Zeremi

7 Ala parol ki Zeova ti dir Zeremi: 2 “Debout kot laport lakaz Zeova ek laba anons sa mesaz-la, ‘Ekout parol Zeova, zot tou pep Zida ki rant par sa bann laport-la pou prostern devan Zeova. 3 Ala seki Zeova Sef bann larme, Bondie Izrael, dir: “Sanz zot fason azir ek zot bann aksion, ek mo pou les zot kontign res dan sa plas-la. 4 Pa met zot konfians dan bann parol ki anbet dimounn ek dir, ‘Sa se* tanp Zeova, se tanp Zeova, se tanp Zeova!’ 5 Parski si vremem zot sanz zot fason azir ek zot bann aksion, si vremem zot fer sir ki aplik lazistis ant enn zom ek so vwazin; 6 si zot pa fer dominer ar bann rezidan etranze, bann orfelin,* bann vev; si zot pa vers disan inosan dan sa plas-la; ek si zot pa swiv bann lezot bondie pou fer zotmem ditor; 7 lerla mo pou les zot kontign res dan sa plas-la, dan pei ki mo’nn donn zot bann anset pou touletan.”’”*

8 “Me zot pe met zot konfians dan bann parol ki anbet dimounn, ek sa pa pou servi nanye. 9 Zot pe kokin, fer krim, komet ladilter, fer bann fos serman, fer bann sakrifis ar* Baal, ek swiv bann lezot bondie ki zot pa’nn kone. 10 Eski zot panse zot kapav fer sa bann kitsoz degoutan la, ek apre sa vinn debout devan mwa dan sa lakaz ki port mo nom la ek dir, ‘Nou pou sape’? 11 Eski sa lakaz ki port mo nom la inn vinn enn kavern voler pou zot? Antouka samem ki mo pe trouve,” ala seki Zeova dir.

12 “‘Selman, aster-la al dan mo tanp ki dan Silo, plas kot mo ti swazir pou port mo nom dan koumansman, ek gete ki mo’nn fer ar li akoz bann move kitsoz ki mo pep Izrael inn fer. 13 Me zot inn kontign fer tou sa bann kitsoz-la,’ ala seki Zeova dir, ‘ek mem si mo ti koz avek zot plizir fwa,* zot pa’nn ekoute. Mo’nn kontign apel zot, me zot pa’nn reponn. 14 Alor, parey kouma mo’nn fer ar Silo, koumsa mem mo pou fer ar sa lakaz ki port mo nom la, sa plas dan ki zot inn met zot konfians la, ek ki mo’nn donn zot ek zot bann anset. 15 Mo pou tir zot devan mo lizie, parey kouma mo’nn fer ar tou zot bann frer, tou bann desandan Efraim.’

16 “Me twa, pa priye pou sa pep-la. Pa rod mo led, pa priye mwa, ouswa pa sipliy mwa pou zot, parski mo pa pou ekout twa. 17 Eski to pa trouve seki zot pe fer dan bann lavil Zida ek lor bann lari Zerizalem? 18 Bann garson pe ramas dibwa, bann papa pe alim dife, ek bann fam pe petri lafarinn pou fer bann gato ki pou ofer an sakrifis pou Larenn Lesiel,* ek zot pe vers ofrand divin pou bann lezot bondie pou ofans mwa. 19 Zeova dir, ‘Eski se mwa ki zot pe fer ditor?* Non, se zotmem ki zot pe fer ditor, ek zot pou fer zotmem gagn onte.’ 20 Akoz sa, ala seki Segner Siprem* Zeova dir, ‘Gete! Mo pou devers mo gran koler lor sa plas-la, lor bann zom ek bann zanimo, lor bann pie ki dan karo ek lor bann kitsoz ki later prodir; mo koler pou brile ek li pa pou tengn.’

21 “Ala seki Zeova Sef bann larme, Bondie Izrael, dir, ‘Ale, azout zot bann sakrifis ki brile ansam avek zot bann lezot sakrifis, ek manz laviann-la zotmem. 22 Parski zour ki mo ti tir zot bann anset dan pei Lezip, mo pa ti dir zot nanye ni mo ti donn zot lord konsernan sakrifis ki brile ek bann lezot sakrifis. 23 Me ala komannman ki mo ti donn zot: “Obeir mwa, ek mo pou vinn zot Bondie, ek zot pou vinn mo pep. Zot bizin swiv tou bann komannman ki mo donn zot pou ki tou pas bien pou zot.”’ 24 Me zot pa ti ekoute ouswa pran kont;* okontrer zot ti swiv plan ki zot ti fer,* ek zot ti fer zot teti kan zot ti swiv zot leker ki move. Akoz sa zot ti rekile ek zot pa ti avanse, 25 depi zour ki zot bann anset ti sorti dan pei Lezip ziska azordi. Alor mo ti kontign avoy kot zot tou mo bann serviter, setadir bann profet, toulezour ek mo ti fer sa plizir fwa.* 26 Me zot ti refiz ekout mwa, ek zot pa ti pran mwa kont.* Okontrer, zot ti teti,* ek zot ti azir pli pir ki zot bann anset!

27 “To pou dir zot, tou sa bann parol-la, me zot pa pou ekout twa; to pou apel zot, me zot pa pou reponn twa. 28 Ek to pou dir zot, ‘Ala pep ki pa’nn obeir lavwa Zeova zot Bondie ek ki’nn refiz aksepte disiplinn. Fidelite inn disparet ek nepli mem mansionn sa parmi zot.’*

29 “Koup zot seve ki zame pa’nn koupe* ek zet li, ek sant enn sante dey lor bann montagn kot nanye pa pouse, parski Zeova inn rezet sa zenerasion ki’nn fer li bien ankoler la ek li pou abandonn zot. 30 Zeova dir, ‘Parski pep Zida inn fer seki move devan mo lizie, zot inn met bann zidol degoutan dan lakaz ki port mo nom, pou fer li vinn inpir. 31 Zot inn aranz bann plas kot fer ladorasion dan Tofet, ki dan Vale Garson Inom,* pou bril zot bann garson ek zot bann tifi dan dife, enn kitsoz ki mo pa’nn donn lord pou fer ek ki zame mo pa’nn mem panse.’*

32 “Zeova dir, ‘Alor gete, bann zour pe vini kot pou nepli apel li Tofet ouswa Vale Garson Inom,* me Vale kot Touye. Zot pou anter bann dimounn mor dan Tofet ziska ki nepli res okenn plas. 33 Bann zwazo ki dan lesiel ek bann zanimo ki lor later pou manz bann kadav sa pep-la, ek pa pou ena personn pou farous zot. 34 Mo pou aret son kontantman ek son lazwa, lavwa nouvo marye ek lavwa lamarye, dan bann lavil Zida ek dan bann lari Zerizalem, parski pei-la pou vinn enn ta ros.’”