To Kapav Ere Mem Si Bann Dimounn Ena Laenn pou Twa

1. Ki Zezi ti dir, ek kifer bann dimounn ti etone kan zot ti tann sa?

DAN so Sermon lor Montagn, Zezi ti dir: “Kan dimounn ena laenn pou zot, . . . zot ere.” (Lik 6:22) Bann dimounn ki ti pe ekout li, kitfwa ti etone kan zot ti tann sa. Kifer? Parski personn pa kontan kan bann dimounn ena laenn pou zot. Alor, kifer Zezi ti dir sa? Li bon ki nou konn repons sa kestion-la, parski azordi boukou dimounn ena laenn pou bann serviter Zeova. Dan sa lartik-la, nou pou gete kifer bann dimounn ena laenn pou nou, ek osi kifer nou kapav ere kanmem sa.

KIFER BANN DIMOUNN ENA LAENN POU NOU?

2-3. Kifer bann dimounn pou ena laenn pou bann serviter Zeova, ek kan nou konn sa, ki lefe sa bizin ena lor nou? (Zan 16:2, 3)

² Bann dimounn ena laenn pou nou parski nou servi Zeova. Konsernan bann dimounn ki ti pou persekit ek touy so bann disip, Zezi ti dir: “Zot pa’nn arive konn ni mwa ni mo Papa.” (Lir Zan 16:2, 3.) Avredir, kisann-la ki pous bann dimounn pou ena laenn pou bann serviter Zeova? Se Satan, “bondie sa lemond-la.” (2 Kor. 4:3, 4) Satan fer tou seki li kapav pou anpes bann dimounn pou aprann laverite lor Zeova, ek li inflians bann dimounn pou ena laenn pou bann ki konn Bondie ek ki kontan Li. (Zan 8:42-44) Kan nou kone ki se Satan ki pe anbet bann dimounn pou ki zot ena laenn pou nou, ki lefe sa bizin ena lor nou? Sa kapav ed nou pou ki nou pena laenn pou sa bann dimounn-la.

³ Anou get lexanp Pavel,a ki res dan enn pei kot nou laktivite interdi. Pavel ti kontign servi Zeova ar fidelite, ek akoz sa lapolis ti aret li, ti tortir li, ek ti met li an izolman dan prizon pandan plizir mwa. Azordi, Pavel dir: “Pou mwa, li kler ki se Satan ek so bann demon ki pe esey anpes nou servi Zeova. Laplipar dimounn ki travay dan bann prizon, zot pena laenn pou nou. Zot pe zis fer zot travay.” Enn frer ki res Kroasi ti gagn boukou persekision ar so bann paran ki pa Temwin. Li dir: “Azordi, mo konpran ki mo lennmi se Satan, pa mo bann paran.”—Efe. 6:12.

4. Ki leson nou aprann ar lexanp Zezi ek Etienn? (Get zimaz osi.)

⁴ Nou pa deteste bann dimounn ki ena laenn pou nou. Okontrer, nou priye pou zot. (Mat. 5:44) Kan bann dimounn persekit nou, nou fer zefor pou swiv lexanp Zezi ek Etienn. Kan bann solda Romin ti pe koulout Zezi lor poto, li ti fer enn lapriyer ek li ti dir: “Papa, pardonn zot.” (Lik 23:34) Zezi ti pe demann Zeova pou pardonn bann solda ki ti gagn lord pou touy li. Kitfwa li ti pe demann Zeova pou pardonn osi bann dimounn ki ti dan lafoul ek ki ti pe kriye for-for ki bizin touy li. Sa bann dimounn-la kitfwa ti les zot inflianse par Zezi so bann lennmi, setadir bann sef relizie. Zezi ti konpran ki sa bann dimounn-la pa ti vremem kone seki zot ti pe fer. Etienn osi ti demann Zeova pou pardonn bann dimounn ki ti pou touy li. (Zist. 7:58-60) Eski Zeova ti reponn lapriyer Zezi ek Etienn? Wi. Nou konn sa parski boukou dimounn ki ti dakor ar zizman ek lamor Zezi ti repanti, ti koumans ena lafwa dan li, ek zot ti pran batem. (Zist. 2:36-41) Ek Sol, ki ti dakor ki touy Etienn, ti vinn enn Kretien ek li ti bien regret seki li ti fer.—1 Tim. 1:13.

