Zeremi
30 Zeova ti koz ar Zeremi. Li ti dir: 2 “Ala seki Zeova Bondie Izrael dir, ‘Ekrir dan enn liv tou bann parol ki mo pe dir twa. 3 Parski “gete! bann zour pe vini,” ala seki Zeova dir, “kot mo pou rasanble bann dimounn dan mo pep, Izrael ek Zida ki prizonie,” ala seki Zeova dir, “ek mo pou fer zot retourn dan pei ki mo ti donn zot bann anset, ek li pou revinn pou zot ankor enn fwa.”’”
4 Ala bann parol ki Zeova ti dir Izrael ek Zida.
5 Ala seki Zeova dir:
“Nou’nn tann bann dimounn pe kriye ek pe panike;
Ena enn gran laper, ek pena lape.
6 Silvouple, demande si enn zom kapav akouse.
Alor, kifer eski mo trouv tou bann zom for inn met zot lame lor zot vant*
Parey kouma enn fam ki pe gagn zanfan?
Kifer zot tou zot figir inn vinn blem?
7 Ayo! Parski sa zour-la li enn zour bien pa bon.*
Pena enn lot zour koumsa,
Se enn moman kot Zakob dan enn gran lapenn.
Me li pou reisi sap ladan.”
8 “Ek sa zour-la,” ala seki Zeova Sef bann larme dir, “mo pou kas zoug* ki’nn met lor to likou ek mo pou kas an-de to bann lakord;* ek bann etranze pou nepli fer li* vinn zot esklav. 9 Zot pou servi Zeova zot Bondie ek David zot lerwa, ki mo pou etabli lor zot.”
10 “Ek twa, mo serviter Zakob, pa gagn per,” ala seki Zeova dir,
“Ek pa bizin to per, A Izrael.
Parski mo pou sap twa mem si to bien lwin
Ek mo pou sap to bann desandan depi pei kot zot ti ale kouma prizonie.
Zakob pou retourne ek pou viv anpe, ek nanye pa pou fatig li,
Pa pou ena personn ki pou fer zot per.”
11 Ala seki Zeova dir, “Parski mo avek twa pou sap twa.
Me mo pou detrir net tou bann pep kot mo ti dispers twa;
Selman, twa mo pa pou detrir twa.
Mo pou koriz* twa kantite ki to merite,
Ek vremem mo pou pini twa.”
12 Parski ala seki Zeova dir:
“Pena okenn gerizon pou to maladi.
Pa kapav geri to dimal.
13 Pena personn pou koz pou twa,
Pena okenn mwayin pou geri to dimal.
Pena gerizon pou twa.
14 Tou bann ki to pe garde ek ki kontan twa avek pasion inn bliye twa.
Zot nepli pe rod twa.
Parski mo’nn bat twa parey kouma enn lennmi ti pou fer,
Ek mo’nn pini twa parey kouma enn kikenn ki san pitie ti pou fer,
Parski to bien koupab ek to’nn fer boukou pese.
15 Kifer to pe kriye for akoz to maladi?
Pena remed pou to douler!
Se parski to bien koupab ek to’nn fer boukou pese
Ki mo’nn fer sa ar twa.
16 Alor pou detrir tou bann ki pe detrir twa,
Ek tou to bann lennmi osi pou ale kouma prizonie.
Ek pou depouy bann ki pe depouy twa,
Mo pou fer bann dimounn kokin tou bann ki pe kokin to bann zafer.”
17 “Me mo pou fer twa regagn to lasante ek mo pou geri to bann dimal,” ala seki Zeova dir,
“Mem si zot tou inn rezet twa ek inn apel twa:
‘Sion, plas ki personn pa pe rode.’”
18 Ala seki Zeova dir:
“Gete! mo pe rasanble bann ki ti dan bann latant Zakob ek ki’nn al kouma prizonie,
Ek mo pou ena pitie pou so bann tabernak.
Pou rekonstrir lavil-la lor so kolinn,
Ek latour ki solid la pou res dan plas kot li sipoze ete.
19 Ek depi laba pou tann bann parol remersiman ek pou tann zot riye.
Mo pou miltipliye zot, ek zot pa pou tigit;
Mo pou fer zot vinn boukou,*
Ek zot pa pou enn ti kantite.
20 So bann garson pou prospere parey kouma dan lepase,
Ek mo pou fer zot vinn enn pep for devan mwa.
Mo pou pini tou bann ki fer dominer ar zot.
21 So sef pou sorti dan so prop pep,
Ek so dirizan pou sorti parmi so bann desandan.
Mo pou fer li koste ar mwa, ek li pou vinn pre ar mwa.”
“Parski sinon, kisann-la ki pou oze* vinn pre ar mwa?” ala seki Zeova dir.
22 “Ek zot pou vinn mo pep, ek mo pou vinn zot Bondie.”
23 Gete! Enn tanpet ki sorti kot Zeova pou eklate dan enn gran violans,
Enn gran siklonn ki kontign tourne kouma enn tourbiyon pou vinn lor latet bann move.
24 Gran koler Zeova pa pou kalme
Tanki li pa fer ek realiz seki li’nn panse dan so leker.
Dan bann dernie zour* zot pou konpran sa.