Zeremi
18 Ala parol ki Zeova ti dir Zeremi: 2 “Leve ek desann kot lakaz potie, ek laba mo pou fer twa tann mo bann parol.”
3 Alor mo ti desann kot lakaz potie-la, ek li ti pe travay lor enn tour* kot bann potie travay. 4 Me resipian ki sa potie-la ti fer avek larzil ti kase dan so lame. Alor potie-la ti re-travay larzil-la ek ti fer enn lot resipian ki li anvi.*
5 Lerla Zeova ti koz ar mwa ek li ti dir: 6 “‘A pep Izrael, eski mo pa kapav fer parey kouma sa potie-la ar zot?’ ala seki Zeova dir. ‘Gete! A pep Izrael, zot dan mo lame parey kouma larzil dan lame enn potie. 7 Kan mo dir ki mo pou derasinn, zet anba, ek detrir enn nasion ouswa enn rwayom, 8 ek ki sa nasion-la aret fer bann move kitsoz ki mo ti pe repros li, alor mwa osi mo pou sanz lide konsernan* maler ki mo ti pans pou avoy lor li. 9 Me kan mo dir ki mo pou konstrir ek plant enn nasion ouswa enn rwayom, 10 ek li fer seki move devan mo lizie, ek li pa obeir mwa, mo pou sanz lide konsernan* bann bon kitsoz ki mo ti pe pans pou fer pou li.’
11 “Aster-la, silteple, dir bann zom Zida ek bann abitan Zerizalem, ‘Ala seki Zeova dir: “Gete, mo pe prepar* enn maler ek mo pe mont enn plan kont zot. Silvouple, retourne ek aret fer bann move kitsoz ki zot pe fer, sanz zot fason azir ek zot konportman.”’”
12 Me zot ti dir: “Pa fatig twa! Parski nou pou azir dapre nou prop fason panse, ek sakenn parmi nou pou azir dapre so move leker ki teti.”
13 Alor, ala seki Zeova dir:
“Silvouple, al demann bann pep.
Kisann-la ki’nn tann enn kitsoz koumsa?
Izrael ki enn vierz inn fer kitsoz pli pa bon ki ena.
14 Eski lanez ki dan Liban pou disparet lor bann ros ki lor so bann lapant?
Ouswa eski bann delo fre ki pe koule depi bien lwin pou sek?
15 Me mo pep inn bliye mwa.
Parski zot pe fer bann sakrifis* pou enn kitsoz ki pa vo nanye,
Ek zot fer bann dimounn tonbe ek elwagn zot ar semin ki la depi lontan,
Pou ki bann-la mars lor bann ti semin akote ki kas-kase ek ki pa nivo,*
16 Pou fer zot pei vinn enn kitsoz ki fer per
Ek enn kitsoz ki bann dimounn pou boufone* pou touletan.
Tou dimounn ki pas par la pou gagn sok ek pou sakouy zot latet kan zot pou get li.
17 Parey kouma divan ki sorti dan Les, mo pou fer zot disperse devan zot lennmi.
Kan pou ariv zour zot maler, mo pou montre zot mo ledo, pa mo figir.”
18 Ek zot ti dir: “Vini, anou fer enn konplo kont Zeremi, parski lalwa* pou touzour res avek nou bann pret ek konsey avek bann zom ki ena sazes, ek laparol avek bann profet. Vini, anou koz kont li,* ek pa pran kont seki li dir.”
19 Pran kont seki mo dir, A Zeova,
Ek ekout seki mo bann lennmi pe dir.
20 Eski bizin rekonpans seki bon par seki pa bon?
Parski zot inn fouy enn trou pou touy mwa.
Rapel kouma mo ti debout devan twa pou dir kitsoz debon lor zot,
Pou detourn to koler ar zot.
21 Alor, les zot bann garson mor ar lafaminn,
Ek les zot mor ar pouvwar lepe.
Ki zot bann fam perdi zot bann zanfan ek vinn bann vev.
Ki zot bann misie mor ar lepidemi,
Ek ki zot bann zennzan mor ar lepe dan lager.
22 Ki tann kriye dan zot lakaz
Kan to fer bann bandi atak zot enn kout koumsa.
Parski zot inn fouy enn trou pou may mwa
Ek zot inn met bann piez pou mo lipie.
23 Me twa, A Zeova,
To konn bien tou bann manigans ki zot pe fer kont mwa pou touy mwa.
Pa kouver zot erer,
Ek pa efas zot pese devan twa.
Ki zot tonbe devan twa
Kan to azir kont zot dan to koler.