Zeremi
17 “Inn ekrir pese Zida avek enn plim an metal.
Inn grav sa lor tablet zot leker avek enn pwint an diaman
Ek lor bann korn zot bann lotel,
2 Pandan ki zot bann garson pe rapel zot bann lotel ek zot bann poto sakre*
Ki akote enn pie ki bien ver, lor bann kolinn ki ot,
3 Lor bann montagn ki dan bann gran laplenn.
Mo pou les bann-la kokin to bann resours, ek tou to bann trezor.
Wi, to bann plas ki dan oter akoz pese ki to’nn fer partou dan to bann teritwar.
4 Volonterman to pou renons leritaz ki mo’nn donn twa.
Ek mo pou fer twa servi to bann lennmi dan enn pei ki to pa kone,
Parski to’nn alim mo koler parey kouma enn dife.*
Li pou brile pou touletan.”
5 Ala seki Zeova dir:
“Modi sa zom* ki met so konfians dan bann sinp imin la,
Ki kont lor pouvwar bann dimounn,*
Ek ki so leker inn abandonn Zeova.
6 Li pou vinn kouma enn pie ki tousel dan dezer.
Li pa pou konn nanye debon,
Me li pou res dan bann landrwa sek dan dezer
Dan enn later sale kot personn pa kapav viv.
8 Li pou vinn kouma enn pie ki’nn plante pre kot delo,
Ki avoy so bann rasinn kot larivier.
Li pa pou trouve kan saler vini,
Me so bann fey pou touletan ver.
Dan lane kot pou ena lasesres, li pa pou trakase,
Ek li pa pou aret raport frwi.
9 Leker pli tret* ki ninport ki kitsoz ek li bien danzere.*
Kisann-la kapav konn li?
10 Mwa Zeova, mo fouy dan leker,
Mo examinn bann panse pli profon,*
Pou donn sakenn seki li merite dapre semin ki li’nn pran,
Dapre seki li’nn fer.
11 Enn dimounn ki rod gagn bann rises dan enn fason malonet,*
Li parey kouma enn perdri ki ramas bann dizef ki li pa’nn ponn.
Bann rises-la pou kit li omilie so lavi,
Ek alafin pou trouve ki li pena sazes.”
12 Nou plas ki sakre, li enn tronn
Ki ranpli ar laglwar, ki bien ot depi koumansman.
13 A Zeova, lespwar Izrael,
Tou bann ki abandonn twa pou gagn onte.
Pou ekrir nom bann ki pe rebel* kont twa* dan lapousier,
Parski zot inn abandonn Zeova, lasours delo ki donn lavi.
14 Geri mwa, A Zeova, ek mo pou gagn mo gerizon.
Sap mwa, ek mo pou sape,
Parski tomem ki mo loue.
15 Gete! Ena sertin ki pe dir mwa:
“Kot parol Zeova?
Ki sa arive, silteple!”
16 Me mwa, mo pa ti aret swiv twa kouma enn berze,
Ek mo pa ti anvi ki zour maler vini.
To konn bien tou seki mo labous inn dir;
Tousala inn realize devan twa!
17 Pa fer mwa per.
To mo proteksion dan zour maler.
18 Les bann ki persekit mwa gagn onte,
Me pa les mwa gagn onte.
Les zot gagn per,
Me pa les mwa gagn per.
Amenn lor zot zour maler,
Kraz zot ek detrir zot net.*
19 Ala seki Zeova ti dir mwa: “Ale ek debout devan laport bann garson sa pep-la kot bann lerwa Zida rantre-sorti, ek kot tou bann laport Zerizalem. 20 To bizin dir zot, ‘Ekout parol Zeova, zot bann lerwa Zida, pep Zida an-antie, ek tou bann abitan Zerizalem, ki rant par sa bann laport-la. 21 Ala seki Zeova dir: “Fer atansion, ek pa sarye okenn kitsoz lour pandan zour Saba ouswa fer sa pas par bann laport Zerizalem. 22 Fode pa ki zot tir okenn kitsoz lour dan zot lakaz pandan zour Saba; ek zot bizin pa fer okenn travay. Fode ki zour Saba res sakre, parey kouma mo’nn donn lord zot bann anset. 23 Me zot pa ti ekoute ouswa pran kont,* ek zot ti fer zot teti kan zot ti refiz* pou obeir ouswa aksepte ki koriz zot.”’
24 “‘“Selman, si zot obeir mwa dan tou kitsoz,” ala seki Zeova dir, “ek zot pa fer okenn kitsoz lour pas par bann laport sa lavil-la zour Saba, ek zot fer zour Saba res sakre kan zot pa fer okenn travay sa zour-la, 25 lerla bann lerwa ek bann prins ki pe asiz lor tronn David zot osi zot pou rant par bann laport sa lavil-la, zot pou mont lor bann kales ek lor bann seval, zot, zot bann prins, bann zom Zida, ek bann abitan Zerizalem; ek bann dimounn pou res dan sa lavil-la pou touletan. 26 Bann dimounn pou sorti depi bann lavil Zida, depi bann landrwa otour Zerizalem, depi pei Binzamin, depi bann landrwa kot ena bann ti kolinn, depi bann landrwa kot ena bann montagn, ek depi Negev* ek pou amenn bann sakrifis ki brile, lezot sakrifis, ofrand sereal, lansan blan,* ek bann sakrifis remersiman dan lakaz Zeova.
27 “‘“Me si zot pa obeir mwa, si zot pa fer ki zour Saba res sakre, si zot sarye bann kitsoz lour, ek fer sa bann kitsoz-la pas par bann laport Zerizalem zour Saba, lerla mo pou met enn dife dan so bann laport. Vremem, sa bann dife-la pou bril bann latour bien solid Zerizalem ek sa dife-la pa pou tengn.”’”