Zeremi
5 Fer enn letour dan bann semin Zerizalem.
Get toutotour ek pran kont.
Rod lor so bann plas piblik pou gete
Si to reisi trouv enn zom ki azir dan enn fason ki zis,
Enn kikenn ki pe fer zefor pou res fidel,
Ek si to reisi trouv enn kikenn,
Lerla mo pou pardonn lavil-la.
2 Mem si zot dir: “Parey kouma Zeova li vivan!”
Zot pou kontign fer bann fos serman.
3 A Zeova, eski to lizie pa pe rod bann ki fidel?
To’nn bat zot, me sa pa finn ena okenn lefe lor zot.*
To’nn detrir zot, me zot pa finn aksepte koreksion.
Zot inn fer zot figir vinn pli dir ki enn ros,
Ek zot inn refiz pou retourn ver twa.
4 Me mo ti dir ar momem: “Pena dout, sa bann-la se bann ti dimounn sa.
Zot azir kouma bann dimounn bet, parski zot pa konn volonte* Zeova,
Zizman zot Bondie.
5 Mo pou al get bann zom inportan ek mo pou koz avek zot,
Parski zot inn bizin pran kont volonte* Zeova,
Zizman zot Bondie.
6 Ala kifer enn lion dan lafore pe atak zot,
Enn loulou dan dezer pe kontign desir zot,
Enn leopar pe veye pre ar bann lavil pou atake.
Tou bann ki sorti, li desir zot bout-bout.
Parski zot inn fer boukou pese;
Ek zot inn montre zot infidel plizir fwa.
7 Kouma mo kapav pardonn twa pou sa?
To bann garson inn abandonn mwa,
Ek zot inn fer serman lor enn kitsoz ki pa Bondie.
Mo’nn donn zot seki zot bizin,
Me zot inn kontign fer ladilter,
Ek zot inn al dan lakaz enn prostitie an group.
8 Zot parey kouma bann seval ki an saler, ki pa kapav kontrol zot bann dezir,
Sakenn pe kriye kouma bann seval ek pe anvi fam enn lot zom.
9 “Eski mo pa bizin demann enn kont pou tou sa bann kitsoz-la?” ala seki Zeova dir.
“Eski mo pa bizin tir vanzans lor enn pep koumsa?”
10 “Vinn dan so bann plantasion rezin ek detrir,
Me pa detrir tou.
Koup so bann ti brans,
Parski zot pa pou Zeova.
11 Parski pep Izrael ek pep Zida
Inn trayir mwa net,” ala seki Zeova dir.
12 “Zot inn renie Zeova ek zot pe kontign dir,
‘Li pa pou fer nanye.*
Nou pa pou konn okenn maler;
Nou pa pou trouv ni lager* ni lafaminn.’
13 Ek bann profet pe dir bann parol ki pena valer,
Parol Bondie pa dan zot.
Ek pou fer zot pena valer parey kouma zot bann parol!”
14 Alor, ala seki Zeova, Bondie Sef bann larme, dir:
“Parski sa bann zom-la pe dir sa,
Mo pe fer mo bann parol vinn kouma enn dife dan to labous,
Ek sa pep-la kouma dibwa,
Ek dife-la pou bril zot net.”
15 Zeova dir, “A pep Izrael, mo pe fer enn pep ki sorti bien lwin atak twa
Se enn pep ki existe depi lontan.
Enn pep ki la depi bien lontan,
To pa konn lang sa pep-la,
Ek to pa konpran kan zot koze.
16 Zot sak kot zot met fles parey kouma enn tom ki ouver;
Zot tou zot bann gerye.
17 Zot pou devor to rekolt ek to dipin.
Zot pou touy to bann garson ek to bann tifi.
Zot pou devor to bann troupo mouton ek to bann troupo bef.
Zot pou devor to bann pie rezin ek to bann pie fig.
Zot pou detrir avek lepe to bann lavil ki bien proteze, dan ki to met to konfians.”
18 Zeova dir, “Me mem dan sa bann zour-la, mo pa pou detrir zot net. 19 Ek si zot demande, ‘Kifer Zeova nou Bondie inn fer tou sa bann kitsoz-la?’ to pou bizin reponn zot, ‘Parey kouma zot inn abandonn mwa pou servi enn bondie etranze dan zot pei, koumsa mem zot pou servi bann etranze dan enn pei ki pa pou zot.’”
20 Al dir sa ar bann desandan Zakob,
Ek anons sa dan Zida:
21 “Ekout sa, zot ki enn pep bet ek ki pena sazes:*
Zot ena lizie me zot pa trouve;
Zot ena zorey me zot pa tande.
22 Zeova dir, ‘Eski zot pena enn gran respe pou mwa?
Eski zot pa bizin tranble devan mwa?
Se mwa ki’nn met disab kouma enn baraz pou lamer,
Enn lalwa ki la pou touletan, enn limit ki lamer pa kapav depase.
Mem si so bann vag kontign ale-vini, zot pa reisi fer nanye;
Mem si bann vag-la pe kraze, kanmem sa zot pa kapav depas sa limit-la.
23 Sa pep-la zot leker teti ek rebel;
Zot inn vir ledo ar mwa ek zot inn swiv zot prop semin.
24 Ek zot pa dir dan zot leker:
“Aster-la anou ena enn gran respe pou Zeova nou Bondie,
Sa Kikenn ki donn lapli dan ler ki bizin la,
Lapli lotonn ek lapli printan toule-de,
Sa Kikenn ki fer sir ki nou gagn bann semenn ki’nn rezerve pou fer rekolt.”
25 Zot bann prop erer inn anpes sa bann kitsoz-la arive;
Zot bann prop pese inn anpes zot gagn seki bon.
26 parski parmi mo pep ena bann zom ki move.
Zot pe kontign veye parey kouma kan bann dimounn ki may zwazo, asize anba.
Zot met bann piez ki amenn lamor.
Ek se bann zom ki zot maye.
27 Parey kouma enn lakaz zwazo ki ranpli ar zwazo,
Zot bann lakaz ranpli ar tronpri.
Ala kifer zot inn vinn pwisan ek ris.
28 Zot inn vinn gro ek zot lapo lis;
Zot ranpli ar bann kitsoz move.
Pou zot prospere,
Zot pa defann case bann orfelin,
Ek zot anpes bann pov gagn lazistis.’”
29 “Eski mo pa bizin demann enn kont pou tou sa bann kitsoz-la?” ala seki Zeova dir.
“Eski mo pa bizin tir vanzans lor enn pep koumsa?
30 Enn kitsoz degoutan ek sokan inn arive dan sa pei-la:
31 Bann profet pe profetiz bann foste,
Ek bann pret pe servi zot lotorite pou fer dominer ar lezot.
Ek mo pep kontan ki sa koumsa.
Me ki zot pou fer kan lafin vini?”