Bann Konsey Ki Amelior Lavi Bann Dimounn

MAZINE ki enn dokter pe vinn res dan ou landrwa. Kitfwa dan koumansman ou pou ezite pou al get li. Me sertin parmi ou bann kamarad inn al get li ek zot lasante inn bien ameliore. Eski ou osi ou pa ti pou anvi al get sa dokter-la?

Nou kapav dir ki bann Lekritir Sakre zot parey kouma sa dokter-la. Sertin dimounn kapav ezite pou lir li. Me kan zot inn swiv bann bon konsey ki ena ladan, zot lavi finn bien ameliore. Anou get de-trwa lexanp ansam.

Regle Bann Problem dan Maryaz

Sumiatun dir: “Kan mo ti fek marye mo ti santi ki mo misie, Dumas, ti negliz mwa. Akoz sa, souvan mo ti kriy ar li, zour li, zet bann kitsoz lor li, ek mem bat li. Parfwa, mo ti telman ankoler ki mo ti tom san konesans.

“Kan Dumas ti koumans etidie bann Lekritir Sakre, mo ti boufonn li. Me san ki li kone, mo ti pe ekoute dan enn lasam akote. Enn zour mo ti tann sa bann verse-la: ‘Fode ki bann fam soumet ar zot mari parey kouma zot soumet ar Lesegner.’ ‘Fam-la li, li bizin ena enn profon respe pou so mari.’ (Efezien 5:22, 33) Sa bann parol-la ti bien tous mwa. Mo ti demann Bondie pou pardonn mwa parski mo ti maltret mo mari. Mo ti priye Li ek mo ti demann Li pou ed mwa pou vinn enn pli bon madam. Mwa ek Dumas pa’nn tarde pou etidie bann Lekritir Sakre ansam.”

Bann Lekritir Sakre dir osi: “Bann mari bizin kontan zot fam kouma zot prop lekor.” (Efezien 5:28) Sumiatun dir: “Kan nou’nn aprann sa bann kitsoz-la, sa finn ena enn lefe lor nou toule-de. Kan Dumas ti sorti travay, mo ti prepar enn tas dite pou li ek mo ti koz bien ar li. Dumas li, li ti montre pli boukou lafeksion anver mwa ek li ti ed mwa pou fer bann louvraz lakaz. Nou toule-de ti fer zefor pou montre nou ‘bon sakenn anver nou kamarad, pou ena enn konpasion ranpli ar tandres, ek pou pardonn sakenn nou kamarad.’ (Efezien 4:32) Avek letan, lamour ek respe ki nou ena pou nou kamarad inn vinn pli for. Aster-la, sa fer plis ki 40 an ki nou marye ek nou ere. Bann konsey ki ena dan Parol Bondie finn sov nou maryaz!”

Ena Kontrol lor Lakoler

Tayib dir: “Mo ti ena enn karakter bien so. Souvan mo ti lager ek menas bann dimounn avek enn fizi. Parfwa, mo ti telman araze ki mo ti bat mo madam, Kustriyah, ek zet li anba. Bann dimounn ti bien per mwa.

“Enn zour mo ti lir bann parol ki Zezi ti dir: ‘Mo pe donn zot enn nouvo komannman: kontan sakenn zot kamarad; parey kouma mo’nn kontan zot.’ (Zan 13:34) Sa bann parol-la ti bien tous mwa, ek mo ti bien deside pou sanze. Kan mo ti santi mwa pe koumans fer laraz, mo ti priye Bondie pou ed mwa res kalm. Lerla, mo ti santi mo koler diminie. Mwa ek mo madam ti swiv konsey ki ena dan Efezien 4:26, 27: ‘Pa res ankoler ziska ki soley kouse; pa donn Lediab okenn lokazion.’ Touleswar mo madam ek mwa nou lir bann Lekritir Sakre ansam, ek nou priye Bondie pou demann li so led. Sa ed nou pou tir tou stres ki nou’nn gagne pandan lazourne, ek ed nou pou vinn pli pros avek nou kamarad.

“Aster-la bann dimounn konn mwa kouma enn kikenn ki pa violan. Mo madam ek mo bann zanfan kontan mwa ek respekte mwa. Mo ena boukou kamarad, ek mo santi mwa pros ar Bondie. Mo vremem ere.”

Aret Pran Ladrog, Fime, ek Bwar Boukou Lalkol

Goin dir: “Mo ti mars avek enn group zenes, mo ti fime boukou, ek souvan mo ti dormi dan lari parski mo ti telman sou. Mo ti abitie pran ladrog, kouma gandia ek extazi. Mo ti osi vann sa bann ladrog-la ek mo ti kasiet zot anba mo zile par-bal. Mem si mo ti montre ki mo enn terib, mo ti viv dan laper.

