“Bondie Laverite” Touletan Tini So Bann Promes

1. Dapre Psom 31:2-5, kifer nou kapav fer Zeova konfians?

NOU pe viv dan enn lemond kot boukou dimounn koz manti ek zot azir kouma tret anver lezot, ek akoz sa, nou kapav trouv sa difisil pou fer lezot konfians. Par exanp, boukou dimounn ki ena bann biznes, zot malonet, ek bien souvan zot koz manti pou ki zot kapav vann zot bann marsandiz. Parfwa, mem nou bann bon kamarad pa tini bann promes ki zot fer. Parkont, nou kapav touletan fer Zeova konfians parski Li “Bondie laverite.” (Lir Psom 31:2-5.) Zame Li pa koz manti, ek tou seki Li dir li laverite. Alor, nou kapav sir ki Li pou touletan tini so bann promes.

2. Ki nou pou examine dan sa lartik-la?

² Dan sa lartik-la, nou pou get sertin rezon kifer nou kapav fer Zeova foul konfians. Apre sa, nou pou gete kouma Zeova, Bondie laverite, pou detrir move lemond Satan, ek osi seki Li pe deza fer depi aster-la pou ki So proze realize. Sa lartik-la pou motiv nou pou vinn bann Temwin Zeova ki ena kouraz ek ki pa per pou dir bann dimounn laverite lor Zeova.

KIFER NOU KAPAV FER BONDIE LAVERITE KONFIANS?

3. Kifer nou kapav fer Zeova foul konfians?

³ Nou kapav fer Zeova konfians parski Li nou Kreater. Li’nn kree lesiel ek later, ek Limem “lasours lavi.” (Zen. 1:1; Ps. 36:9; Rev. 4:11) Lor later, Li’nn kree tou seki nou bizin pou ki nou kapav viv. Par exanp, Li’nn kree ler ki nou respire ek delo ki nou bwar. Li’nn touletan ek Li pou touletan ena kontrol lor liniver. Alor, parski Zeova Li nou Kreater, Li Tou-Pwisan, ek Li ena boukou sazes, nou kapav fer Li foul konfians pou diriz nou lavi, ek nou kapav sir osi ki Li pou donn nou enn zoli lavenir.

4. Kouma nou kone ki Zeova kontan nou?

⁴ Nou kapav fer Zeova konfians parski Li kontan nou. Li’nn kree nou, parski Li anvi ki nou viv ek ki nou ena enn zoli lavi parey kouma Li. Li’nn kree nou “dan [so] resanblans” pou ki nou kapav ena bann zoli kalite, kouma lamour ek bonte. (Zen. 1:26) Li’nn osi donn nou liberte pou swazir, ek enn zoli plas pou nou reste, setadir nou planet Later. (Ps. 115:16) Kan Li ti kree Adan ek Ev, Li ti donn zot enn zoli travay pou fer. Zot ti bizin fer later vinn enn paradi. (Zen. 1:28; 2:15) Li ti osi donn zot boukou kitsoz, kouma par exanp bann bon manze, enn gran kantite plant ek zanimo, ek bann lezot kitsoz ankor. Li ti fer sa pou ki zot ere ek ki zot ena enn zoli lavi. Wi, tousala montre ki “Zeova li touletan montre lamour fidel.”—Ps. 103:17.

5. (a) Kan Adan ek Ev ti dezobeir Zeova, ki Li ti fer pou ki Li tini so promes? (b) Sit sertin promes ki Zeova inn tini. (Get lankadre “Zeova Touletan Tini So Bann Promes.”)

⁵ Nou kapav fer Zeova konfians parski Li touletan tini so bann promes. Zeova pa’nn kree later “pou nanye, me [li’nn] form li pou ki dimounn res lor la.” (Iza. 45:18, 19) Kan Adan ek Ev ti rebel kont Zeova ek ki zot ti dezobeir Li, Zeova ti kondann zot amor. Akoz sa, sertin ti kapav panse ki proze Zeova zame pa ti pou realize. Selman, Zeova Li touletan tini so bann promes. (Iza. 46:10, 11) So proze pou ranpli later ar bann dimounn ki drwat, pa ti sanze. Se pou sa rezon-la ki Li ti les Adan ek Ev gagn bann zanfan, ek ki Li’nn avoy So Garson lor later pou li donn so lavi pou nou, pou ki nou kapav ena lespwar pou viv pou touletan.—Zan 3:16.

