Nĩatĩa Bibiria Yugaga Bwegie Mogwati ja Wĩthĩre?

Ĩcookio rĩa Bibiria

Tĩ Mũrungu ũretaga mogwati ja wĩthĩre jarĩa jagũkarĩka ntukũne cietũ, ĩndĩ namakagĩra antũ barĩa baringithagua nĩjo. Mogwati ja wĩthĩre nĩ jamwe ja mantũ jarĩa jatũmaga tũthangĩka, jarĩa jakathirua nĩ Ũnene bwa Mũrungu. Ĩgiitene rĩrĩ, Mũrungu nakwejana ũboreri kĩrĩ barĩa baringithĩtue nĩ mogwati ja wĩthĩre.—2 Akorintho 1:3.

• Nĩkĩ tũũmba kwĩthĩrwa na mma atĩ mogwati ja wĩthĩre tĩ mpũrwa kuuma kĩrĩ Mũrungu?

• Rĩ, mogwati ja wĩthĩre nĩ rwano rwa ntukũ cia mũthiro?

• Nĩatĩa Mũrungu atethagia barĩa baringithĩtue nĩ mogwati ja wĩthĩre?

• Rĩ, Bibiria no ĩtũtethie kwithuranĩra tontũ bwa mogwati ja wĩthĩre?

• Mĩstaarĩ ya Bibiria ya kũboreria barĩa baringithĩtue nĩ mogwati ja wĩthĩre

Nĩkĩ tũũmba kwĩthĩrwa na mma atĩ mogwati ja wĩthĩre tĩ mpũrwa kuuma kĩrĩ Mũrungu?

Nĩkwĩthagĩrwa na mwanya rĩrĩa Mogwati ja wĩthĩre jakarĩka, na rĩrĩa Mũrungu atumĩra inya cia wĩthĩre, o ta ũrĩa kũgweti Bibiriene.

• Mogwati ja wĩthĩre jatĩthuuraga barĩa bagakua kana barĩa bakaurarua. Mwanya nou, rĩrĩa Mũrungu aatumĩĩre inya cia wĩthĩre gũtua magamba, barĩa baathirĩrue nĩ antũ baathũũku akĩ. Ngerekano, rĩrĩa Mũrungu eenyangĩrie matũũra ja karaaja ja Sodomu na Gomora, noonokerie Loti na aarĩ baawe. (Kiambiriria 19:29, 30) Mũrungu naamenyere jarĩa jaarĩ nkorone cia antũ ba ĩgiita rĩu, na areenyangia barĩa akĩ oonere barĩ babaaĩ.—Kiambiriria 18:23-32; 1 Samweli 16:7.

• Kaingĩ mogwati ja wĩthĩre jaumagĩra antũ bakĩmenyaga bũkai bũjegie, kana batĩkũmenya buru. Mwanya nou, Mũrungu naaejanĩre mũkana kĩrĩ barĩa baaĩ mbere atumĩra inya ciawe cia wĩthĩre kũbathiria. Antũ barĩa baathĩkĩĩre mĩkaana ĩu yaawe, nĩboonokere.—Kiambiriria 7:1-5; Mathayo 24:38, 39.

• Antũ kinya bo nĩbatũmĩte gũkethĩrwa na mogwati ja wĩthĩre. Nĩatĩa bathithĩtie ũu? Gũkũrũkĩĩra kwĩnyangia into birĩa bitũthiũrũkĩrĩte, gwaka gũntũ kũrĩa kuumagĩra ithingithia bia nthĩ, maburiko, mũũ jũmwingĩ, na mantũ jangĩ ta jau. (Kugwurirwa 11:18) Mũrungu atĩbuĩrĩte kũlaumwa tontũ bwa maatia ja antũ.—Njuno 19:3.

Rĩ, mogwati ja wĩthĩre nĩ rwano rwa ntukũ cia mũthiro?

