Bon Zizman Pou Ed Twa pou Pran Bann Desizion ki Fer Zeova Plezir

1-2. Ki ete bon zizman, ek kouma li kapav ed nou?

ESKI inn deza arive ki enn kikenn pa’nn tret twa avek respe? Eski enn kikenn inn deza ofans twa, ouswa to panse ki enn kikenn ena enn move lopinion lor twa? Ouswa eski inn deza ariv twa enn sitiasion ki’nn fer twa gagn per? Si wi, alor sirman to konpran ki li pa touletan fasil pou azir dan enn bon fason dan sa bann sitiasion-la. Labib koz lor enn kalite ki kapav ed nou dan sa bann sitiasion-la. Sa kalite-la se bon zizman.

² Bon zizman se kapasite pou trouv pli devan. Sa kalite-la ed nou pou konpran kifer enn kitsoz inn arive ouswa kifer enn kikenn inn azir dan enn sertenn fason. Kan nou ena bon zizman, sa kapav ed nou pou pran bann bon desizion. Par exanp, bon zizman kapav ed nou pou ‘kontrol nou labous’ ek pou kone kan nou bizin “res trankil.” (Prov. 10:19; Ps. 4:4) Li ed nou pou res kalm kan nou ankoler ek pou pa ofanse vit kan lezot tret nou dan enn move fason. Ek si arive enn sitiasion agas nou, nou pa pou koz brit ek nou pa pou sap lor kal. Bon zizman ed nou pou “ekout bann konsey ek aksepte disiplinn” osi. (Prov. 19:20) Kan nou ena bon zizman, seki nou fer ek seki nou dir, pa zis fer plezir Zeova, me li osi ed nou ek bann ki otour nou pou gagn bann bienfe. Aster-la, anou get trwa zistwar dan Labib ki kapav ed nou pou ena limilite, pou res kalm, ek pou fer Zeova konfians.

ENA LIMILITE OLIE KI TO ENA LORGEY

3. Kisann-la Naamann ti ete?

³ Pou ki nou azir dan enn bon fason, nou bizin ena limilite. (1 Pier 5:5) Bon zizman kapav ed nou pou ena limilite olie ki nou ena lorgey. Kouma? Anou get lexanp Naamann. Naamann ti res dan Siri, enn pei ki ti pre ar lenor Izrael. Li ti enn zom bien inportan parski li ti sef larme Siri. Selman, li ti ena lalep, enn maladi lapo bien grav.—2 Ler. 5:1.

4. Kouma Naamann ti montre ki li ti ena bon zizman?

⁴ Dan lakaz Naamann, ti ena enn tifi Izraelit ki ti servant so madam. Li ti dir madam Naamann ki ti ena enn profet dan Izrael ki ti kapav geri so misie. (2 Ler. 5:2, 3) Naamann ti kapav pans koumsa, ‘Se enn tifi ki enn esklav ki pe dir sa. Lorla, li sorti dan enn pep ki nou lennmi. Eski seki li pe dir kapav vremem ed mwa?’ Selman, Naamann ti ena bon zizman, parski li ti reflesi lor seki sa tifi-la ti dir. Li pa ti azir avek lorgey ek inior seki sa tifi-la ti dir. Okontrer, li ti ena limilite ek li ti pran kont bann parol sa tifi-la. Lerla, avek permision lerwa Siri, Naamann ti al Izrael pou ki li geri.—2 Ler. 5:4, 5.

5. Ki ti ariv Naamann kan li ti ariv Izrael?

⁵ Naamann ti al get Lerwa Zoram dan Izrael pou ki li kapav geri. Selman, Zoram ti panse ki lerwa Siri ti pe vinn lager kont li. Kan profet Elize ti tann sa, li ti demann lerwa pou avoy Naamann pou vinn get li. (2 Ler. 5:6-9) Selman, bann kitsoz pa ti pas kouma Naamann ti anvi. Elize pa ti mem sorti depi so lakaz pou al get Naamann ek pou koz ar li. Olie sa, li ti avoy enn mesaze pou dir Naamann seki li ti bizin fer pou li geri.—2 Ler. 5:10.

