Eski Bondie Gagn Nou Traka?

ENA boukou problem dan lemond azordi. Bann milyon dimounn pe soufer akoz bann lager, bann katastrof natirel, maladi, lamizer, koripsion, ek bann lezot maler. Ou osi kitfwa toulezour ou pe fer fas ar bann traka. Kisann-la kapav ed nou? Eski ena enn kikenn ki gagn nou traka?

Nou kapav sir ki Bondie vremem gagn nou traka. Dan so Parol Sakre Li dir: “Eski enn fam kapav bliye so ti-baba ki ankor pe bwar avek li, ek pena pitie pou garson ki sorti dan so vant? Mem si sa bann fam-la kapav bliye, mwa mo pa pou bliye twa.”a

Lamour ki enn mama ena pou so ti-baba, se enn parmi bann santiman pli for ki enn dimounn kapav ena. Me kanmem sa, lamour Bondie bien pli gran ki lamour ki enn mama ena pou so ti-baba. Ek sa vremem rasir nou, parski Bondie zame pou abandonn nou! Avredir, Li’nn fini fer bann kitsoz pou ed nou dan enn fason extraordiner. Ki Li’nn fer? Li’nn montre nou ki nou kapav ere si nou ena vre lafwa dan Bondie.

Se gras-a vre lafwa ki ou pou vremem ere. Vre lafwa pou ed ou pou evit sertin problem ek pou sirmont bann problem ki ou pa kapav evite. Sa pou osi ed ou pou aprann konn Bondie pli bien ek pou santi ou anpe. Ek vre lafwa pou permet ou ena enn zoli lavenir: lavi pou touletan dan Paradi!

Me ki savedir vre lafwa? Ek ki ou bizin fer pou gagn vre lafwa?