BONDIE LAVERITE PE REALIZ SO PROZE

6. Ki Zeova ti predir apre ki Adan ek Ev ti rebel kont Li?

⁶ Se Satan, “sa premie serpan-la, limem ki apel Diab,”a ki ti pous Adan ek Ev pou rebel kont Zeova. (Rev. 12:9; Zen. 3:4, 5; Zan 8:44) Ek akoz sa, Zeova ti predir ki Satan ti pou detrir. (Zen. 3:15) Me avan ki sa arive, boukou dimounn ti pou swiv Satan ek zot ti pou fer bann move kitsoz parey kouma li. Selman, sertin dimounn ti pou res fidel ar Zeova.

7. Kisann-la pe swiv Satan azordi, ek ki pou ariv zot?

⁷ Parmi bann ki pe swiv Satan azordi, ena bann anz ki’nn rebel kont Zeova ek bann dimounn ki pa anvi obeir Li. Ek parski zot pe opoz zot ar Zeova, zot form parti dan desandans Satan. Me dan ler ki Zeova inn fixe, Satan ek tou bann ki swiv li pou detrir net.—Dan. 2:44; Rom. 16:20.

8. Ki Zezi ti fer an 1914? (Get zimaz osi.)

⁸ Ki prev nou ena ki Zeova pou kapav tini so promes pou detrir Satan ek tou bann ki swiv li? An 1914, Zeova inn fer Zezi vinn Lerwa, ek Zezi inn koumans enn lager ar Satan ek so bann demon. Lerla, li’nn zet zot lor later. (Rev. 12:7-9) Ek mem si sa lager-la ti dan lesiel, bann dimounn lor later inn santi bann konsekans sa lager-la. Labib dir: “Maler pou later ek pou lamer, parski Lediab finn desann kot zot; li dan enn gran koler parski li kone ki li ena zis enn tigit letan.” (Rev. 12:12) Depi 1914, lobzektif prinsipal Satan se pou fer maximum dimounn swiv li, ek akoz sa ena deplizanplis problem lor later. Selman, biento Zezi pou “konplet so viktwar” ek li pou detrir Satan ek tou bann ki swiv li. (Rev. 6:2) Lerla, tou bann ki lor later ek dan lesiel pou kone ki Satan ti pe fann bann foste lor Zeova. (Ps. 45:4-6) Ek zot pou kone osi ki Zeova Li Bondie laverite!—Eze. 38:23.

Premie Lager Mondial: U.S. National Archives photo; enn bom atomik: USAF photo; pandemi: blvdone/stock.adobe.com; manifestasion: inhauscreative/E+ via Getty Images

BONDIE LAVERITE RASANBLE TOU BANN KI KONTAN LAVERITE

9. Kisann-la Zeova pe rasanble azordi?

⁹ An-atandan, Zeova pe rasanble “tou bann kitsoz dan Lekris, bann kitsoz ki dan lesiel ek bann kitsoz ki lor later.” (Efe. 1:10) “Bann kitsoz ki dan lesiel” se bann Kretien ki ena lesperans pou al dan lesiel. Se Zeova ki swazir zot pou al regn ansam ar Zezi dan lesiel. “Bann kitsoz ki lor later” se bann dimounn ki pou viv pou touletan lor later ki pou vinn enn paradi. Sa bann serviter Zeova la fer boukou zefor pou ed lezot pou aprann laverite lor Zeova ek pou montre bann dimounn ki Satan li enn gro manter.

10. Kouma Zeova pe ed bann dimounn pou konn laverite lor Li? (Revelasion 14:6, 7)

¹⁰ Azordi, Zeova pe servi so bann serviter pou pres laverite lor Li partou dan lemond ek pou rasanble bann dimounn ki anvi konn laverite lor Li. Sa se pli gran travay predikasion dan listwar! (Lir Revelasion 14:6, 7.) Mem si Zeova pe servi nou pou fer bann dimounn konn laverite lor Li, Li servi bann anz pou gid bann dimounn ki ena enn leker sinser ver nou. Ek kan nou ed bann dimounn pou konn laverite lor Zeova, nou ed zot osi pou konpran ki Satan pe servi fos relizion pou fann bann foste lor Zeova. (Rev. 18:2, 4) Biento, tou bann fos relizion pou detrir net, ek tou bann ki kontan Bondie pou donn Li laglwar ki Li merite.—Rev. 17:16.

