Mars

Labib koz lor bann dimounn ki ti drwat, me ki apre ti vinn bann dimounn ki inzis. Anou get lexanp Lerwa Salomon. Salomon ti kone kisann-la Zeova ti ete. Li ti kone kouma pou ador Li, ek li ti gagn boukou benediksion ar Zeova. Me kanmem sa, li ti al ador bann fos bondie. Akoz bann pese ki Salomon ti fer, Zeova ti bien ankoler, ek pep Izrael ti soufer pandan plizir santenn lane. Li vre ki Labib dir ki “Salomon ti al repoze ar so bann anset,” ek parmi so bann anset ti ena Lerwa David. (1 Ler. 11:5-9, 43; 2 Ler. 23:13) Me mem si Labib dir ki Salomon ti al repoze ar so bann anset, eski savedir ki Zeova pou resisit li? Labib pa dir nanye lor la. Rezireksion, se enn kado nou Papa Zeova. Li donn sa kado-la bann dimounn ki Li Li anvi, pou ki zot kapav gagn lokazion pou servi Li pou touletan. (Zob 14:13, 14; Zan 6:44) Eski Salomon pou gagn sa kado-la? Zis Zeova tousel ki konn sa. Nou, nou pa kone. Selman, seki nou kone, seki Zeova touletan fer seki drwat. w24.05 4 ¶9

Kan nou donn nou lavi Zeova ek nou pran batem, nou vinn enn invite anba latant Zeova. Gras-a sa, nou gagn tou seki nou bizin pou ki nou kontign ena enn bon lamitie ar Zeova, ek nou kapav osi profit konpagni bann lezot invite Zeova. Latant Zeova, li pa zis dan enn sel plas. Ninport kotsa enn kikenn reste, li kapav vinn anba latant Zeova. Wi, latant Zeova li ninport kotsa so bann fidel serviter ete! (Rev. 21:3) Kan bann fidel serviter Zeova mor, eski zot ankor touzour bann invite Zeova anba so latant? Wi. Pou Zeova, zot ankor vivan dan so memwar! Se pou sa rezon-la ki Zezi ti dir: “Konsernan rezireksion bann mor, mem Moiz ti fer konn sa dan zistwar ki koz lor touf pikan, kan li ti apel Zeova ‘Bondie Abraam, Bondie Izaak, ek Bondie Zakob.’ Li pa Bondie bann mor, me Bondie bann vivan, parski pou li zot tou vivan.”—Lik 20:37, 38. w24.06 3 ¶6-7

Kan Zadok ti al Ebron, li ti pran so bann zarm avek li, ek li ti pare pou al lager. (1 Kro. 12:38) Li ti pre pou al lager ansam avek David ek defann Izrael kont so bann lennmi. Kitfwa Zadok pa ti ena boukou lexperyans pou lager kouma enn solda, me li ti enn zom ki ti ena boukou kouraz. Kouma Zadok finn aprann pou ena sa kantite kouraz-la? Li ti antoure ar bann zom ki ti ena lafors ek kouraz. Nou sir ki li ti aprann boukou ar zot lexanp. Par exanp, bann Izraelit ti anvi fer David vinn lerwa parski avek boukou kouraz li ti “diriz Izrael dan so bann kanpagn militer.” (1 Kro. 11:1, 2) Selman, David ti touletan kont lor Zeova pou lager kont so bann lennmi. (Ps. 138:3) Zadok ti osi aprann pou ena kouraz gras-a bann zom kouma Zoad ek so garson Benaya, ek osi 22 sef tribi ki ti soutenir David.—1 Kro. 11:22-25; 12:26-28. w24.07 3 ¶5-6

Enn parmi bann dimounn ki ti bien bizin repanti ek gagn pardon Zeova se Sol ki ti sorti Tars. Kifer? Parski li ti bien persekit bann disip Zezi. Laplipar bann Kretien kitfwa ti panse ki zame li ti pou sanze. Me Zezi ti kone ki Sol ti kapav sanze ek repanti. So Papa ek li ti trouv bann zoli kalite ki Sol ti ena. Zezi ti dir: “Sa zom-la limem linstriman ki mo’nn swazir.” (Zist. 9:15) Zezi ti mem fer enn mirak ki ti ed Sol pou repanti. (Zist. 7:58–8:3; 9:1-9, 17-20) Apre ki li ti vinn Kretien, Sol, ki plitar ti vinn lapot Pol, souvan ti explike ki kantite li ti rekonesan pou bonte ek mizerikord ki Zeova ek Zezi ti montre anver li. (1 Tim. 1:12-15) Enn fwa, Pol ti tann dir ki enn zom dan lasanble Korint ti pe viv enn lavi imoral. Ki kitsoz Pol ti dir zot fer? Seki li ti dir zot ansegn nou boukou kitsoz lor lamour, disiplinn, ek mizerikord Zeova. w24.08 13 ¶15-16

