Zeova Inn Form Mwa Depi ki Mo Bien Zenn

Me avan ki mo kontigne, les mo rakont zot mo zistwar depi koumansman. Mo’nn ne dan Calgary, dan Kanada, pandan Deziem Lager Mondial. Ver lafin bann lane 1940, enn zenn pionie ki apel Donald Fraser ti tap nou laport ek mo mama ti aksepte enn letid Labib. Li ti bien kontan bann verite ki li ti pe aprann dan Labib. Selman, li pa ti kapav asiste bann renion souvan parski li ti bien malad. Kanmem sa, li ti fer bann progre ek li ti pran batem an 1950. Malerezman, mwins ki de-z-an apre, mo mama ti mor. Sa lepok-la, mo papa pa ti enn Temwin Zeova, selman li ti aksepte ki bann Temwin fer diskour lanterman mo mama.

De-trwa zour apre lanterman, Alice, enn vie ser ki ti ena lesperans pou al dan lesiel, ti invit mwa pou vinn Lasal. Li ti konn mwa parski mo ti abitie al renion dan wikenn ar mo mama kan so lasante ti permet li al renion. Mo ti demann mo papa si mo ti kapav ale. Li ti aksepte ek li ti desid pou vinn ar mwa “zis sa zour-la,” pou li remersie sa frer ki ti fer diskour lanterman la. Sa swar-la, ti ena Lekol Minister Teokratik ek Renion Servis. Mo papa ti swiv enn kour lor kouma pou koze an piblik, alor sa renion-la ti bien inpresionn li. Depi sa premie renion-la, mo papa ti koumans asiste Lekol Minister Teokratik ek Renion Servis sak semenn. Avek letan, li ti koumans asiste bann lezot renion osi.

Sa lepok-la, kan sa frer ki ti responsab Lekol Minister Teokratik la ti koumans so renion, li ti dir nom tou bann ki ti aksepte fer enn size, ek zot ti reponn, “Prezan.” Enn zour, mo ti demann frer-la pou dir mo nom pou prosin renion. Frer-la ti felisit mwa, selman li pa ti demann mwa si mo ti konpran seki sa vedir.

Mo pa ti konpran ki mo ti pe port mwa volonter pou fer enn size dan Lekol. Mo ti zis anvi ki frer-la dir mo nom. So semenn apre, kan frer-la ti dir mo nom, mo ti bien kontan ek mo ti reponn, “Prezan.” Ek apre renion, bann frer ek ser ti bien felisit mwa. De-trwa semenn apre, mo ti gagn sa ti papie lor ki mo koze dan koumansman sa lartik-la.

Mo ti move strese! Sa lepok-la, bann zelev ti bizin fer enn size sis-a-wit minit, ek pa ti ena zis lektir Labib kouma aster-la. Mo papa ti ed mwa pou prepar mo size ek li ti fer mwa repet sa 20 fwa. Apre ki mo ti fer size-la, frer ki ti responsab Lekol ti donn mwa bann bon konsey. Avek letan, Zeova inn servi mo papa, bann frer ek ser ki ena lexperyans, ek So lorganizasion pou kontign form mwa.

ZEOVA KONTIGN FORM MWA

Alice ti form mwa kan mo ti koumans prese. Sa lepok-la, kan nou ti zwenn enn dimounn dan predikasion, nou ti bizin lir trwa verse Labib ar li, avan ki nou donn li enn liv. Kan ti ariv mo tour pou prese, Alice ti prezant limem, li ti koumans konversasion-la, ek li ti demann mwa pou lir premie verse Labib la. Apre sa, mo ti kontign konversasion-la, mo ti lir deziem ek trwaziem verse la, ek mo ti donn dimounn-la piblikasion-la. Avek letan, mo ti aprann kouma pou koumans enn konversasion par momem. Kan mo papa ti pran batem ver lafin lane 1954, li ti kontign form mwa pou prese. Mem si mo pa ti ena mama, mo papa ti fer tou seki li kapav pou ki mo kontan Zeova. Renion ek predikasion ti bien inportan pou mo papa. Alor, mo ti touletan kone seki nou ti pou fer bann zour kot ena renion, ek osi dan Samdi ek Dimans gramatin.

Mo’nn al lekol pandan 12 an, ek mo’nn aprann boukou kitsoz ki’nn ed mwa toutlong mo lavi. Par exanp, mo konpran bien Matematik ek gramer Angle. Dan klas Angle, mo’nn aprann kouma pou ekrir bann zistwar, ek ziska zordi, sa pe bien ed dan mo travay pou Departman Redaksion.

