Nĩatĩa Bibiria yugaga bwegie kwejana?

Ũrĩa Bibiria yugaga

Bibiria ĩtwĩkagĩra inya twejanage into bietũ na magi, tũrĩna mwerekera jũmwega. Kinya, nĩyonanagia atĩ kwejana kũu nĩkũgunaga mwejani na ũrĩa ũkũewa. (Njuno 11:25; Luka 6:38) Jesũ aaugĩre ũjũ: “Nikutharimi kwejana nkuruki ya kwewa.”—Mathithio 20:35.

Nĩrĩ kwejana kũgwĩragia Mũrungu?
Nĩrĩ kwejana kũthũũragia Mũrungu?
Tũcuuncĩ twa Bibiria twegie kwejana

Nĩrĩ kwejana kwĩthagĩrwa na baita?

Kwejana no kũgune bangĩ rĩrĩa kwathithua kuuma nkorone. Bibiria yugaga ũjũ, “Ni kaba o muntu athithagie o uria athuganitie kuthithia na nkoro yawe, nawe naejanage na magi, atikwigiirua kiria akwejana murimo, kana ta agukinyiirua na inya, tontu Murungu eendaga muntu uria wejanaga na magi agwiritue.”—2 Akorintho 9:7.

Kwejana kũrĩa kuumaga nkorone nĩ nkuma ya “ndini yo yongwa iria iti igi” ĩrĩa Mũrungu eetĩkagĩĩria. (Jakubu 1:27) Muntũ ũrĩa ũtethagia barĩa barĩ na ũbatu nagwĩragia Mũrungu na nĩ ta ĩrandu aejaga Mũrungu. (Njuno 19:17) Bibiria ĩritanaga atĩ Mũrungu akarĩa barĩa baejanaga na magi.—Luka 14:12-14.

Nĩrĩ kwejana kũthũũragia Mũrungu?

Kethĩra kwejana kũu gũtongeeretue nĩ gũcienda. Ngerekano:

Kwejana nĩkenda tũkumua nĩ antũ.—Mathayo 6:2.
Kwejana nĩkenda tũrĩwa.—Luka 14:12-14.
Kwejana nĩkenda twona wendeeri mbere ya Jehova na kinya antũ.—Zaburi 49:6, 7.

Kethĩra kwejana kũu nĩgũkũgwata mbaru mantũ jarĩa jathũũragia Mũrungu. Ngerekano, nĩ untũ bũthũũku kwaa muntũ mbeca cia gũcetha kamarĩ, kũgũra dawa cia mbogita kana kinya ncoobi. (1 Akorintho 6:9, 10; 2 Akorintho 7:1) O ũu, tĩ bwega kwaa ũtethio bwa kĩmbeca muntũ ũrĩa ũrĩna ũũmbi bwa kũrita ngũgĩ na atĩkwenda kũthithia ũu.—2 Athesalonike 3:10.

Kethĩra kwejana kũu nĩgũtũmaga tũtĩjĩra famĩlĩ cietũ. Bibiria ĩritanaga atĩ mũkũrũ abuĩrĩte kũingia mobatu ja antũ ba nja yaawe. (1 Timotheo 5:8) Tĩ ũntũ bwa ũũme mũkũrũ ndeene ya nja gũtethia antũ bangĩ ĩndĩ rĩrĩa wee wengwa atĩkũingĩria antũ ba nja yaawe mobatu. O ta ũu, Jesũ naamenagĩĩria antũ barĩa baaregaga gũtethia aciari baao na njĩra ya kuuga atĩ ‘ĩnto birĩa ndĩ nabio nĩbinenkeri Mũrungu.’—Mariko 7:9-13.

Tũcuuncĩ twa Bibiria twegie kwejana

Njuno 11:25: “Nkoro ya muntu uria wendanaga ikanora, nawe uria ukundanagia ruuji no u agakundua.”

Kũu nĩ kuuga atĩ: Kwejana nĩkwĩthagĩrwa na kĩguni kĩrĩ mwejani na ũrĩa ũkũewa.

Njuno 19:17: “Uria wigagiirua nkia kiao naejaga Mwathani irandu, na wega buu bwawe Mwathani akamurea buu.”

Kũu nĩ kuuga atĩ: Mũrungu noonaga ta ĩrandũ twamwaa rĩrĩa twatethia barĩa barĩna ũbatu na naugaga atĩ agatũrĩa tontũ bwa mathithio jau.

Mathayo 6:2: “lndiria ukuthithia mantu ja kiao, tigaga kuringithia rugoji mbere yaku, ta uria aciayia bathithagia . . . nikenda bakumagua ni antu.”

Kũu nĩ kuuga atĩ: Tũtĩbuĩrĩte kwejana nĩkenda tũkumwaa nĩ antũ bangĩ.

Mathithio 20:35: “Nikutharimi kwejana nkuruki ya kwewa.”

Kũu nĩ kuuga atĩ: Kwejana kuuma nkorone nĩkũretaga kũgwĩrua kwa mma.

2 Akorintho 9:7: “Ni kaba o muntu athithagie o uria athuganitie kuthithia na nkoro yawe, nawe naejanage na magi, atikwigiirua kiria akwejana murimo, kana ta agukinyiirua na inya: tontu Murungu eendaga muntu uria wejanaga na magi agwiritue.”

Kũu nĩ kuuga atĩ: Kwejana na magi nĩkũgwĩragia Mũrungu.