Zeremi
21 Ala parol ki Zeova ti dir Zeremi kan Lerwa Sedesias ti avoy Pashour ek Sofoni pou al get li. Pashour, garson Malkiya, ek Sofoni, garson Maaseya, ki ti enn pret ti demann Zeremi: 2 “Silteple demann Zeova seki pou ariv nou, parski lerwa Babilonn, Naboukodonozor,* pe rod fer lager kont nou. Kitfwa Zeova pou fer enn kitsoz extraordiner pou nou kouma li’nn fer dan lepase, pou ki li sorti kot nou li ale.”
3 Zeremi ti dir zot: “Ala seki zot bizin dir Sedesias, 4 ‘Ala seki Zeova Bondie Izrael dir: “Gete, mo pe vir kont zot bann zarm ki dan zot lame, bann zarm ki zot pe servi pou lager kont lerwa Babilonn ek kont bann Kaldeen ki’nn antour zot andeor miray. Ek mo pou rasanble bann-la omilie sa lavil-la. 5 Ek momem mo pou lager kont twa avek mo lame ki bien for ek mo lebra pwisan, mo pou fer sa avek koler, enn gran koler, wi, enn extra gran koler. 6 Mo pou touy bann abitan sa lavil-la, bann zom ek bann zanimo toule-de. Zot pou mor avek enn gran lepidemi.”’*
7 “‘“Ek apre sa,” ala seki Zeova dir, “Mo pou livre lerwa Zida, Sedesias, ek so bann serviter ek bann dimounn sa lavil-la, setadir bann ki pa’nn mor avek lepidemi, lepe, ek lafaminn, dan lame lerwa Babilonn, Naboukodonozor,* dan lame zot bann lennmi, ek dan lame bann ki pe rod tir zot lavi. Li pou touy zot ar lepe. Li pa pou ena pitie pou zot, ni konpasion ouswa mizerikord.”’*
8 “Ek to bizin dir sa pep-la, ‘Ala seki Zeova dir: “Gete! Mo pe met devan zot semin lavi ek semin lamor. 9 Bann ki res dan lavil pou mor ar lepe, lafaminn, ek lepidemi. Me seki sorti andeor lavil ek rann limem ar bann Kaldeen ki pe anserkle zot, pou kontign viv ek pou gagn so lavi kouma enn rekonpans.”’*
10 “‘“Parski mo’nn vir ledo ar sa lavil-la, li pou konn maler ek li pa pou konn nanye debon,” ala seki Zeova dir. “Pou livre li dan lame lerwa Babilonn, ek li pou bril lavil-la avek dife.”
11 “‘Zot ki form parti dan lakaz lerwa Zida: Ekout parol Zeova. 12 A lakaz David, ala seki Zeova dir:
“Toule gramatin fer ki respekte lazistis,
Ek sap bann dimounn ki bann voler pe depouye,
Pou ki mo koler pa anflame kouma enn dife
Ek brile pou ki personn pa kapav tengn li
Akoz bann move kitsoz ki zot pe fer.”’
13 ‘Gete! mo pou lager kont zot, A bann abitan ki res dan vale,
A ros ki dan enn pei plat,’ ala seki Zeova dir.
‘Ek pou zot ki dir: “Kisann-la ki pou vinn lager kont nou?
Ek kisann-la ki pou vinn anvayir bann plas kot nou reste?”
14 Mo pou fer zot gagn seki zot merite
Pou bann aksion ki zot inn fer,’ ala seki Zeova dir.
‘Ek mo pou met dife dan so lafore,
Ek dife-la pou bril tou bann kitsoz ki otour li.’”