Bann dimounn souvan demann mwa kifer mo kontan lamizik. Avredir, mo bann paran ti bien kontan lamizik. Akoz sa, kan mo ti ena set an, mo ti koumans pran leson piano. Selman, mo profeser pa ti satisfe ar mwa, ek li ti dir mo papa fer mwa aret pran leson-la. Mo konpran kifer li ti dir sa, parski sa lepok-la mo ti pa ti interese ar bann leson.

Apre de-trwa mwa, mo papa ti rod enn lot profeser lamizik. Mo ti aprann sante ek zwe piano, ek sann fwa-la, mo ti bon dan toule-de. Kan mo ti tipti, mo ti ena enn zoli lavwa ek mo ti gagn plizir konpetision. Mo ti anvi vinn enn profeser lamizik ek gagn ase kas pou mo fer pionie. Selman, mo ti konpran ki mo ti pou bizin pas tro boukou letan pou etidie lor lamizik ek pou prepar mwa pou bann lexame. Alor, an 1963, mo ti aret mo bann letid ek mo ti vinn pionie permanan.

SERVIS PIONIE DONN MWA BOUKOU LAZWA

Apre ki mo ti fer pionie pandan enn an, lorganizasion ti avoy mwa kouma pionie spesial dan Kapuskasing, dan Ontario. Mo konpagnon servis, Daniel Skinner, ti boukou pli gran ki mwa. Li ti montre mwa boukou kitsoz lor kouma enn lasanble fonksione. Ek laz 20 an, mo ti form parti Komite Servis Lasanble. Alor, mo ti ena boukou kitsoz pou aprann. Mo extra kontan ki lorganizasion pe rekoumans ankouraz nou pou form bann zenn frer. Si sa bann frer-la travay dir, zot pou itil pou Zeova mem si zot bien zenn!

Li pa ti touletan fasil pou viv dan Kapuskasing. Pandan liver, tanperatir ti kapav desann ziska mwins 44 degre (-44°C) ouswa parfwa li ti kapav “mont enn tigit” ziska mwins 33 degre (-33°C). Daniel ek mwa, nou ti pres inpe partou dan sa teritwar-la. Selman, enn parmi bann lazwa ki mo’nn gagne dan sa lafektasion-la, se ki mo ti zwenn enn ser ki apel Linda Cole, ki apre inn vinn Linda Splane.

Linda ti bien kontan prese ek li ti ena bann bon vizit. Li ti bien zenere, li ti zanti, ek li ti kontan pas letan ar lezot. So mama ti apel Goldie ek so papa ti apel Allen. Linda ti osi ena de frer ki ti apel John ek Gordon. Goldie ti enn ser bien fidel. O-koumansman, Allen, pa ti kontan bann Temwin Zeova. Me kanmem sa, Goldie ti amenn so trwa zanfan renion souvan ek li ti montre zot kouma pou prese. Goldie, Linda, John, ek Gordon, toule kat ti servi kouma pionie. Ek boukou lane plitar, Allen ti vinn enn Temwin Zeova ek li ti ede boukou dan lasanble.

An 1965, mo ti gagn linvitasion pou asiste Lekol pou Bann Frer Nome pandan enn mwa dan Betel Kanada, pou mo gagn plis formasion. Pandan sa lekol-la, mo ti gagn lankourazman pou ranpli enn form pou fer Lekol Galaad. Mo ti ranpli form-la, mem si mo ti panse ki zame mo ti pou kapav vinn enn misioner. Mo ti gagn linvitasion pou asiste 42^em klas Lekol Galaad. Dan klas-la, nou bann formater souvan ti koz lor bann progre ki nou ti pe fer, ek depi koumansman mem, zot ti ankouraz mwa pou aprann tou seki mo kapav lor lorganizasion. Sa lepok-la, mo ti ena zis 21 an, alor sa ti enn extra bon konsey.

Dan Lekol Galaad, mo ti aprann kouma pou korper ek kominik avek bann ki travay dan bann stasion radio ek televizion, ek ki ekrir bann zournal. Mo ti trouv sa bien interesan. Selman, mo pa ti atann ki sa formasion-la ti pou bien ed mwa dan lavenir. Taler nou pou koz inpe lor la.

