Me

Apre ki Li ti fer bann Izraelit sorti dan Lezip, Zeova ti etabli bann pret pou servi dan tabernak. Li ti osi donn bann Levit bann lezot travay pou fer kot tabernak. Me eski Zeova ti okip pli bien bann ki servi dan tabernak ouswa bann ki ti res pli pre ar tabernak? Non. Kifer? Parski Zeova Li pa fer preferans. Tou bann Izraelit ti kapav vinn bann kamarad Zeova. Par exanp, Zeova ti fer sir ki lepep an-antie kapav trouv kolonn niaz ek kolonn dife ki ti lao tabernak. (Ex. 40:38) Kan niaz-la ti koumans bouze pou al dan enn nouvo direksion, tou dimounn ti kapav trouv li. Lerla, zot ti ramas zot bann zafer, kas zot latant, ek al ansam ar bann lezot Izraelit. (Nonb 9:15-23) Li parey pou nou azordi. Ninport kotsa nou reste lor later, Zeova kontan nou, Li pran nou swin, ek Li protez nou. w24.06 4 ¶10-12

David so garson Absalon, ti anvi touy David pou li vinn lerwa dan so plas. (2 Sam. 15:12, 13) Akoz sa, David ti bizin kit Zerizalem pli vit ki li kapav. Pandan ki so bann serviter ti pe sove, David ti konpran ki enn kikenn ti bizin reste pou konn plis lor seki Absalon ti pe anvi fer. Alor li ti fer Zadok ek lezot pret retourn Zerizalem pou vinn so bann espion. (2 Sam. 15:27-29) Selman, bann-la ti bizin fer bien atansion. David ti demann so bann bon kamarad, Zadok ek Oushay, pou ed li pou mont enn plan. (2 Sam. 15:32-37) Dapre plan David, Oushay ti bizin fer sanblan ki li pe soutenir Absalon. Li ti bizin donn Absalon konsey kouma pou atak David, ek lerla, sa ti pou donn David letan pou prepar enn latak. Apre sa, Oushay ti fer Zadok ek Abiatar kone ki Absalon ti pou fer. (2 Sam. 17:8-16) Lerla, sa de zom-la ti avoy David enn mesaz pou fer li kone ki plan Absalon ti ena. Sa ti zwe enn rol inportan pou protez David.—2 Sam. 17:21, 22. w24.07 4-5 ¶9-10

Sertin serviter Zeova ankor bien trakase pou bann pese ki zot inn fer dan lepase. Selman, fode pa nou bliye ki Zeova bien kontan nou ek ki Li’nn donn laranson pou ki nou kapav gagn pardon nou bann pese. Li anvi ki nou aksepte sa kado-la! Li fer nou konpran ki, si nou “remet bann kitsoz an-ord” avek Li, Li pou pardonn nou bann pese net. Nou bien rekonesan ki nou Papa Zeova bliye bann pese ki nou’nn fer dan lepase, pa vre! Selman, zame Li pa bliye bann bon kitsoz ki nou fer. (Ps. 103:9, 12; Ebre 6:10). Si to latet fatige akoz bann pese ki to’nn fer dan lepase, konsantre twa lor seki to pe fer aster-la ek osi lor seki to pou kapav fer dan lavenir. Nou pa kapav sanz lepase. Me azordi, nou ena gran loner pou servi Zeova ek pou fer Li plezir, ek nou kapav osi reflesi lor bann zoli promes ki Li’nn fer nou konsernan lavenir. w24.10 8 ¶8-9

Kan to lir Labib, parfwa to kapav santi twa dekouraze parski to rann twa kont ki to ena boukou kitsoz pou ameliore. Anou pran enn lexanp: Fer koumadir zordi to lektir Labib koz lor linportans pou pa fer preferans. (Zak 2:1-8) Ek to trouve ki to kapav amelior fason ki to tret lezot. Alor, to desid pou fer bann sanzman. Bien bon! So landemin, dan to lektir Labib, to trouve ki li inportan ki to fer atansion ar fason ki to koze. (Zak 3:1-12) Ek to rekonet ki parfwa to dir bann kitsoz ki inpe negatif. Akoz sa, to deside ki to pou dir bann kitsoz ki pli pozitif ek ankourazan. Bien bon! Lor trwaziem zour, dan to lektir Labib, to gagn bann konsey pou pa vinn kamarad avek lemond. (Zak 4:4-12) Ek to rann twa kont ki to bizin fer plis atansion ar bann kitsoz ki to lir, to gete, ek to ekoute. Bien bon! Selman, lor katriem zour, kitfwa to pou ena linpresion ki to ena tro boukou kitsoz pou ameliore, pa vre! Me pa dekouraze. Pa bliye ki met “nouvo personalite” lor nou, se pa enn kitsoz ki fer enn sel kout; nou bizin kontign fer sa. w24.09 5-6 ¶11-12

