Zeremi
31 “Sa lepok-la,” ala seki Zeova dir, “mo pou vinn Bondie tou bann fami ki dan Izrael, ek zot pou vinn mo pep.”
2 Ala seki Zeova dir:
“Sa pep ki pa ti mor ar lepe la ti gagn faver Bondie dan dezer
Kan Izrael ti pe marse pou al dan so plas kot li pou gagn repo.”
3 Depi bien lwin, Zeova ti aparet ar mwa ek li ti dir:
“Mo’nn kontan twa avek enn lamour ki eternel.
Se akoz sa ki mo’nn atir twa ver mwa avek mo lamour fidel.*
4 Pourtan mo pou rekonstrir twa ek to pou rekonstrir.
A Izrael ki enn vierz, to pou repran to bann tanbourin
Ek to pou al danse dan lazwa.*
5 Ankor enn fwa to pou plant bann karo rezin dan bann montagn Samari;
Bann planter pou plante ek pou profit zot bann frwi.
6 Parski zour pou vini kot bann gardien ki lor bann montagn Efraim pou kriye bien for:
‘Leve, anou monte pou al Sion, kot Zeova nou Bondie.’”
7 Parski ala seki Zeova dir:
“Kriye for dan lazwa pou Zakob.
Kriye dan lazwa parski to lao bann pep.
Anons sa; loue Bondie ek dir,
‘A Zeova, sap to pep, sa tigit ki reste dan Izrael la.’
8 Mo pe retourn zot depi pei Lenor.
Mo pou rasanble zot ansam depi bann landrwa ki pli lwin lor later.
Parmi zot pou ena bann aveg ek bann ki bwate,
Bann fam ansint ek bann ki pe donn nesans, zot tou ansam.
Kan zot pou retourn isi zot pou enn gran lafoul.
9 Kan zot pou vini, zot pou plore.
Mo pou diriz zot parski zot pou sipliy mwa pou gagn mo faver.
Mo pou gid zot ver bann ti larivier delo,
Lor enn semin ki plat, kot zot pa pou kogne.
Parski mo enn Papa pou Izrael, ek Efraim li mo premie-ne.”
10 Ekout parol Zeova, zot bann pep,
Ek anons sa parmi bann zil ki bien lwin:
“Sa Kikenn ki’nn dispers Izrael la pou rasanble li ansam.
Li pou vey lor li parey kouma enn berze ki vey lor so troupo.
11 Parski Zeova pou reaste Zakob
Ek pou sap* li dan lame sa kikenn ki pli for ki li la.
12 Zot pou vini ek zot pou kriye dan lazwa lao lor Sion
Ek zot pou zwaye akoz bonte* Zeova,
Akoz sereal, nouvo divin, delwil,
Ek akoz bann ti mouton ek bann ti bef.
Zot pou vinn kouma enn zardin bien aroze,
Ek zame zot pa pou deperi ankor.”
13 “Sa lepok-la, sa tifi vierz la pou danse dan lazwa,
Bann zennzan ek bann vie osi, zot tou ansam.
Mo pou fer zot dey vinn lazwa.
Mo pou konsol zot ek mo pou donn zot lazwa pou ki zot bliye zot sagrin.
14 Mo pou donn bann pret enn kantite manze* ek zot pou kontan,
Ek mo pep pou kontan ar bann bon kitsoz ki mo pou donn zot,” ala seki Zeova dir.
15 “Ala seki Zeova dir:
‘Pe tann enn lavwa dan Rama. Enn kikenn pe plengne ek pe gran plore:
Rasel pe plore akoz so bann garson,*
Li’nn refiz gagn konsolasion pou so bann garson,
Parski zot nepli la.’”
16 Ala seki Zeova dir:
“‘Tini to lavwa pou ki to pa plore ek anpes to lizie vers larm,
Parski mo pou rekonpans twa pou seki to’nn fer,’ ala seki Zeova dir.
‘Zot pou retourne depi pei zot lennmi.’
17 ‘Ek ena enn lespwar pou to lavenir,’ ala seki Zeova dir.
‘To bann garson pou retourn dan zot teritwar.’”
18 “Mo’nn bien tann Efraim pe plengne:
‘To’nn koriz mwa, ek mo’nn gagn koreksion,
Parey kouma enn ti toro ki pa’nn drese.
Fer mwa revinn ver twa, ek san ezite mo pou aret fer seki pa bon,
Parski tomem Zeova mo Bondie.
19 Parski apre ki mo ti aret fer seki pa bon, mo’nn regrete;
Apre ki ti fer mwa konpran, mo’nn tap mo lakwis parski mo ti sagrin.
Akoz bann move kitsoz ki mo ti fer kan mo ti ankor zenn,
Mo ti gagn onte ek mo ti santi mwa imilie.’”