Tigit-tigit, Zeova inn montre kouma bann dimounn inparfe kapav vinn pros ar Li. Par exanp, premie dimounn ki’nn ena lafwa dan Zeova apre rebelion dan zardin Eden se Abel, deziem garson Adan ek Ev. Abel ti bien kontan Zeova, li ti anvi fer Li plezir, ek li ti anvi vinn pros ar Li. Akoz sa, li ti ofer Zeova enn sakrifis. Abel ti enn berze, alor li ti pran sertin parmi so bann zenn mouton, li ti touy zot, ek li ti ofer sa Zeova. Kouma Zeova ti reazir? Labib dir ki “Abel ek so lofrand ti fer Zeova plezir.” (Zen. 4:4) Zeova ti bien kontan osi bann sakrifis ki bann lezot dimounn ti fer parski zot ti kontan Li ek zot ti fer Li konfians, kouma par exanp Noe. (Zen. 8:20, 21) Kan Li ti aksepte sa bann sakrifis-la, Zeova ti montre ki bann imin inparfe kapav gagn so faver ek vinn pros ar Li. w24.08 3 ¶5-6

Kan nou pas par enn linzistis, sa kapav bien dekouraz nou ek bien bles nou. (Ekle. 7:7) Bann serviter fidel kouma Zob ek Abakouk ti ena sa bann santiman-la. (Zob 6:2, 3; Abak. 1:1-3) Kan nou pe pas par enn linzistis, li normal ki nou ena sa bann santiman-la. Selman, nou bizin fer bien atansion ar fason ki nou reazir, tansion nou fer enn kitsoz bet ek nou fer sitiasion-la vinn pli pir. Kan enn kikenn azir dan enn fason inzis ek si li pa pe gagn okenn pinision, nou kapav demann nou-mem si li vo lapenn ki nou kontign fer seki bon. Kan enn ekrivin psom ti trouv bann move dimounn pe maltret bann bon dimounn, ek ki li ti ena linpresion ki sa bann move dimounn-la ti pe profit lavi, li ti dir: “Ala kouma bann move dimounn ete, zot lavi touletan fasil.” (Ps. 73:12) Sa ekrivin psom la ti bien dekouraze akoz bann linzistis ki li ti trouve, ek li ti panse ki sa pa ti vo lapenn ki li servi Zeova. Li ti dir: “Kan mo ti esey konpran sa, sa ti fatig mwa.”—Ps. 73:14, 16. w24.11 3 ¶5-7

Nou donn Zeova laglwar parski nou ena enn gran respe pou Li. Nou ena boukou rezon pou respekte Zeova. Li Tou-Pwisan ek zame Li pa fatige. (Ps. 96:4-7) Li ena boukou sazes, ek nou trouv sa dan bann kitsoz ki Li’nn fer. Li’nn donn nou lavi ek tou seki nou bizin pou viv. (Rev. 4:11) Li fidel. (Rev. 15:4) Tou seki Li fer reisi ek Li touletan tini so bann promes. (Zozwe 23:14) Se akoz sa ki, kan Zeremi ti koz lor Zeova, li ti dir: “Parmi tou bann dimounn saz dan bann nasion ek zot bann rwayom, pena personn kouma twa!” (Zer. 10:6, 7) Wi, nou ena boukou rezon pou respekte nou Papa ki dan lesiel! Me Zeova, Li pa zis nou Bondie ki merit nou respe. Nou donn Zeova laglwar parski nou vremem kontan Li. w25.01 3 ¶5-6

Bann lennmi Bondie anvi fer nou trouv dan enn fason negatif bann bon kitsoz ki lorganizasion fer pou nou. Par exanp, Labib montre nou ki Zeova anvi ki so bann serviter res prop lor plan fizik, moral, ek spiritiel. Akoz sa, kan enn kikenn pe kontign fer enn move kitsoz ek ki li pa repanti, bizin exkli li. (1 Kor. 5:11, 12; 6:9, 10) Se enn komannman ki ena dan Labib, ek nou bizin obeir li. Selman, nou bann lennmi kapav servi sa kont nou ek dir ki nou pena tolerans, ki nou kondann bann dimounn, ek ki nou pena lamour. Nou bizin konpran kisann-la pe vremem atak nou. Se Satan ki pe fann bann mansonz lor lorganizasion Zeova. Labib dir ki li “papa bann manter.” (Zan 8:44; Zen. 3:1-5) Alor, fode pa sa etonn nou kan Satan servi bann dimounn pou fann bann mansonz lor lorganizasion. w24.04 10-11 ¶13-14

