Zeremi

33 Kan Zeremi ti ankor anferme dan Lakour Gard, Zeova ti koz ar li enn deziem fwa ek ti dir: 2 “Ala seki Zeova dir, sa Kikenn Ki’nn Fer later la, Zeova limem ki’nn form li ek ki’nn etabli li dan enn fason solid; limem ki so nom se Zeova, 3 ‘Apel mwa, ek mo pou reponn twa. Deswit mo pou dir twa bann kitsoz ki gran ek ki inposib pou konpran, bann kitsoz ki to pa kone.’”

4 “Parski ala seki Zeova Bondie Izrael dir konsernan bann lakaz ki dan sa lavil-la ek bann lakaz bann lerwa Zida ki pe detrir pou reziste kont bann baraz ki otour sa lavil-la ek kont lepe, 5 ek konsernan bann ki pe vinn lager kont bann Kaldeen, bann ki pe ranpli sa bann plas-la avek kadav bann dimounn ki mo’nn touye dan mo gran koler, bann ki akoz zot bann move aksion inn fer mwa inior* sa lavil-la: 6 ‘Gete, mo pe retabli sa lavil-la ek fer li regagn so lasante; mo pou geri zot ek fer zot gagn lape ek laverite an-abondans. 7 Mo pou fer bann prizonie Zida ek bann prizonie Izrael retourne, ek mo pou konstrir zot parey kouma mo ti fer dan koumansman. 8 Mo pou pirifie zot akoz tou bann erer ki zot inn fer kan zot inn fer pese kont mwa, ek mo pou pardonn tou bann pese ek tou bann fot ki zot inn fer kont mwa. 9 Ek nom sa lavil-la pou fer mwa bien kontan, sa lavil-la pou fer tou bann pep lor later ki’nn tann tou bann bon kitsoz ki mo’nn fer pou mo pep loue mwa ek glorifie mwa. Zot pou bien per ek zot pou tranble akoz tou bann bon kitsoz ek akoz lape ki mo pou donn sa lavil-la.’”

10 “Ala seki Zeova dir: ‘Dan sa plas kot zot pou dir enn dezer la, kot pena okenn dimounn, okenn troupo, dan bann lavil Zida ek dan bann lari Zerizalem ki’nn abandone, kot nepli ena okenn dimounn, okenn abitan, okenn troupo, pourtan laba pou retann 11 son kontantman ek son lazwa, lavwa nouvo-marye ek lavwa lamarye, lavwa bann ki dir: “Remersie Zeova Sef bann larme, parski Zeova bon; so lamour fidel dire pou touletan!”’

“Zeova dir: ‘Zot pou amenn bann ofrand remersiman dan lakaz Zeova, parski mo pou retourn bann prizonie sa pei-la, parey kouma dan koumansman.’”

12 “Ala seki Zeova Sef bann larme dir: ‘Dan sa dezer-la, kot pena okenn dimounn, okenn troupo, ek dan tou so bann lavil, pou re-ena bann patiraz kot bann berze pou amenn zot troupo repoze.’

13 “‘Dan bann lavil ki lor bann montagn, dan bann lavil ki lor bann ti kolinn, dan bann lavil ki dan Lesid, dan pei Binzamin, dan bann landrwa otour Zerizalem, ek dan bann lavil Zida, bann troupo pou repas anba lame sa kikenn ki pe kont zot la,’ ala seki Zeova dir.”

14 “‘Gete! Bann zour pe vini,’ ala seki Zeova dir, ‘kot mo pou realiz zoli promes ki mo’nn fer konsernan pep Izrael ek pep Zida. 15 Dan sa bann zour-la ek dan sa lepok-la, mo pou fer enn bourzon* ki drwat bourzone pou David, ek li pou fer ki ena lazistis ek ladrwatir dan pei-la. 16 Dan sa bann zour-la pou sap Zida, ek Zerizalem pou viv an sekirite. Ek ala kouma pou apel li: Zeova Li Nou Ladrwatir.’”

17 “Parski ala seki Zeova dir: ‘Pou touletan ena enn zom ki sorti dan desandans David ki pou asiz lor tronn pep Izrael, 18 ek pou touletan ena enn zom parmi bann pret Levit ki pou debout devan mwa pou ofer bann sakrifis ki brile, bann ofrand sereal, ek bann lezot sakrifis.’”

19 Ek Zeova ti koz ar Zeremi ankor enn fwa, ek ti dir: 20 “Ala seki Zeova dir, ‘Eski zot kapav kas mo lalians konsernan lizour ek mo lalians konsernan lanwit pou anpes lizour ek lanwit vinn dan ler kot zot bizin vini? 21 Non. Li parey, nanye pa pou kapav kas lalians ki mo’nn fer ar mo serviter David ek anpes li ena enn garson ki pou regne lor so tronn. Ek osi nanye pa pou kapav kas lalians ki mo’nn fer ar bann pret Levit, mo bann serviter. 22 Parey kouma pa kapav kont larme ki dan lesiel ek mezir disab ki dan lamer, koumsa mem mo pou miltipliye bann desandan mo serviter David ek bann Levit ki pe servi mwa.’”

23 Ek Zeova ti koz ar Zeremi ankor enn fwa, ek ti dir: 24 “Eski to pa’nn tande seki sa pep-la pe dir, ‘Zeova pou rezet de fami ki li’nn swazir’? Zot pa pe montre respe anver mo pep, ek zot nepli tret bann-la kouma enn pep.

25 “Ala seki Zeova dir: ‘Vremem, parey kouma mo’nn etabli mo lalians pou lizour ek lanwit, bann lalwa* pou lesiel ek later, 26 koumsa mem zame mo pa pou rezet bann desandan Zakob ek bann desandan mo serviter David, ek mo pou pran bann dirizan parmi so bann desandan ek mo pou etabli zot lor bann desandan Abraam, Izaak, ek Zakob. Parski mo pou rasanble zot bann prizonie ek mo pou ena pitie pou zot.’”