Parey Kouma Benaya, Ena Kouraz ek Res Fidel ar Zeova

Benaya ti enn solda ki ti ena boukou kouraz. Li ti servi Lerwa David ek plitar li ti servi Lerwa Salomon. Benaya ti garson enn pret. Bann pret ek bann Levit pa sipoze al lager ek servi bann zarm. Kanmem sa, Benaya ti servi kouma solda dan larme ek li ti ena boukou kouraz. Par exanp, li ti rant dan enn pwi pou touy enn lion ek li ti osi lager kont enn solda ki ti enn zean. David ti telman fer Benaya konfians ki li ti fer li vinn sef bann solda ki ti vey lor so sekirite.—2 Sam. 23:20-23.

Benaya ti res fidel ar David kan Absalon ek Adoniya ti rebel kont li. (2 Sam. 8:18; 15:18; 1 Ler. 1:8) Ek kan David ti vinn vie, Benaya ti kontign res fidel ar David ek li ti ede pou fer Salomon vinn lerwa. (1 Ler. 1:32-40) Benaya ti res fidel ar Zeova ek ar bann lerwa ki Zeova ti swazir, mem si lezot pa ti fidel.

Nou osi, nou bizin ena kouraz pou lit kont nou lennmi, Satan, ek tou bann ki soutenir li. Nou bizin bien deside pou kontign swiv bann lalwa ek bann prinsip Zeova. (Efe. 6:11; 1 Pier 5:8, 9) Ek mem si lezot kit Zeova, nou nou pou res fidel ar Li. Nou sir ki Li pou rekonpans nou.—2 Sam. 22:26.