Zezi ti kone ki Zeova ti trouv bann linzistis ki li ti pe pase, ek li ti ena konfians ki Zeova ti pou regle sa bann linzistis-la dan moman ki bizin. Kan enn kikenn tret nou dan enn fason inzis, nou kapav imit Zezi ek kontrol nou-mem. Si enn kikenn inn fer nou enn kitsoz ki pa tro grav, nou kapav swazir pou pas lor la. Nou kapav osi swazir pou pa dir nanye, parski si nou dir kitsoz, sitiasion-la kapav vinn pli pir. (Ekle. 3:7; Zak 1:19, 20) Selman, si nou trouv enn kikenn ki pe pas par enn linzistis, ouswa si nou bizin defann nou krwayans, dan bann sitiasion koumsa kitfwa nou pou bizin dir kitsoz. (Zist. 6:1, 2) Ek si nou deside pou dir kitsoz, nou bizin res kalm ek koz avek respe. Nou kapav osi imit Zezi kan nou fer konfians “sa Kikenn ki ziz avek zistis la.”—1 Pier 2:23. w24.11 5-6 ¶10-12

Nou tou nou bien kontan kan enn kikenn repanti! (Lik 15:7) Me mem si bann ansien fer zot maximum pou ed enn kikenn pou sanze, kisann-la vremem ed li pou repanti? Lapot Pol ti dir: “Li posib ki Bondie donn zot repantans.” (2 Tim. 2:25) Konsernan sa verse-la, enn not pou letid dir: “Se gras-a Zeova, pa gras-a enn dimounn, ki enn kitsoz koumsa kapav arive, parski se Zeova ki ed bann ki rebel pou fer bann sanzman. Pol koz lor sertin parmi bann benediksion ki enn kikenn gagne kan li repanti; li gagn enn konesans pli exakt lor laverite, li regagn so bon sans, ek li sorti dan piez Satan.—2Tim 2:26.” Kan enn kikenn repanti, bann ansien pou kontign vizit li pou ed li pou fer so lafwa vinn pli for. Ek zot pou kontign ed li pou lit kont bann piez Satan ek pou fer seki bon.—Ebre 12:12, 13. w24.08 23 ¶14-15

Lafoul ki Zezi ti nouri, ti plis interese pou gagn manze, ki ekout bann lansegnman Zezi. Kifer nou dir sa? So landemin, zot ti revinn dan mem landrwa kot Zezi ti nouri zot. Me Zezi ek so bann zapot pa ti la. Alor, zot ti mont lor bann bato ki ti sorti Tiberiad, ek zot ti al Kafarnaom pou al rod Zezi. (Zan 6:22-24) Eski zot ti fer sa parski zot ti anvi aprann plis lor Rwayom Bondie? Non. Zot ti fer sa parski zot ti anvi ki Zezi nouri zot ankor. Kouma nou konn sa? Kan zot ti reisi trouv Zezi pre ar Kafarnaom, Zezi pa ti ezite pou dir zot ki zot ti pe rod li parski zot ti anvi gagn manze. Li ti dir zot ki mem si zot ti “manz dipin ziska ki zot vant plin,” sa manze-la ti ‘enn manze ki kapav gate.’ Lerla, li ti dir zot ki zot bizin plito travay pou enn “manze ki pa gate ek ki fer gagn lavi pou touletan.” (Zan 6:26, 27) Zezi ti dir zot ki se so Papa ki donn sa kalite manze-la. w24.12 5 ¶8-9

Frer, pou to vinn enn bon ansegnan, to lansegnman bizin touletan sorti dan Labib. Ek kan to donn to bann frer ek ser bann konsey, sa bizin touletan an-akor ar Labib. Pou to reisi fer sa, to bizin kontan etidie Labib ek nou bann piblikasion. (Prov. 15:28) Kan to etidie, gete kouma nou bann piblikasion explik bann verse Labib, koumsa to pou kapav met zot an pratik kouma bizin. Kan to ansegn lezot, fer zefor pou tous zot leker. Ek pou to vinn enn bon ansegnan, pa ezite pou rod led ar bann ansien ki ena lexperyans ek pou met an pratik bann konsey ki zot donn twa. (1 Tim. 5:17) Enn ansien bizin “kapav ankouraz” so bann frer ek ser. Selman, parfwa li pou bizin osi konsey zot ek “koriz” zot. Ek kan li fer sa, li bizin touletan zanti. Si to zanti, to kontan to bann frer ek ser, ek to servi Labib pou ansegn lezot, to pou vinn enn bon ansegnan. Lerla, to pou imit nou Gran Ansegnan, Zezi Kris.—Mat. 11:28-30; 2 Tim. 2:24. w24.11 24 ¶16