Apre ki gran soufrans koumanse, li posib ki sertin dimounn ki’nn trouv destriksion “Gran Babilonn,” rapel ki pandan plizir lane bann Temwin Zeova ti anonse ki sa ti pou arive. Eski li posib ki sa bann dimounn-la koumans ena lafwa dan Zeova? (Rev. 17:5) Si sa arive, sa pou resanble seki ti arive dan lepok Moiz. Kan bann Izraelit ti kit Lezip, “enn gran pep tou sort kalite dimounn” ti al ansam ar zot. Sertin parmi zot ti koumans ena lafwa dan Zeova kan zot ti trouv Dis Fleo ki Moiz ti anonse, realize. (Ex. 12:38) Si enn kitsoz koumsa arive apre destriksion Gran Babilonn, eski nou pou panse ki li inzis ki bann dimounn pe gagn lokazion pou zwenn ansam ar nou zis avan ki lafin arive? Fode pa nou pans koumsa! Nou bizin ena mem fason panse ki nou Papa Zeova, ki “enn Bondie ki ena mizerikord ek konpasion, ki pa ankoler vit, ek ki ena lamour fidel ek laverite an-abondans.”—Ex. 34:6. w24.05 11 ¶12-13

Ki kapav arive si nou nepli “res atase ar model bann bon parol”? Anou get enn lexanp. Dan premie siek, sertin Kretien ti pe fann enn rimer ki zour Zeova inn arive. Kitfwa ti ena enn let ki ti koz lor la, ki swadizan lapot Pol ti ekrir. San ki zot inn pran letan pou verifie si sa ti vre ouswa non, sertin Kretien dan Tesalonik ti krwar ladan ek zot ti mem pe fann sa rimer-la. Si zot ti rapel bann kitsoz ki Pol ti ansegn zot kan li ti avek zot, zot pa ti pou les sa rimer-la anbet zot. (2 Tes. 2:1-5) Pol ti konsey so bann frer ek ser pou pa krwar tou seki zot tande. Ek pou ed zot dan lavenir, Pol ti fini so deziem let pou bann Tesalonisien par sa bann parol-la: “Mwa Pol, mo pe ekrir zot ar mo prop lame pou fer zot konpliman. Se avek sa lekritir-la ki mo konfirm tou mo bann let; se koumsa ki mo ekrir.”—2 Tes. 3:17. w24.07 12 ¶13-14

Bann Kretien dan Zide ti pou bizin ena landirans dan zot servis pou Zeova parski biento zot ti pou gagn bann gran difikilte. Mem si sertin parmi zot ti gagn bann gran persekision dan lepase, boukou ti vinn Kretien dan enn peryod kot ti ena lape. Alor, lapot Pol ti rapel zot ki zot ti bizin prepar zot pou gagn plis persekision, ek ki zot ti bizin pare pou res fidel ziska zot lamor parey kouma Zezi. (Ebre 12:4) Boukou dimounn ti pe koumans vinn Kretien. Akoz sa, bann Zwif ti bien ankoler ek ti vinn violan. De-trwa lane avan, enn group dimounn ti atak Pol kan li ti pe prese dan Zerizalem. Plis ki 40 Zwif “ti fer enn serman ki zot pa pou ni manze ni bwar tanki zot pa’nn touy Pol.” (Zist. 22:22; 23:12-14) Mem si bann dimounn ti ena laenn pou zot ek ti persekit zot, bann Kretien ti pou bizin kontign zwenn ansam pou ador Bondie, pres bon nouvel, ek gard zot lafwa for. w24.09 12 ¶15

