Zeremi
4 Zeova dir: “A Izrael, si to revini,
Si to revinn ver mwa
Ek si to tir to bann zidol degoutan devan mwa,
Lerla to pou nepli enn fizitif.
2 Ek si to fer serman ek to dir,
‘Parey kouma Zeova li vivan!’ mo fer serman pou dir laverite, pou fer seki zis ek seki drwat,
Lerla bann pep pou gagn enn benediksion gras-a li,
Ek zot pou fier pou koz lor li ar lezot.”
3 Parski ala seki Zeova dir bann zom ki dan Zida ek ki dan Zerizalem:
“Travay pou ki zot gagn enn bon later pou zotmem,
Ek pa kontign sem bann lagrin parmi bann pie pikan.
4 Zot bizin fer sirkonsizion pou Zeova,
Ek pirifie zot leker,*
Zot, bann zom dan Zida ek bann dimounn ki res dan Zerizalem,
Pou ki mo koler pa anflame kouma enn dife
Ek brile san ki personn kapav tengn li,
Akoz zot bann move aksion.”
5 Dir sa dan Zida, ek anons sa dan Zerizalem.
Kriye ek soufle dan enn korn partou dan pei-la.
Kriye for ek dir: “Rasanble ansam,
Ek anou sove pou al dan bann lavil ki bien proteze.
6 Met enn signal lor enn poto dan direksion Sion.
Rod enn plas pou kasiet, ek kontign ale,”
Parski mo pe amenn enn maler ki sorti depi Lenor, enn gran katastrof.
7 Sa kikenn ki detrir bann pep la inn sorti;
Li’nn sorti kouma enn lion ki ti pe kasiet dan touf.
Li’nn sorti kot li ti ete, pou fer to pei vinn enn kitsoz ki fer per.
To bann lavil pou detrir net; pa pou ena personn ki res laba.
8 Alor, met enn latwal sak lor zot,
Gard dey,* kriye ek plore,
Parski Zeova ankor touzour bien ankoler kont nou.
9 Zeova dir: “Sa zour-la, lerwa pou dekouraze,*
Ek bann prins osi;*
Bann pret pou gagn bien per, ek bann profet pou gagn sok.”
10 Lerla, mo ti dir: “Ayo, Segner Siprem* Zeova! Vremem to’nn tronp sa pep-la ek Zerizalem, kan to’nn dir, ‘Zot pou gagn lape,’ alor ki lepe anba nou lagorz.”
11 Sa lepok-la, pou dir sa pep-la ek Zerizalem:
“Enn divan bien so ki sorti depi bann kolinn, kot nanye pa pouse dan dezer,
Pou soufle lor tifi* mo pep;
Li pa pe vini ni pou tir lapay lor lagrin ni pou fer li vinn prop.
12 Enn gro divan pe sorti depi sa bann plas-la parski mo’nn donn lord.
Aster-la mo pe anons bann zizman kont zot.
13 Gete! Lennmi pe vini parey kouma bann niaz lapli,
Ek so bann kales parey kouma enn siklonn.
So bann seval pli rapid ki bann leg.
Maler lor nou, parski nou’nn fini net!
14 A Zerizalem, lav to leker ek tir bann move kitsoz ki ena ladan, pou ki to sape.
Pandan komie letan ankor to pou kontign ena bann move panse?
15 Parski enn lavwa pe donn bann nouvel depi Dann,
Ek li pe anons enn maler depi bann montagn Efraim.
16 Wi, fer bann pep konn sa;
Anons sa kont Zerizalem.”
“Bann solda* pe vini depi enn pei bien lwin,
Ek zot pou kriye bien for kont bann lavil Zida.
17 Zot pe vinn atak li dan tou kote, parey kouma bann gardien pe veye dan laplenn,
Parski li’nn rebel kont mwa,” ala seki Zeova dir.
18 “To pou bizin peye pou to bann aksion ek pou to bann fason azir.
Parski sa inn rant ziska to leker,
Maler ki pou tom lor twa pou bien amer!”
19 Mo dan lapenn,* mo dan lapenn!
Mo pe santi enn gran soufrans dan mo leker.*
Mo leker pe bat for.
20 Pe tann nouvel maler enn deryer lot,
Parski pei-la an-antie inn detrir.
Enn sel kout mo bann latant inn detrir,
Enn kout koumsa mo bann latwal latant inn detrir.
21 Pandan komie letan ankor mo bizin kontign trouv sa sign-la,*
Kontign tann son sa korn-la?
22 “Parski mo pep zot bet;
Zot pa pran mwa kont.
Zot bann garson inbesil, zot pa konpran nanye.
Zot malin* zis kan ena pou fer seki pa bon,
Me zot pa kone kouma pou fer seki bon.”
23 Mo’nn get pei-la, ek li ti vid ek abandone.
Mo’nn get lesiel, ek li ti nepli ena lalimier.
24 Mo’nn get bann montagn, ek zot ti pe tranble,
Ek ti pe sakouy bann kolinn.
25 Mo’nn gete, ek pa ti ena okenn dimounn,
Ek tou bann zwazo dan lesiel inn anvole, inn ale.
26 Mo’nn gete, ek verze-la ti vinn enn dezer,
Ek so bann lavil ti’nn kraze.
Sa ti arive akoz Zeova,
Akoz so koler ki kouma enn dife.
27 Parski ala seki Zeova dir: “Pei-la net pou abandone,
Me mo pa pou detrir li net.
28 Akoz sa, pei-la pou an-dey,
Ek lesiel pou vinn nwar.
Parski mo’nn koze, mo’nn deside,
Ek mo pa pou sanz mo lide,* ni mo pou sanz seki mo’nn desid pou fer.
29 Lavil an-antie sove
Kan zot tann son bann kavalie ek bann dimounn ki tir kout fles,
Zot rant dan bann touf,
Ek zot grinp lor bann ros.
Tou bann lavil inn abandone,
Ek personn pa res ladan.”
30 Aster-la ki’nn fini twa net, ki to pou fer?
To ti abitie met bann linz kouler rouz vif,
To ti abitie met bann bizou an-or,
Ek agrandi to lizie avek makiyaz nwar.*
Me pou nanye to pe fer tomem vinn zoli,
Parski bann ki ena enn gran dezir pou twa, inn rezet twa.
Aster-la zot pe rod touy twa.
31 Parski mo’nn tann enn son ki parey kouma son enn madam ki pe gagn douler,
Bann son plengne parey kouma enn madam plengne kan li pe akous so premie zanfan,
Lavwa tifi Sion ki pe kontign mank ler.
Pandan ki li lev so lame li dir:
“Maler lor mwa, parski mo’nn fatige akoz bann ki touye!”