Zeremi
13 Ala seki Zeova ti dir mwa: “Ale ek aste enn sintir an lin pou twa, met li otour to lerin, me pa plonz li dan delo.” 2 Alor mo ti aste enn sintir parey kouma Zeova ti dir mwa ek mo ti met li otour mo lerin. 3 Ek Zeova ti koz ar mwa enn deziem fwa, ek li ti dir mwa: 4 “Pran sa sintir ki to’nn aste ek ki to’nn met lor twa la, leve, al Lefrat, ek kasiet li laba dan fant enn gran ros.” 5 Alor mo ti ale ek mo ti kasiet li pre ar Lefrat, parey kouma Zeova ti’nn donn mwa lord pou fer.
6 Me plizir zour apre, Zeova ti dir mwa: “Leve, al Lefrat, ek laba pran sa sintir ki mo ti donn twa lord pou kasiet la.” 7 Alor mo ti al Lefrat ek mo ti fouy sa plas kot mo ti kasiet sa sintir-la, mo ti pran li ek mo ti trouve ki sintir-la ti’nn abime; pa ti pou kapav servi li ditou.
8 Lerla, Zeova ti koz ar mwa ek li ti dir: 9 “Ala seki Zeova dir, ‘Dan mem fason mo pou detrir fierte Zida ek gran fierte Zerizalem. 10 Sa bann move dimounn ki refiz obeir mo bann parol la, ki dan enn fason teti pe swiv zot prop leker, ek ki pe swiv lezot bondie, ki pe servi zot ek prostern devan zot, pou vinn parey kouma sa sintir ki pa kapav servi ditou la.’ 11 Zeova dir, ‘Parski parey kouma atas enn sintir dan lerin enn zom, koumsa mem mo ti atas pep Izrael an-antie ek pep Zida an-antie ar mwa, pou ki zot vinn pou mwa enn pep, enn nom, enn louanz, ek enn kitsoz ki zoli. Me zot pa ti obeir.’
12 “Ek to bizin osi pas zot sa mesaz-la, ‘Ala seki Zeova Bondie Izrael dir: “Bizin ranpli tou bann gran resipian ar divin.”’ Ek zot pou reponn twa, ‘Eski nou pa deza kone ki bizin ranpli tou bann gran resipian ar divin?’ 13 Lerla dir zot, ‘Ala seki Zeova dir: “Gete mo pe ranpli ar divin tou bann abitan sa pei-la ziska ki zot sou, ki li bann lerwa ki pe asize lor tronn David, bann pret, bann profet, ek tou bann abitan Zerizalem. 14 Ek mo pou tap zot ar zot kamarad, ziska ki zot kase bout-bout, bann papa ek osi bann garson,” ala seki Zeova dir. “Mo pa pou montre okenn konpasion ni gagn zot sagrin, ni ena pitie pou zot; nanye pa pou anpes mwa detrir zot.”’
15 Ekoute ek pran kont.
Pa montre zot arogan parski Zeova inn koze.
16 Donn Zeova zot Bondie laglwar
Avan ki li amenn nwarte
Ek avan ki to lipie kogne lor bann montagn kan soley kouse.
Zot pou espere ki ena lalimier,
Me li pou amenn enn gran lonbraz;
Li pou fer lalimier vinn enn gran marenwar.
17 Ek si zot refiz pou ekoute,
Mo pou plore an kasiet akoz zot lorgey.
Bann gro-gro larm pou koule depi mo lizie,
Parski inn pran troupo Zeova ek inn amenn zot kouma bann prizonie.
18 Dir lerwa ek mama lerwa,* ‘Asiz dan enn plas ki pli ba,
Parski pou tir zot zoli kouronn lor zot latet.’
19 Bann lavil dan Lesid zot ferme,* ek pena personn pou ouver zot.
Inn amenn Zida an-antie kouma prizonie, inn amenn zot tou kouma prizonie.
20 Lev to lizie ek get bann ki pe vinn depi Lenor.
Kot sa zoli troupo ki ti’nn donn twa la, to bann zoli mouton?
21 Ki to pou dir kan bann ki to’nn touletan konsider kouma to bann bon kamarad pini twa?
Eski to pa pou gagn douler lakousman, parey kouma enn fam ki pe gagn zanfan?
22 Ek kan to dir dan to leker, ‘Kifer inn ariv mwa sa bann kitsoz-la?’
Se akoz to gran erer ki’nn tir lazip to rob lor twa
Ek inn tret to talon avek violans.
23 Eski enn Kousit* kapav sanz kouler so lapo ouswa enn leopar sanz so bann tas?
Si wi, alor savedir zot kapav fer bann bon kitsoz,
Zot ki abitie fer seki pa bon.
24 Alor mo pou fann zot parey kouma lapay ki divan dan dezer pran ale.
25 Ala to par, porsion ki mo’nn mezire pou twa,” ala seki Zeova dir,
“Parski to’nn bliye mwa ek to met to konfians dan bann foste.
26 Akoz sa, mo pou lev lazip to rob lor to figir,
Ek pou trouv to laont.
27 Parski to pe fer ladilter ek to pe kriye kouma enn seval ki anvi krwaze,
Ek to pe fer enn prostitision degoutan.*
Lor bann kolinn, dan bann karo,
Mo’nn trouv to konportman degoutan.
Maler lor twa, A Zerizalem!
Komie letan ankor to pou res inpir?”