Fer Zefor pou Ena enn Bon Relasion ar To Bann Fami Ki Pa Servi Zeova

1-2. Kifer sertin nepli ena enn bon relasion ar zot fami ki pa Temwin?

ZEZI ti dir enn zom ki ti anvi vinn so disip: “Al kot to bann fami ek rakont zot tou seki Zeova inn fer pou twa.” (Mark 5:19) Zezi ti dir sa parski li ti kone ki, kan bann dimounn tann bann bon nouvel, zot anvi partaz sa ar zot fami.

² Eski to rapel seki to ti resanti kan to ti fek koumans etidie Labib? Sirman to ti bien kontan ek to ti partaz ar to fami tou bann zoli kitsoz ki to ti pe aprann! Selman, kitfwa bann-la ti bien ankoler parski to ti pe etidie Labib ar bann Temwin Zeova. Ouswa, kan to ti esey pres ar zot, kitfwa to pa ti fer sa dan enn bon fason ek sa ti bien ofans zot. Akoz sa, kitfwa to nepli ena enn bon relasion ar to fami. Sa lartik-la pou montre twa kouma to kapav res fidel ar Zeova ek anmemtan amelior to relasion ar to fami.

3. Ki nou pou examine dan sa lartik-la?

³ Dan sa lartik-la, nou pou trouve (1) kouma konpasion kapav pous nou pou montre lamour ek pasians anver nou fami ki pa Temwin, mem si zot pa anvi konn plis lor Zeova, (2) seki nou kapav fer kan zot dir ouswa fer bann kitsoz ki bles nou, (3) kouma nou kapav ed zot si nou ena pasians ek nou gard lespwar ki zot kapav servi Zeova, ek (4) kouma nou kapav montre zot ki nou kontan zot.

MONTRE KONPASION ANVER ZOT

4. Kouma Zezi ti reazir kan bann dimounn pa ti interese ar bon nouvel?

⁴ Mem si bann dimounn pa ti interese ar bon nouvel, Zezi ti kontign ed zot. Li ti dir ki li ti kouma enn planter ki ti esey diferan metod pou ki enn pie grandi ek raport bann frwi. (Lik 13:6-9) Kan Zezi ti servi sa lexanp-la, sa ti fer plis ki trwa-z-an ki li ti pe ed bann Zwif pou ki zot ena lafwa dan li. Kifer Zezi ti kontign fer zefor pou ed zot? Se parski li ti ena konpasion pou zot, ek so konpasion ti pous li pou ed zot ek pou montre pasians anver zot.

5. Kifer Zezi ti ena konpasion pou bann Zwif?

⁵ Zezi ti ena konpasion pou bann Zwif parski bann sef relizie pa ti ed zot pou ena lafwa dan Bondie. Zezi ti dir ki zot ti “kouma bann mouton ki pena berze.” (Mark 6:34) Inpe avan so lamor, Zezi ti mem plore kan li ti get lavil Zerizalem. Li ti kone ki boukou dimounn sa lavil-la ti pou mor parski zot pa ti ena lafwa dan li ek dan Zeova. (Lik 19:41-44) Parey kouma Zezi, si nou ena konpasion anver nou bann fami ki pena lafwa dan Zeova, sa pou motiv nou pou ed zot.

6. Kifer nou bizin ena pasians ar nou bann fami ki pa servi Zeova? (Galat 6:9)

⁶ Lir Galat 6:9. Mem si pou linstan nou bann fami pa anvi konn plis lor Zeova, nou bizin ena pasians ek kontign montre bonte anver zot. Nou kone ki sa pran letan pou ki enn kikenn sanz so krwayans ek devlop lafwa an Zeova. Dan lepase, kitfwa twa osi to ti kouma zot; to “pa ti ena lesperans ek [to] pa ti konn Bondie.” (Efe. 2:12) Selman, enn kikenn ti montre pasians anver twa. Li ti ed twa pou sanze ek pou aprann plis lor Zeova. Alor, si twa osi to ena pasians ar to fami, kitfwa to pou gagn lokazion pou ed zot pou aprann plis lor Zeova.

