Avril

Nou bizin ena lafwa dan laranson pou ki nou kapav viv pou touletan. (Efe. 1:7) Bann dimounn ki Zezi konsider kouma “lezot mouton” pa manz dipin ek pa bwar divin kan selebre Repa Lesegner sak lane. (Zan 10:16) Selman, zot osi zot gagn bann benediksion gras-a lekor ek disan Zezi. Ek pou zot gagn sa bann benediksion-la, zot bizin montre ki zot ena lafwa dan laranson, setadir dan sakrifis Zezi. (Zan 6:53) Parkont, bann ki manz dipin ek bwar divin pandan Repa Lesegner, zot montre ki zot form parti dan nouvo lalians ek ki zot ena lespwar pou regne ansam ar Zezi dan Rwayom Bondie. Alor, mem si nou form parti bann ki ena lesperans pou al dan lesiel ouswa si nou form parti bann lezot mouton, nou bizin ena enn lafwa for dan laranson pou ki nou kapav viv pou touletan. w24.12 12 ¶14; 13 ¶16

Pandan Repa Lesegner, Zezi ti pas dipin san levin ar so bann zapot ek li ti dir zot ki sa reprezant so lekor. Apre sa, li ti pas enn koup divin ek li ti dir zot ki sa reprezant “disan lalians.” (Mark 14:22-25; Lik 22:20; 1 Kor. 11:24) Sa nouvo lalians-la, li ant Zeova ek “lakaz Izrael [spiritiel]” setadir bann ki pou regn ansam ar Zezi “dan Rwayom Bondie.” (Ebre 8:6, 10; 9:15) Seki Zezi ti dir pandan Repa Lesegner konsern zis sa ti group ki Labib apel “ti troupo” la. Bann zapot ki ti fidel, ti bann premie pou form parti dan sa group-la. Me plitar, bann lezot ti pou form parti dan sa group-la. Se sa ti group-la ki pou al regne ansam ar Zezi dan lesiel. w24.12 11 ¶9-10

Enn parmi bann bon kamarad Zezi ti trayir li. Lerla, bann dimounn ti aret Zezi, ti maltret li, ek ti met bann fos sarz lor li. Zot ti kondann li amor, ek zot ti tortir li. Alafin, bann solda ti koulout Zezi lor enn poto pou ki li mor. Selman, Zezi ti res fidel ar Zeova ek li ti andir tou sa soufrans-la. Me dan sa ler-la, ti ena enn kikenn ki ti pe plis soufer ki Zezi! Se nou Bondie Zeova. Mem si Li ti ena pouvwar pou sov so Garson ki Li bien kontan, Li pa’nn fer li. Kifer? Parski Li kontan nou. Sakrifis Zezi se pli gran prev ki Zeova kontan twa. Li’nn aksepte soufer ek Li’nn donn seki ti ena plis valer pou Li, pou ki to kapav libere ar pese ek lamor. (1 Zan 4:9, 10) Alor, si nou anvi vinn pros ar Zeova ek gagn pardon nou bann pese, li bien inportan ki nou repanti. w24.08 6 ¶13-14

Pou nou konpran ki kantite Zeova kontan nou, nou bizin reflesi lor komie sa finn kout Li pou donn laranson. Dapre Satan, si enn serviter Bondie gagn bann gran difikilte, li pa pou res fidel ar Zeova. Alor, pou montre ki Satan ena tor, Zeova inn les Zezi soufer avan ki li mor. (Zob 2:1-5) Depi lesiel, Zeova inn trouv bann dimounn boufonn Zezi, fwet li, ek koulout li lor enn poto. Li’nn trouv so Garson ki Li bien kontan, soufer ziska ki li mor. (Mat. 27:28-31, 39) Zeova ti kapav anpes tousala arive ninport kan. (Mat. 27:42, 43) Selman, si Li ti fer sa, Zezi pa ti pou donn so lavi an sakrifis, ek nou, nou pa ti pou ena okenn lespwar. Wi, Zeova telman kontan nou ki Li’nn les so Garson soufer ziska ki li mor! w25.01 22 ¶7