Zan ti enn bon kamarad Zezi. Li ti osi enn so bann zapot. (Mat. 10:2) Zan ti pas boukou letan pou prese ansam ar Zezi ek li ti trouv li fer bann mirak. Li ti res fidel ar Zezi pandan bann moman difisil. Li ti la kan Zezi ti mor, ek li ti trouv Zezi apre so rezireksion. Li ti osi trouv lasanble Kretien grandi ek li ti viv ase lontan pou trouv bon nouvel “prese dan tou kreasion anba lesiel.”(Kol. 1:23) Kan li ti pre pou mor, Zan ti gagn privilez pou ekrir sertin liv Labib. Par exanp, li ti ekrir liv Revelasion, parski li ti gagn “enn revelasion par Zezi Kris.” (Rev. 1:1) Zan ti osi ekrir enn parmi bann Levanzil, ek trwa let ki apel 1 Zan, 2 Zan, ek 3 Zan. Li ti ekrir so trwaziem let pou Gayis, enn Kretien fidel ki li ti kontan kouma so prop zanfan. (3 Zan 1) Anplis, seki Zan inn ekrir pe kontign ankouraz bann disip Zezi ziska azordi. w24.11 12 ¶15-16

Enn mari ki kontan so fam, li montre li ki li ena valer pou li. Li konsider so fam kouma enn kado ki Zeova inn donn li ek ki ena boukou valer. (Prov. 18:22; 31:10) Ek akoz sa, li pou zanti avek li ek li pou respekte li, mem kan zot gagn bann relasion sexiel. Kan zot gagn bann relasion sexiel, li pa pou fors so fam pou fer bann kitsoz ki li pa anvi fer ouswa ki pou fatig konsians so fam. Mari-la osi pa pou fer nanye ki kapav fatig so prop konsians kan zot pe gagn bann relasion sexiel. (Zist. 24:16) Mari, Zeova bien kontan kan Li trouv twa fer zefor pou donn to fam loner par to bann parol ek to bann aksion. Alor, kontign fer tou seki to kapav pou rezet bann move kondwit. Kontign fer zefor pou montre twa zanti ar to fam ek pou respekte li. Ek kontign montre li ki to kontan li. Kan to fer tousala, to montre to fam ki li ena boukou valer pou twa. Anplis, kan to donn to fam loner, sa montre osi ki to anvi res kamarad ar Zeova.—Ps. 25:14. w25.01 13 ¶17-18

Bann serviter Zeova ena enn gran dezir pou pres bon nouvel ek zot fer boukou zefor pou fer sa. Akoz sa, zot bien diferan ar bann lezot dimounn ki dir ki zot Kretien. Me ki kitsoz kapav ed nou pou res bien aktif dan predikasion ek pou kontign ogmant nou dezir pou prese? Zezi ti bien kontan prese, ek nou kapav aprann boukou ar so lexanp. Kan li ti lor later, li ti fer boukou zefor pou pres ar maximum dimounn. Plis letan ti pase, plis li ti ogmant so laktivite predikasion. Dan enn lexanp, Zezi ti konpar so laktivite ar enn planter rezin ki ti travay dir pandan trwa-z-an pou okip enn pie fig ki pa ti pe raport okenn frwi. Dan mem fason, pandan trwa-z-an, Zezi ti pres avek bann Zwif, me laplipar parmi zot pa ti vinn so bann disip. Selman, parey kouma sa planter rezin ki pa ti abandonn so pie fig la, Zezi pa ti bes lebra ek li pa ti diminie so laktivite kan bann dimounn pa ti ekout li. (Lik 13:6-9) Azordi, nou osi nou kapav res bien aktif dan predikasion kan nou swiv seki Zezi ti ansegne ek kan nou imit li. w25.03 14-15 ¶1-4

Ki to bizin fer si to panse ki enn kikenn pou enn bon konzwin pou twa? Eski deswit to bizin dir li seki to resanti pou li? Labib dir ki enn kikenn ki ena sazes, li pa azir lor enn kout-tet; li reflesi bien avan li azir. Alor, li pli bon ki to aprann konn dimounn-la, avan ki to dir li seki to resanti. Kouma to kapav aprann konn enn kikenn san ki li kone? Kan zot dan renion ouswa dan bann ti program, to kapav remarke ki kalite dimounn li ete. Eski li enn kikenn ki kontan Zeova? Eski li konport li bien ar lezot? Ki kalite kamarad li ena, ek lor ki kitsoz li koze? (Lik 6:45) Eski zot ena mem lobzektif? To kapav osi koz ar bann ansien so lasanble ouswa ar bann Kretien ki ena lexperyans ek ki konn li bien. (Prov. 20:18) To kapav demann zot si li ena bann zoli kalite ek enn bon repitasion. (Rit 2:11) Selman, kan to pe aprann konn sa dimounn-la, fer an-sort ki to pa met li malalez. Respekte osi so santiman ek so lavi prive. w24.05 22 ¶7-8

