Nĩkĩ Jesũ Etagwa Mũtaana wa Mũrungu?

Ĩcookio rĩa Bibiria

Kaingĩ Bibiria ĩtaga Jesũ “Mutana-wa-Murungu.” (Johana 1:49) Kiugo “Mutana-wa-Murungu” kĩonanagia atĩ Mũrungu nĩwe Mũũmbi kana kaumo ka ũtũũro, amwe na bũrĩa bwa Jesũ. (Zaburi 36:9; Kugwurirwa 4:11) Bibiria ĩtĩritanaga atĩ Mũrungu neka aaere ĩthe wa Jesũ na njĩra ĩrĩa antũ aja nthĩgũrũne bagĩjaga nayo aana.

Bibiria kinya ĩtaga araĩka “atana ba Murungu.” (Ayubu 1:6) Na Bibiria yugaga muntũ wa mbere, Adamu, eetagwa “mũtaana wa Mũrungu.” (Luka 3:38; Kimeru Bible, 2010) Amwe nou, tontũ Jesũ aarĩ wa mbere kũũmbwa nĩ Mũrungu ĩmwe kwa ĩmwe, nĩkĩo Bibiria ĩtaragĩĩria nĩwe Mũtaana wa mũmwe wa Mũrungu.

• Rĩ, Jesũ aatũũraga ĩgũrũ mbere ya gũciarwa aja nthĩgũrũne?

• Nĩatĩa Jesũ aathithagia ĩgũrũ mbere ya eeja aja nthĩgũrũne?

Rĩ, Jesũ aatũũraga ĩgũrũ mbere ya gũciarwa aja nthĩgũrũne?

Ĩĩ. Jesũ aarĩ kĩũmbe kĩa gĩkĩrundu narĩa ĩgũrũ mbere ya aciarwa aja nthĩgũrũne. Jesũ wengwa aaugĩre ũjũ: “Ni ndi wa iguru.”—Johana 6:38; 8:23.

Mũrungu oombĩre Jesũ mbere ya kũũmba into bingĩ bionthe. Bibiria yugaga ũjũ bwegie Jesũ:

• “Na ningi niwe. . . waciarirwe ari kiranga mbere into bionthe bitiroombwa.”—Akolosai 1:15.

• Nĩwe “mwambiriiria wa uumbi bwa Murungu.”—Kugwurirwa 3:14.

Jesũ noojũrĩrie ũroria bwegie ũrĩa ‘kuumagara kwawe kwarĩ o kuuma karaaja mono, naku gũgatũũraga o mwanka kenya na kenya.’—Mika 5:2; Mathayo 2:4-6.

Nĩatĩa Jesũ aathithagia ĩgũrũ mbere ya eeja aja nthĩgũrũne?

Jesũ naarĩ na kaanya gakanene narĩa ĩgũrũ. Jesũ rĩrĩa arombaga, aaũgĩre ũjũ bwegie kaanya kau: “Baaba, nkumithia . . . na mwago juria twatwire naju karaja mbere nthiguru iti o.”—Johana 17:5.

Naatethererie baaba waawe kũũmba into bingĩ bionthe. Jesũ aaritaga ngũgĩ arĩ rũteere rwa Mũrungu arĩ “murungamiiri wa ngugi.” (Njuno 8:30) Bwegie Jesũ Bibiria yugaga ũjũ: “Into bionthe nabio bioombirwe ndene yawe, biria biri Iguru, na kinya biria biri nthiguru.”—Akolosai 1:16.

Mũrungu aaritanĩrie ngũgĩ na Jesũ nĩkenda oomba into bingĩ bionthe. Ũũmbi bũu nĩ amwe na araĩka na into bionthe birĩa tũkwona narua aja nthĩgũrũne. (Kugwurirwa 5:11) Na njĩra ya ngerekano, ũrũmwe bũbũ bwa Mũrungu na Jesũ nĩ ta bwa mũcoori wa nyomba na mwaki. Mũcoori wa nyomba acooraga nyomba ũrĩa ĩkethĩrwa ĩkari, nawe mwaki agaka mũcooro jũu jwa nyomba.

Aatumĩkaga arĩ Rũteto. Bibiria ĩkĩarĩria bwegie Jesũ ĩmwĩtaga “Ruteto.” (Johana 1:1) Bũu bũrĩonania Mũrungu aatumagĩra Jesũ kwejana nteto na mĩkaana yaawe, kĩrĩ biũmbe bia gĩkĩrundu.

Kinya nkũrũki, Jesũ aarĩ mwarĩa wa Mũrungu kĩrĩ antũ aja nthĩgũrũne. Kwombĩka Mũrungu aarĩrie gũkũrũkĩĩra Jesũ arĩ Rũteto rĩrĩa aaejaga Adamu na Hawa mawatho, narĩa muundene jwa Edeni. (Kiambiriria 2:16, 17) Jesũ nĩwe mũraĩka ũrĩa watongerererie Aisiraeli ba karaaja rĩrĩa baarĩ narĩa rwanda, na ũrĩa Aisiraeli babuĩrĩte kũthikĩĩra kaju kaawe.—Kuuma 23:20-23.a