6. (a) Kifer Naamann pa ti anvi ekout seki sa mesaze-la ti dir li? (b) Kouma Naamann so bann serviter ti montre ki zot ena bon zizman, ek ki ti arive apre sa? (2 Lerwa 5:13, 14)

⁶ O-koumansman, Naamann pa ti ekout seki sa mesaze-la ti dir li. Li “ti bien ankoler ek li ti ale.” (2 Ler. 5:11, 12) Kifer? Kitfwa li ti panse ki Elize ti bizin montre plis respe anver li parski li ti sef larme Siri. Ek kitfwa li ti panse osi ki Elize ti pe mank respe anver so pei, Siri. Alor, Naamann ti desid pou retourn kot li san ki li geri. Selman, so bann serviter ti ena bon zizman ek zot ti konpran ki Elize ti vremem anvi ed li. Akoz sa, zot ti demann Naamann pou reflesi ek pou sanz so desizion. Lerla, Naamann ti met so lorgey dekote ek li ti montre ki li ti ena limilite parski li ti fer seki Elize ti dir li. Ek kan li ti fer sa, li ti geri!—Lir 2 Lerwa 5:13, 14.

7. Ki leson nou aprann ar lexanp Naamann? (Proverb 22:4) (Get zimaz osi.)

⁷ Ki leson nou aprann ar lexanp Naamann? Nou montre ki nou ena bon zizman kan nou trouv pli lwin ki seki devan nou. Nou montre osi ki nou ena bon zizman kan nou pa les nou bann santiman inflians bann desizion ki nou pran. Bon zizman kapav ed nou pou ena limilite. Avredir, li ed nou pou konpran ki nou pa konn tou kitsoz. Li osi ed nou pou konpran ki parfwa nou bizin led lezot, ek sirtou led Zeova pou konpran enn sitiasion pli bien. Mem si Naamann pa ti ankor koumans servi Zeova, li ti ena limilite parski li ti ekout sa tifi Izraelit la, so bann serviter, ek sirtou Elize, ki ti enn profet Zeova. Naamann ti met so lorgey ek so bann santiman dekote. Gras-a sa, li ti reisi pran enn bon desizion ek li ti geri. Alor, avan ki nou dir ouswa nou fer enn kitsoz, nou bizin reflesi bien. Par exanp, kitfwa enn kikenn inn donn nou enn konsey ki sorti dan Labib, selman nou pa dakor ar li. Kan sa arive, nou bizin reflesi bien lor kouma nou pou reazir parski sa pou montre si nou ena limilite ouswa lorgey.—Lir Proverb 22:4.

RES KALM OLIE KI TO ANKOLER

8. Kan eski nou kapav trouv sa difisil pou res kalm?

⁸ Bon zizman kapav ed nou pou res kalm ek pou nou pa ankoler kan enn sitiasion ki agas nou arive. Biensir, li pa touletan fasil pou fer sa, sirtou si enn kikenn inn koz brit ouswa inn azir dan enn move fason anver nou. (Efe. 4:26) Anou gete kouma David ek Abigail ti montre bon zizman dan enn sitiasion difisil.

9. Kouma Nabal ti tret David?

⁹ Anou gete seki ti arive kan David ek so bann zom ti sove ek ti al dan dezer Parann parski Sail ti pe rod touy David. (1 Sam. 25:1) Kan zot ti dan dezer, zot ti protez bann berze ek bann mouton enn zom ris ki ti apel Nabal. (1 Sam. 25:15, 16) Kan bann zom Nabal ti pe “tay lalenn” bann mouton, David ti avoy so bann zom kot Nabal pou demann li manze. Sa bann zom-la ti al get Nabal ek zot ti koz ar li avek respe ek zantiyes. (1 Sam. 25:6-8) Selman, Nabal pa ti ena rekonesans pou tou seki David ek so bann zom ti fer pou li. Li ti koz brit ar zot ek li ti insilte zot.—1 Sam. 25:10, 11.