Bann ansien pran letan avan ki zot pran enn desizion. Zot pa panse vit-vit ki enn kikenn ki’nn fer enn pese pa’le sanze. Sertin dimounn repanti kan bann ansien zwenn zot pou premie fwa. Me lezot kitfwa bizin plis letan. Alor, pou enn kikenn ki bizin plis letan, kitfwa bann ansien pou bizin zwenn li plizir fwa. Kan bann ansien zwenn sa dimounn-la pou premie fwa, kitfwa li pou koumans reflesi lor seki bann ansien inn dir li. Ek apre sa, kitfwa avek limilite li pou priye Zeova pou ki Zeova pardonn so pese. (Ps. 38:18) Lerla, kan bann ansien pou rezwenn li enn lot fwa, kitfwa so latitid pa pou parey kouma premie fwa ki zot ti zwenn li. Kan bann ansien esey ed enn kikenn pou repanti, zot bizin montre konpasion ek bonte. Zot priye Zeova pou ki Li beni zot bann zefor ek zot gard lespwar ki sa dimounn-la ‘regagn so bon sans’ ek repanti.—2 Tim. 2:25, 26. w24.08 22-23 ¶12-13

Zeova pa anvi ki personn detrir! Kan enn kikenn fer enn pese, Li anvi ki sa dimounn-la ‘rekonsilie ar Li.’ (2 Kor. 5:20) Se akoz sa ki Li’nn touletan ankouraz so bann serviter ki’nn kit Li, pou repanti ek pou retourn ver Li. Bann ansien ena privilez pou travay ansam ar Zeova kan zot kontign fer zefor pou ed bann ki’nn fer pese pou repanti. (Rom. 2:4; 1 Kor. 3:9) Ena boukou lazwa dan lesiel kan enn kikenn repanti! Sak fwa ki enn parmi so bann mouton ki’nn perdi retourn dan lasanble, nou Papa Zeova extra kontan! Alor, anou kontign reflesi lor konpasion, mizerikord, ek bonte extraordiner Zeova. Lerla, nou lamour pou Li pou kontign grandi.—Lik 1:78. w24.08 31 ¶16-17

Si Zezi ti les bann Zwif fer li vinn lerwa, sa ti pou koumadir li pe partisip dan bann zafer politik ek ki li ti pe pran par bann Zwif. Labib dir ki li ti “al lor montagn.” Mem si lezot ti met presion lor li, Zezi pa ti partisip dan bann zafer politik. Enn zoli leson pou nou, pa vre! Azordi, li vre ki bann dimounn pa pou demann nou pou fer enn mirak pou donn zot manze, pou geri bann ki malad, ouswa pou vinn zot dirizan. Me kitfwa zot kapav demann nou pou vot pou enn kikenn, ouswa pou soutenir enn kikenn ki zot panse pou amelior bann kitsoz. Zezi inn donn nou enn zoli lexanp. Li ti refiz partisip dan bann zafer politik. Kan nou lir Labib, nou trouve ki inpe letan apre sa, li ti dir: “Mo Rwayom pa fer parti dan sa lemond-la.” (Zan 17:14; 18:36) Antan-ki Kretien, nou bizin pans parey kouma Zezi ek swiv so lexanp. Kouma nou kapav fer sa? Nou fer sa kan parey kouma Zezi, nou soutenir Rwayom Bondie, nou koz lor la ar lezot, ek nou priye pou ki li vini.—Mat. 6:10. w24.12 4 ¶5-6

Kan to pe etidie, reflesi kouma to kapav met an pratik seki to pe aprann. Par exanp, to kapav imit lazistis Zeova kan to tret tou dimounn parey ek ki to pa fer preferans. To kapav imit lamour ki Zezi ena pou so Papa ek pou bann dimounn, kan to fer seki Zeova demann twa ek kan to ed lezot, mem si parfwa sa difisil. To kapav imit Zezi osi kan to pres ar lezot, pou ki zot gagn lokazion pou aprann seki Zeova inn fer pou zot. Lerla, zot pou kapav ena lafwa dan laranson. Kan nou kontign aprann plis lor laranson, nou lamour pou Zeova ek Zezi pou vinn pli for. Ek plis nou kontan zot, plis zot pou kontan nou zot osi. (Zak 4:8) Alor, anou profit bien tou bann dispozision ki Zeova pran pou ansegn nou, pou nou aprann plis lor laranson. w25.01 25 ¶16-17

