Zeremi
9 A! Si selman mo latet ti enn pwi kot ena delo,
Ek mo lizie enn lafontenn larm!
Lerla, mo ti pou plore lanwit-lizour
Pou bann ki bann dimounn inn touye parmi mo pep.
2 A! Si selman dan dezer mo ti ena enn plas kot bann vwayazer reste!
Lerla, mo ti pou kit mo pep ek mo ti pou al lwin ar zot,
Parski zot tou zot fer adilter,
Zot bann tret.
3 Zot pare pou koz manti parey kouma enn lark ki pare pou tir kout fles;*
Dan sa pei-la ena zis foste, pena fidelite.
“Zot pe vinn deplizanpli pir,
Ek zot pa ekout mwa,” ala seki Zeova dir.
4 “Zot tou zot bizin mefie zot prosin,
Ek pa fer konfians mem zot frer.
Parski tou bann frer se bann tret,
Ek tou bann prosin se bann ki koz manti pou gat repitasion lezot.
5 Sakenn pe anbet so prosin,
Ek personn pa pe koz laverite.
Zot inn ansegn zot lalang pou koz manti.
Zot pe fatig zotmem telman zot pe fer bann move kitsoz.
6 To pe viv omilie foste.
Dan zot foste zot inn refiz pou konn mwa,” ala seki Zeova dir.
7 Alor ala seki Zeova Sef bann larme dir:
“Mo pou fer zot fonn dan dife ek mo pou examinn zot,
Parski ki mo kapav fer ankor avek tifi mo pep?
8 Zot lalang se enn fles ki amenn lamor ek ki anbet dimounn.
Avek so labous enn dimounn pe dir bann parol lape ar so prosin,
Me andan, li pe prepar enn piez.”
9 “Eski mo pa bizin demann enn kont pou tou sa bann kitsoz-la?” ala seki Zeova dir.
“Eski mo pa bizin tir vanzans lor enn pep koumsa?
10 Mo pou plore ek kriye for-for pou bann montagn
Mo pou sant enn sante dey pou bann patiraz ki dan dezer,
Parski inn bril zot pou ki okenn zom pa pas laba,
Ek nepli tann son bann troupo.
Bann zwazo ki dan lesiel ek bann zanimo inn sove; zot inn ale.
11 Mo pou fer Zerizalem vinn enn ta ros, enn plas kot bann lisien sovaz* reste,
Ek mo pou fer bann lavil Zida vinn enn landrwa abandone, kot personn pa reste.
12 Kisann-la ki ena ase sazes pou konpran sa?
Ar kisann-la Zeova inn dir sa, pou ki li kapav dir sa lezot?
Kifer pei-la inn detrir?
Kifer li’nn brile parey kouma dezer,
Kot personn pa kapav pase?”
13 Zeova ti reponn: “Parski zot inn rezet mo lalwa* ki mo’nn met devan zot, ek parski zot pa’nn swiv li ek zot pa’nn obeir mwa. 14 Olie sa, dan enn fason teti zot ti swiv zot prop leker, ek zot ti ador bann zidol Baal, parey kouma zot bann anset ti’nn ansegn zot pou fer. 15 Alor, ala seki Zeova Sef bann larme, Bondie Izrael dir, ‘Mo pou fer sa pep-la manz labsint,* ek mo pou fer zot bwar delo anpwazone. 16 Mo pou avoy zot parmi bann pep ki zot ek zot bann anset pa’nn kone, ek mo pou avoy enn lepe deryer zot ziska ki mo detrir zot net.’
17 Ala seki Zeova Sef bann larme dir,
‘Azir avek lintelizans.
Apel bann fam ki sant bann sante dey,
Ek al sers bann fam ki profesionel ladan,
18 Pou ki zot vinn vit ek sant enn sante tris pou nou,
Pou ki bann gro-gro larm koule dan nou lizie
Ek delo koule depi nou popier.
19 Parski inn tann bann dimounn plore ar tristes depi Sion:
“Gete kouma nou’nn fini net!
Sa enn gran laont pou nou!
Parski nou’nn kit pei-la, ek zot inn kraz nou bann lakaz.”
20 Zot, bann fam, tann parol Zeova.
Ki zot zorey aksepte parol ki sorti dan so labous.
Ansegn zot bann tifi sa sante tris la,
Ek sakenn ansegn so kamarad sa sante dey la.
21 Parski lamor inn monte ek inn pas par nou bann lafnet;
Li’nn rant par nou bann latour ki bien solid
Pou pran bann zanfan lor semin
Ek bann zenom dan bann plas piblik.’
22 Dir, ‘Ala seki Zeova dir:
“Kadav bann dimounn pou tonbe kouma fimie dan karo,
Parey kouma enn ranze sereal ki’nn fek koupe apre ki bann dimounn ki fer rekolt inn pase,
Ek personn pa’nn ramas zot.”’”
23 Ala seki Zeova dir:
“Fode ki sa kikenn ki ena sazes-la pa fer vantar pou so sazes;
Fode ki sa kikenn ki pwisan la pa fer vantar pou so pwisans;
Ek fode ki sa kikenn ki ris la pa fer vantar pou so rises.”
24 “Me si enn kikenn fer vantar, li bizin fer vantar pou sa bann kitsoz-la:
Ki li ena bon zizman ek ki li konn mwa,
Ki li kone ki mwa mo Zeova, ek ki momem ki montre lamour fidel, lazistis, ek fer seki drwat lor later,
Parski mo kontan sa bann kitsoz-la,” ala seki Zeova dir.
25 Zeova dir: “Gete! Bann zour pe vini ek mo pou fer tou bann ki’nn fer sirkonsizion me ki an realite pa’nn fer sirkonsizion, rann bann kont. 26 Mo pou fer Lezip, Zida, Edom, bann Amonit, Moab, ek tou bann ki’nn koup zot seve ziska zot latanp ek ki pe res dan dezer rann bann kont; parski tou bann nasion pa’nn fer sirkonsizion, ek zot tou dan pep Izrael pa’nn fer sirkonsizion ar zot leker.”