Nou le 16 Nizan lane 33 Nou Lepok. Bann disip Zezi bien sagrin ek zot trakase. De parmi zot kit Zerizalem pou al Emais. Enn zom ki zot pa kone, zwenn zot ek fer enn bout sime ansam ar zot. Bann disip rakont li bann kitsoz bien tris ki’nn ariv Zezi. Lerla, zom-la koumans dir zot bann kitsoz ki zame zot pa’nn bliye. Zom-la “pran apartir Moiz ek tou bann Profet,” ek li explik zot kifer Lemesi ti bizin soufer ek mor. Kan zot ariv Emais, zom-la fer zot kone kisann-la li ete—limem Zezi ki’nn resisite! (Lik 24:13-35) Zezi inn pas 40 zour lor later avan ki li retourn dan lesiel, ek pandan sa letan-la, li’nn aparet plizir fwa ar so bann disip. Li ti ankouraz so bann disip parski zot ti tris ek zot ti pe trakase. Gras-a sa, zot ti regagn zot lazwa ek zot ti regagn kouraz pou al prese ek pou al ansegn bon nouvel lor Rwayom Bondie. w24.10 12 ¶1-3

Bann zanfan pa bizin fer zefor pou grandi. Se enn kitsoz ki otomatik. Parkont, pou ki enn Kretien vinn enn kikenn ki ena matirite, li pa otomatik; li bizin fer bann zefor. Bann Kretien dan Korint ti aksepte laverite, zot ti pran batem, zot ti gagn lespri sin, ek zot ti aprann boukou kitsoz ar lapot Pol. (Zist. 18:8-11) Selman, plizir lane apre zot batem, zot pa ti ankor gagn matirite. (1 Kor. 3:2) Pou nou vinn enn Kretien ki ena matirite, pou koumanse nou bizin ena dezir pou gagn matirite. Labib koz lor bann ki “kontan seki san lexperyans.” Sa bann dimounn-la, zot prefer res bann ti-baba lor plan spiritiel, ek akoz sa zot pa fer okenn progre. (Prov. 1:22) Nou pa anvi resanble bann adilt ki les zot paran pran bann desizion dan zot plas, pa vre! Okontrer, nou anvi pran nou prop responsabilite ek fer zefor pou ki nou lamitie ar Zeova kontign grandi. Si to pe fer zefor pou gagn matirite, priye Zeova pou ki Li donn twa “dezir ek lafors toule-de pou azir.”—Fil. 2:13. w24.04 4 ¶9-10

Labib dir nou seki Zeova resanti kan Li bizin ziz bann dimounn. (Eze. 33:11) Nou kone ki Zeova pa detrir personn lor enn kout-tet. Zeova Li enn Bondie ki ena boukou mizerikord, ek tanki Li kapav, Li pou montre mizerikord. Konsernan bann dimounn ki pa pou resisite, ki kitsoz nou kone? Labib koz lor de-trwa dimounn ki pa pou resisite. Par exanp, Zezi ti dir ki Zida Iskaryot pa pou resisite. (Mark 14:21; Zan 17:12) Zida ti kone ki li ti pe al fer enn move kitsoz kont Zeova ek kont So Garson. Me kanmem sa, li ti kontign fer li. (Get Mark 3:29) Zezi ti dir osi ki sertin sef relizie ki ti pe opoz ar li, pa ti pou resisite. (Mat. 23:33; get not pou letid pou Zan 19:11.) Ek lapot Pol ti dir ki bann aposta ki pa repanti, pa pou resisite.—Ebre 6:4-8; 10:29. w24.05 4 ¶10-11

Kan nou kontign res pros ar Zeova, Satan pa pou kapav kontign fer nou ditor. (1 Zan 3:8) Dan lemond nouvo, Zeova pa pou zis kontign protez so bann kamarad kont Satan, me Li pou osi protez zot kont lamor. (Rev. 21:4) Se vremem enn gran loner pou vinn enn invite Zeova anba so latant. Gras-a sa, nou kapav ena enn bon lamitie avek Li, ek sa lamitie-la kapav dire pou touletan. (Eze. 37:27) Me kouma nou bizin konport nou si nou anvi kontign res enn invite Zeova? Si enn kikenn invit twa kot li, sirman to pou anvi kone kouma to kapav fer li plezir. Dan mem fason, nou anvi kone seki Zeova anvi nou fer pou ki nou kontign res so bann invite. Nou bien kontan Zeova, akoz sa nou anvi fer tou seki nou kapav “pou fer li plezir dan tou kitsoz.” (Kol. 1:10) Fode zame nou bliye kisann-la Zeova ete, ek nou bizin touletan ena enn gran respe pou Li. Koumsa, nou pou evit fer bann kitsoz ki kapav ofans Li. Wi, nou vremem anvi kontign “mars avek [nou] Bondie avek limilite!”—Mish. 6:8. w24.06 4 ¶8-9