5. Ki nou kapav aprann ar lexanp César?

⁵ Azordi osi, kan nou priye pou bann ki persekit nou, Zeova reponn nou lapriyer. Anou get lexanp César, ki res Veneziela. So papa pa ti kontan laverite ditou ek li ti persekit zot boukou. César dir: “Mo mama ti enn bon madam ek enn bon mama. Mem si li ti touletan met Rwayom Bondie an premie dan so lavi, zame li pa ti negliz mo papa. Li ti touletan ansegn mwa ek mo sink frer ek ser ki nou bizin respekte nou papa. Li ti osi ansegn nou ki nou bizin obeir nou papa, amwin ki li demann nou pou fer enn kitsoz ki pa fer Zeova plezir.” Avek letan, César so papa ti koumans sanze. César dir: “Enn zour, apre ki mo ti priye Zeova ar tou mo leker, mo ti demann mo papa si li ti pou kontan etidie Labib ar mwa. Kan li ti reponn wi, mo leker ti ranpli ar lazwa.” Apre inpe letan, César so papa ti pran batem ek ti vinn enn Temwin Zeova. Li vre ki pa tou dimounn ki persekit nou, ki pou sanze koumsa. Selman, kan zot trouve ki nou ena enn bon kondwit ek ki nou respekte zot, sertin kapav sanz zot latitid anver nou. Ek nou bien kontan kan zot fer sa, pa vre! Alor, nou inpasian pou trouve kouma Zeova, ki sel “Ziz lor later antie” ek ki ena boukou mizerikord, pou atir sa bann dimounn-la ver Li.—Zen. 18:25.

6. Dapre Mark 13:13, pou ki rezon ankor bann dimounn ena laenn pou nou?

⁶ Bann dimounn ena laenn pou nou parski nou fer Zezi konfians. Zezi ti dir ki bann dimounn ti pou ena laenn pou bann vre Kretien “akoz [so] nom.” (Lir Mark 13:13.) Kan Zezi servi lexpresion “akoz [so] nom,” li pe koz lor so bann kalite ek so lotorite kouma Lerwa dan Rwayom Bondie. Bann dimounn ki ena laenn pou nou, se bann dimounn ki fer bann dirizan sa lemond-la konfians, olie ki zot fer konfians Dirizan ki Zeova inn swazir, setadir Zezi. Depi 1914, Zezi li Lerwa dan Rwayom Bondie, ek biento li pou detrir tou bann gouvernman ki rezet so lotorite.

7-8. Sit enn lot rezon kifer bann dimounn ena laenn pou nou? (Zan 15:18-20) (Get zimaz osi.)

⁷ Bann dimounn ena laenn pou nou parski nou diferan ar bann ki dan lemond Satan. Zezi ti dir ki bann dimounn ti pou ena laenn pou so bann disip parski zot “pa fer parti dan lemond.” (Lir Zan 15:18-20.) Parey kouma bann Kretien dan premie siek, nou rezet bann move konportman ek mantalite sa lemond-la. Akoz sa, boukou frer ek ser inn gagn persekision dan zot travay ouswa dan lekol. (1 Pier 4:3, 4) Selman, kan sertin trouve ki nou diferan ar bann dimounn sa lemond-la, avek letan zot sanz zot latitid ek zot koumans respekte nou. Nou bien kontan kan sa arive, pa vre!

⁸ Anou get lexanp Ignacio, ki res dan enn pei dan Lamerik Santral. Kan li ti lekol, enn parmi so bann profeser inn boufonn li pandan plizir lane parski li ti pe swiv bann prinsip moral ki ena dan Labib. Selman, inpe avan ki Ignacio gagn so diplom, profeser-la ti demann li kouma li fer pou swiv bann prinsip Labib mem si bann dimounn pa respekte li akoz sa. Ignacio ti explik so profeser ki bann lalwa Bondie zot enn proteksion pou li, ek li ti invit li pou asiste enn renion. Ignacio ti bien etone kan so profeser ti vinn Lasal. Ek kan profeser-la ti trouv lamour ki ena dan lasanble, li ti telman inpresione ki li ti kontign asiste bann renion ek li ti koumans etidie Labib. Ek mem si li osi li ti gagn persekision parski li ti pe etidie Labib, li ti kontign fer bann progre ek li ti pran batem.

9-10. (a) Sit enn lot rezon kifer bann Kretien zot diferan ar bann ki dan lemond Satan. (b) Ki leson nou kapav aprann ar lexanp lapot Pol?