Nou kapav osi tradir nou text pou azordi dan sa fason-la: “To’nn tir tou mo bann pese devan to lizie.” Sa lexanp-la montre nou ki kan Zeova pardonn enn kikenn ki repanti, Li zet so bann pese bien-bien lwin. Pou explik sa verse-la, enn liv referans dir ki ‘pou Bondie se koumadir zame nou pa’nn fer pese.’ Pou nou konpran pli bien sa lide-la, ena enn lot lexanp dan Labib ki trouv dan Mishe 7:18, 19. Sa bann verse-la montre ki Zeova zet nou bann pese dan fon lamer. Dan lepase, kan ti zet enn kitsoz dan fon lamer, pena sime ki ti kapav regagn li. Gras-a sa bann lexanp-la, nou’nn aprann ki kan Zeova pardonn nou, Li pran nou bann pese net ek nou nepli bizin santi nou koupab pou sa. Parey kouma David ti dir: “Ere bann dimounn ki finn gagn pardon pou zot bann move aksion ek ki zot bann pese finn kouver.” (Rom. 4:7) Wi, se samem vre pardon! w25.02 9 ¶7-8

Lor later azordi, ena enn paradi kot ena bann milyon dimounn ki pe viv dan lape ek zot bien okipe pou fer bann bon kitsoz. Sa paradi-la, se nou paradi spiritiel! Bann dimounn ki deza dan sa paradi spiritiel la, zot bien deside pou kontign res ladan, ek zot anvi ki enn maximum dimounn vinn zwenn zot ladan. Mem si nou pe viv dan move lemond Satan, kot bann dimounn ena laenn pou zot kamarad, Zeova inn kree enn plas sinbolik kot so bann serviter viv dan lape ek linite. Extraordiner, pa vre! (1 Zan 5:19; Rev. 12:12) Zeova trouve kouma lemond Satan pe afekte bann dimounn. Akoz sa, Li fer an-sort ki so bann serviter santi zot an sekirite, pou ki zot kapav kontign servi Li dan lazwa. Labib dekrir paradi spiritiel kouma “enn plas kasiet” ek “enn zardin ki bien aroze.” (Iza. 4:6; 58:11) Avek benediksion Zeova, bann dimounn ki dan sa paradi-la zot ere, mem si zot pe viv dan enn “lepok kritik, difisil pou siporte.”—Iza. 54:14; 2 Tim. 3:1. w24.04 20 ¶1-2

Si to anvi trouv enn kikenn pou marye, nou sir ki to’nn priye Zeova lor la. Biensir, Zeova pa’nn promet bann selibater ki Li pou trouv enn kikenn pou zot. Selman, to kapav sir ki Li konn to santiman, Li pou donn twa seki to bizin, ek Li pou ed twa kan to pe rod enn kikenn pou marye. Alor, kontign dir Zeova seki to resanti. (Ps. 62:8) Demann Li pasians ek sazes. (Zak 1:5) Me si to pa pe reisi trouv enn kikenn pou marye, ki kitsoz to kapav sir? To kapav sir ki Zeova pou donn twa seki to bizin lor plan fizik ek emosionel. (Ps. 55:22) Selman, si to pe rod enn kikenn pou marye, ena enn kitsoz ki to bizin fer bien atansion: Fode pa to les sa vinn kitsoz pli inportan dan to lavi. (Fil. 1:10) Se nou lamitie ar Zeova ki rann nou ere, pa si nou marye ouswa non. (Mat. 5:3) Pa bliye osi ki, kan to selibater, to kapav pas plis letan dan predikasion. (1 Kor. 7:32, 33) Alor, servi bien to letan. w24.05 21 ¶4; 22 ¶6

Komie letan de dimounn bizin frekante? Kan nou pa pran ase letan pou reflesi avan ki nou pran enn desizion, souvan nou fer bann erer. (Prov. 21:5) Li vre ki zot pou pran letan pou aprann konn zot kamarad bien. Selman, fode pa zot res frekante mem; ariv enn moman zot bizin pran enn desizion. Labib dir: “Kan seki enn dimounn pe atann pe tarde pou realize, sa fer so leker malad.” (Prov. 13:12) Kouma lezot kapav ed de dimounn ki pe frekante? Nou kapav invit zot pou manze, ouswa pou nou ladorasion an fami. Nou kapav osi fer enn ti program ansam ar zot. (Rom. 12:13). Eski zot bizin enn lift ouswa enn sapron? Kitfwa nou kapav ed zot. Nou kapav osi invit zot kot nou pou ki zot aprann konn zot kamarad pli bien. (Gal. 6:10) Si de dimounn ki pe frekante demann twa pou fer sapron, konsider sa kouma enn privilez. Ek kan to pe fer sapron, pa tas ar zot; res enn distans ek les zot koze an prive. Selman, fode pa ki to les zot tousel. w24.05 30 ¶13-14