MO GAGN LAFEKTASION POU AL SERVI DAN SENEGAL

De-trwa zour apre ki nou ti gagn nou diplom, Michael Höhle, mo konpagnon servis, ek mwa, nou ti al dan nou lafektasion dan Senegal, dan Lafrik. Sa lepok-la, ti ena apepre 100 proklamater laba.

Apre plizir mwa dan mo lafektasion, mo ti gagn linvitasion pou travay dan biro nasional enn fwa par semenn. “Sa biro nasional la” ti zis enn lasam dan enn lakaz misioner. Se Frer Emmanuel Paterakis, ki ti responsab biro nasional la. Mem si nou biro nasional ti bien sinp, Frer Paterakis ti touletan rapel mwa ki sa biro-la ti reprezant lorganizasion Zeova dan sa pei-la. Enn fwa, Frer Paterakis ti demann nou pou ekrir enn let pou ankouraz tou bann misioner. Sa lepok-la, li pa ti fasil pou fer kopi bann let, ek sa ti kout bien ser. Alor, nou ti servi enn masinn tipe pou ekrir sa bann let-la. Nou ti ena boukou travay pou fer, parski nou ti bizin fer sir ki nou pa fer okenn erer.

Sa swar-la, avan ki mo ti retourn kot mwa, Frer Paterakis ti donn mwa enn lanvlop. Li ti dir mwa, “David, Lasosiete inn avoy enn let pou twa.” Plitar, kan mo ti ouver lanvlop-la, mo ti gagn enn parmi bann let ki mo ti ekrir! Sa ti ansegn mwa ki mo bizin ena respe pou lorganizasion, mem si enn biro nasional li tipti.

Mo ti fer kamarad avek boukou frer ek ser dan mo lasanble, ek souvan mo ti pas letan avek zot dan Samdi tanto. Sa bann moman-la ti extra top! Mo ankor gard kontak ar sa bann frer ek ser la. Mo’nn aprann koz Franse, parski sa ti lang ofisiel dan Senegal, ek sa inn bien ed mwa kan plitar mo’nn al vizit bann biro nasional dan diferan pei.

An 1968, Linda ek mwa, nou ti fianse. Pandan plizir mwa, mo ti esey gagn enn travay part-time pou ki Linda ek mwa nou kapav fer pionie dan Senegal. Selman, bann dimounn pa ti gagn drwa pran bann etranze pou travay. Lerla, mo ti bizin retourn Kanada, ek apre nou maryaz, nou ti gagn lafektasion pou servi kouma pionie spesial dan Edmundston, dan New Brunswick, enn ti lavil ki ti trouv lor frontier Quebec.

NOU FER PIONIE DAN NEW BRUNSWICK EK QUEBEC

Dan sa lavil-la, pa ti ena okenn proklamater, ek ti ena bien tigit dimounn ki ti pe etidie Labib. Legliz Katolik ti ena enn gran linflians lor bann dimounn. Lor preske sak lakaz, ti ena enn pano kot ti ekrir, “Nou pa’le bann Temwin Zeova.” Sa lepok-la, nou pa ti tro kas latet kan bann dimounn ti met bann pano koumsa lor zot laport. Alor, nou ti kontign prese lakaz-lakaz, mem si ti ena sa bann pano-la. Sak semenn, Legliz Katolik ti fer pibliye lor zournal: “Anou al rod bann Temwin Zeova ek anou fer zot ale.” Ti ena zis kat Temwin dan sa lavil-la: Victor ek Velda Norberg, ek Linda ek mwa. Alor, nou ti kone ki zot ti pe koz lor nou!

Zame mo pou bliye premie vizit ki responsab sirkonskripsion ti fer laba. Apre ki li ti pas enn semenn avek nou, li ti dir nou: “Tanki zot la, sel kitsoz ki kitfwa zot kapav fer, se ed bann dimounn pou sanz lopinion ki zot ena lor bann Temwin Zeova.” Depi sa zour-la, sa ti vinn nou lobzektif, ek nou ti reisi fer sa! Tigit-tigit, bann dimounn ti koumans trouv diferans ki ti ena ant bann Temwin Zeova, ki ti ena boukou limilite, ek bann pret Katolik, ki ti ena boukou lorgey. Ek aster-la, ena enn ti lasanble dan sa lavil-la.