SEKI NOU KAPAV FER KAN ZOT DIR OUSWA FER BANN KITSOZ KI BLES NOU

7. Pou ki rezon Zezi so bann frer kitfwa pa ti ena lafwa dan li?

⁷ Zezi so bann frer sirman ti tann koz lor bann mirak ki li ti fer dan Galile. (Lik 4:14, 22-24) Selman, o-koumansman, zot pa ti ena lafwa dan li. (Zan 7:5) Kifer? Labib pa dir nanye lor la. Parkont, Labib explike kifer sertin Zwif pa ti vinn bann disip Zezi. Sertin ti per tansion bann lezot Zwif rezet zot. (Zan 9:18-22) Ek lezot inn konn Zezi depi ki li tipti. Pou zot, sa ti inposib ki Zezi, ki ti enn sinp ti dimounn, li Lemesi. (Mark 6:1-4) Bann frer Zezi kitfwa ti pans koumsa zot osi. Dan mem fason, li posib ki to bann fami pa interese pou konn plis lor Zeova parski zot per tansion lezot rezet zot. Kitfwa zot panse osi ki enn sinp ti dimounn kouma twa, pa kapav ansegn zot Labib.

8. Pou ki rezon kitfwa nou fami dir ouswa fer bann kitsoz ki blesan?

⁸ Reflesi pou ki rezon zot dir ouswa fer bann kitsoz ki blesan. Kan Zezi so bann fami ti dir li ki li ti “vinn fou,” kitfwa so bann frer ti parmi zot. (Mark 3:21) Pou ki rezon kitfwa zot ti dir sa? Kontex sa verse-la montre ki Zezi ti telman okipe pou prese ek pou geri bann dimounn, ki li pa ti mem gagn letan pou manze. (Mark 3:20) Alor, li posib ki so bann frer ti panse ki li ti vinn enn fanatik. Eski to fami panse ki to tro relizie? Si zot pans koumsa, alor par seki to dir ek seki to fer, to bizin montre zot ki to enn kikenn ki rezonab.

9. Ki nou kapav fer pou ki nou bann fami sanz lopinion ki zot ena lor bann Temwin Zeova? (1 Pier 3:1, 2) (Get zimaz osi.)

⁹ Kontign montre bonte anver zot ek montre twa rezonab. Kan nou koz ek azir dan enn bon fason ar nou bann fami ki pa Temwin, sa kapav sanz lopinion ki zot ena lor nou. (Lir 1 Pier 3:1, 2.) Par exanp, si enn ser so misie pa enn Temwin, kitfwa misie-la santi li tousel ouswa li ankoler kan so madam al prese ek al renion. Ki kitsoz ser-la kapav fer pou ki so misie pa santi li koumsa? Kitfwa li kapav fer sertin sanzman pou li pas plis letan ar so misie. Par exanp, li kapav al prese kan so misie okipe ouswa kan li pa lakaz. Kan enn ser aksepte fer bann sanzman pou ki so misie ere, sa kapav sanz lopinion ki li ena lor bann Temwin Zeova.

10. Kouma nou kapav swiv lexanp Zezi kan lezot kritik nou?

¹⁰ Kan to bann fami kritik twa, parfwa li pli bon ki to res trankil. Kan bann dimounn ti dir Zezi ki li ti gourma ek ki li ti kontan bwar boukou, li pa ti ankoler ek li pa ti esey defann limem pou montre ki zot ena tor. Olie sa, li ti anvi ki bann dimounn trouve par zotmem ki tousala ti fos. (Mat. 11:19) Li ti montre ki li ti enn kikenn ki rezonab par so bann aksion. (Konpar ar Zan 2:2, 6-10.) Dan mem fason, kan to bann fami kritik twa, to pa oblize reponn zot sak fwa. Olie sa, montre zot par to bann aksion ki to enn kikenn ki rezonab ek ki ere. Koumsa, kan zot pou tann bann kitsoz negatif lor bann Temwin Zeova, zot pa pou pran kont sa bann kitsoz-la parski zot kone ki sa li fos.