Nou kapav donn Zeova laglwar par seki nou dir lor Li. Labib ankouraz nou pou “sant pou Zeova,” pou “loue so nom,” pou “anons bon nouvel lor delivrans ki Li pou amene,” ek pou “anons so laglwar parmi bann nasion.” (Ps. 96:1-3) Se dan sa fason-la ki nou kapav donn nou Papa laglwar. (Zist. 4:29) Nou kapav osi servi nou bann kitsoz materyel pou donn Zeova laglwar. Bann serviter Zeova inn touletan donn Li loner dan sa fason-la. (Prov. 3:9) Par exanp, bann Izraelit ti fer bann kontribision pou konstriksion ek mintenans tanp. (2 Ler. 12:4, 5; 1 Kro. 29:3-9) Sertin disip Zezi “ti servi zot dibien pou soutenir li ek bann zapot.” (Lik 8:1-3) Labib dir osi ki kan sertin Kretien ti soufer akoz enn lafaminn, zot bann frer ek ser ki ti res dan bann lezot landrwa ti avoy kas pou zot. (Zist. 11:27-29) Azordi, nou osi nou kapav donn Zeova laglwar par nou bann kontribision volonter. w25.01 4 ¶8; 5 ¶11

Ki kitsoz ti ed Korney pou pran batem? Labib dir ki Korney “ansam avek so fami ti ena enn gran respe pou Bondie.” Anplis, Korney ‘ti touletan pe sipliy Bondie.’ (Zist. 10:2) Kan Pier ti anons bon nouvel ar Korney, li ek so fami ti aksepte Zezi, ek zot pa ti tarde pou pran batem. (Zist. 10:47, 48) Sirman Korney ti pre pou fer bann sanzman ki bizin, pou ki li kapav ador Zeova ansam ar so fami. (Zozwe 24:15; Zist. 10:24, 33) Korney ti ena enn gran pozision, ek li ti kapav servi sa kouma enn pretext pou ki li pa vinn enn Kretien. Selman, li pa ti fer sa. Eski to bizin fer bann gran sanzman dan to lavi pou ki to kapav pran batem? Si wi, Zeova pou ed twa. To kapav sir ki Zeova pou beni twa si to bien deside pou swiv bann prinsip Labib ek pou servi Li. w25.03 5 ¶12-13

Si to tann bann kitsoz negatif lor nou lorganizasion ouswa lor bann ansien, pa bliye ki bann lennmi Bondie ti fer sa ar Zezi ek ar bann Kretien dan premie siek osi. Zezi ti dir ki bann dimounn ti pou persekit bann serviter Zeova ek ti pou dir bann foste lor zot. Se seki pe arive azordi! (Mat. 5:11, 12) Alor, kan nou tann bann mansonz lor nou lorganizasion, nou bizin rapel ki se Satan ki pe atak nou ek ki nou bizin azir deswit. Me kouma nou kapav protez nou kont bann mansonz Satan? Pa ekout bann mansonz ki Satan pe fane. Lapot Pol ti donn bann instriksion bien kler lor seki nou bizin fer kan nou tann bann mansonz. Li ti dir Timote pou “donn lord sertin pou pa . . . pran kont bann fos zistwar” ek pou “rezet bann fos zistwar ki dezonor Bondie.” (1 Tim. 1:3, 4) Dan mem fason, kan nou tann bann fos zistwar, fode pa nou ekoute parski nou kone ki se Satan ki pe fann sa bann mansonz-la. Alor, pou protez nou, nou bizin ekout zis “bann bon parol” laverite.—2 Tim. 1:13. w24.04 11 ¶16; 13 ¶17

