Zeremi

34 Kan Naboukodonozor,* lerwa Babilonn ek tou so larme ek tou bann rwayom ki li dirize lor later ek tou bann pep ti pe lager kont Zerizalem ek tou so bann lavil, Zeova ti koz ar Zeremi. Li ti dir:

2 “Ala seki Zeova Bondie Izrael dir, ‘Ale ek koz ar Sedesias, lerwa Zida ek dir li: “Ala seki Zeova dir, ‘Gete! mo pe donn sa lavil-la dan lame lerwa Babilonn, ek li pou bril li ar dife. 3 Ek to pa pou sape dan so lame, parski vremem pou trap twa ek pou livre twa ar li. To pou get lerwa Babilonn dan so lizie ek li pou koz ar twa fas-a-fas, ek to pou al Babilonn.’ 4 Selman, ekout parol Zeova, A Sedesias lerwa Zida, ‘Ala seki Zeova dir lor twa: “To pa pou mor ar lepe. 5 To pou mor anpe ek zot pou bril lansan pou to lanterman parey kouma zot ti fer pou to bann anset, bann lerwa ki ti la avan twa ek zot pou gard dey pou twa. Zot pou dir, ‘Ayo mo met!’ parski ‘mo’nn dir sa parol-la,’ ala seki Zeova dir.”’”’”

6 Lerla profet Zeremi ti dir tou sa bann parol-la lerwa Zida, Sedesias dan Zerizalem, 7 kan bann larme Babilonn ti pe lager kont Zerizalem ek kont tou bann lavil Zida ki ti reste, kont Lakis ek kont Azeka; parski parmi bann lavil bien proteze dan Zida, ti ena zis sa bann lavil-la ki ti reste.

8 Zeova ti koz ar Zeremi apre ki Lerwa Sedesias ti fer enn lalians avek tou bann dimounn dan Zerizalem pou anons zot ki zot pou gagn liberte. 9 Tou dimounn pou bizin liber so bann esklav Ebre, zom ek fam, pou ki personn pena enn Zwif kouma so esklav. 10 Alor tou bann prins ek lepep an-antie ti obeir. Zot ti dakor pou fer lalians ki zot tou bizin liber zot bann esklav zom ek fam ek nepli gard bann-la kouma esklav. Zot ti obeir ek zot ti les bann-la ale. 11 Selman, plitar zot ti reamenn bann esklav, bann zom ek bann fam ki zot ti libere, ek ankor enn fwa zot ti fors bann-la pou revinn bann esklav. 12 Alor Zeova ti koz ar Zeremi. Zeova ti dir:

13 “Ala seki Zeova Bondie Izrael dir, ‘Mo ti fer enn lalians avek zot bann anset zour ki mo ti tir zot depi pei Lezip, depi pei kot zot ti bann esklav. Mo ti dir: 14 “Alafin set an, sakenn parmi zot bizin liber so frer Ebre ki ti’nn vann ar zot ek ki ti’nn servi zot pandan si-z-an; zot bizin liber li.” Me zot bann anset pa ti ekoute ouswa pran kont mo bann parol.* 15 Ek pa lontan* zotmem zot ti sanz zot fason panse ek zot ti fer seki drwat devan mo lizie kan zot ti anons bann Zwif ki zot pou gagn liberte, ek zot ti fer enn lalians devan mwa dan lakaz ki port mo nom. 16 Me apre sa zot inn sanz lide ek zot inn zet dezoner lor mo nom kan zot inn reamenn zot bann esklav, bann zom ek bann fam ki zot ti libere pou ki bann-la al kot zot anvi, ek zot inn fors bann-la pou ki zot revinn zot bann esklav.’

17 “Alor, ala seki Zeova dir: ‘Zot pa’nn obeir mwa kan sakenn pa’nn liber so frer ek enn Zwif ki parey kouma li. Ala liberte ki mo pe anons zot,’ ala seki Zeova dir, ‘zot pou mor ar lepe, lepidemi,* ek lafaminn, ek mo pou fer zot vinn enn kitsoz ki fer per pou tou bann rwayom ki lor later. 18 Ek ala seki pou ariv bann zom ki pa’nn respekte mo lalians kan zot pa’nn obeir bann parol ki ti ena dan lalians ki zot ti fer devan mwa kan zot ti koup enn ti bef an-de ek zot ti pas ant sa de lamwatie-la, 19 setadir bann prins Zida, bann prins Zerizalem, bann ofisie lakour, bann pret ek tou bann abitan dan sa pei-la ki ti pas ant sa de lamwatie sa ti bef-la: 20 Mo pou livre zot ar zot bann lennmi ek ar bann ki pe rod tir zot lavi, ek bann zwazo dan lesiel ek bann zanimo lor later pou manz zot bann kadav. 21 Ek mo pou livre Sedesias lerwa Zida ek so bann prins dan lame zot bann lennmi ek dan lame bann ki pe rod tir zot lavi ek dan lame bann larme lerwa Babilonn, ki pe aret atak zot ek pe ale.’

22 “‘Gete! mo pou donn lord,’ ala seki Zeova dir, ‘ek mo pou reamenn zot dan sa lavil-la, ek zot pou lager kont sa lavil-la ek zot pou gagn laviktwar lor li ek zot pou bril li ar dife; ek mo pou fer bann lavil Zida vinn enn dezer, kot personn pa pou reste.’”