Ĩĩ, ũroria bwa Bibiria bwonanagia atĩ kũrĩĩngĩĩthĩrwa na mogwati ĩgiita rĩa “muthiro jwa nthiguru,” kana “matukune ja muthiro.” (Mathayo 24:3; 2 Timotheo 3:1) Ngerekano, bwegie ntukũ cietũ, Jesũ aaugĩre ũjũ: ‘Gũkagĩta mpara na ithingithia bia nthĩ gũntũ gũkwingĩ.’ (Mathayo 24:7) Kagiita gatĩ kũraaja, Mũrungu akathiria mantũ jonthe jarĩa jaretaga ũrũrũ na kũthangĩka, ona kinya mogwati ja withĩre nthĩgũrũne.—Kugwurirwa 21:3, 4.

Nĩatĩa Mũrungu atethagia barĩa baringithĩtue nĩ mogwati ja wĩthĩre?

• Mũrungu nababoragĩria gũkũrũkĩĩra Rũteto rwawe Bibiria. Bibiria nĩtũrikithagĩria atĩ Mũrungu natũmakagĩra, na naringĩkaga rĩrĩa tũkũthangĩka. (Isaya 63:9; 1 Petero 5:6, 7) Kinya nĩ ĩtũmenyithagia wĩrane bwawe bwegie ĩgiita rĩrĩa mogwati ja wĩthĩre jatĩĩthĩrwa o kaĩrĩ.—Tega, “Mĩstaarĩ ya Bibiria ya kũboreria barĩa baringithĩtue nĩ mogwati ja wĩthĩre.”

• Mũrungu nabatethagia gũkũrũkĩĩra athathayia baawe. Mũrungu natumagĩra athathayia baawe barĩa barĩ nthĩgũrũne kũthingata ngerekano ĩrĩa Jesũ eekĩre. Nĩkwaroretue atĩ Jesũ arĩngĩbooreria barĩa ‘baunĩkangi nkoro’ na bonthe ‘barĩa barĩraga.’ (Isaya 61:1, 2) Athathayia ba Mũrungu nĩbaciũmagia kũthithia o ũu.—Johana 13:15.

  Mũrungu kinya natumagĩra athathayia baawe kwejana ũtethio bũrĩa bũkwagĩra, kĩrĩ barĩa baringithĩtue nĩ mogwati ja wĩthĩre.—Mathithio 11:28-30; Agalatia 6:10.

Rĩ, Bibiria no ĩtũtethie kwithuranĩra tontũ bwa mogwati ja wĩthĩre?

Ĩĩ. Kinya kethĩra Bibiria ĩtaandĩkĩrwe nĩkenda yejanaga mwerekera jwa kwithuranĩra tontũ bwa mogwati, nĩĩthagĩrwa na moritani jarĩa jomba gũtũtethia. Ngerekano:

• Ithuranĩre o mbere tontũ bwa mogwati jarĩa jomba kuumĩra. “Muntu uria uri na mathuganio noonaga ugwati bwijite, na agaiciitha.” (Njuno 22:3) Nĩ ũntũ bwa ũũme kwithuranĩra o mbere, ũrĩa tũkathithia ũntũ bũtĩĩrĩgĩĩri bwaumĩra. Twomba kwithuranĩra gũkũrũkĩĩra kũbanga kondo ka ĩgiita rĩa ũgwati, karĩa tũũmba kuumagara nako kwabatarĩka, na kũbangania amwe na nja yaaku antũ arĩa bũgacemanĩria ũgwati bwaumĩra.

• Ona mwoyo jũrĩ jwa gĩtũmi nkũrũki ya into. Bibiria yugaga: “Guti gantu kinya kamwe tweejire nako nthi, na ningi guti gantu tukoomba kurita ku.” (1 Timotheo 6:7, 8) Nĩtũbuĩrĩte kwĩthĩrwa twĩtĩkĩĩrĩtie gũtiganĩria nyomba na into bietũ nĩkenda tũmatũka ũgwati bwaumĩra. Tũbuĩrĩte kũriikana atĩ mwoyo jwetũ nĩ jwa gĩtũmi nkũrũki ya into kinya birĩkũ.—Mathayo 6:25.