Zeova ti demann Abraam pou ofer so garson Izaak kouma enn sakrifis. Sirman Abraam so leker ti bien fermal kan Zeova ti demann li fer sa! Selman, li ti obeir Zeova. Me zis kouma Abraam ti pe al touy so garson, Zeova ti aret li. Sa lexanp-la ansegn nou seki Zeova ti pou fer dan lavenir: Li ti pou donn lavi so Garson ki Li bien kontan kouma enn sakrifis. Zeova ti pou fer sa parski Li kontan bann dimounn. (Zen. 22:1-18) Kan Zeova ti donn Lalwa bann Izraelit, Li ti demann zot fer sakrifis bann zanimo pou ki zot kapav gagn pardon zot bann pese. (Lev. 4:27-29; 17:11) Sa bann sakrifis-la ti reprezant enn pli gran sakrifis ki Zeova ti pou done, enn sakrifis ki ti pou liber bann dimounn ar pese ek lamor. Zeova ti fer bann profet ekrir lor sa desandans ki li ti promet la. Bann-la ti explike ki sa desandans-la ti pou enn Garson Bondie ek ki li ti pou bizin soufer ek mor, pou ki bann dimounn kapav libere ar pese ek lamor. Se enn kitsoz extraordiner ki Zeova inn fer, ek Li’nn fer sa pou twa osi!—Iza. 53:1-12. w24.08 4 ¶7-8

Kan to lir Labib, reflesi kouma to kapav met an pratik seki to pe aprann. Amezir ki to pe fer to lektir Labib, demann tomem, ‘Kouma depi aster-la mem ouswa dan lavenir mo kapav met seki mo pe lir an pratik?’ Anou pran enn lexanp. Fer koumadir dan to lektir Labib, to’nn lir 1 Tesalonisien 5:17, 18. Kan to fini lir sa de verse-la, to kapav arete ek demann tomem: “Eski souvan mo fer lapriyer? Eski mo bann lapriyer zot profon?” To kapav osi reflesi pou ki kitsoz to kapav montre to rekonesans. Kitfwa to kapav deside pou remersie Zeova pou trwa kitsoz presi. Mem si to pas zis de-trwa minit pou reflesi lor bann leson ki to’nn aprann dan Labib, sa pou ed twa pou konpran Parol Bondie ek pou met li an pratik. Reflesi lor bann benediksion ki to pou gagne si toulezour to pran letan pou reflesi lor seki to lir dan Labib! Avek letan, to pou vinn enn pli bon serviter Zeova! w24.09 4-5 ¶9-10

Nou pli ere kan nou done, ki kan nou gagne. Zeova inn kree nou koumsa! Nou santi nou bien kan nou kapav ed nou bann frer ek ser. Nou kontan osi kan zot montre nou zot rekonesans. Ek mem si nou’nn ed enn kikenn ek ki li pa’nn montre rekonesans anver nou, nou zwaye parski nou kone ki nou’nn fer enn bon kitsoz. Ninport ki kitsoz ki nou fer, fode zame nou bliye ki “Zeova ena kapasite pou donn [nou] boukou plis.” (2 Kro. 25:9) Zame nou pa pou kapav donn lezot plis ki seki Zeova kapav donn nou! Ek pena pli gran lazwa ki kan Zeova Limem Li rekonpans nou. Alor, anou bien deside pou kontign imit zenerozite nou Papa Zeova. w24.09 30-31 ¶20-21

Zeova li enn Bondie ki ena mizerikord ek konpasion. (Ps. 103:13; Iza. 49:15) Kan nou soufer, sa fer so leker fermal. (Zaka. 2:8) Li ed nou pou aprann konn Li pli bien ek pou vinn so kamarad. (Ps. 25:14; Zist. 17:27) Ek Li ena limilite; “Li abes li pou get lesiel ek later. Li relev ti dimounn dan lapousier.” (Ps. 113:6, 7) Pou tou sa bann rezon-la, nou anvi donn laglwar nou Bondie ki extraordiner! Nou donn laglwar Zeova parski nou anvi ki lezot konn Li. Boukou dimounn pa konn laverite lor Zeova. Kifer? Parski Satan inn fann bann mansonz lor Li ek boukou dimounn krwar sa bann mansonz-la. (2 Kor. 4:4) Satan inn konvink bann dimounn ki Zeova Li enn Bondie ki ankoler, ki pa gagn nou traka, ek ki responsab bann soufrans ki ena dan lemond. Me nou, nou konn laverite lor Bondie, pa vre! Ek akoz sa, nou bizin fer bann dimounn kone ki kalite Bondie Li ete ek montre zot kouma zot kapav donn Li laglwar.—Iza. 43:10. w25.01 3 ¶6-7

