondasion. Anplis, parski bann dimounn pe vinn deplizanpli move, pli boukou dimounn pou soufer. (Mat. 24:8; 2 Tim. 3:13) Zeova ti kapav rezoud tou nou bann problem aster-la mem, selman si Li fer sa, sa pou koumadir Li pe donn Satan enn koudme pou diriz sa lemond-la. Se dan lavenir ki Zeova pou rezoud tou nou bann problem. Alor, tanki Satan diriz sa lemond-la, nou pou kontign gagn bann problem.—Ekle. 9:12

4. Ki lezot difikilte nou gagne parski nou bann Kretien?

⁴ Nou gagn bann lezot difikilte parski nou bann Kretien. Zezi souvan ti dir so bann disip ki zot ti pou gagn persekision parski zot ti pe obeir li. (Mat. 24:9; Zan 16:2) Alor, fode pa nou etone kan nou gagn persekision! Bann dimounn persekit nou parski nou obeir Zezi ek nou res fidel ar Zeova. (1 Tes. 3:3, 4) Selman, kan nou res fidel kan nou gagn bann difikilte, nou kapav sir ki nou pe fer Zeova ek Zezi plezir, ek ki zot pou rekonpans nou pou sa. Kan nou res fidel dan bann difikilte, nou montre ki nou bien deside pou servi Zeova parski Li mem meyer Dirizan ki ena, ek nou montre osi ki Satan enn manter. Enn parmi bann foste ki Satan dir lor bann dimounn, se ki nou pa vremem kontan Bondie ek ki nou servi Li par lintere. Se akoz sa ki Satan atak bann serviter Zeova. Li anvi montre ki nou pa pou res fidel ar Zeova kan nou gagn bann difikilte. (Zob 1:9-11) Selman, kan nou andir nou bann difikilte ek ki nou res fidel ar Zeova, nou montre ki nou vremem kontan Li, ek sa fer Li plezir.—Prov. 27:11.

5. Ki leson nou aprann dan Ekleziast 7:13, 14? (Get zimaz osi.)

⁵ Zeova les nou gagn bann difikilte. Zeova zame pa pou azir dan enn move fason, ek zame Li pa pou fer nou ditor. (Zak 1:13) Selman, kan Lerwa Salomon ti dir ki “enn move lazourne” se “travay vre Bondie,” ki li ti pe rod dir? (Lir Ekleziast 7:13, 14.) Salomon pa ti pe rod dir ki Zeova fer bann move kitsoz arive. Selman, kan enn move kitsoz arive, Zeova pa anpes li arive. Alor, ki leson nou kapav aprann ar seki Salomon dir dan Ekleziast 7:13, 14? Premierman, parski nou inparfe ek ki nou pe viv dan move lemond Satan, nou bizin realist: Pou ena bann zour kot tou pou korek, me pou ena bann zour kot nanye pa pou bon! Selman, kan bann bon kitsoz arive, li bon ki nou remersie Zeova parski se Li ki donn nou tou bon kitsoz. Ek deziemman, Salomon rapel nou ki nou “pa kapav kone vremem ki pou ariv” nou. Alor, nou pa kapav kone si zordi pou enn bon zour ouswa enn move zour. Anplis, bann bon ek bann move dimounn toule-de gagn bann problem san ki zot atann.

6. Kifer Zeova les nou gagn bann difikilte? (Ebre 12:7, 11)

⁶ Si nou trouv nou bann problem parey kouma Zeova trouv zot, nou pou aprann kont lor Li olie ki nou kont lor nou-mem pou nou rezoud nou bann problem. Zeova trouve seki pe pase dan nou lavi. Li bien sagrin kan Li trouv nou soufer ek Li pou touletan ed nou. Mem kan Li les nou “mars dan enn vale kot fer bien nwar,” Li kontign gid nou, Li montre nou ki Li kontan nou, ek Li donn nou lafors ki nou bizin pou andire. (Ps. 23:4) Anplis, kan nou gagn bann difikilte, sa kapav ed nou pou trouv bann febles ki nou ena ek bann kalite ki nou bizin devlope, ek avek led Zeova, nou pou kapav fer bann sanzman ki bizin. (Lir Ebre 12:7, 11.) Par exanp, Zob ti bizin fer zefor pou ena plis limilite. Se pa akoz Zeova ki Zob ti gagn bann leprev. Selman, Zeova ti les sa arive, ek gras-a sa, Zob ti reisi tir bann leson bien inportan. (Zob 42:1-6) Alor, nou kapav sir ki si Zeova pe les nou andir enn sitiasion, Li pou ed nou pou ki nou res fidel ar Li, ek si nou res fidel, Li pou rekonpans nou.—Rom. 8:35-39.