Res ini ar bann ki fidel ar Zeova. Bondie anvi ki nou ador Li dan linite ansam avek nou bann frer ek ser. Selman, nou pou res ini tanki nou res atase ar laverite. Tou dimounn ki fann bann linformasion ki al kont laverite ki ena dan Labib, kree divizion dan lasanble. Akoz sa, Bondie inn averti nou pou “evit” zot. Sinon, nou kapav al lwin ar laverite. (Rom. 16:17) Kan nou rekonet laverite ek res atase ar li, nou pou res pros ar Zeova ek nou pou gard enn lafwa for. (Efe. 4:15, 16) Sa pou protez nou osi kont tou bann fos kitsoz ki Satan pe fane, ek nou pou res an sekirite dan lebra Zeova pandan gran soufrans. Alor, anou kontign res atase ar laverite, “ek Bondie lape pou avek [twa].”—Fil. 4:8, 9. w24.07 13 ¶16-17

Zezi ti ed sirtou bann dimounn ki ti santi zot koupab akoz zot bann pese, ek li ti invit zot pou vinn so bann disip. Li ti kone ki pese se lasours tou bann problem ki bann dimounn gagne. Li ti dir: “Se pa bann dimounn ki ena enn bon lasante ki bizin dokter, me bann ki malad. . . . Mo pa’nn vini pou bann dimounn ki drwat me pou bann dimounn ki ena enn move lavi.” (Mat. 9:12, 13) Akoz sa, Zezi ti fer zefor pou ed bann dimounn ki ti pe soufer akoz bann pese ki zot ti fer. Par exanp, kan enn madam ti lav lipie Zezi ar so bann larm, Zezi ti bien zanti avek li ek li ti pardonn so bann pese. (Lik 7:37-50) Li ti osi ansegn enn Samaritenn, mem si li ti kone ki Samaritenn-la ti ena enn move lavi. (Zan 4:7, 17-19, 25, 26) Li vre ki lamor se pli pir konsekans pese. Me Zeova ti mem donn Zezi pouvwar pou resisit bann zom, bann fam, ek bann zanfan ki ti mor!—Mat. 11:5. w24.08 4 ¶9-10

Dan lavenir, kouma Zeova pou fer so nom gagn laglwar? Li pou fer sa kan Li pou amenn lazistis lor later. Biento, Li pou detrir Gran Babilonn, lanpir mondial bann fos relizion, parski zot inn fer bann kitsoz ki bien move ek zot inn ansegn boukou mansonz lor Li. (Rev. 17:5, 16; 19:1, 2) Kan sertin pou trouv destriksion Gran Babilonn, kitfwa zot pou koumans ador Zeova ansam avek nou. Finalman, kan pou ena lager Armagedon, Zeova pou detrir lemond Satan ek bann ki deteste Li ek ki’nn koz manti lor so nom. Selman, Li pou sap bann dimounn ki kontan Li, ki obeir Li, ek ki anvi donn Li laglwar. (Mark 8:38; 2 Tes. 1:6-10) Apre leprev final ki pou ena apre Regn Mil An Zezi Kris, Zeova pou fini sanktifie so nom. (Rev. 20:7-10) Lerla, “later pou ranpli ar konesans lor laglwar Zeova parey kouma delo kouver lamer.” (Abak. 2:14) Sa pou vremem extraordiner kan tou dimounn pou donn Zeova laglwar ki so nom merite! w25.01 7 ¶15-16

Ki kitsoz ti pou ed bann Kretien Ebre pou andir bann persekision ki zot ti pou gagne? Lapot Pol ti anvi fer zot konpran ki, si zot andir bann persekision, zot pou gagn bann bienfe. Li ti explik zot ki, kan zot gagn bann leprev, Bondie servi sa pou form zot. Sa formasion-la kapav ed enn kikenn pou devlop ek pou amelior so bann kalite. Alor, si bann Kretien Ebre ti res konsantre lor bann bienfe ki zot kapav gagne kan zot andir bann leprev, li ti pou pli fasil pou zot andire. (Ebre 12:11) Pol ti ankouraz bann Kretien Ebre pou ena kouraz ek pou pa bes lebra kan zot gagn persekision. Lapot Pol ti kapav donn bann bon konsey lor kouma pou andir bann persekision. Kifer? Parski avan ki li vinn Kretien, limem li ti persekit bann Kretien ek li ti kone par ki zot ti pase. Li ti kone osi kouma pou andir bann persekision, parski apre ki li ti vinn Kretien, li ti gagn enn ta persekision.—2 Kor. 11:23-25. w24.09 12 ¶16-17