Mem si Zezi ti parfe ek ki li ti fer bann mirak extraordiner, Satan ti servi bann dimounn pou fann bann mansonz lor li. Par exanp, bann sef relizie ti dir lepep ki Zezi ti “pe tir bann demon par mwayin sef bann demon.” (Mark 3:22) Kan Zezi ti pas devan lakour, bann sef relizie ti dir ki Zezi pa ti ena respe pou Bondie, ek zot ti ankouraz lafoul pou fer touy Zezi. (Mat. 27:20) Dan premie siek, kan bann disip Zezi ti pe pres bon nouvel, bann lennmi Bondie “ti mont latet bann dimounn” pou ki bann-la persekit sa bann Kretien-la. (Zist. 14:2, 19) Konsernan Zistwar Bann Zapot 14:2, Latour Degard 1^e Desam 1998 dir: “Bann lennmi Bondie pa ti zis rezet mesaz ki bann Kretien ti pe prese, me zot ti osi fann bann foste lor bann Kretien, pou ki bann dimounn pa ekout zot ek ena laenn pou zot.” Satan ankor pe fann bann mansonz azordi. Li ankor “pe met bann dimounn lor later antie dan lerer.” w24.04 11 ¶15-16

Pou ki enn kikenn resisite ek ki li gagn posibilite pou viv pou touletan, sa pa depann lor kan li’nn mor. Zeova Li enn Ziz ki parfe ek Li touletan pran bann bon desizion. (Ps. 33:4, 5) Alor, nou kapav sir ki “sa Ziz lor later antie la” pou fer seki drwat. Posibilite pou viv pou touletan, li pa depann osi lor kotsa enn kikenn reste. Par exanp, ena bann milyon dimounn ki res dan bann pei kot nou pa reisi prese, ek Zeova zame pa pou konsider sa bann milyon dimounn-la kouma “bann kabri.” (Mat. 25:46) Zeova, “sa Ziz lor later antie la,” gagn traka sakenn parmi sa bann dimounn-la. Nou pa kone kouma Zeova pou diriz bann kitsoz pandan gran soufrans. Kitfwa sertin parmi sa bann dimounn-la pou gagn lokazion pou aprann konn Zeova, pou ena lafwa dan Li, ek pou servi Li avan ki Li sanktifie so nom devan tou bann pep.—Eze. 38:16. w24.05 12 ¶14-15

Bann serviter Zeova kontan pou ed sakenn zot kamarad. (2 Kor. 8:4) Selman, ena fwa zot bizin kouraz pou fer sa. Par exanp, kan enn lager eklate, kitfwa bann ansien konpran ki bann frer ek ser pou bizin soutien ek lankourazman. Ek osi, kitfwa zot pou bizin Labib, bann piblikasion, manze, linz, ek enn plas pou reste. Bann ansien bien kontan zot bann frer ek ser, akoz sa zot fer tou seki zot kapav pou ed bann-la mem si kitfwa sa kapav danzere. Dan sa bann sitiasion-la, li bien inportan ki nou res ini. Alor, swiv bann instriksion ki biro nasional donn nou. (Ebre 13:17) Bann ansien bizin reget bann instriksion regilierman lor kouma pou prepar zot avan enn katastrof, ek seki zot bizin fer kan ena enn katastrof. (1 Kor. 14:33, 40) Ena kouraz me fer atansion. (Prov. 22:3) Servi to bon zizman. Pa pran bann risk initil. Kont lor Zeova. Li pou ed twa pou ki to kapav ed to bann frer ek ser san ki to met to lavi an danze. w24.07 4 ¶8; 5 ¶11