Bann ansien bizin esey konpran seki’nn arive avan ki enn kikenn fer enn pese. Par exanp, zot kapav demann zotmem kouma so lamitie ar Zeova inn afebli? Eski li ti pe negliz so letid personel ek predikasion? Eski li’nn aret priye Zeova regilierman? Eski li’nn les so bann move dezir kontrol li? Eski li ti pe pran bann move desizion konsernan so bann frekantasion ek so bann divertisman? Eski sa bann desizion-la finn ena enn move lefe lor li? Eski li konpran kouma so bann desizion ek so bann aksion inn afekte so Papa Zeova? Bann ansien kapav poz li bann kestion ki fer li reflesi lor bann kitsoz ki’nn afebli so lamitie ar Zeova ek ki’nn fer li tom dan pese. Zot pou poz sa bann kestion-la avek boukou bonte, san ki zot rant dan so lavi prive. (Prov. 20:5) Anplis, zot kapav servi bann lexanp pou ed sa dimounn-la reflesi, pou ki li trouve ki li’nn fer enn erer. Premie fwa ki zot zwenn ar sa dimounn-la, kitfwa li pou koumans regrete ek li pou vremem sagrin akoz seki li’nn fer. Kitfwa li kapav mem repanti. w24.08 22 ¶9-11

Zezi ti fer so maximum pou pres “bon nouvel lor Rwayom” parski li ti kone ki Bondie ti anvi ki li fer sa travay-la. Pres bon nouvel ti kitsoz pli inportan dan so lavi. Pandan bann dernie mwa ki li ti lor later, li ti mem al “dan enn lavil apre lot ek dan enn vilaz apre lot” pou ansegn bann dimounn. (Lik 13:22) Li ti osi form bann lezot disip pou pres ansam avek li. (Lik 10:1) Azordi osi, pres bon nouvel se travay pli inportan ki Zeova ek Zezi anvi nou fer. (Mat. 24:14; 28:19, 20) Kan nou fer zefor pou trouv bann dimounn parey kouma Zeova trouv zot, sa ogmant nou dezir pou prese. Zeova anvi ki maximum dimounn tann bon nouvel ek aprann laverite lor Li. (1 Tim. 2:3, 4) Akoz sa, Li form nou pou ki nou kapav partaz sa bon nouvel-la, parski sa kapav sap lavi bann dimounn. Mem si bann dimounn pa aksepte nou mesaz deswit, kitfwa zot pou gagn lokazion pou fer li avan lafin gran soufrans. w25.03 15-16 ¶5-7

Kan enn kikenn ki nepli form parti dan lasanble asiste enn renion, sak Kretien bizin servi so konsians pou deside si li pou akeyir sa dimounn-la ek dir li enn sinp bonzour. Selman, nou pa pou gagn bann gran konversasion avek li ek nou pa pou pas letan avek li. Me sertin kapav demann zotmem, ‘Eski Labib pa dir ki, kan enn Kretien dir bonzour sa kalite dimounn-la, li “pe partisip dan so bann move aksion”?’ (2 Zan 9-11) Kontex sa verse-la montre ki sa instriksion-la ti konsern zis bann aposta ek bann ki ankouraz lezot pou fer bann move kitsoz. (Rev. 2:20) Alor, si enn kikenn li enn aposta, ouswa si li pe ankouraz lezot pou fer bann move kitsoz, bann ansien pa pou vizit li. Kanmem sa, li posib ki sa dimounn-la repanti. Me ziska ki sa arive, nou pa pou dir li bonzour ek nou pa pou invit li pou asiste renion. w24.08 30-31 ¶14-15

Apre ki Zezi ti nouri enn lafoul, li ti dir so bann zapot kit sa landrwa-la ek retourn Kafarnaom. Lerla, li ti al lor montagn pou ki lafoul pa fer li vinn lerwa. (Zan 6:16-20) Kan bann zapot ti lor bato, ti ena enn tanpet lor lamer, avek bann gro divan ek bann gro vag. Lerla, Zezi ti mars lor delo pou al zwenn so bann zapot. Inpe apre, li ti dir Pier mars lor delo pou vinn zwenn li. (Mat. 14:22-31) Ek kan Zezi ti mont lor bato-la, divan-la ti kalme net. Bann zapot ti etone ek zot ti dir: “To vremem Garson Bondie.” (Mat. 14:33) Li inpe drol ki bann zapot dir sa bann parol-la apre ki Zezi mars lor delo, ek pa kan li ti fer enn mirak pou nouri bann milye dimounn, pa vre! Mark, ki ti ekrir lor seki ti arive, ti donn bann lezot detay lor la. Li ti ekrir: “[Bann zapot] ti bien etone, parski zot pa ti’nn konpran ki vedir mirak ki Zezi ti fer ar dipin.” (Mark 6:50-52) Avredir, bann zapot Zezi pa ti konpran ki kantite pouvwar Zeova ti donn Zezi. w24.12 5 ¶7

