Ki Savedir Vre Lafwa?

ENA vre lafwa se plis ki krwar ki Bondie li existe. Ena plizir milyon dimounn ki krwar dan Bondie, me pourtan zot fer bann move kitsoz. Sa kalite “lafwa” la li koumadir enn fos biye. Enn fos biye, li resanble enn vre biye me li pena okenn valer. Alor, ki savedir vre lafwa?

Vre Lafwa baze lor enn konesans exakt lor bann Lekritir Sakre. Bann Lekritir Sakre sorti kot Bondie. Zot montre nou laverite lor li ek zot ed nou pou aprann konn li. Ladan nou kapav aprann so bann lalwa, so proze, ek so bann lansegnman. Ala de-trwa lexanp sa bann lansegnman-la:

• Bondie li enn sel. Pena personn kouma li.

• Zezi li pa Bondie Tou-Pwisan. Li enn profet Bondie.

• Bondie kondann ladorasion tou kalite zidol.

• Biento, Bondie pou ziz bann dimounn.

• Bann dimounn ki’nn mor pou resisite pou viv dan Paradi.

Vre lafwa pous nou pou fer bann bon kitsoz. Sa bann kitsoz-la donn Bondie loner, ek fer nou ek lezot dimounn gagn bann bienfe. Ala de-trwa lexanp sa bann bon kitsoz-la:

• Ador Bondie.

• Ena bann kalite ki Bondie kontan, kouma lamour.

• Rezet bann move panse ek bann move dezir.

• Kontign ena lafwa dan Bondie malgre bann difikilte.

• Ansegn lezot lor Bondie.

Kouma Ou Kapav Gagn Vre Lafwa?

Demann Bondie pou ed ou. Profet Moiz ti priye Bondie ek ti dir: “Silteple, si mo’nn gagn to faver, fer mwa konn to bann semin pou ki mo kapav konn twa ek kontign gagn to faver.”a Bondie ti tann so lapriyer ek ti reponn li. Azordi, bann dimounn konn Moiz kouma enn kikenn ki ti ena enn gran lafwa. Bondie pou ed ou osi pou gagn vre lafwa si ou demann Li so led.

Pran letan pou etidie bann Lekritir Sakre. Parmi bann Parol ki vre Bondie inn fer ekrir dan bann Lekritir Sakre ena Torah, bann Psom, ek bann Levanzil.b Tousala trouv dan Labib, ek se samem liv ki’nn plis tradir ek pibliye dan lemond antie. Eski ou ena enn kopi sa bann Lekritir Sakre-la?

Dan ou lavi toulezour swiv bann konsey ki ena dan bann Lekritir Sakre. Parey kouma enn misk vinn pli for kan ou travay li, ou lafwa osi parey. Kan ou travay lor ou lafwa li pou vinn pli for. Lerla, sa pou permet ou trouve ki bann konsey ki Bondie done, zot bann bon konsey. Ofet bann konsey ki ena dan bann Lekritir Sakre inn ed plizir dimounn pou amelior zot lavi. Lir prosin leson pou trouv de-trwa lexanp.