20 “Eski Efraim pa enn garson ki ena valer pou mwa, enn zanfan ki mo bien kontan?
Parski sak fwa ki mo koz kont li, kanmem sa mo rapel li.
Ala kifer mo leker fermal* pou li.
Ek pena dout ki mo pou ena pitie pou li,” ala seki Zeova dir.
21 “Met bann born lor semin pou tomem,
Ek met bann poto indikater.
Pran kont gran semin, semin ki to bizin pran pou ale.
Retourne, A Izrael ki enn vierz, retourn dan sa bann lavil ki pou twa la.
22 Komie letan ankor to pou ezite, A tifi ki infidel?
Parski Zeova inn kree enn kitsoz nouvo lor later:
Enn fam pou kontign galoup deryer enn zom.”
23 Ala seki Zeova Sef bann larme, Bondie Izrael, dir: “Zot pou dir ankor enn fwa sa bann parol-la dan pei Zida ek dan so bann lavil kan mo pou re-rasanble zot bann prizonie: ‘Ki Zeova beni twa, A twa lakaz lazistis, A twa montagn ki sin.’ 24 Ek ladan, Zida ek tou so bann lavil zot tou pou res ansam, bann fermie ek bann ki gid bann troupo. 25 Parski mo pou donn lafors sa kikenn ki fatige la ek tou bann ki feb mo pou donn zot seki zot bizin.”
26 Lerla mo ti leve ek mo ti ouver mo lizie, ek mo ti’nn fer enn bon somey.
27 “Gete! Bann zour pe vini,” ala seki Zeova dir, “kot mo pou fer pep Izrael ek pep Zida vinn enn kantite. Mo pou osi fer zot gagn enn kantite troupo.”
28 “Ek parey kouma mo’nn vey lor zot pou derasinn zot, pou zet zot anba, pou kraz zot, pou detrir zot, ek pou fer zot ditor, dan mem fason mo pou vey lor zot pou ranz zot ek pou plant zot,” ala seki Zeova dir. 29 “Sa lepok-la zot pou nepli dir, ‘Bann papa inn manz rezin eg, me ledan bann garson ki’nn grinse.’ 30 Me sakenn pou mor pou so prop erer. Ninport kisann-la ki manz bann rezin eg, se so prop ledan ki pou grinse.”
31 “Gete! Bann zour pe vini,” ala seki Zeova dir, “kan mo pou fer enn nouvo lalians avek lakaz Izrael ek avek lakaz Zida. 32 Li pa pou kouma lalians ki mo ti fer avek zot bann anset zour ki mo ti trap zot lame pou fer zot sorti dan pei Lezip, ‘mo lalians ki zot inn kase, mem si mo ti zot vre proprieter,’* ala seki Zeova dir.”
33 “Parski ala lalians ki mo pou fer avek lakaz Izrael* apre sa bann zour-la,” ala seki Zeova dir. “Mo pou met mo lalwa dan zot, ek mo pou ekrir sa dan zot leker. Ek mo pou vinn zot Bondie ek zot pou vinn mo pep.”
34 “Ek sakenn pou nepli ansegn so prosin ni ansegn sakenn so frer ek dir, ‘Konn Zeova!’ parski zot tou pou konn mwa, depi so pli tipti ziska so pli gran parmi zot,” ala seki Zeova dir. “Parski mo pou pardonn zot erer, ek mo pou nepli rapel zot pese.”
35 Ala seki Zeova dir,
Sa kikenn ki donn soley pou eklere lizour,
Ki donn bann lalwa* pou lalinn ek bann zetwal pou eklere aswar,
Ki fer lamer azite ek ki fer so bann vag fer tapaz,
Limem ki apel Zeova Sef bann larme:
36 “‘Si sa bann lalwa-la nepli marse,’ ala seki Zeova dir,
‘Lerla desandans Izrael pou nepli enn pep devan mwa pou touletan.’”
37 Ala seki Zeova dir: “‘Si ti kapav mezir lesiel lao ek etidie bann fondasion later anba, lerla mo ti pou kapav rezet tou bann desandan Izrael pou tou seki zot inn fer,’ ala seki Zeova dir.”
38 “Gete! Bann zour pe vini,” ala seki Zeova dir, “kot sa lavil-la pou ranze pou Zeova depi Latour Ananel ziska Laport dan Kwin. 39 Ek enn difil ki servi pou mezire pou sorti drwat ek pou al ziska kolinn Gareb, ek apre li pou tourn dan direksion Goa. 40 Ek vale kot ena bann kadav ek lasann* ek tou bann lapant ziska Vale Kidronn, pre ar kwin Laport Seval ki al dan direksion Les pou vinn enn kitsoz ki sin pou Zeova. Zame ankor pa pou derasinn li ouswa kraz li.”