ENA PASIANS EK GARD LESPWAR

11. Kouma Zezi ti azir ar so bann frer?

¹¹ Labib montre ki Zezi ti ena pasians ar so bann frer. Par exanp, zot osi zot ti dan Kana kan Zezi ti fer so premie mirak. (Zan 2:11, 12) Selman, mem si zot ti trouv li fer sa mirak-la, zot pa ti’le krwar ki li ti Lemesi. Me kanmem sa, Zezi pa ti aret frekant zot. Apepre trwa-z-an apre ki Zezi ti fer sa mirak-la dan Kana, Labib montre ki Zezi ti ankor ena enn bon relasion ar so bann frer.—Zan 7:5-8.

12. Kifer nou kapav gard lespwar ki sertin manb nou fami kapav koumans servi Zeova?

¹² Azordi, nou konpran pli bien kouma Zeova Li enn Bondie ki ena boukou mizerikord, ek sa kapav ed nou pou gard lespwar ki enn zour sertin manb nou fami kapav koumans servi Li. Kan zot pou trouv destriksion fos relizion, sertin manb nou fami kitfwa pou rapel ki nou ti dir zot ki sa ti pou arive.a (Rev. 17:16) Lerla, kitfwa zot kapav koumans servi Zeova, mem apre ki gran soufrans inn koumanse. Alor, si azordi nou bann fami pe pas par bann sitiasion difisil, nou bizin esey fer tou seki nou kapav pou ed zot. Koumsa, kan zot pou trouve ki kantite nou kontan zot ek ki nou gagn zot traka, kitfwa zot pou anvi konn plis lor bann verite ki ena dan Labib.

MONTRE ZOT KI TO KONTAN ZOT

13. Mem si nou bien okipe dan nou servis pou Zeova, ar ki kitsoz nou bizin fer bien atansion?

¹³ Mem si nou bien okipe dan nou servis pou Zeova, fode pa ki nou fami gagn linpresion ki nou pena letan pou zot ouswa ki nou nepli kontan zot. (Mat. 7:12) Anou gete kouma nou kapav montre zot ki nou gagn zot traka.

14-15. Sit enn fason kouma nou kapav montre ki nou kontan nou bann fami ki pa Temwin. Donn enn lexanp.

¹⁴ Koz ar zot souvan ek montre zot ki to kontan zot. Enn fason ki nou montre ki nou kontan nou fami, se kan nou donn zot nou nouvel souvan. Par exanp, nou kapav avoy zot bann mesaz ouswa foto bann kitsoz interesan ki nou fek fer. Nou kapav osi donn zot enn ti kado ouswa ekrir zot enn let. Sa pou montre ki nou pans zot, ek sa kapav ede pou ki nou ena enn pli bon relasion ar zot. Kan nou fer bann kitsoz koumsa, nou montre zot ki nou kontan zot.

¹⁵ Anou get lexanp Anna, enn ser ki res Armeni. Avan ki li vinn enn Temwin, li ti pas boukou letan ar so bann fami, sirtou kan ti ena bann fet ek bann laniverser. Kan Anna ti vinn dan laverite, so bann fami ti trakase tansion li aret frekant zot akoz so relizion. Zot ti trakase osi tansion so lavi vinn pli difisil akoz li enn Temwin Zeova. Kouma Anna ti rasir zot? Li dir: “Kan mo al get zot, mo rakont zot inpe seki pe pase dan mo lavi, ek osi kifer mo bien okipe. Mo osi invit zot kot mwa ek mo prezant zot mo bann kamarad. Gras-a sa, laplipar mo bann fami konn mo bann bon kamarad ek zot santi zot alez avek zot.” Anna dir: “Boukou fami inn felisit mwa parski zot inn trouve ki mo vremem ere, ek aster-la zot nepli trakase pou mwa.”

16. Kouma Zezi ti montre ki li ti vremem gagn traka so frer Zak? (Get not osi.)

¹⁶ Montre zot ki zot inportan pou twa. Apre ki li ti resisite, Zezi ti montre ki li ti vremem gagn traka so frer Zak kan li ti al get li pou koz avek li. (1 Kor. 15:7) Zak sirman ti bien kontan ki Zezi ti vinn get li, parski sa ti montre ki Zezi ti vremem kontan li. Sa vizit-la sirman ti konvink Zak ki Zezi ti Lemesi, ek apre sa, kitfwa Zak ti al get bann lezot manb so fami pou fer zot konpran ki Zezi li vremem Lemesi.b—Zist. 1:14.