Lerwa David ti konn Zeova ek li ti kont lor Li. Kan Lerwa Sail ek bann lezot dimounn ti rod touy li, David ti priye Zeova pou ki Li ed li. Apre ki Zeova ti reponn so lapriyer ek ti sov li, David ti dir: “Zeova li vivan!” (Ps. 18:46) Ki li ti pe rod dir? David pa ti pe zis dir ki Bondie Li existe. Pou explik sa verse-la, enn liv referans dir ki David ti pe rod dir ki Zeova Li “vre Bondie ek ki Li touletan ed so bann serviter.” Wi, David ti kone ki so Bondie ti konn tou seki pe pase dan so lavi, ek ki Li ti pre pou ed li. Sa ti ankouraz David pou kontign servi Zeova ek pou kontign loue Li. (Ps. 18:28, 29, 49) Kan nou sir ki Zeova Li “Bondie vivan,” sa motiv nou pou kontign fer nou maximum pou servi Li ek sa donn nou lafors pou andir nou bann difikilte. Sa motiv nou osi pou res pros ar Li. w24.06 20 ¶3-4

Ki nou kapav aprann ar seki lapot Pol ti dir bann Tesalonisien? Kan nou tann enn kitsoz ki pa an-akor ar seki nou aprann dan Labib, ouswa si nou tann enn rimer ki paret inpresionan, nou bizin servi nou bon zizman. Dan lepase, dan Linion Sovietik, nou bann lennmi ti donn bann frer enn let ki swadizan sorti depi biro mondial. Sa let-la ti ankouraz sertin parmi nou bann frer pou kree enn lot lorganizasion ki indepandan. Sa let-la ti paret vre. Me nou bann frer pa’nn les sa let-la anbet zot. Zot ti konpran ki mesaz ki ena dan sa let-la pa ti an-akor avek seki zot ti aprann dan Labib. Azordi osi, nou bann lennmi kapav servi bann teknolozi kouma Internet ek rezo sosial pou anbet ek kree divizion parmi nou. Olie ki nou ‘les nou trouble dan nou bon zizman,’ nou kapav protez nou-mem kan nou reflesi lor seki nou pe tande ek lor seki nou pe lir, pou gete si li an-akor avek bann verite ki nou’nn aprann dan Labib.—2 Tes. 2:2; 1 Zan 4:1. w24.07 12 ¶14-15

Desizion pli inportan ki enn dimounn kapav pran se donn so lavi Zeova ek servi Li ansam ar so bann frer ek ser. Zeova anvi ki tou dimounn fer sa. Kifer? Li anvi ki zot vinn so kamarad ek ki zot viv pou touletan.(Det. 30:19, 20; Gal. 6:7, 8) Selman, Zeova pa obliz personn pou servi Li. Li les sak dimounn deside seki li anvi fer. Me ki kapav arive si enn Kretien dezobeir lalwa Zeova ek ki li fer enn pese grav? Si li pa repanti, pou bizin tir li dan lasanble. (1 Kor. 5:13) Me kanmem sa, Zeova gard lespwar ki li pou repanti ek ki li pou retourn ver Li. Avredir, enn parmi bann rezon prinsipal kifer Zeova inn donn laranson, se pou ki Li kapav pardonn bann dimounn ki repanti. Nou Bondie Zeova ena boukou lamour ek Li ankouraz bann ki fer pese pou repanti.—Zaka. 1:3; Rom. 2:4; Zak 4:8. w24.08 14 ¶1-2

Kan Zan ti ekrir so trwaziem let, sertin dimounn ti pe ansegn bann fos lansegnman ek ti pe kree divizion dan lasanble. Selman, lezot ti “kontign mars dan laverite.” Zot ti obeir Zeova ek zot ti “kontign mars dapre so bann komannman.” (2 Zan 4, 6) Sa bann Kretien fidel la ti fer Zan ek Zeova osi bien kontan. (Prov. 27:11) Ki leson nou aprann? Kan nou res fidel ar Zeova, sa rann nou zwaye. (1 Zan 5:3) Par exanp, nou gagn boukou lazwa kan nou kone ki nou fer leker Zeova kontan. Li kontan kan Li trouv nou rezet bann tantasion sa lemond-la ek obeir so bann lalwa. Bann anz osi bien kontan kan zot trouv nou fer sa. (Lik 15:10) Nou osi, nou bien kontan kan nou trouv nou bann frer ek ser res fidel. (2 Tes. 1:4) Ek biento, kan lemond Satan pou detrir, nou pou bien kontan ki nou’nn reisi res fidel ar Zeova. w24.11 12 ¶17-18