Sak zour ki pase, li vinn deplizanpli inportan ki nou prese. Kifer nou dir sa? Parski pa res boukou letan avan ki lafin vini. Anou gete seki Zezi ti predir konsernan predikasion dan bann dernie zour, parey kouma nou trouve dan Mark 13:10. Dan Levanzil Matie, Zezi ti dir ki bon nouvel ti pou prese partou lor later avan ki “lafin” vini. (Mat. 24:14) Lor ki lafin Zezi ti pe koze? Li ti pe koz lor lafin move lemond Satan. Zeova inn fini fixe ‘enn zour ek enn ler’ pou ki lafin arive. (Mat. 24:36; Zist. 1:7) Ek sak zour ki pase, nou pe koste pli pre ar lafin. (Rom. 13:11) Me ziska ki lafin arive, nou bizin kontign prese. Enn kestion ki nou tou nou bizin poz nou-mem se: ‘Pou ki rezon nou bizin pres bon nouvel?’ Nou prese parski se lamour ki motiv nou pou prese. Kan nou prese, nou montre ki nou kontan bon nouvel, ki nou kontan bann dimounn, me pli inportan, ki nou kontan Zeova ek so nom. w24.05 14 ¶2-3

Paran, ed to zanfan pou reflesi lor bann kitsoz extraordiner ki Zeova inn kree. Kan zot pe marse dan lanatir, ouswa kan to pe okip to zardin, atir latansion to zanfan lor bann diferan form ouswa bann desin ki ena dan lanatir, ek lor kouma nou kapav trouv sertin parmi sa bann form-la lor diferan kitsoz. Kifer? Parski sa bann form-la montre ki ena enn kikenn ki bien intelizan ki’nn kree sa bann kitsoz-la. Par exanp, ena boukou kitsoz dan lanatir, kouma bann galaxi, bann kokiyaz, sertin fey, ouswa leker enn fler soley, ki dan enn form spiral. Pandan plizir lane, boukou siantifik inn etidie sa form-la. Enn siantifik ki apel Nicola Fameli explike ki, kan to kont bann spiral ki ena dan sertin kitsoz ki trouv dan lanatir, to tom lor enn konbinezon sif ki bien presi. Bann siantifik apel sa konbinezon sif-la, suite de Fibonacci. w24.12 16 ¶7

Moiz, David, ek Zan ti viv dan diferan lepok, ek zot sitiasion ti bien diferan ar nou. Me ena boukou kitsoz ki nou fer parey kouma zot. Zot ti servi vre Bondie. Nou osi parey! Zot ti priye Zeova, zot ti kont lor Li, ek zot ti rod so bann konsey. Nou osi parey! Ek parey kouma sa bann zom-la, nou ena konfians ki Zeova beni bann ki obeir Li. Alor, anou swiv konsey sa bann zom-la ek obeir bann komannman Zeova. Lerla, nou pou vremem reisi tou seki nou fer. Nou pou gagn lavi ek nou “pou res lontan” lor sa later-la; nou pou res pou touletan! Anplis, nou pou ena lazwa pou fer plezir nou Papa ki dan lesiel, ki kontan nou, ek ki pou rekonpans nou dan bann fason ki nou pa atann!—Efe. 3:20. w24.11 13 ¶20-21

Dan premie siek, sertin frer ti pe servi kouma serviter lasanble. (1 Tim. 3:8) Se kitfwa lor zotmem ki lapot Pol ti pe koze kan li ti dir ki zot ti pe “ed lezot.” Sa bann serviter lasanble la ti pe fer bann travay bien inportan pou ki bann ansien kapav res konsantre lor lansegnman ek pran swin bann frer ek ser lor plan spiritiel. Par exanp, bann serviter lasanble kitfwa ti pe fer bann kopi bann Lekritir, ouswa zot ti aste bann kitsoz pou fer sa bann kopi-la. Ki kitsoz inportan bann serviter lasanble fer azordi? (1 Pier 4:10) Sertin okip kont ek teritwar lasanble. Zot pas komann bann piblikasion, zot servi dan sono, dan servis lakey, ouswa zot ede pou fer mintenans Lasal. Tou seki zot fer bien inportan pou ki lasanble fonksionn bien.—1 Kor. 14:40. w24.10 19 ¶4-5