7. Kifer nou kapav ere mem kan nou gagn persekision parski nou pe servi Zeova?

⁷ Nou kapav ere mem kan nou gagn persekision. Si to pe gagn persekision parski to enn serviter Zeova, fode pa to panse ki to nepli ena so faver. Okontrer, pa bliye ki se parski to pe obeir Zeova ki to pe gagn persekision. Ek parski to pe andire, sa fer Li plezir ek Li pou rekonpans twa. (Mat. 5:10-12) Kan to trouv persekision dan sa fason-la, to kapav ere parey kouma bann zapot Zezi. (Zist. 5:40-42) Anplis, si to res fidel kan to gagn persekision, sa kapav ede pou ki lezot aprann laverite lor Zeova ek ki zot “donn [li] laglwar.” (1 Pier 2:12) Mazinn osi lexanp Zozef. Zeova ti ed li ek ti rekonpans li, pa zis kan li ti fini sorti dan prizon, me osi kan li ti ankor dan prizon. Alor, to kapav sir ki Zeova kapav fer parey pou twa osi kan to gagn persekision.—Zen. 39:3, 23.

8. Ki kitsoz ankor kapav ed nou pou res fidel ar Zeova kan nou gagn bann difikilte?

⁸ Nou bann difikilte pa pou dire pou touletan. Lexanp Zob montre nou ki enn zour nou pou nepli ena okenn problem. Labib dir ki “Zeova ti beni bann dernie zour Zob plis ki avan.” (Zob 42:12) Dan mem fason, kan nou pou dan lemond nouvo, Zeova pou beni nou dan enn fason extraordiner. Mem si nou lavi ranpli ar problem azordi, li bien kourt konpare ar lavi eternel ki Zeova pou donn nou dan lemond nouvo. Eski to anvi trouve kouma Zeova pou tini so promes ek pou rekonpans twa dan lemond nouvo? Alor, kontign servi Li avek fidelite!—Mat. 24:13.

KAN NOU TROUV NOU BANN DIFIKILTE DAN ENN MOVE FASON, SA KAPAV FER NOU DITOR

9. Kouma sa kapav fer nou ditor kan nou trouv nou bann difikilte dan enn move fason?

⁹ Kan nou gagn bann difikilte, nou sitiasion kapav plis anpire si nou koumans pans bann kitsoz ki fos. Par exanp, nou kapav koumans panse ki se akoz Zeova ki nou pe gagn sa bann difikilte-la. Pandan enn moman, Zob ti panse ki se akoz Zeova ki li ti pe gagn bann leprev. Ek parski li ti pans koumsa, li ti esey montre ki li pli drwat ki Zeova. (Zob 32:2) Noemi osi ti koumans akiz Zeova akoz bann maler ki li ti pe gagne. (Rit 1:13, 20, 21) Si Zob ek Noemi ti kontign ena sa move fason panse-la, zot ti pou gat zot lamitie ar Zeova. (Prov. 19:3) Selman, Zeova ti ed zot pou konpran ki Li pa ti pe pini zot, me plito ki Li ti pe pran zot swin. Ek parski zot ti res fidel anver Li, Li ti rekonpans zot.

10. Kan nou gagn bann difikilte, ki kitsoz nou kapav demann nou-mem?

¹⁰ Mem si nou sir ki se pa akoz Zeova ki nou gagn bann difikilte, li kapav arive ki nou demann nou-mem si Li ankor gagn nou traka. Si nou pans koumsa, sa kapav dekouraz nou, ek lerla nou kapav trouv sa pli difisil pou servi Zeova. (Prov. 24:10) Lerwa David ek profet Abakouk ti gagn boukou difikilte dan zot lavi. Ek parfwa, zot ti demann zotmem si Zeova ti vremem tann zot bann lapriyer. (Ps. 10:1; Abak. 1:2) Me kanmem sa, zot ti kontign priye Zeova, ek Zeova ti soutenir sa de zom fidel la. To kapav sir ki Zeova pou fer parey pou twa!—Ps. 10:17.