Pandan komie letan to bizin aprann konn enn kikenn avan ki to dir li seki to resanti pou li? Si to dir dimounn-la tro boner ki to interese ar li, li kapav panse ki to’nn azir san reflesi. (Prov. 29:20) Parkont, si dimounn-la inn remarke ki to interese ar li, me ki to pe pran tro boukou letan pou al koz ar li, li kapav panse ki to pa serye ek ki to pa kone seki to anvi. (Ekle. 11:4) Rapel sa osi: To pa bizin atann ki to sir ki to anvi marye ar enn kikenn, pou to al koz ar li. Selman, to bizin sir ki to’nn pare pou lavi maryaz ek ki sa dimounn-la pou enn bon konzwin pou twa. Me ki to bizin fer si to rann twa kont ki enn kikenn interese ar twa? Si to pena santiman pou li, esey montre li par to bann aksion ki to pa interese ar li. Li pa pou korek ki to donn dimounn-la lespwar, alor ki to kone ki to pa interese ar li.—Efe. 4:25. w24.05 22-23 ¶9-10

Se zis bann Kretien ki vremem ena lesperans pou al dan lesiel ek ki res fidel ar Zeova, ki Zezi pou akeyir dan Rwayom ki dan lesiel. Si enn frer Zezi pa res lor so gard ek ki li pa kontign veye, li pa pou form parti “bann ki Bondie inn swazir.” (Mat. 24:31) Avredir, tou bann serviter Zeova, ki nou ena lesperans pou viv dan lesiel ouswa lor later, bizin pran kont bann lavertisman Zezi. Nou bizin kontign veye ek res fidel anver Zeova. Nou’nn aprann konn Zeova bien, ek nou sir ki zame Li pa pou fer enn kitsoz ki inzis. Alor, fode pa nou trakase si dan nou lepok Zeova ankor pe swazir bann dimounn pou al viv dan lesiel. Fode pa nou bliye seki Zezi ti dir dan lexanp karo rezin, konsernan bann travayer ki ti vinn travay zis enn-er-tan avan lafin lazourne. (Mat. 20:1-16) Sa bann travayer-la ti gagn mem lapey ki bann ki ti pe travay depi pli boner. Li parey osi pou enn Kretien ki ena lesperans pou al dan lesiel. Mem si Zeova fek swazir li, ouswa si sa fer lontan ki Zeova inn swazir li, sa Kretien-la pou reisi gagn so rekonpans zis si li res fidel ar Zeova. w24.09 24 ¶15-17

Zezi inn donn nou pli bon lexanp lor kouma nou kapav andir bann linzistis. Boukou dimounn, mem bann manb so fami, ti tret li dan enn fason inzis. Par exanp, so bann fami ti dir ki li ti vinn fou, bann sef relizie ti dir ki li ti gagn so pouvwar ar bann demon, ek bann solda Romin ti boufonn li, ti bat li, ek alafin ti touy li. (Mark 3:21, 22; 14:55; 15:16-20, 35-37) Selman, mem si li ti pas par tou sa linzistis-la, zame Zezi ti reazir dan enn move fason. Ki nou kapav aprann ar so lexanp? (1 Pier 2:21-23) Par so zoli lexanp, Zezi inn montre nou kouma nou bizin reazir kan lezot tret nou dan enn fason inzis. Li ti kone kan li ti bizin res trankil ek kan li ti bizin koze. (Mat. 26:62-64) Parfwa, kan lezot ti koz manti lor li, li pa ti dir nanye. (Mat. 11:19) Ek kan li ti koze, li pa ti insilte bann ki ti pe persekit li ek menas li. w24.11 4-5 ¶9-10

Fer koumadir to donn enn kikenn ki to kontan enn kado ki spesial, ki itil, ek ki bien zoli. To pou bien sagrin si li met to kado dan enn kwin ek ki li pa pran li kont, pa vre! Parkont, si li servi to kado ek li montre twa ki li bien rekonesan pou sa, to pou bien kontan! Ki nou kapav aprann ar sa lexanp-la lor kado ki Zeova inn donn nou, setadir laranson? Parski Li bien kontan nou, Zeova inn aksepte sakrifie so Garson pou nou. Alor, Li bien kontan kan nou montre rekonesans pou sa zoli kado-la ek pou lamour ki Li’nn montre anver nou. (Zan 3:16; Rom. 5:7, 8) Malerezman, plis letan pase, li kapav arive ki nou rekonesans pou laranson diminie. Si sa arive, sa pou koumadir nou pe pran zoli kado ki Zeova inn donn nou, nou pe met li dan enn kwin, ek nou pa pe pran li kont. Alor, pou ki sa pa arive, nou bizin kontign reflesi lor seki Zeova ek Zezi inn fer pou nou. w25.01 26 ¶1-2