Kan nou rapel ki Zeova Li Bondie vivan ek ki Li touletan pre pou ed nou, sa donn nou lafors pou andir ninport ki difikilte. Apre tou, Bondie Li Tou-Pwisan, ek Li kapav donn nou lafors pou andire. Akoz sa, nou sir ki nou kapav sirmont ninport ki difikilte. Anplis, kan nou trouve kouma Zeova ed nou pou sirmont bann ti difikilte, nou ena plis konfians ki Li kapav ed nou kan nou gagn bann gran leprev. Anou get de sitiasion ki ti ed Lerwa David pou ena plis konfians an Zeova. Kan David ti enn zenn berze, enn lion ek enn lours ti pran bann mouton so papa. Avek kouraz, toule-de fwa David ti galoup deryer sa bann zanimo-la ek li ti sov bann mouton so papa. Selman, David pa ti panse ki li ti reisi fer sa par limem. Li ti kone ki Zeova ti ed li. (1 Sam. 17:34-37) David ti reflesi lor la, ek sa ti fer li ena plis konfians ki Zeova ti pou ed li dan lavenir. w24.06 21 ¶5-6

Fer koumadir to invite dan enn program. Eski to pou ale ouswa non? Si to anvi pran enn bon desizion, to pou bizin poz bann kestion sa dimounn ki’nn invit twa la. Par exanp, to kapav demann li: “Kan ek kotsa pou fer sa program-la? Komie dimounn pou ena? Kisann-la ki pou veye ki tou pe pas bien? Kisann-la pou ena dan sa program-la ek kouma program-la pou deroule? Eski pou ena lalkol?” Repons pou sa bann kestion-la kapav ed twa pou pran enn bon desizion. Kan to fini gagn tou bann ransegnman, li bon ki to reflesi lor seki kapav arive. Par exanp, fer koumadir to’nn aprann ki pou ena bann dimounn dan sa program-la ki pena okenn respe pou bann prinsip Labib, ouswa ki pou ena lalkol amor dan program-la. Eski to panse li posib ki sa program-la vinn enn “fet kot pena okenn kontrol”? (1 Pier 4:3) Kan to reflesi lor tou seki kapav arive, sa kapav ed twa pou pran bann bon desizion. w25.01 15 ¶4-5

Zeova servi bann lexanp pou montre nou ki gras-a laranson, Li kapav efas pese bann dimounn ki repanti. Kan ena enn tas rouz fonse lor enn linz, li extra difisil pou tir sa tas-la. Zeova servi sa lexanp-la pou montre nou ki Li kapav lav nou bann pese ziska ki nou nepli trouv zot. Labib konpar osi nou bann pese ar bann “det.” (Mat. 18:32-35) Alor, sak fwa ki nou fer enn pese kont Zeova, se koumadir nou det pe ogmante. Akoz sa, nou ena enn gro det anver Li! Selman, kan Zeova pardonn nou, se koumadir Li kennsel sa det-la. Ek kan Li kennsel nou det, Li pa revinn lor la ankor. Kan nou reflesi lor Zeova so pardon, sa vremem rasir nou, pa vre! w25.02 10 ¶9-10

Kan bann paran vinn vie, boukou zanfan pran bann dispozision pou okip zot paran, ek zot bien kontan pou fer sa. (1 Tim. 5:4) Selman, bann paran ki ena konfians dan Zeova, zot konpran ki zot pou pli ere kan zot ed zot zanfan pou vinn bann serviter Zeova, olie ki zot atann ki zot zanfan gagn ase kas pou ki li kapav pran zot swin kan zot vinn vie. (3 Zan 4) Par to lexanp, montre to zanfan ki to ena konfians dan Zeova. Lerla, amezir ki to pe montre li kouma li kapav debrouy li par limem, li pou konpran ki li bizin fer Zeova konfians. Depi ki li tipti, montre li ki travay dir bien inportan. (Prov. 29:21; Efe. 4:28) Ek amezir ki li grandi, ed li pou fer so best dan lekol. Bann paran Kretien bizin fer bann resers ek rod bann prinsip Labib pou ki zot kapav ed zot zanfan pou pran bann bon desizion konsernan zot ledikasion. Paran, to lobzektif se pou prepar to zanfan pou li aprann depann lor limem, koumsa li pou kapav ena plis letan pou prese, ek kitfwa mem fer pionie. w25.03 31 ¶15-16

