Zeremi
47 Ala seki Zeova ti dir profet Zeremi konsernan bann Filistin, avan ki Faraon atak Gaza. 2 Ala seki Zeova dir:
“Gete! Bann delo pe vini depi Lenor.
Zot pou vinn enn larivier ki’nn deborde.
Ek zot pou inond pei-la ek tou seki ena ladan,
Lavil-la ek so bann abitan.
Bann zom pou kriye,
Ek tou dimounn ki res dan pei-la pou kriye ek plore.
3 Kan zot pou tann son sabo so bann seval,
Son so bann kales lager,
Ek tapaz so bann larou,
Bann papa pa pou mem vir par deryer pou sov zot bann garson,
Parski zot lame pena lafors,
4 Parski sa zour ki pe vini la pou detrir tou bann Filistin;
Sa zour-la pou detrir tou bann dimounn dan Tir ek Sidon ki pe ed zot.
Parski Zeova pou detrir bann Filistin,
Bann ki reste ek ki sorti lor lil Kaftor.*
5 Gaza pou vinn sov.*
Inn fer Askalon res trankil.
A zot, sa tigit ki reste dan zot laplenn la,
Komie letan ankor zot pou kontign koup-koup zot?
6 Ayo! Lepe Zeova!
Komie letan ankor to pou kontign fer tapaz?
Retourn dan to fouro.
Pran inpe repo ek res trankil.
7 Kouma lepe-la kapav res trankil
Alor ki Zeova inn donn li enn lord?
Li’nn avoy li,
Pou atak Askalon ek lakot.”