Apre ki nou ti servi apepre enn an dan sa teritwar-la, lorganizasion ti avoy nou pou al ede dan enn gran lasanble dan lavil Quebec. Nou ti pas sis mwa dan sa lasanble-la, ek nou ti zwenn bann frer ek ser ki ti bien akeyir nou. Apre sa, nou ti gagn linvitasion pou fer servis sirkonskripsion.

Nou’nn servi dan diferan sirkonskripsion dan Quebec pandan 14 an. Nou ti pas bann extra bon moman laba! Bann frer ek ser ti pe gagn bann bon rezilta dan predikasion, ek kan nou ti vizit bann lasanble, souvan nou ti zwenn plizir fami ki ti pe etidie Labib ek ki ti pe progrese pou vinn bann Temwin Zeova!

NOU PA BLIYE NOU BANN FRER EK SER KI FIDEL

Nou bien kontan nou bann frer ek ser dan Kanada, ki viv dan bann rezion kot bann dimounn koz ek swiv kiltir Franse. Zot bien fran, zot zwaye, ek zot ena boukou lantouziasm. Selman, li pa ti fasil pou zot aksepte laverite, parski zot ti gagn boukou lopozision ar zot fami. Par exanp, sertin paran ti dir zot zanfan, “Swa to etidie Labib ar bann Temwin Zeova, swa to kit lakaz!” Malgre sa lopozision-la, zot ti res fidel ar Zeova. Mo sir ki Zeova bien fier kan Li get sa bann zenn-la!

Mo anvi koz osi lor bann pionie permanan ek pionie spesial ki’nn servi avek fidelite dan Quebec. Laplipar parmi zot sorti dan bann lezot rezion dan Kanada. Anplis ki zot ti bizin aprann koz Franse, zot ti bizin osi adapte ar bann dimounn laba, parski Legliz Katolik ti ena enn gran linflians lor sa bann dimounn-la.

Souvan bann pionie spesial ti bizin al servi dan bann teritwar izole kot pa ti ena okenn proklamater. Akoz bann dimounn pa ti kontan bann Temwin Zeova, li ti difisil pou sa bann pionie-la gagn enn plas pou reste, ek li ti pli difisil ankor pou zot gagn enn travay part-time. Zot pa ti ena ase kas pou pey zot lwaye ek pou bann lezot depans. Alor, plizir koup ti bizin res dan enn sel lakaz. Parfwa, ti ena kat, sis, ouswa mem wit dimounn dan enn sel lakaz. Sa bann pionie-la ti fer boukou zefor pou prese. Kan zot ti koumans letid avek enn kikenn, zot ti fer tou seki zot kapav pou ed li. Aster-la, ena boukou proklamater dan Quebec, alor boukou parmi sa bann pionie-la inn al servi dan bann teritwar kot bizin plis proklamater.

Kan nou ti dan servis sirkonskripsion, souvan nou ti fer zefor pou pres ar bann adolesan dan Samdi gramatin. Sa ti ed nou pou konpran bann difikilte ki zot ti pe gagne. Ek aster-la, sertin parmi zot pe servi kouma misioner dan bann lezot pei, ouswa zot inn gagn bann lezot lafektasion.

Sa lepok-la, sertin lasanble pa ti kapav ranbours nou kas pou lesans ek pou manze. Alor, parfwa kan ti ariv lafin dimwa, nou pa ti ena ase kas. Dan sa bann moman-la, nou ti bizin kont net lor Zeova, parski zis Li tousel ti konn nou sitiasion. Selman, zame Li’nn abandonn nou, parski sak semenn nou ti reisi vizit bann lasanble.

MO’NN APRANN BOUKOU AR BANN FRER KI FIDEL

Kan mo ti dan Quebec, mo ti gagn boukou lokazion pou donn temwaniaz lor bann stasion radio ek televizion, ek dan bann zournal. Alor, mo ti extra kontan parski mo ti deza aprann sa bann kitsoz-la dan lekol Galaad. Souvan, mo ti gagn privilez pou travay avek Frer Léonce Crépeault, ki ti enn responsab sirkonskripsion ek ki ti travay souvan avek bann media. Kan li ti koz ar bann dimounn bien inportan ki ti travay dan sa domenn-la, li pa ti rod montre zot ki li ti konn boukou kitsoz. Olie sa, li ti abitie dir: “Misie, mo kamarad ek mwa, nou zis bann predikater. Nou pa tro kone kouma pou koze lor televizion ek lor radio. Me nou lorganizasion inn demann pou fer bann dimounn kone ki biento pou ena enn gran lasanble bann Temwin Zeova. Alor, nou pou bien rekonesan si zot kapav ed nou.” Gras-a so limilite, boukou dimounn ti aksepte pou ed nou.