Dan Izai sapit 65, Zeova explike kouma lavi bann dimounn ti pou ete dan paradi spiritiel. Sa profesi-la ti realize enn premie fwa lane 537 Avan Nou Lepok. Sa lane-la, bann Zwif ki ti repanti, ti libere depi Babilonn ek zot ti retourn Zerizalem. Zeova ti beni so pep, ek Li ti ed zot pou rekonstrir lavil Zerizalem. Li ti osi ed zot pou rekonstrir so tanp, plas prinsipal kot zot ti ador Li dan Izrael. (Iza. 51:11; Zaka. 8:3) Dan nou lepok, profesi Izai ti realize enn deziem fwa an 1919 kan bann serviter Zeova ti sorti dan Gran Babilonn. Apartir sa moman-la, paradi spiritiel ti koumans devlope. Par exanp, bann proklamater Rwayom Bondie ti koumans form boukou lasanble lor later, ek bann frer ek ser ti fer zefor pou devlop bann kalite Kretien. Bann dimounn ki avan ti violan, ti “met lor zot nouvo personalite ki finn kree dapre volonte Bondie.” w24.04 20-21 ¶3-4

Dan sertin pei, se bann paran ouswa bann lezot dimounn ki deside ar kisann-la enn selibater pou marye. Ek dan lezot pei, se bann fami ouswa bann kamarad ki rod enn kikenn pou enn selibater. Lerla, zot fer sa de dimounn-la zwenn pou zot gete si zot al bien ar zot kamarad. Si demann twa pou fer agwa, setadir pou rod enn kikenn pou enn selibater, to bizin pran kont seki toule-de selibater pe rode kot enn fitir konzwin. Si to panse ki enn kikenn pou fer enn bon konzwin pou enn kamarad ouswa enn fami, aprann konn sa dimounn-la bien, gete si li ena bann zoli kalite, me pli inportan gete si li ena enn bon lamitie ar Zeova. Enn bon lamitie ar Zeova, li boukou pli inportan ki kas, ledikasion, ouswa pozision sosial. Pa bliye osi ki se sa de selibater-la ki bizin deside si zot pou marye ouswa non. w24.05 23 ¶11

Nou kapav ed bann ki pe frekante kan nou vey bien lor seki nou dir. Ena sertin kitsoz ki nou kapav dir, me ena lezot kitsoz ki fode pa nou dir. (Prov. 12:18) Par exanp, nou pa pou dir lezot ki de dimounn pe frekante, parski kitfwa zot ti pou kontan partaz sa nouvel-la zotmem. Fode pa osi ki nou fer palab lor zot ek ki nou kritik zot. (Prov. 20:19; Rom. 14:10; 1 Tes. 4:11) Fode pa osi ki nou poz zot bann kestion ouswa nou dir zot bann kitsoz ki pou met presion lor zot. Kouma nou bizin azir kan de dimounn desid pou aret frekante? Fode pa nou rod kone kifer, ek fode pa nou dir ki se akoz enn ant zot de ki sa finn arive. (1 Pier 4:15) Kan de dimounn desid pou aret frekante, sa pa vedir ki zot frekantasion pa’nn pas bien. Okontrer, zot frekantasion inn permet zot pran enn bon desizion. Selman, akoz sa desizion-la, kitfwa zot tris ek zot soufer. Alor, nou bizin trouv bann fason pou soutenir zot. w24.05 31 ¶15-16

Enn kitsoz ki kapav plis dekouraz nou, se kan enn manb nou fami ouswa enn bon kamarad kit Zeova. (Ps. 78:40) Plis to kontan enn dimounn, plis sa pou difisil pou aksepte sa sitiasion-la. Si to’nn pas par sa sitiasion-la, Zadok so lexanp fidelite kapav donn twa lafors. Zadok ti swazir pou res fidel ar Zeova, mem si so bon kamarad Abiatar ti swazir pou pa res fidel ar Zeova. Sa ti arive kan Lerwa David ti vinn vie ek ti pre pou mor. So garson Adoniya ti esey fer limem vinn lerwa, mem si Zeova ti deside ki se Salomon ki ti pou vinn lerwa. (1 Kro. 22:9, 10) Abiatar ti swazir pou soutenir Adoniya. (1 Ler. 1:5-8) Kan li’nn fer sa, Abiatar pa’nn zis trayir David ek Zadok, me li’nn osi trayir Zeova! Pandan plizir dizenn lane, Zadok ek Abiatar ti travay ansam kouma pret.—2 Sam. 8:17; 15:29; 19:11-14. w24.07 6 ¶14-15