17. Kouma nou kapav swiv prinsip ki ena dan Romin 12:15? (Get zimaz osi.)

¹⁷ Lir Romin 12:15. Nou bann fami pou konn bann bon moman ek bann move moman dan zot lavi. Ek si nou montre zot ki nou gagn zot traka sirtou kan zot vremem bizin nou led, sa kapav sanz lopinion ki zot ena lor nou.c Par exanp, si enn manb nou fami gagn enn ti-baba, nou kapav partaz zot lazwa ek donn zot enn ti kado pou ki zot kone ki nou kontan pou zot. Si enn kikenn ki zot kontan mor, nou kapav rekonfort zot, ed zot, ouswa avoy zot enn ti kart. Fode pa nou bliye osi pou telefonn zot, pou avoy zot bann mesaz, ouswa pou al get zot, sirtou si zot pe pas par bann sitiasion difisil, ek li bon ki nou fer sa souvan.

18. Kouma nou kapav swiv lexanp Andre?

¹⁸ Prezant zot bann lezot frer ek ser. Kan Andre ti aprann ki Zezi ti Lemesi, li ti al get so frer Pier ek li ti dir li vinn zwenn Zezi. (Zan 1:40-42) Kouma to kapav swiv lexanp Andre? Detanzantan, to kapav invit to fami pou asiste enn renion ouswa pou manz enn manze ar to bann kamarad. Si to prezant zot bann lezot frer ek ser, zot pou trouve ki bann Temwin Zeova bann bon dimounn ek ki nou parey kouma tou dimounn.

19. Mem si nou fami kitfwa pa vremem konpran kifer nou pa fer sertin kitsoz, kouma nou bizin azir anver zot? (1 Pier 3:15)

¹⁹ Lir 1 Pier 3:15. Nou fami kitfwa pa vremem konpran kifer nou pa fer sertin kitsoz. Selman, si nou bon anver zot ek ki nou ena respe pou zot, zame zot pa pou bliye sa. Ek mem si nou pa fer sertin fet ek ki nou nepli swiv sertin koutim, zot pou kontan si nou fer zefor pou pas letan avek zot. Par exanp, nou kapav al get zot, manz enn manze ar zot, ek donn zot bann kado bann lezot zour dan lane.

KONTIGN GARD LESPWAR KI TO FAMI KAPAV VINN DAN LAVERITE

20. Kifer lexanp Zak bien ankourazan?

²⁰ Lepok ki Zezi ti pe prese, Zak pa ti vinn so disip. Me inpe apre, li ti vinn enn disip Zezi, ek sirman li ti aprann bann zoli leson ki Zezi ti ansegn bann dimounn kan li ti lor later. (Gal. 1:18, 19; 2:9) Par exanp, kan li ti ekrir so let pou bann Kretien, Zak ti koz lor sertin kitsoz ki inpe parey ar seki Zezi ti ansegne dan so Sermon lor Montagn.d

21. Kifer nou bizin gard lespwar ki nou bann fami ki pa Temwin kapav sanze?

²¹ Mem si nou fer tou seki nou kapav pou montre bonte ek lamour anver nou bann fami ki pa Temwin, kitfwa zot pa pou anvi aprann plis lor Zeova. Selman, nou bizin gard lespwar ki zot kapav sanze. Kifer? Parski sak fwa ki nou montre lamour ek bonte anver zot, nou pe imit Zeova, nou Bondie ki ena boukou mizerikord, ek so Garson Zezi. (Lik 6:33, 36) Si nou kontign montre zot ki nou kontan zot, avek letan kitfwa sa kapav sanz lopinion ki zot ena lor nou. Ki kone, kitfwa zot bien rapel seki nou’nn dir zot lor Zeova ek lor so bann promes! Alor, si nou kontign ed nou fami ek nou kontign montre zot ki nou kontan zot, kitfwa sertin parmi zot kapav vinn dan laverite ek servi Zeova ansam ar nou. Sa pou vremem rann nou ere, pa vre!