11. Kouma nou kapav kone kisann-la bann vre serviter Zeova?

¹¹ Azordi, Zeova pe rasanble bann dimounn partou lor later pou ki zot form parti dan so fami. (Rev. 7:9, 10) Kan sa bann dimounn-la tann “bon nouvel,” zot konpran ki se laverite ek zot anvi form parti dan fami Zeova. (Mark 13:10) Azordi, li pe vinn deplizanpli fasil pou kone kisann-la pe servi Zeova dan bon fason. Se samem ki profet Malaki ti predir, kan li ti dir: “Ankor enn fwa, zot pou trouv diferans ant enn bon dimounn ek enn move dimounn, ant enn dimounn ki pe servi Bondie ek enn dimounn ki pa pe servi Li.” (Mal. 3:18) Wi, gras-a zot predikasion ek zot bon kondwit, bann serviter Zeova montre ki zot pe ador Bondie laverite.

12. Kan nou prese, kouma nou ede pou ki proze Zeova realize?

¹² Kan nou pres “bon nouvel lor Rwayom,” nou obeir lord Zezi ek nou osi realiz bann profesi. (Mat. 24:14; 28:18-20) Gras-a predikasion, partou dan lemond bann dimounn pe vinn bann disip Zezi, ek zot pe osi gagn posibilite pou servi Bondie laverite pou touletan. Wi, nou kapav ede pou ki proze Zeova realize, ek sa se enn gran loner ki Li fer nou!

NOU KAPAV SIR KI ZEOVA POU TINI SO BANN PROMES

13. Kisann-la sirtou Satan pe persekite, ek kifer?

¹³ Satan bien ankoler parski li kone ki “ena zis enn tigit letan” avan ki so move lemond detrir. (Rev. 12:12, 13) Akoz sa, li persekit sirtou bann ki Zeova inn swazir pou al regne ansam ar Zezi dan lesiel. Kifer? Parski se zot “ki obeir bann komannman Bondie ek ki ena sa travay-la: pou rann temwaniaz lor Zezi.” (Rev. 12:17; 14:12) Anplis, Satan persekit osi tou bann ki soutenir zot ek travay ki zot pe fer.

14. Ki pou arive kan Satan pou atak pep Zeova? (Get zimaz osi.)

¹⁴ Apre destriksion Gran Babilonn, bann ki swiv Satan pou esey detrir pep Zeova. Lerla, lager Armagedon pou koumanse. (Rev. 16:13, 14, 16) Zezi ek so larme ki dan lesiel pou sov bann serviter Zeova ek zot pou detrir net tou bann move kitsoz ki ena dan lemond Satan. (Rev. 19:19-21) Nepli pou ena okenn manter, okenn tret, ek okenn move dimounn. (Rev. 21:8) Lerla, tou bann ki dan lesiel ek lor later pou kone ki Zeova touletan fer seki drwat ek ki Li touletan koz laverite.

15. Kifer nou sir ki Zeova pou tini so bann promes? (Izai 65:16, 17) (Get zimaz osi.)

¹⁵ Azordi, partou dan lemond, ena deplizanpli divizion. Selman, avek led Zeova, nou so bann serviter, nou pe viv dan linite. Anplis, Zeova pe kontign rasanble tou bann ki kontan laverite pou ki zot form parti dan so fami. Nanye pa kapav anpes Zeova beni so bann serviter ek travay ki zot pe fer pou Li! (Lir Izai 65:16, 17.) Wi, nou kapav sir ki Zeova pou tini tou so bann promes! Kifer? Parski dan Romin 8:38, 39, lapot Pol fer nou konpran ki “ni lamor, ni lavi, ni bann anz, ni bann gouvernman, ni bann kitsoz ki ena aster-la, ni bann kitsoz ki pou ena apre, ni bann pwisans, ni oter, ni profonder, ni okenn lezot kreasion pa pou kapav separ nou ar lamour ki Bondie ena pou nou ek ki dan Kris Zezi nou Segner.”

16. Kifer to kapav fer Zeova foul konfians?

¹⁶ Nou ena bann bon rezon pou fer Zeova konfians: Li touletan tini so bann promes, Li nou Kreater, ek Li bien kontan nou. Zeova pe osi rasanble bann dimounn dan lemond antie pou ki zot kapav servi Li. (Iza. 60:22; Zaka. 8:23) Nou kone ki Li pou realiz so proze, ek ki biento Li pou detrir Satan ek tou bann foste ki li’nn fane lor Li. Akoz sa, parey kouma David, nou kapav priye nou Bondie ek nou dir: “Ki Zeova Bondie . . . beni, Li tousel ki fer bann travay extraordiner. Ek ki so gran nom beni pou touletan, ek ki so laglwar ranpli later antie.”—Ps. 72:18, 19.