Zeremi
14 Ala seki Zeova ti dir Zeremi konsernan bann lasesres:
2 Zida an-dey, ek so bann laport inn deteryore.
Zot inn tom anba ek zot pa bon,
Ek pe tann bann dimounn kriye dan Zerizalem.
3 Bann met avoy zot bann serviter* pou al sers delo.
Zot al kot bann trou kot gard delo,* ek zot pa trouv okenn delo.
Zot retourne avek zot bann resipian vid.
Zot gagn onte, zot dekouraze,
Ek zot kouver zot latet.
4 Later inn kas-kase,
Parski pena lapli dan pei-la,
Akoz sa, bann planter inn dezespere ek inn kouver zot latet.
5 Mem femel serf ki dan karo inn abandonn so piti
Parski pena lerb.
6 Bann bourik sovaz pe debout lor bann kolinn kot nanye pa pouse.
Zot pe respire for-for kouma bann lisien sovaz;*
Zot lizie fatige telman zot pe rod feyaz.
7 Mem si nou bann prop erer temwagn kont nou,
A Zeova, azir akoz to nom.
Parski nou’nn montre nou infidel plizir fwa,
Ek se kont twa ki nou’nn fer pese.
8 A twa, lespwar Izrael, sa Kikenn Ki Sov li dan so bann problem,
Kifer to koumadir enn etranze dan pei-la,
Kouma enn vwayazer ki arete zis pou pas lanwit?
9 Kifer to koumadir enn zom ki’nn gagn sok,
Kouma enn zom for ki pa kapav sap so pep?
Parski to parmi nou, A Zeova,
Ek nou port to nom.
Pa abandonn nou.
10 Ala seki Zeova dir lor sa pep-la: “Sakenn kontan al dan so prop direksion; zot lipie pa kapav res anplas. Akoz sa, Zeova pa kontan seki zot fer. Aster-la li pou rapel zot bann erer ek li pou demann zot rann bann kont pou zot bann pese.”
11 Apre sa, Zeova ti dir mwa: “Pa priye pou ki bann bon kitsoz ariv sa pep-la. 12 Kan zot gard karem, mo pa ekout zot bann siplikasion, ek kan zot ofer bann sakrifis ki brile ek bann ofrand sereal,* sa pa fer mwa plezir. Mo pou detrir zot par lepe, lafaminn ek lepidemi.”*
13 Lerla mo ti dir: “Ayo, Segner Siprem* Zeova! Isi bann profet pe dir zot, ‘Zot pa pou trouv lepe, ek lafaminn pa pou vinn lor zot, me mwa Bondie, mo pou donn zot vre lape dan sa landrwa-la.’”
14 Lerla Zeova ti dir mwa: “Bann profet pe predir bann foste lor mo nom. Mo pa’nn avoy zot, ni donn zot lord, ni koz ar zot. Enn fos vizion, enn prediksion ki pena valer ek bann manigans ki ena dan zot prop leker, se samem ki bann-la pe profetize ar zot. 15 Alor, ala seki Zeova dir konsernan bann profet ki pe profetiz lor mo nom, mem si mo pa’nn avoy zot, ek ki dir ki pa pou ena okenn lepe ouswa lafaminn ki pou vinn dan sa pei-la: ‘Sa bann profet-la pou mor par lepe ek lafaminn. 16 Ek bann dimounn ki ekout sa bann profesi-la pou mor akoz lafaminn ek lepe. Pou zet zot dan bann semin dan Zerizalem ek personn pa pou anter zot, setadir zot, zot bann madam, zot bann garson ouswa zot bann tifi, parski mo pou devers lor zot maler ki zot merite.’
17 “To bizin dir zot sa parol-la,
‘Les bann gro-gro larm koule depi mo lizie lanwit-lizour; pa les zot arete,
Parski tifi mo pep ki vierz inn kraze net ek inn kas-kase,
Avek enn dimal ki bien grav.
18 Si mo al dan laplenn ek gete,
Mo pou trouv bann ki’nn mor par lepe!
Ek si mo rant dan lavil,
Mo pou trouv bann ki malad akoz lafaminn!
Parski bann profet ek bann pret inn al partou dan enn pei ki zot pa kone.’”
19 Eski to’nn rezet Zida net ouswa eski to’nn degout Sion?
Kifer to’nn tap nou pou ki pena okenn gerizon pou nou?
Nou ti pe espere ki ena lape, me nanye debon pa’nn arive,
Nou ti pe espere ki ena gerizon, me ena enn gran laper!
20 A Zeova, nou rekonet bann move kitsoz ki nou’nn fer,
Ek erer nou bann anset,
Parski nou’nn fer pese kont twa.
21 Akoz to nom pa rezet nou;
Pa mepriz to tronn ki ranpli ar laglwar.
Rapel lalians ki to’nn fer avek nou, ek pa kas li.
22 Eski enn parmi sa bann zidol ki pena valer ki bann pep servi la kapav fer lapli tonbe?
Ouswa eski lesiel kapav fer lapli tonbe par li tousel?
Eski se pa To tousel ki kapav fer sa, A Zeova nou Bondie?
Ek nou met nou lespwar dan twa,
Parski to tousel ki’nn fer tou sa bann kitsoz-la.