Nou kapav sir ki li vo lapenn ki nou kontign res lor nou gard pou pa tom dan tantasion. Fer pese kapav fer nou pou gagn bann “plezir tanporer,” me viv dapre bann prinsip Zeova pou fer nou vremem ere. (Ebre 11:25; Ps. 19:8) Akoz samem Zeova finn kree nou pou viv dapre so bann prinsip. (Zen. 1:27) Alor, kan nou viv dan enn fason ki fer Zeova plezir, sa pou fer nou santi nou bien. Nou pou ena enn bon konsians, ek enn zour nou pou kapav viv pou touletan. (1 Tim. 6:12; 2 Tim. 1:3; Zid 20, 21) Li vre ki “laser li feb.” (Mat. 26:41) Me sa pa vedir ki nou pa kapav fer nanye pou lit kont nou bann febles. Zeova pre pou donn nou seki nou bizin, setadir so pwisans. (2 Kor. 4:7) Me remarke ki Bondie promet pou donn nou enn pwisans ki plis ki normal. Me avan, nou bizin fer tou seki nou kapav pou lit kont bann tantasion. Zeova pou reponn nou bann lapriyer ek Li pou donn nou plis lafors. (1 Kor. 10:13) Wi, gras-a led Zeova, nou kapav kontign res lor nou gard pou pa tom dan tantasion. w24.07 19 ¶19-21

Dan nou text pou azordi, lapot Pol ti dir Timote, ki ti enn ansien, ki li ti bizin koriz “bann ki pratik pese” devan “tou dimounn.” Eski Pol ti pe rod dir ki bizin koriz enn kikenn ki’nn fer enn pese devan tou bann frer ek ser? Pa forseman. Pol ti pe koz lor bann dimounn ki kitfwa ti konn sa sitiasion-la. Kitfwa zot ti temwin seki ti arive, ouswa kitfwa sa dimounn-la ti dir zot ki li’nn fer enn pese. Dan sa ka-la, bann ansien pou dir zis bann dimounn ki konn sa sitiasion-la, ki zot inn okip sa sitiasion-la ek ki zot inn koriz sa dimounn ki’nn fer pese la. Parfwa, kan enn kikenn fer enn pese grav, li kapav arive ki boukou dimounn dan lasanble kone ki li’nn fer enn pese, ouswa kitfwa zot pou konn sa sitiasion-la apre. Dan sa ka-la, lexpresion “tou dimounn” vedir tou bann frer ek ser dan lasanble. Lerla, enn ansien pou fer enn lanons dan lasanble pou dir ki sa frer-la ouswa sa ser-la inn gagn enn blam. Kifer? Pol dir: “Pou ki sa servi kouma enn lavertisman pou lezot,” pou ki zot pa fer pese. w24.08 23-24 ¶16-17

Nou osi nou bizin prepar nou bien ek kontign veye ziska ki lafin arive. Bann Kretien ki ena lesperans pou al dan lesiel bizin kontign veye ek res fidel. Si zot fer sa, Zezi “pou pran” zot ek pou amenn zot avek li dan lesiel. (Mat. 24:40) Sa bann Kretien-la pe atann avek inpasians ki zot ansam avek Zezi dan lesiel. Lerla, apre lager Armagedon, zot pou marye ar Lagno. (2 Tes. 2:1) Biento, Zezi pou ziz tou dimounn. Selman, nou pena okenn rezon pou per! Si nou kontign res fidel, nou Papa Zeova pou donn nou “sa pwisans ki plis ki seki normal la” pou ki nou “reisi . . . tini dibout devan Garson limanite.” (2 Kor. 4:7; Lik 21:36) Ninport ki lesperans nou ena, si nou kontign pran kont bann lavertisman Zezi, nou pou reisi fer Zeova plezir. Lerla, dan so bonte extraordiner, Li pou ekrir nou nom “dan liv lavi”!—Dan. 12:1; Rev. 3:5. w24.09 25 ¶19-20

Gras-a Labib, to kapav lit kont to bann panse negatif. Kouma to kapav fer sa? Rapel bann bon kitsoz ki to ena, kouma par exanp, bann benediksion ki Zeova donn twa. Pa bliye osi ki bann dimounn ki pa servi Zeova, zot pa gagn tousala. Pou sa bann dimounn-la, enn bon travay ek enn lavi konfortab, se samem ki pli inportan pou zot parski zot pena okenn lespwar pou lavenir. Selman, twa to diferan! Kifer? Parski Zeova pa zis donn twa bann bon kitsoz depi aster-la, me Li osi promet twa ki Li pou donn twa bann zoli kitsoz dan lavenir. (Ps. 145:16) Pa bliye sa osi: Si to ti pran bann lezot desizion, to pa kone kouma to lavi ti pou ete azordi. Selman, ena enn kitsoz ki nou tou nou kapav sir: Si nou pran bann desizion parski nou kontan Zeova ek nou kontan nou prosin, nou pou touletan ena enn lavi ki ere. w24.10 27 ¶12-13