Pou ki enn frer vinn enn ansien, li bizin pa enn kikenn ki fek konverti. Kifer? Parski sa pran letan pou ki enn kikenn ranforsi so lamitie ar Zeova ek ki li aprann servi Labib bien pou pran bann bon desizion. Parey kouma Zezi, to bizin ena limilite ek to bizin dispoze pou servi Zeova dan ninport ki fason. To bizin ena pasians osi, ek to bizin kapav atann ki Zeova donn twa plis responsabilite dan lasanble. (Mat. 20:23; Fil. 2:5-8) Ek pandan ki to pe atann, montre ki to “fidel” kan to res atase ar Zeova, kan to obeir so bann lalwa, ek kan to swiv bann instriksion ki Li done atraver so lorganizasion. Labib bien kler lor la: Enn ansien bizin ena kapasite pou ansegne. Me eski savedir ki enn ansien bizin enn bon orater? Non. Boukou ansien, ki pa bann bon orater, zot bien efikas dan predikasion ek zot bien ankourazan kan zot fer bann vizit pastoral. w24.11 23-24 ¶14-15

Kan to lir enn verse Labib ki to pa tro konpran, fer bann resers. Apre sa, toutlong lazourne, reflesi lor seki to’nn etidie ek lor seki sa finn aprann twa lor Zeova, Zezi, ek lor lamour ki zot ena pou twa. (Ps. 119:97) Si to pa reisi trouv bann nouvo kitsoz ouswa bann kitsoz interesan sak fwa ki to lir Labib ouswa ki to fer bann resers, fode pa to dekouraze. Dan enn sertenn fason, to kapav konpar tomem ar enn kikenn ki pe rod lor. Enn kikenn ki rod lor, li bizin ena pasians parski li kapav pas plizir lertan ouswa plizir zour zis pou gagn de-trwa bout lor. Me kanmem sa, li pa pou bes lebra parski li kone ki sak bout lor ena boukou valer. Bann nouvo kitsoz ki nou aprann dan Labib, zot ena boukou plis valer ki lor! (Prov. 8:10) Akoz sa, nou bizin ena pasians, nou bizin kontign lir nou Labib ek kontign fer bann resers pou ki nou kapav dekouver bann nouvo kitsoz.—Ps. 1:2. w25.01 24-25 ¶14-15

Zeova anvi ki nou fer zefor pou pardonn bann ki bles nou. (Ps. 86:5; Lik 17:4; Efe. 4:32) Kan enn kikenn ofans nou, sa kapav bien bles nou, sirtou si sa dimounn-la li enn bon kamarad ouswa enn fami. (Ps. 55:12-14) Ek parfwa, nou kapav telman ankoler ki se koumadir inn pik nou ar enn kouto. (Prov. 12:18) Selman, fode pa nou inior seki nou resanti; fode pa nou fer koumadir nanye pa’nn arive. Si nou fer sa, se koumadir nou pe les sa kouto-la dan sa dimal-la. Avredir, kan nou inior seki nou resanti, sa kapav fer nou plis ditor. Kan enn kikenn ofans nou, kitfwa nou premie reaksion se nou pou ankoler. Labib dir ki nou kapav ankoler. Selman, li osi dir nou ki fode pa nou kontign res ankoler. (Ps. 4:4; Efe. 4:26) Kifer? Parski lakoler zame pous nou pou fer bann bon kitsoz. (Zak 1:20) Alor, fode pa nou bliye sa: Lakoler se enn reaksion. Parkont, kontign res ankoler ar enn kikenn, se enn swa ki nou nou fer. w25.02 15 ¶4-6

