Zeremi

28 Dan sa mem lane-la, dan koumansman regn Sedesias lerwa Zida, dan katriem lane, dan sinkiem mwa, profet Anania, garson Azour ki sorti Gabaon ti dir mwa dan lakaz Zeova, devan bann pret ek lepep an-antie: 2 “Ala seki Zeova Sef bann larme, Bondie Izrael dir, ‘Mo pou kas zoug* lerwa Babilonn. 3 Dan lespas de-z-an mo pou reamenn dan sa plas-la tou bann istansil ki ti dan lakaz Zeova ki Naboukodonozor, lerwa Babilonn ti pran dan sa plas-la ek ti amenn Babilonn.’” 4 “‘Ek mo pou reamenn dan sa plas-la Zekonia garson Zoakim, lerwa Zida, ek tou bann abitan Zida ki’nn al an exil dan Babilonn,’ ala seki Zeova dir, ‘parski mo pou kas zoug lerwa Babilonn.’”

5 Apre sa, profet Zeremi ti koz ar profet Anania devan bann pret ek lepep an-antie ki ti pe debout dan lakaz Zeova. 6 Profet Zeremi ti dir: “Amen!* Ki Zeova fer sa! Ki Zeova realiz bann parol ki to’nn profetize kan li retourn dan sa plas-la depi Babilonn bann istansil ki ti dan lakaz Zeova ek tou bann ki ti al an exil! 7 Me selman, silteple, ekout mesaz ki mo pe dir twa ek lepep* an-antie. 8 Lontan, bann profet ki ti la avan mwa ek ki ti la avan twa ti abitie anons bann profesi lor boukou pei ek bann gran rwayom, lor lager, maler ek lepidemi.* 9 Si enn profet anons bann profesi lor lape ek ki seki sa profet-la dir realize, lerla pou kone ki se Zeova vremem ki’nn avoy sa profet-la.”

10 Apre sa, profet Anania ti tir sa zoug ki ti lor likou profet Zeremi la ek ti kas li. 11 Lerla Anania ti dir devan lepep an-antie: “Ala seki Zeova dir, ‘Dan lespas de-z-an dan mem fason mo pou kas zoug ki Naboukodonozor, lerwa Babilonn inn met lor likou tou bann pep.’” Ek lerla profet Zeremi ti ale.

12 Apre ki profet Anania ti kas sa zoug ki ti lor likou Zeremi la, Zeova ti koz ar Zeremi ek ti dir li: 13 “Ale ek dir Anania, ‘Ala seki Zeova dir: “To’nn kas bann zoug an dibwa me dan so plas to pou fer bann zoug an feray.” 14 Parski ala seki Zeova Sef bann larme, Bondie Izrael, dir: “Mo pou met enn zoug an feray lor likou tou sa bann pep-la pou ki zot servi Naboukodonozor, lerwa Babilonn, ek zot pou bizin servi li. Mo pou mem donn li bann zanimo sovaz dan bwa.”’”

15 Apre sa profet Zeremi ti dir profet Anania: “Ekoute silteple, A Anania! Zeova pa’nn avoy twa, me to’nn fer sa pep-la krwar dan enn foste. 16 Alor, ala seki Zeova dir, ‘Gete! Mo pe detrir twa. Sa lane-la mem to pou mor parski to’nn ankouraz enn rebelion kont Zeova.’”

17 Ek profet Anania ti mor sa lane-la mem, dan setiem mwa.