Nou montre nou rekonesans pou lamour Zeova kan nou fer tou seki nou kapav dan bann semenn avan ek apre Komemorasion Lamor Zezi pou montre Zeova ki kantite nou rekonesan anver Li pou laranson. Enn fason nou fer sa se kan nou invit lezot pou asiste Komemorasion. Kan to invit enn kikenn, explik li seki pou pase pandan Komemorasion. Pou to fer sa, to kapav servi video Kifer Zezi Inn Mor? ek video Rapel Lamor Zezi. Bann ansien bizin fer zefor pou invit bann inaktif. Kan bann ki’nn kit troupo Zeova retourn dan lasanble, ena boukou lazwa dan lesiel ek lor later! (Lik 15:4-7) Zour Komemorasion, anplis ki nou akeyir nou bann frer ek ser, nou bizin fer zefor pou akeyir bann ki nouvo ek bann ki pa’nn vinn renion depi lontan. Nou anvi ki zot santi zot bien ek ki zot santi zot alez.—Rom. 12:13. w25.01 29 ¶15

Kalite ki’nn plis motiv Zeova pou avoy Zezi lor later pou li donn so lavi pou nou, se so lamour pou nou. (Zan 3:16; 1 Zan 4:9, 10) Zeova inn sakrifie so Garson pou nou, parski Li anvi ki nou viv pou touletan ek ki nou form parti dan so fami. Kan Adan ti fer pese, li ti nepli kapav form parti dan fami Zeova. Ek akoz sa, so bann desandan osi ti nepli form parti dan fami Zeova. Me gras-a laranson, tou bann ki ena lafwa dan Bondie ek ki obeir Li, enn zour pou kapav form parti dan so fami. Ek depi aster-la mem, Zeova pardonn nou bann pese ek nou kapav ena enn bon lamitie ar Li ek ar nou bann frer ek ser. Tousala montre ki Zeova vremem kontan nou!—Rom. 5:10, 11. w25.01 21 ¶6

Sirman to pou dakor ki laranson se enn kado ki ena boukou valer, pa vre! (2 Kor. 9:15) Gras-a sakrifis Zezi, to kapav ena enn bon lamitie ar Zeova ek to ena posibilite pou viv pou touletan. Nou bien rekonesan anver Zeova parski Li’nn donn nou laranson! Li’nn fer sa parski Li bien kontan nou. (Rom. 5:8) Zezi inn donn nou lord pou asiste Komemorasion so lamor toule lane. Enn parmi bann rezon li’nn fer sa, se pou ki nou kontign montre nou rekonesans pou laranson ek pou ki nou pa bliye seki Li ek so Papa inn fer pou nou. (Lik 22:19, 20) Sa lane-la, nou pou selebre Komemorasion Lamor Zezi, Zedi le 2 Avril 2026. Sirman nou tou nou pe fini koumans organiz nou pou asiste sa levennman bien inportan la, pa vre! Si avan ek apre Komemorasion nou pran letan pou reflesi lor seki Zeova ek Zezi inn fer pou nou, nou pou vremem gagn bann bienfe. w25.01 20 ¶1-2

To pou aprann plis lor lamour ki Zeova ek Zezi ena pou bann dimounn si to kontign reflesi lor la. Dan bann semenn avan ek apre Komemorasion Lamor Zezi, to kapav lir ek etidie plis bann Levanzil. Pa lir tro boukou sapit enn sel kout. Olie sa, kan to lir, pran to letan ek rod bann lezot rezon kifer nou bizin kontan Zeova ek Zezi. Si sa fer lontan ki to batize, eski ankor ena bann nouvo kitsoz ki to kapav aprann lor laranson, lazistis, ek lamour Bondie? Avredir, nou pou touletan ena bann nouvo kitsoz pou aprann lor sa bann size-la ek lor bann lezot size osi. Alor, lir ek etidie nou bann piblikasion, parski ladan to kapav dekouver bann kitsoz extraordiner lor Zeova ek Zezi. w25.01 24-25 ¶13-15