Zeremi

19 Ala seki Zeova ti dir: “Al kot enn potie ek aste enn resipian ki’nn fer avek later. Amenn ar twa sertin ansien parmi lepep ek sertin ansien parmi bann pret, 2 ek al dan Vale Garson Inom, kot lantre Laport Potie. Ek laba to bizin dir bann parol ki mo pe dir twa. 3 To pou dir, ‘Ekout parol Zeova, zot bann lerwa Zida ek bann abitan Zerizalem. Ala seki Zeova Sef bann larme, Bondie Izrael, dir:

“‘“Biento mo pou amenn enn maler lor sa plas-la, ek ninport kisann-la ki tann sa pou gagn sok.* 4 Sa pou arive parski zot inn abandonn mwa ek zot inn fer sa vinn enn plas ki bann dimounn nepli kapav idantifie. Ladan zot fer bann sakrifis pou bann lezot bondie, bann bondie ki zot, zot bann anset, ek bann lerwa Zida pa’nn kone. Ek zot inn ranpli sa plas-la avek disan bann inosan. 5 Zot aranz bann plas kot fer ladorasion pou Baal pou bril zot bann garson dan dife kouma bann sakrifis ki brile pou Baal, enn kitsoz ki mo pa’nn donn lord pou fer, lor ki mo pa’nn koze, ek ki zame mo pa’nn mem panse.”’*

6 “‘“Alor gete, bann zour pe vini,” ala seki Zeova dir, “kot nepli pou apel sa plas-la Tofet ouswa Vale Garson Inom, me Vale kot Touye. 7 Dan sa plas-la mo pou sabot bann plan Zida ek Zerizalem. Mo pou fer zot tom anba lepe zot bann lennmi ek zot pou mor dan lame bann ki pe rod tir zot lavi. Apre sa, mo pou donn bann zwazo ki dan lesiel ek bann zanimo lor later zot bann kadav pou manze. 8 Ek mo pou fer sa lavil-la vinn enn kitsoz ki fer per ek enn kitsoz ki bann dimounn boufone.* Tou dimounn ki pas par la, kan pou gete pou gagn sok ek pou boufonn li akoz tou so bann maler. 9 Mo pou fer zot manz laser zot bann garson ek zot bann tifi, ek sakenn pou manz laser zot kamarad, parski zot lavil pou anserkle ek zot pou dezespere parski zot bann lennmi ek bann ki pe rod tir zot lavi pou antour zot.”’

10 “Lerla, kraz resipian-la devan bann zom ki pou al avek twa, 11 ek dir zot, ‘Ala seki Zeova Sef bann larme dir: “Se koumsa mem ki mo pou kraz sa pep-la ek sa lavil-la, parey kouma kan enn kikenn kraz resipian enn potie pou ki pa kapav repar sa ankor; ek zot pou anter bann mor dan Tofet ziska ki nepli ena plas pou anter zot.”’

12 “‘Se seki mo pou fer avek sa plas-la,’ ala seki Zeova dir, ‘ek so bann abitan, pou ki sa lavil-la vinn parey kouma Tofet. 13 Ek bann lakaz ki dan Zerizalem ek bann lakaz bann lerwa Zida pou vinn inpir parey kouma sa plas-la, setadir Tofet. Parski lor tou bann lakaz zot inn ofer bann sakrifis pou tou bann larme ki dan lesiel ek zot inn vers bann ofrand divin pou lezot bondie.’”

14 Kan Zeremi ti retourne depi Tofet kot Zeova ti avoy li pou profetize, li ti debout dan lakour lakaz Zeova ek ti dir ar lepep an-antie: 15 “Ala seki Zeova Sef bann larme, Bondie Izrael dir, ‘Gete, mo pe amenn lor sa lavil-la ek lor tou bann landrwa alantour tou bann maler ki mo’nn dir mo pou amene lor li, parski zot inn fer zot teti kan zot inn refiz pou obeir mo bann parol.’”*