10. Kouma David ek Abigail ti montre bon zizman? (1 Samiel 25:32, 33) (Get zimaz osi.)

¹⁰ Si to ti dan plas David, ki to ti pou resanti? Nou konpran kifer David ti bien ankoler, pa vre! David pa ti reisi kontrol so bann santiman ek li ti telman ankoler ki li ti anvi touy Nabal. (1 Sam. 25:13, 21, 22) Selman, kan David ek so bann zom ti pe al fer sa, Nabal so madam, Abigail, ti aret zot. Kifer li ti fer sa? Parski li ti ena bon zizman. Abigail ti konpran ki mem si David ti bien ankoler, li ti enn bon dimounn. Ek akoz sa, li ti anvi fer tou seki li kapav pou kalme David ek pou ed li azir dan enn bon fason. Abigail ti donn David bann kado, ek avek boukou limilite li ti donn David bann bon konsey. (1 Sam. 25:18, 23-31) David ti montre ki li ti ena bon zizman parski li ti ekout bann konsey ki Abigail ti donn li. Li ti osi konpran ki seki Abigail ti dir li, ti montre fason panse Zeova lor sa sitiasion-la. Sa ti ed David pou kalme li ek pou pa fer enn erer bien grav.—Lir 1 Samiel 25:32, 33.

11. Kouma bon zizman kapav ed nou kan nou ena bann bon rezon pou nou ankoler? (Proverb 19:11)

¹¹ Ki leson nou aprann ar lexanp David ek Abigail? Bon zizman kapav ed nou pou gard nou kalm ek pou koz dan enn bon fason, mem si nou ena bann bon rezon pou ankoler. Bon zizman kapav osi ed nou pou reflesi lor konsekans ki nou bann parol ek nou bann aksion kapav ena. (Lir Proverb 19:11.) Kan Abigail ti fer David konpran seki Zeova ti pou resanti si li ti fer enn move aksion, sa ti ed li pou kalme limem. Alor, si enn kikenn ouswa enn sitiasion agas twa ek fer twa ankoler, fode pa to ofanse vit ek to azir san reflesi. (Zak 1:19) Pran letan pou priye Zeova ek pou reflesi lor seki Li panse lor sa sitiasion-la. Sa pou ed twa pou res kalm.

12. Kouma lezot kapav ed nou pou ena bon zizman ek pou res kalm?

¹² Parey kouma Zeova ti servi Abigail pou ed David pou res kalm ek pou konpran So fason panse, azordi osi Zeova kapav servi nou bann frer ek ser pou ed nou pou konpran seki Li panse lor enn sitiasion. Si enn sitiasion fer twa ankoler, koz avek enn Kretien ki ena matirite ek ki kapav ed twa pou trouv bann kitsoz parey kouma Zeova. (Prov. 12:15; 20:18) Ouswa, si enn parmi to bann kamarad ankoler, eski to kapav swiv lexanp Abigail? Eski to kapav ed li pou konpran seki Zeova panse lor sa sitiasion-la? Nou sir ki Zeova pou beni bann zefor ki to fer pou ed lezot pou ena bon zizman ek pou res kalm.

FER ZEOVA KONFIANS OLIE KI TO PER

13. Si enn sitiasion fer nou gagn per, kouma bon zizman kapav ed nou?

¹³ Parfwa, pou ena bann sitiasion ki pou fer nou gagn per. Selman, bon zizman kapav ed nou pou rapel ki Zeova pli pwisan ki ninport kisann-la ek ki ninport ki kitsoz, ek sa kapav ed nou pou fer Li konfians mem si nou per. (Ps. 27:1) Zeova kapav ed nou mem si nou panse ki pena okenn solision pou nou problem. Se seki ti ariv profet Zonas. Li ti bien kontan Zeova, selman li ti gagn per kan Zeova ti donn li enn travay difisil pou fer.