⁹ Nou diferan osi ar bann dimounn ki dan lemond Satan, parski nou pa mel nou dan bann zafer politik ek nou pa partisip dan bann lager. (Zan 18:36) Nou swiv lord ki ena dan Romin 13:1 ek nou obeir bann lalwa ki gouvernman mete. Selman, parski nou bann Kretien, nou pa mel nou dan politik, ek akoz sa nou pa pou poz kandida ek nou pa pou vot pou personn. Kifer? Parski nou fidel ar Zeova ek ar so Rwayom ki dirize par Zezi. Malerezman, boukou Temwin Zeova inn al dan prizon akoz zot lafwa. Selman, mem dan prizon, zot pe kontign prese. Zot swiv lexanp lapot Pol ki, mem si pandan plizir lane li ti anprizone dan enn lakaz ek ki li ti osi dan prizon, li ti kontign prese. (Zist. 24:27; 28:16, 30) Li ti kontign partaz bon nouvel ar tou bann ki ti ekout li, kouma par exanp bann gard prizon, bann fonksioner lakour, bann gouverner, bann lerwa, ek kitfwa mem ar bann fonksioner ki ti pe travay pou Lanperer Romin Neron.—Zist. 9:15.

¹⁰ Dan mem fason, nou bann frer ek ser ki dan prizon pres ar tou bann ki ekout zot, kouma par exanp bann ziz, bann fonksioner, ek bann gard prizon. Enn frer ti fer plis ki si-z-an dan prizon parski li pa ti partisip dan bann zafer politik. Li dir ki li pa ti konsider sa letan ki li ti dan prizon-la kouma enn pinision, me plito kouma enn lafektasion ki Zeova ti donn li pou rod bann dimounn ki ena enn leker sinser. Alor, nou bizin kontan si Zeova servi nou pou pres bon nouvel ar sa bann dimounn-la! (Kol. 4:3) Aster-la, anou get bann lezot rezon kifer nou kapav ere mem si bann dimounn ena laenn pou nou parski nou servi Zeova.

KIFER NOU KAPAV ERE MEM SI BANN DIMOUNN ENA LAENN POU NOU?

11. Kouma nou lafwa vinn pli for kan nou gagn persekision? Donn enn lexanp.

¹¹ Labib ti predir ki bann dimounn ti pou ena laenn pou nou. Dan premie profesi ki’nn ekrir dan Labib, Zeova ti predir ki Satan ek tou bann ki swiv li, ti pou ena laenn pou bann ki kontan Zeova ek ki servi Li. (Zen. 3:15) Zezi osi plizir fwa ti dir ki bann dimounn ti pou ena laenn pou bann ki servi Zeova. (Mat. 10:22; Mark 13:9-12; Lik 6:22, 23; Zan 15:20) Bann lezot ekrivin Labib osi ti dir sa. (2 Tim. 3:12; Zak 1:2; 1 Pier 4:12-14; Zid 3, 17-19) Alor, nou pa etone kan nou gagn persekision. Olie sa, nou ere parski nou kone ki bann profesi Labib pe realize. Se enn prev ki nou pe servi vre Bondie. Enn ser ki res dan enn pei kot nou laktivite lor restriksion, dir: “Kan mo ti donn mo lavi Zeova, mo ti kone ki mo ti pou gagn persekision. Alor, kan sa arive, mo pa etone ek mo pa per.” Ser-la so misie osi ti persekit li. Li ti maltret li ek li ti bril so Labib ek so bann piblikasion. Me olie ki nou ser ti per, so lafwa ti vinn pli for. (Ebre 10:39) Li dir: “Labib inn predir ki nou pou gagn persekision, alor mo ti kone ki sa ti pou arive. Ek kan sa ti arive, sa ti konvink mwa ki mo dan vre relizion.”

12. Ki kitsoz ti ed enn frer pou andir persekision?

¹² Mem si nou kone ki nou pou gagn persekision, kanmem sa li kapav difisil pou nou andire. Enn frer ki ti dan prizon, dir: “Parfwa, mo ti santi mwa tris ek dekouraze, ek mo ti zis plore.” Ki kitsoz ti ed nou frer pou andire? Li dir: “Mo ti touletan priye Zeova. Toulezour, mo ti koumans mo lazourne par lapriyer. Ek sak fwa ki ti ena bann difikilte, mo ti priye Zeova. Kan lezot ti tret mwa dan enn move fason ek ki sa ti fer mwa ankoler, mo ti rant dan saldebin, mo ti ferm laport, ek mo ti priye Zeova.” Nou frer ti osi reflesi lor lexanp bann fidel serviter Zeova dan nou lepok ek dan lepase, ki ti andir bann persekision. Sa ti ed li pou andire ek pou resanti lape ki Zezi ti promet so bann disip.—Zan 14:27; 16:33.

