Zeremi
20 Pashour garson Imer, ki ti enn pret ek ki ti osi sef responsab lakaz Zeova, ti pe ekoute kan Zeremi ti pe anons sa bann kitsoz-la. 2 Lerla Pashour ti bat profet Zeremi ek ti met li dan bann blok dibwa* ki ti kot Laport Binzamin ki Pli Lao, ki dan lakaz Zeova. 3 Me landemin kan Pashour ti tir Zeremi dan bann blok dibwa,* Zeremi ti dir li:
“Zeova pa’nn apel twa “Pashour,” me “Laper Partou.” 4 Parski ala seki Zeova dir, ‘Mo pou fer twa vinn enn kitsoz ki fer per pou tomem ek pou tou to bann kamarad. Zot bann lennmi pou touy zot ar lepe devan to prop lizie; ek mo pou donn Zida an-antie dan lame lerwa Babilonn, ek li pou amenn zot an exil dan Babilonn ek li pou touy zot par lepe. 5 Ek mo pou donn tou bann rises sa lavil-la, tou so bann resours, tou so bann kitsoz ki ena valer, ek tou bann trezor bann lerwa Zida dan lame zot bann lennmi. Ek bann-la pou depouy zot, pran zot, ek amenn zot dan Babilonn. 6 Me twa Pashour ek tou bann ki res dan to lakaz, zot pou ale kouma prizonie. To pou al Babilonn ek to pou mor laba, ek pou anter twa laba avek tou to bann kamarad, parski to’nn anons bann-la bann fos profesi.’”
7 To’nn anbet mwa, A Zeova, wi to’nn anbet mwa.
To’nn servi to lafors kont mwa, ek to’nn gagne.
Toutlong lazourne bann dimounn pran plezir ar mwa;
Tou dimounn boufonn mwa.
8 Parski sak fwa ki mo koze, mo bizin kriye ek anonse,
“Violans ek destriksion!”
Akoz parol Zeova, pe insilte mwa ek maltret mwa toutlong lazourne.
9 Alor mo ti dir: “Mo pa pou koz lor li,
Ek mo pou aret koz lor so nom.”
Me dan mo leker so parol ti vinn kouma enn dife bien for, kouma enn dife bien for ki ti anferme dan mo lezo,
Ek mo ti fatige tini li;
Mo ti nepli kapav siporte.
10 Parski mo’nn tann boukou move koze;
Laper inn antour mwa.
“Denons li; anou denons li!”
Tou bann dimounn ki ti pe swet mwa lape ti pe atann kan mo pou tonbe.
Zot ti dir: “Kitfwa li pou fer enn erer bien bet,
Ek nou pou gagn laviktwar lor li ek nou pou tir nou vanzans lor li.”
11 Me Zeova ti avek mwa kouma enn solda ki fer per.
Akoz sa, bann ki pe persekit mwa pou tonbe ek zot pa pou gagn laviktwar.
Zot pou gagn enn gran laont, parski zot pa pou reisi.
Zot imiliasion pou dire pou touletan ek pa pou bliye sa.
12 Me twa, A Zeova Sef bann larme, to pe examinn sa kikenn ki drwat la;
To trouv leker ek bann panse pli profon.*
Fer mwa trouv vanzans ki to pou amene lor zot,
Parski mo’nn les mo case dan to lame.
13 Sant pou Zeova! Loue Zeova!
Parski li’nn sap sa kikenn ki pov la dan lame bann dimounn ki move.
14 Modi sa zour ki mo’nn ne la!
Ki sa zour ki mo mama ti gagn mwa la, li pa enn zour beni!
15 Modi sa zom ki ti amenn enn bon nouvel pou mo papa la, ek ti dir:
“To’nn gagn enn garson!”
Ek ki’nn fer li gagn enn gran lazwa.
16 Ki sa zom-la vinn kouma bann lavil ki Zeova inn detrir san okenn regre.
Ki gramatin li tann kriye ek midi li tann bann son ki averti ki ena danze.
17 Kifer li pa’nn touy mwa dan vant,
Pou ki mo mama vinn mo tom,
Ek ki li touletan res ansint?
18 Kifer mo’nn bizin sorti dan vant
Pou trouv problem ek sagrin,
Ek pou ki mo bann zour fini dan laont?