14. Kifer Zonas ti per pou fer travay ki Zeova ti donn li lord pou fer?

¹⁴ Zeova ti demann Zonas pou fer enn kitsoz bien difisil. Li ti bizin al dir bann dimounn dan Niniv ki Zeova ti pou detrir zot. (Zonas 1:1, 2) Fer koumadir Zeova ti demann twa pou fer sa. Ki to ti pou resanti? Zonas ti bizin marse depi Izrael pou al lavil Niniv, ki ti trouv dan Lasiri. Sa ti pou pran apepre enn mwa pou li ariv laba. Zonas ti bizin al koz ar bann Asirien ki ti enn pep bien violan. Labib dir ki Niniv ti enn “lavil ki vers disan.” (Na. 3:1, 7) Akoz sa, olie ki li ti fer travay ki Zeova ti donn li lord pou fer, Zonas ti sove.—Zonas 1:3.

15. Ki kitsoz ti ed Zonas pou fer Zeova plis konfians? (Zonas 2:6-9)

¹⁵ Kan Zonas ti pran enn bato pou al lwin ar Niniv, bann marin ti “zet li dan lamer.” Lerla, Zeova ti fer enn mirak pou sap li, ek sa ti rapel li gran pwisans ki Zeova ena. (Zonas 1:15, 17) Se enn zoli leson ki Zonas ti aprann! Li ti konpran ki li pa ti bizin per pou koz ar bann abitan Niniv parski Zeova ti kapav protez li kont ninport ki danze. (Lir Zonas 2:6-9.) Alor, kan Zeova ti donn li lord pou al Niniv enn deziem fwa, Zonas ti obeir ek li ti al Niniv. Laba, bann dimounn ti ekout so mesaz ek Zeova pa ti detrir zot.—Zonas 3:5.

16. Kouma bon zizman kapav ed nou kan nou per? (Proverb 29:25) (Get zimaz osi.)

¹⁶ Ki leson nou aprann ar lexanp Zonas? Fode zame ki nou telman per bann dimounn, ki sa pous nou pou dezobeir Zeova. (Lir Proverb 29:25.) Bon zizman ti ed Zonas pou konpran ki, olie ki li per bann kitsoz ki ti kapav ariv li, li ti bizin rapel ki Zeova ti pou ed li. Dan mem fason, nou osi nou pa pou per bann kitsoz ki kapav ariv nou si nou reflesi lor kouma Zeova inn ed nou ek protez nou dan lepase. Nou kapav osi reflesi lor lexanp nou bann frer ek ser ki’nn fer Zeova konfians dan bann sitiasion difisil ek lor kouma Zeova inn ed zot.a (Ebre 13:6) Wi, nou montre ki nou ena bon zizman kan nou fer Zeova konfians ek nou ed lezot pou fer parey.

KONTIGN FER ZEFOR POU PANS PAREY KOUMA ZEOVA

17. Ki kitsoz kapav ed nou pou kontign fer zefor pou pans parey kouma Zeova?

¹⁷ Kouma nou’nn trouve dan sa lartik-la, bon zizman kapav ed nou pou azir dan enn bon fason kan nou pas par bann sitiasion difisil. Ki kitsoz kapav ed nou pou pans parey kouma Zeova? Se Zeova ki pli bien plase pou ed nou. Se pou sa rezon-la ki Li’nn donn nou so Parol, Labib, ek ki Li donn nou so lespri sin. (Ne. 9:20; Ps. 32:8) Li donn nou bann konsey pou ki nou kapav kontrol nou bann santiman ek pran bann bon desizion. (Ps. 119:97-101) Kan nou reflesi lor bann kitsoz ki Labib ansegne ek nou priye Zeova pou gagn so lespri sin, sa pou ed nou pou ena bon zizman. Lerla, bon zizman pou ed nou pou trouv bann kitsoz parey kouma Zeova ek pou fer seki Zeova anvi nou fer.—Prov. 21:11.

18. Ki to bien deside pou fer?

¹⁸ Anou kontign rod ek apresie sazes ki sorti kot Zeova. (Ps. 14:2) Kan nou fer sa, nou pa pou “al lwin ar semin bon zizman.” (Prov. 21:16) Alor, anou bien deside pou montre bon zizman touletan ek dan sak sitiasion. Koumsa, nou pou pran bann bon desizion ek sa pou fer Zeova plezir.