Zeremi
10 Ekout parol ki Zeova inn dir kont twa, A pep Izrael. 2 Ala seki Zeova dir:
“Pa fer parey kouma bann pep,
Ek pa per bann sign ki ena dan lesiel
Parski bann pep per sa bann sign-la.
3 Parski koutim bann pep pa vo nanye.*
Se zis enn pie dan lafore ki’nn koupe,
Ek enn artizan travay li avek so zouti.*
4 Zot servi larzan* ek lor pou fer li vinn zoli
Ek zot fixe li avek enn marto ek bann koulou pou ki li pa tonbe.
5 Parey kouma enn epouvantay dan enn karo kokom, zot pa kapav koze;
Bizin sarye zot parski zot pa kapav marse.
Pa per zot, parski zot pa kapav ni fer ditor,
Ni fer nanye debon.”
6 Pena personn parey kouma twa, A Zeova.
To gran, ek to nom gran ek pwisan.
7 A Lerwa bann nasion, kisann-la ki pa pou ena enn gran respe pou twa, parski to merit sa;
Parski parmi tou bann ki ena sazes parmi bann nasion ek dan tou zot bann rwayom,
Pena personn ki kouma twa.
8 Zot tou zot bet ek zot pa reflesi.
Bann lansegnman ki sorti kot enn pie, pa vo nanye.*
9 Inn inport bann plak an-arzan depi Tarsis ek lor depi Oufaz,
Travay ki enn artizan ek enn dimounn ki travay metal inn fer.
Sa bann zidol-la zot linz inn fer ar difil ble ek lalenn mov.
Tou sa bann zidol-la inn fer par bann dimounn ki kalifie.
10 Me Zeova li, li vremem Bondie.
Limem Bondie vivan ek Lerwa pou touletan.
Later pou tranble akoz so koler,
Ek kan li amenn so kondanasion, okenn pep pa pou kapav siporte.
11* Ala seki to bizin dir zot:
“Bann bondie ki pa’nn fer lesiel ek later
Pou disparet depi later ek pou nepli trouv zot anba sa lesiel-la.”
12 Limem sa Kikenn Ki’nn Fer later par so lafors,
Sa Kikenn ki’nn prepar later fertil par so sazes
Ek ki’nn tal lesiel par so lintelizans.
13 Kan li fer tann so lavwa,
Bann delo dan lesiel fer tapaz,
Ek li fer bann niaz* monte depi dan bout later.
Li avoy zekler ansam avek* lapli,
Ek li tir divan depi so bann stor.
14 Tou bann dimounn pe azir san reflesi ek dan enn fason ki montre ki zot pena konesans.
Tou bann dimounn ki travay metal pou gagn onte akoz sa zidol skilpte la;
Parski zot zidol an metal* se enn kitsoz ki fos,
Ek zot pena lavi.*
15 Zot pa vo nanye,* enn travay ki bann dimounn pou boufone.
Kan pou ariv zour kot zot bizin rann bann kont, zot pou disparet.
16 Bondie* Zakob pa parey kouma sa bann kitsoz-la,
Parski Limem ki’nn fer tou kitsoz,
Ek Izrael li baton so leritaz.
So nom se Zeova Sef bann larme.
17 Ramas to bann zafer anba,
A fam ki lennmi inn antoure.
18 Parski ala seki Zeova dir:
“Gete! Sann-fwa la mo pou avoy* bann abitan andeor sa pei-la,
Ek mo pou fer zot konn bann maler.”
19 Maler lor mwa akoz mo malad!*
Pa kapav geri mo dimal.
Ek mo’nn dir: “Wi, samem mo maladi, ek mo bizin siport sa.
20 Mo latant inn kase, ek tou so bann lakord inn kase.
Mo bann garson inn kit mwa ek zot nepli la.
Pena personn pou mont mo latant ouswa pou lev mo bann latwal latant.
21 Parski bann berze inn azir dan enn fason bet,
Ek zot pa’nn rod direksion Zeova,
Akoz sa zot pa’nn azir avek bon zizman,
Ek tou zot bann troupo inn fane partou.”
22 Ekoute! Ala nouvel ki nou’nn fek gagne!
Ena enn gran mouvman ki sorti depi pei Lenor,
Ki pou fer bann lavil Zida vinn enn dezer, enn plas kot bann lisien sovaz* reste.
23 A Zeova! mo konn bien ki enn dimounn pa kapav trouv so semin par limem.
Enn dimounn ki pe marse li pa kapav mem swazir kot li pou met so lipie.
24 A Zeova! koriz mwa dapre to lazistis,
Me pa dan to koler, pou ki to pa detrir mwa.
25 Devers to koler lor bann pep ki pa pe pran twa kont
Ek bann fami ki pa loue to nom.
Parski zot inn fini Zakob,
Wi, zot inn fini li net,
Ek zot inn fer so pei vinn enn dezer.