Zezi inn servi enn lexanp pou montre ki nou pou bien bet si nou ramas enn ta kas me ki nou pa “ris devan Bondie.” (Lik 12:16-21) Avredir, personn pa kone kouma so lavi pou ete dime! (Prov. 23:4, 5; Zak 4:13-15) Anplis, Zezi ti dir ki tou bann ki anvi vinn so disip bizin pre pou “abandonn” tou bann kitsoz materyel ki zot ena. (Lik 14:33) Dan premie siek, se seki bann Kretien dan Zide ti fer. Zot ti abandonn zot bann dibien ek zot ti fer sa avek lazwa. (Ebre 10:34) Dan nou lepok osi, ena boukou frer ek ser ki’nn aksepte perdi zot bann dibien parski zot pa’nn soutenir bann parti politik. (Rev. 13:16, 17) Ki kitsoz inn ed zot pou fer sa? Zot ti ena foul konfians dan promes Zeova, ki dir: “Zame mo pa pou kit twa, ek zame mo pa pou abandonn twa.” (Ebre 13:5) Alor, mem si nou fer seki nou kapav pou met inpe larzan dekote pou kan nou vinn vie, kan bann sitiasion ki nou pa atann ariv nou, nou sir ki Zeova pou pran nou swin. w25.03 29-30 ¶13-14

Pou nou vinn bann Kretien ki ena matirite, ki kitsoz Zeova inn donn nou? Li’nn donn nou bann berze ek bann ansegnan dan lasanble, ki ed nou pou vinn bann “adilt” lor plan spiritiel, pou nou “ariv mem degre matirite ki Lekris.” (Efe. 4:11-13) Li’nn osi donn nou so lespri sin, ki ed nou pou “ena fason panse Kris.” (1 Kor. 2:14-16) Dan so Parol Labib, Li’nn osi donn nou kat Levanzil ki montre nou kouma Zezi ti azir kan li ti lor later. Ek si nou azir ek pans parey kouma Zezi, nou pou kapav vinn bann Kretien ki ena matirite. Me pou ki nou gagn matirite, nou bizin konn plis ki “bann lansegnman debaz lor Lekris.” w24.04 4-5 ¶11-12

Toulezour nou bizin pran bann desizion. Sertin desizion fasil pou pran, kouma par exanp, ki nou pou manze pou ti-dezene, ouswa ki ler nou pou al dormi. Parkont, ena bann desizion ki pli difisil pou pran. Kifer? Parski sa bann desizion-la kapav ena enn lefe lor nou lasante, lor nou lavi fami, ouswa lor nou servis pou Zeova. Selman, nou tou nou anvi pran bann bon desizion pou nou ek nou fami. Me pli inportan, nou anvi ki nou bann desizion fer Zeova plezir. (Rom. 12:1, 2) Pou to pran bann bon desizion, premie kitsoz ki to bizin fer se pran bann ransegnman. Kifer sa inportan? Anou pran enn lexanp. Fer koumadir enn kikenn inn al get enn dokter parski li ena enn maladi bien grav. Eski dokter-la pou pran enn desizion lor tretman ki sa dimounn-la bizin swiv san ki li examinn li ouswa san ki li poz li bann kestion? Non. Enn bon dokter pou pran tou bann ransegnman ki bizin ar dimounn-la pou ki li kapav pran enn bon desizion. Dan mem fason, twa osi to pou kapav pran bann pli bon desizion, si avan to pran enn desizion to pran bann ransegnman ki bizin. w25.01 14 ¶1-3

Ki kitsoz nou kone lor mizerikord Zeova? Kouma Zeova inn montre ki Li “pa anvi ki personn detrir”? (2 Pier 3:9) Anou gete kouma Zeova ti montre mizerikord anver bann dimounn ki ti fer bann pese bien grav. Lerwa David ti fer boukou pese grav. Par exanp, li ti komet limoralite sexiel ek li ti fer touy enn kikenn. Selman, kan li ti repanti, Zeova ti montre mizerikord anver li ek ti pardonn li. (2 Sam. 12:1-12) Pandan boukou lane, Lerwa Manase ti fer seki move devan lizie Zeova. Me kan li ti repanti, Zeova ti montre mizerikord anver li ek ti pardonn li. (2 Kro. 33:9-16) Sa bann lexanp-la montre nou ki Zeova montre mizerikord kan Li trouv enn bon rezon pou fer sa. Nou kapav sir ki Zeova pou resisit bann dimounn ki’nn repanti, mem si zot ti fer bann pese ki bien grav. w24.05 4 ¶12