“Lerla, enn dimounn ti montre mwa sa verse-la: ‘Mo garson, pa bliye mo lansegnman parski gras-a sa, to pou viv lontan ek dan lape.’ (Proverb 3:1, 2) Mo ti bien anvi viv lontan ek dan lape! Mo ti lir sa verse-la osi: ‘Mo bann kamarad ki mo bien kontan, parski nou ena sa bann promes-la, anou pirifie nou ar tou kitsoz ki sali lekor ek lespri pou ki nou kapav vinn deplizanpli sin kan nou ena enn gran respe pou Bondie.’ (2 Korintien 7:1) Alor, mo ti aret pran ladrog, aret frekant sa group kamarad-la, ek koumans servi Bondie.

“Aster-la sa fer plis ki 17 an ki mo pa’nn tous okenn ladrog ek sigaret. Mo ena enn bon lasante, enn zoli fami, bann bon kamarad, ek enn bon konsians. Ek azordi, olie ki mo dormi lor sime parski mo’nn sou, touleswar mo dormi trankil lor mo lili.”

Tir Tou Tras Rasis

Bambang dir: “Kan mo ti enn adolesan mo ti enn vakabon, ek laplipar bann dimounn ki’nn soufer akoz mwa sorti dan enn ti kominote ki mo ti deteste.

“Me selman, avek letan mo ti anvi aprann konn plis lor Bondie. Lerla, mo’nn zwenn enn group dimounn ki ti abitie etidie bann Lekritir Sakre ansam. Bann dimounn ki ti akeyir mwa laba ti sorti dan sa kominote ki mo ti deteste la! Sa ti etonn mwa kan mo ti trouve ki dan sa group-la ti ena bann dimounn diferan ras ki ti zwenn ansam ek ki ti ere. Se lerla ki mo’nn konpran verse ki dir: ‘Bondie pa fer preferans, me dan tou nasion dimounn ki ena enn gran respe pou li ek ki fer seki drwat gagn so faver.’​—Zistwar Bann Zapot 10:34-35.

“Azordi, mo nepli ena laenn pou personn. Sertin parmi mo bann pli bon kamarad sorti dan sa ti kominote ki enn lepok mo ti deteste la. Gras-a bann Lekritir Sakre, Bondie inn montre mwa kouma pou ena lamour.”

Rezet Violans

Garoga dir: “Kan mo ti ankor enn adolesan mo ti al dan prizon trwa fwa: de fwa parski mo ti kokin ek enn fwa parski san okenn pitie mo ti donn enn zom kout kouto. Plitar, mo ti rant dan enn group rebel ek mo ti touy plizir dimounn. Kan sa lager-la inn arete, mo ti vinn sef enn group kriminel ki ti menas bann dimounn pou gagn kas ek bann linformasion. Mo bann gardkor ti akonpagn mwa partou. Mo ti enn zom violan ek danzere.

“Lerla, enn zour mo ti lir sa verse-la: ‘Lamour li pasian ek bon. Lamour pa zalou. Li pa fer vantar, li pa gonfle ar lorgey, li pa mank manier, li pa rod so prop lintere, li pa ankoler vit. Li pa gard enn kont pou ditor ki’nn fer li.’ (1 Korintien 13:4, 5) Sa bann parol-la ti bien tous mwa. Mo ti demenaze, mo ti etidie bann Lekritir Sakre, ek mo ti swiv so bann konsey.

“Azordi, mo nepli enn zom ki violan. Okontrer, mo ansegn bann dimounn Parol Bondie ek mo pe viv enn zoli lavi.”

Parol Bondie Li Pwisan

Sa bann lexanp-la ek lezot ankor montre ki “parol Bondie, li vivan ek li pwisan.” (Ebre 4:12) So bann konsey sinp, itil, ek ankourazan.

Eski bann Lekritir Sakre kapav ed ou osi? Wi, li kapav ed ou pou ninport ki problem ki ou pe gagne. “Tou Lekritir inspire par Bondie, ek li itil pou ansegne, pou korize, pou redres bann kitsoz, pou disipline an-akor avek seki drwat, pou ki enn serviter Bondie kapav bien kalifie, bien ekipe pou tou bon travay.”​—2 Timote 3:16, 17.

Alor, anou get ansam de-trwa lansegnman prinsipal ki ena dan bann Lekritir Sakre.