11. Ki kapav arive si nou pa trouv nou bann leprev parey kouma Zeova anvi nou trouv zot?

¹¹ Si nou pa trouv nou bann leprev parey kouma Zeova anvi nou trouv zot, nou kapav koumans panse ki Zeova pa gagn drwa les nou soufer. Si nou pans koumsa, nou pou bien dekouraze kan nou gagn bann leprev. (1 Pier 4:12) Anou gete seki nou kapav aprann ar lexanp bann disip Zezi. Kan Zezi ti dir zot ki bann dimounn ti pou persekit li ek touy li, zot ti panse ki sa pa ti pou arive. (Lik 18:33, 34) Par exanp, mem si Zezi ti fini dir so bann disip ki li ti pou bien soufer avan ki li mor, Pier ti panse ki Zeova pa ti pou les Zezi soufer koumsa. Zezi ti kone ki sa ti fer parti volonte Zeova ki li soufer ek li mor, ek li ti anvi obeir Zeova. Selman, si li ti les Pier inflians so fason panse, Zezi ti kapav trouv sa difisil pou kontign fer volonte Zeova. Se pou sa rezon-la ki li ti koriz Pier. (Mark 8:31-33) Mem apre lamor Zezi, bann disip pa ti konpran deswit kifer li ti bizin mor. Kanmem sa, Zezi ti kontign kontan zot ek li ti kontign ed zot. Kan li ti koz ar zot apre ki li ti resisite, li ti “explik [zot] bann Lekritir dan enn fason kler” ek li ti ed zot pou konpran kifer li ti bizin soufer ek mor. (Lik 24:25-27, 32, 44-48) Kan bann disip ti reflesi lor seki Zezi ti ansegn zot, sa ti ed zot pou prepar zot pou bann persekision ki zot ti pou gagne apre. Nou osi, kan nou reflesi lor seki Labib dir lor bann leprev ek lor persekision, sa pou ed nou pou andir ninport ki leprev ki nou gagne.

12. Ki kapav arive si nou pa trouv nou sitiasion parey kouma Zeova anvi ki nou trouv li?

¹² Si nou pe pas par enn sitiasion difisil ek ki nou pa trouv li parey kouma Zeova anvi nou trouv li, sitiasion-la kapav plis anpire. Zezi ti montre kouma enn kitsoz koumsa kapav arive kan li ti servi lexanp bann travayer enn karo rezin. Sertin parmi sa bann travayer-la ti plengne ar met-la parski zot ti panse ki zot lapey pa ti ase. Selman, met-la ti dir enn parmi zot: “Mo kamarad, mo pa’nn fer twa okenn ditor.” (Mat. 20:10-13) Kan met-la ti fer zot lapey, zot ti panse ki zot ti merite gagn plis kas. Ek parski zot pa ti gagn plis, zot ti panse ki met-la ti inzis anver zot. Selman, sa ti fos! Azordi, sertin frer ek ser kitfwa ena mem santiman kan zot perdi enn privilez, ouswa kan zot pa’nn gagn enn privilez ki zot panse zot merite gagne. Ki kitsoz kapav ed nou pou ena mem fason panse ki Zeova kan nou pas par enn sitiasion difisil?

SEKI NOU BIZIN FER KAN NOU GAGN BANN DIFIKILTE

13. Ki kitsoz kapav arive kan nou gagn bann difikilte?

¹³ Nou kone seki Labib dir lor bann difikilte, ek bien souvan nou servi bann verse Labib pou ankouraz lezot kan zot gagn bann difikilte. Selman, kan nou nou gagn bann difikilte, kitfwa li pa touletan fasil pou nou trouv nou bann difikilte parey kouma Zeova anvi ki nou trouv zot. Par exanp, nou kapav koumans panse ki Zeova pe pini nou, ouswa ki Li pa pe tann nou bann lapriyer. Si parfwa nou ena sa bann santiman-la, ki nou bizin fer pou ki nou kapav trouv nou bann difikilte parey kouma Zeova anvi nou trouv zot?

