Zeremi
12 A Zeova! to montre twa drwat kan mo depoz mo plint devan twa,
Kan mo koz lor lazistis avek twa.
Me kifer seki bann move dimounn fer reisi?
Ek kifer bann dimounn ki fer tret pa gagn okenn traka?
2 To ti plant zot ek zot inn pran rasinn.
Zot inn grandi ek gagn bann frwi.
Zot touletan koz lor twa, me to pa dan zot bann panse pli profon.*
3 Me to konn mwa bien, A Zeova, to trouv mwa;
To’nn examinn mo leker ek to’nn trouve ki li dan linite avek twa.
Met zot enn kote kouma bann mouton ki pe al touye,
Ek met zot apar pou zour kot pou touy zot.
4 Komie letan ankor pei-la pou deperi
Ek bann verdir dan tou bann laplenn pou sek?
Akoz bann move kitsoz ki bann dimounn dan sa pei-la pe fer,
Bann zanimo ek bann zwazo inn disparet net.
Parski zot inn dir: “Li pa pe trouv seki pou ariv nou.”
5 Si to fatige kan to galoup avek bann dimounn ki apie,
Kouma to pou kapav galoup enn lekours avek bann seval?
To santi twa an sekirite dan pei kot ena lape,
Me kouma to pou fer parmi bann touf pie ki pouse toutlong larivier?
6 Parski mem to bann prop frer, fami to papa,
Inn fer tret ar twa.
Zot inn kriye bien for ar twa.
Fode pa to fer zot konfians,
Mem si zot dir twa bann bon kitsoz.
7 “Mo’nn abandonn mo lakaz; mo’nn kit mo leritaz.
Mo’nn kit sa kikenn ki mo bien kontan la dan lame so bann lennmi.
8 Pou mwa, mo leritaz inn vinn kouma enn lion dan lafore.
Li pe kriye kont mwa.
Akoz sa mo’nn koumans ena laenn pou li.
9 Pou mwa, mo leritaz li kouma enn zwazo rapas ki tou kouler;*
Bann lezot zwazo rapas antour li ek atak li.
Vini, rasanble ansam, zot tou bann zanimo sovaz ki dan laplenn,
Vinn manze.
10 Boukou berze inn detrir mo karo rezin;
Zot inn mars lor mo par later.
Zot inn fer mo par later ki mo bien kontan vinn enn dezer ki’nn abandone.
11 Li’nn vinn enn terin abandone.
Li’nn sek;*
Li’nn vinn enn dezer devan mwa.
Inn fer pei-la net vinn enn dezer,
Me personn pa pe kas latet avek sa.
12 Bann ki detrir inn vini, zot inn pas lor tou bann semin ki bann dimounn ale-vini dan dezer
Parski lepe Zeova pe detrir depi enn kote pei-la ziska so lot kote.
Pena lape pou personn.
13 Zot inn plant dible, me zot inn rekolte bann pie pikan.
Zot inn fatig zot pou nanye.
Seki zot inn rekolte pou fer zot gagn onte
Parski Zeova bien ankoler kont zot.”
14 Ala seki Zeova dir: “Konsernan tou mo bann move vwazin, ki pe tous leritaz ki mo’nn fer mo pep Izrael gagne, gete mo pe derasinn zot depi zot pei ek mo pou derasinn pep Zida parmi zot. 15 Me apre ki mo pou’nn derasinn zot, mo pou ena pitie pou zot ankor enn fwa ek mo pou fer sakenn retourn dan so leritaz ek dan so pei.”
16 “Ek si zot vremem aprann fason ki mo pep viv ek fer serman lor mo nom kan zot dir, ‘Parey kouma Zeova li vivan!’ parey kouma zot ti ansegn mo pep pou fer serman lor Baal, lerla zot pou gagn enn plas parmi mo pep. 17 Me si zot refiz pou obeir, mo pou osi derasinn sa nasion-la, mo pou derasinn li ek detrir li,” ala seki Zeova dir.