Plitar, biro nasional ti demann mwa pou travay avek Frer Glen How, enn parmi bann avoka lorganizasion. Nou ti bizin okip bann case difisil, lor ki bann media ti pou koz boukou. Bann formasion ki mo ti gagne dan Lekol Galaad ek avek Léonce ti bien ed mwa. Sa ti enn gran privilez pou travay ansam avek Frer How. Li pa ti per pou defann lorganizasion dan bann lakour, me sirtou, seki pli inportan, li ti ena enn gran lamour pou Zeova.

An 1985, lorganizasion ti demann nou pou al servi dan enn sirkonskripsion dan lwes Kanada, ki pa ti lwin ar lakaz mo papa, pou ki nou kapav pran li swin. Trwa mwa apre, li ti mor. Alor, nou ti kontign nou servis sirkonskripsion dan lwes Kanada, ziska ki an 1989, nou ti gagn lafektasion pou vinn manb lafami Betel Letazini. Savedir ki nou ti bizin kit nou servis sirkonskripsion, ki nou’nn fer pandan apepre 19 an. Pandan tou sa bann lane-la, nou’nn res dan bann santenn lakaz ek nou’nn manz ansam ar bann frer ek ser ki ti bien akeyir nou. Nou extra rekonesan anver tou bann frer ek ser ki’nn ouver zot laport pou nou ek ki’nn donn nou manze!

NOU AL SERVI DAN BETEL LETAZINI

Kan nou ti ariv Brooklyn, mo ti travay dan Departman Servis. Mo pou touletan rekonesan pou formasion ki mo’nn gagn laba. Enn parmi bann leson ki mo’nn aprann, se ki fode pa ki mo panse ki mo konn enn kitsoz avan ki mo konn tou bann detay lor la. An 1998, mo ti koumans travay dan Departman Redaksion, ek ziska zordi, mo ankor pe aprann kouma pou ekrir. Pandan plizir lane, mo ti gagn privilez pou travay ansam ar Frer John Barr, ki ti kordinater Komite Redaksion. Bann formasion ki li’nn donn mwa ek letan ki mo’nn pase avek li, pou touletan ena boukou valer pou mwa. Li ti ena enn zoli personalite ek li ti vremem swiv lexanp Zezi.

Mo bien kontan pou travay ar bann frer ek ser dan Departman Redaksion. Zot ena boukou limilite, parski zot touletan priye Zeova pou Li ed zot dan zot laktivite. Ek zot kone osi ki tou seki zot reisi fer, se gras-a Zeova so lespri sin, ek pa akoz bann kapasite ki zot ena.

Linda ek mwa, nou’nn gagn privilez pou vizit nou bann frer ek ser ki fidel dan 110 pei. Nou’nn trouve ki kantite bann misioner, bann manb Komite Biro Nasional, ek bann lezot serviter aplintan, kontan Zeova. Nou’nn osi trouv kouraz ek fidelite bann proklamater ki pe kontign servi Zeova mem si ena lager, bann problem ekonomik, ek persekision dan zot pei. Nou sir ki Zeova extra kontan zot!

Pandan tou sa bann lane-la, Linda inn bien soutenir mwa pou ki mo kapav asim mo bann responsabilite. Li bien kontan bann dimounn ek li touletan rod bann lokazion pou ed lezot. Li kone osi kouma pou koumans bann konversasion ar bann dimounn dan predikasion. Li’nn ed boukou dimounn pou aprann konn Zeova, ek li’nn osi ed sertin ki ti inaktif pou retourn ar Zeova. Linda vremem enn zoli kado ki Zeova inn donn mwa! Amezir ki nou pe vinn vie, Linda ek mwa nou bien rekonesan anver bann zenn frer ek ser ki pe ed nou pou fer diferan kitsoz.—Mark 10:29, 30.

Kan mo reflesi lor sa 80 lane ki’nn pase la, mo vremem rekonesan ek mo ena mem santiman ki sa ekrivin psom, ki ti dir: “A Bondie, to finn ansegn mwa depi mo zenes, ek ziska aster-la mo pe anons to bann travay extraordiner.” (Ps. 71:17) Mo anvi kontign fer sa tanki mo vivan!