Zeremi
16 Zeova ti koz ar mwa ankor enn fwa. Li ti dir: 2 “Fode pa ki to marye, ek fode pa ki to gagn bann garson ek bann tifi dan sa landrwa-la. 3 Parski ala seki Zeova dir konsernan bann garson ek bann tifi ki pe ne isi ek konsernan zot mama ki pe donn zot nesans ek konsernan zot papa ki pe donn zot lavi dan sa pei-la: 4 ‘Zot pou mor ar bann maladi, me personn pa pou gard dey pou zot ouswa anter zot; zot pou vinn kouma fimie lor later. Zot pou mor ar lepe ek lafaminn, ek bann zwazo dan lesiel ek bann zanimo lor later pou manz zot bann kadav.’
5 Parski ala seki Zeova dir,
‘Pa rant dan enn lakaz kot bann dimounn ki an-dey pe manze,
Ek pa al laba pou kriye ek plore ouswa pou ena pitie pou zot.’*
‘Parski mo’nn tir mo lape lor sa pep-la,’ ala seki Zeova dir,
‘Mo’nn tir osi mo lamour fidel ek mo mizerikord.*
6 Bann dimounn inportan ek bann ti-dimounn toule-de pou mor dan sa pei-la.
Pa pou anter zot,
Personn pa pou gard dey pou zot,
Ek personn pa pou koup-koup limem ouswa raz so latet pou zot.*
7 Ek personn pa pou donn manze bann ki an-dey
Pou rekonfort zot parski ena lamor kot zot;
Ek personn pa pou donn zot koup ki donn konsolasion
Pou bwar kan zot perdi zot papa ouswa zot mama.
8 Ek fode pa to rant dan enn lakaz kot ena lamizman
Pou asize ek manze-bwar avek zot.’
9 “Parski ala seki Zeova Sef bann larme, Bondie Izrael, dir, ‘Isi dan sa plas-la, dan zot lepok ek devan zot prop lizie, mo pou aret son kontantman ek son lazwa, lavwa nouvo-marye ek lavwa lamarye.’
10 “Kan to pou dir sa pep-la tou sa bann parol-la, zot pou demann twa, ‘Kifer Zeova inn anons tou sa bann gran maler la kont nou? Ki erer ek ki pese nou’nn fer kont Zeova nou Bondie?’ 11 To bizin reponn zot, ‘“Parski zot bann anset inn abandonn mwa,” ala seki Zeova dir, “ek zot inn kontign swiv bann lezot bondie, servi zot ek prostern devan zot. Me zot inn abandonn mwa ek zot pa’nn swiv mo lalwa. 12 Ek zot inn fer pli pir ki zot bann anset, ek sakenn parmi zot inn swiv zot move leker ki teti olie ki zot obeir mwa. 13 Alor mo pou zet zot andeor sa pei-la ek mo pou avoy zot dan enn pei ki ni zot ni zot bann anset pa’nn kone. Laba lanwit-lizour zot pou bizin servi lezot bondie, parski mo pa pou montre zot mo faver.”’
14 “‘Selman, bann zour pe vini,’ ala seki Zeova dir, ‘kot zot pou nepli dir: “Parey kouma Zeova li vivan, limem ki’nn tir pep Izrael depi pei Lezip!” 15 me okontrer zot pou dir: “Parey kouma Zeova li vivan, limem ki’nn tir pep Izrael depi pei Lenor ek depi tou bann pei kot li ti dispers zot!” ek mo pou retourn zot dan zot pei, pei ki mo ti donn zot bann anset.’
16 ‘Gete, mo pou fer boukou peser vini,’ ala seki Zeova dir,
‘Ek bann-la pou lapes zot.
Apre sa, mo pou fer boukou saser vini,
Ek bann-la pou lasas zot lor tou bann montagn ek tou bann kolinn
Ek dan fant bann gro ros.
17 Parski mo lizie lor tou seki zot fer.*
Zot pa kapav kasiet mwa bann kitsoz ki zot fer,
Ni kasiet devan mo lizie bann erer ki zot fer.
18 Pou koumanse, mo pou fer zot peye pou tou zot bann erer ek tou zot bann pese,
Parski zot inn fer mo pei vinn inpir avek zot bann zidol degoutan ki pena lavi*
Ek zot inn ranpli mo leritaz avek zot bann kitsoz ki detestab.’”
19 A Zeova, mo lafors ek mo fortres,
Plas kot mo kapav kasiet kan mo dan problem,
Bann pep pou sorti depi dan bout later pou vinn ver twa,
Ek zot pou dir: “Nou bann anset inn erit enn gran foste,
Bann kitsoz ki dan vid ek bann kitsoz initil ki pa amenn nanye debon.”
20 Eski enn zom kapav fer bann bondie pou limem
Alor ki zot pa vremem bann bondie?
21 “Alor mo pou fer zot kone,
Sann-fwa la mo pou fer zot konn mo lafors ek mo pwisans,
Ek zot pou bizin kone ki mo nom se Zeova.”