13. Ki kitsoz pli for ki laenn?

¹³ Nou lamour pou Zeova ek pou nou bann frer ek ser pli for ki laenn. Zezi kontan so Papa ar tou so leker. Kan li ti lor later, ziska ki li mor li’nn kontan so Papa ek so bann disip. (Zan 13:1; 15:13) Kan nou ena sa kalite lamour-la pou Zeova ek pou nou bann frer ek ser, nou osi nou pou kapav andire mem si bann dimounn ena laenn pou nou. Kifer nou dir sa? Anou get lexanp lapot Pol.

14. Ki kitsoz ti ed Pol pou res fidel ziska lamor?

¹⁴ Inpe avan so lamor, Pol ti ekrir so bon kamarad Timote, ek li ti dir li: “Lespri sin ki Bondie donn nou li pa fer nou vinn kapon, me li fer nou gagn pwisans, [ek] lamour.” (2 Tim. 1:7) Ki Pol ti pe rod dir? Li ti pe rod dir ki kan enn Kretien ena enn gran lamour pou Zeova, sa kapav ed li pou andir persekision. (2 Tim. 1:8) Ek mem si Pol ti kone ki bann dimounn ti pou touy li parski li ti pe servi Zeova, so gran lamour pou Zeova ti ed li pou ena kouraz ek pou res fidel anver Li.—Zist. 20:22-24.

15. Dan nou lepok, kouma nou bann frer ek ser montre ki zot kontan sakenn zot kamarad? (Get zimaz osi.)

¹⁵ Nou bien kontan nou bann frer ek ser ki pe res fidel ar Zeova malgre persekision! Parey kouma Prisil ek Akila ki ti riske zot lavi pou Pol, azordi ena sertin ki pe met zot lavi an danze pou zot bann frer ek ser. (Rom. 16:3, 4) Par exanp, dan Larisi, kan enn Temwin Zeova pas lakour, boukou frer ek ser al ankouraz li. Enn zour, kan enn ser ti pas lakour, li ti trouve ki enn kantite frer ek ser ti vini pou ankouraz li. Sa ti telman tous li ki, pandan enn moman, li pa ti pe kapav koze. Dan sa ler-la, nou ser ti bien bizin lankourazman, ek kan li ti trouv lamour ki nou bann frer ek ser ena pou li, sa ti redonn li lafors. Wi, nou kapav ere parski nou lamour pli for ki laenn!

16. Kifer lapot Pier ti dir ki nou ena enn bon rezon pou zwaye kan nou andir persekision? (1 Pier 4:14)

¹⁶ Kan bann dimounn persekit nou ek ki nou andire, sa fer nou gagn faver Bondie. (Lir 1 Pier 4:14.) Lapot Pier ti dir ki bann ki andir persekision parski zot pe servi Bondie, zot ena enn bon rezon pou zot zwaye. Kifer zot zwaye? Parski sa bann persekision-la, se enn prev ki “lespri Bondie, li lor zot.” Pier osi ti pas ladan, alor li ti kone ki savedir andir persekision ek ena faver Bondie. Inpe apre Lapantkot lane 33 Nou Lepok, bann sef relizie Zwif ti avoy bann dimounn pou aret Pier ek bann lezot zapot parski zot ti pe prese. Selman, avek kouraz Pier ti defann so lafwa. (Zist. 5:24-29) Ek mem si bann-la ti bat zot, zot pa ti aret prese. Okontrer, zot ti zwaye parski ti “konsider zot dign pou gagn maltrete akoz nom [Zezi].” Nou osi, nou bizin zwaye kan nou reisi andir bann persekision.—Zist. 5:40-42.

17. Ki Zezi ti dir so bann disip lanwit avan so lamor?

¹⁷ Lanwit avan so lamor, Zezi ti dir so bann disip: “Dimounn ki kontan mwa, mo Papa pou kontan li, ek mo pou kontan li.” (Zan 14:21) Nou pe atann avek inpasians lepok kot tou dimounn pou kontan Zeova ek Zezi! Sa lepok-la, personn pa pou ena laenn pou so kamarad parski tou dimounn pou bann serviter Zeova! (2 Tes. 1:6-8) Me ziska ki sa lepok-la arive, anou kontign rapel bann rezon kifer nou bizin ere kan bann dimounn ena laenn pou nou.