14. Pou ki kitsoz to kapav priye kan to gagn bann difikilte? (Filipien 4:13)

¹⁴ Priye Zeova ek demann Li pou ed twa. Dir Zeova seki pe fer twa soufer ek osi lefe ki sa ena lor twa. Si to anvi ki Li fer enn kitsoz presi pou twa, priye pou sa. Demann Li so lespri sin, so sazes, ek lafors ki to bizin pou ki to kapav andir to sitiasion. Selman, pa bliye ki Zeova kapav reponn to lapriyer dan enn fason ki to pa atann. (Efe. 3:20) Li kapav osi servi so bann anz ek to bann frer ek ser pou ed twa. (Ps. 34:7) Alor, esey trouve kouma Li pe ed twa, aksepte so led, ek remersie Li pou sa. Zeova bien zenere kan Li donn so lespri sin, ek so lespri sin kapav ed twa pou fer fas ar ninport ki difikilte.—Lir Filipien 4:13.

15. Ki kitsoz kapav ed nou pou andire kan nou gagn bann difikilte? (Get zimaz osi.)

¹⁵ Kontign fer bann kitsoz ki pou fer to lamitie ar Zeova vinn pli for. Kan to gagn bann difikilte, to kapav trouv sa difisil pou kontign gard to bann bon labitid spiritiel. Selman, se dan sa moman-la mem ki to bizin fer plis zefor pou pans parey kouma Zeova. Alor, kontign lir ouswa kontign ekout bann kitsoz ki pou fer twa ena mem fason panse ki Zeova. (Ps. 119:143) Kontign lir to Labib toulezour, reflesi lor seki to’nn aprann, ek fer bann resers lor la. Fer to maximum dan predikasion, ek kontign asiste ek partisipe dan bann renion. Pa res dan to kwin. (Prov. 18:1) Okontrer, kontign res pros ar to bann frer ek ser.

16. Ki bann dout to kapav ena kan to gagn bann difikilte, ek kouma to kapav sirmont zot? (2 Korintien 10:4, 5)

¹⁶ Servi Labib pou sirmont bann dout ki to ena. Kan to gagn bann difikilte, li kapav arive ki to koumans pans bann kitsoz ki fos lor twa ouswa lor Zeova. Si sa arive, ki kitsoz kapav ed twa pou rezet sa fason panse-la? (Lir 2 Korintien 10:4, 5.) Si to ena bann dout, servi “konesans Bondie” ki ena dan Labib ek dan nou bann piblikasion pou sirmont sa bann dout-la. Par exanp, eski to ena bann dout lor lamour ki Zeova ena pou twa ek to panse ki to nepli ena so faver? Si wi, etidie lor lexanp lapot Pol. Mem si Pol ti bien aktif dan predikasion, li ti ena boukou problem dan so lavi. Selman, li ti kontign prese avek fidelite malgre so bann problem, ek li ti sir ki sa ti fer Zeova ek Zezi plezir. (2 Kor. 11:23-27) Eski to ena bann dout lor pardon Zeova ek to panse ki Li pa’nn pardonn bann pese ki to’nn fer dan lepase? Si wi, fer enn lalis bann verse ki montre ki Zeova pardonn bann pese. (Iza. 43:25) Apre sa, lir sa bann verse-la ek pran letan pou reflesi lor la. (Ps. 119:97) Eski inn ariv twa, ouswa enn kikenn ki to kontan, enn move kitsoz ek to ena bann dout lor kapasite ki Zeova ena pou protez so bann serviter? Si wi, fer bann resers lor bann size kouma par exanp, kifer Zeova les bann dimounn soufer, ek kouma Li protez nou lor plan spiritiel mem kan nou gagn bann difikilte. (Ps. 91:9-12) To kapav osi lir biografi bann frer ek ser ki’nn reisi andir zot bann difikilte.a

17. Ki nou bizin fer kan nou gagn bann difikilte?

¹⁷ Pou linstan, kitfwa to pena okenn gro problem dan to lavi. Alor, remersie Zeova ek pran letan pou reflesi lor bann bon kitsoz ki Li donn twa. (Ekle. 7:14) Ek kan to gagn bann difikilte, fer zefor pou trouv zot parey kouma Zeova anvi to trouv zot, ek kontign fer Li konfians. Si to fer sa, Li pou trouv “enn mwayin pou [to] sorti ladan, pou ki [to] kapav andir sa.” (1 Kor. 10:13) Me ki nou bizin fer kan nou bann frer ek ser gagn bann difikilte, ek kouma nou kapav ed zot? Nou pou reponn sa kestion-la dan prosin lartik.