Zeremi
6 A bann desandan Binzamin, al kasiet lwin ar Zerizalem.
Soufle dan korn dan Tekoa;
Alim enn dife kouma enn signal lor Bet-Akerem!
Parski enn maler pe sorti depi Lenor, enn gran katastrof.
2 Tifi Sion resanble enn zoli fam ki bien rafine.
3 Bann berze ek zot bann troupo pou vini.
Zot pou pik zot latant toutotour li,
Ek sak berze pou fer bann mouton ki anba zot responsabilite, manze.
4 “Prepar* zot pou lager kont li!
Leve, ek anou atak li anplin midi!”
“Maler lor nou, parski soley pe kouse,
Pe koumans fer nwar!”
5 “Leve, anou atak li pandan lanwit
Ek anou detrir so bann latour ki bien solid.”
6 Parski ala seki Zeova Sef bann larme dir:
“Koup dibwa ek met enn baraz otour Zerizalem pou atak li.
Li enn lavil ki bizin rann bann kont;
Li ranpli avek bann dimounn ki fer dominer ar lezot.
7 Parey kouma enn pwi gard so delo fre,
Koumsa mem li gard bien fre bann move aksion ki li fer.
Li ranpli ar violans ek destriksion;
Ena zis maladi ek katastrof devan mwa.
8 A Zerizalem fer atansion, sinon mo pou degout twa ek vir ledo ar twa;
Mo pou fer twa vinn enn dezer, enn pei kot personn pa reste.”
9 Ala seki Zeova Sef bann larme dir:
“Zot pou ramas tou bann ki’nn reste parmi pep Izrael,
Kouma bann dernie grap rezin lor enn pie rezin.
Pas to lame ankor enn fwa kouma enn kikenn ki pe kas bann grap rezin lor bann pie rezin.”
10 “Ar kisann-la mo bizin koze ek donn enn lavertisman?
Kisann-la pou ekoute?
Gete! Zot inn bous zot zorey,* pou ki zot pa tande.
Gete! Parol Zeova inn vinn enn kitsoz ki zot meprize;
Zot pa kontan so parol.
11 Akoz sa, mo’nn ranpli ar gran koler Zeova,
Ek mo nepli kapav tini sa andan.”
“Devers sa lor bann zanfan ki lor lari,
Lor bann group zennzan ki’nn rasanble ansam.
Zot tou pou vinn prizonie, enn misie ansam avek so madam,
Bann vie misie ansam avek bann ki pli vie.*
12 Pou donn lezot dimounn zot lakaz,
Ansam avek zot bann karo ek zot bann madam.
Parski mo pou avoy mo lame pou pini bann abitan sa pei-la,” ala seki Zeova dir.
13 “Parski depi so pli tipti ziska so pli gran, sakenn pe fer bann profi malonet;
Depi so profet ziska so pret, sakenn pe fer bann frod.
Alor ki pena lape.
15 Eski zot gagn onte pou bann kitsoz degoutan ki zot inn fer?
Zot pa gagn onte ditou!
Zot mem pa kone ki savedir gagn onte!
Akoz sa, zot pou tom parmi bann ki’nn fini tonbe.
Kan mo pou pini zot, zot pou tonbe,” ala seki Zeova dir.
16 Ala seki Zeova dir:
“Debout lor lakrwaze ek gete.
Pran ransegnman konsernan bann semin ki ti ena avan,
Demande kotsa bon sime-la ete, ek mars ladan,
Lerla zot pou gagn trankilite dan zot lavi.”
Me zot dir: “Nou pa pou mars ladan.”
17 “Ek mo ti met bann gardien ki ti dir,
‘Ekout bien son korn!’”
Me zot ti dir: “Nou pa pou ekoute.”
18 “Alor ekoute, A bann pep!
Ek gete, A lasanble,
Seki pou ariv bann-la.
19 Ekoute, A later!
Mo pe amenn enn maler lor sa pep-la,
Akoz tou bann move kitsoz ki zot inn fer.
Parski zot pa’nn pran kont mo bann parol,
Ek zot inn rezet mo lalwa.”*
20 “Eski to panse sa interes mwa kan to amenn lansan blan* ki sorti Saba,
Ek long lerb ki santi bon ki sorti depi enn pei bien lwin?
Mo pa aksepte to bann sakrifis ki brile,
Ek to bann lezot sakrifis pa fer mwa plezir.”
21 Akoz sa, ala seki Zeova dir:
“Gete! Mo pe met bann obstak devan sa pep-la,
Ek zot pou tonbe akoz sa,
Bann papa ansam avek bann garson,
Enn vwazin ek so kamarad,
Ek zot tou zot pou mor.”
22 Ala seki Zeova dir:
“Gete! Enn pep pe vini depi pei Lenor,
Ek enn gran nasion pou leve depi landrwa pli lwin ki ena lor later.
23 Zot pou trap bien for lark ek zavlo.
Zot kriel ek zot pa pou ena okenn pitie.
Zot lavwa pou fer tapaz parey kouma kan lamer move,
Ek zot mont lor bann seval.
Zot pe pran pozision pou lager kont twa parey kouma enn solda fer, A tifi Sion.”
24 Nou’nn tann koz lor la.
25 Pa sorti pou al dan karo,
Ek pa mars lor semin,
Parski lennmi ena enn lepe;
Partou bann dimounn dan enn gran laper.
26 A tifi mo pep,
Met enn latwal sak lor twa ek roul dan lasann.
Gard dey, kriye, ek plore for-for koumadir to’nn perdi to sel garson,
Parski enn sel kout, sa kikenn ki detrir la pou vinn lor nou.
27 “Mo’nn fer twa* vinn enn kikenn ki teste metal parmi mo pep,
Enn kikenn ki rod bien;
To bizin pran kont ek get bien seki zot pe fer.
28 Zot tou zot bann zom ki bien teti,
Kan zot marse zot koz manti pou gat repitasion lezot.
Zot kouma kwiv ek feray;
Zot tou, zot azir dan enn fason malonet.
29 Enn kikenn fer telman zefor pou rafinn zot,
Ki mem so zouti brile.
Me se dan vid ki li pe esey rafinn zot,
Parski zot tou pa bon.
Zis diplon ki pe sorti dan dife.
30 Vremem, bann dimounn pou apel zot enn larzan* ki’nn rezete,
Parski Zeova inn rezet zot.”