Jesũ akamati nĩ ntigiri atonyete Jerusaremu

Rĩ, Ũroria Bwegie Mesiya Nĩbũkũrikithia atĩ Jesũ Nĩwe Mesiya?

Ũrĩa Bibiria yugaga

Ĩĩ. Rĩrĩa Jesũ aarĩ nthĩgũrũne, noojũrĩrie mororia jamaingĩ jegie “mwiturirua-maguta, tawe munene,” ũrĩa ũrĩngĩĩthĩrwa arĩ “Mwonokia wa nthiguru.” (Danieli 9:25; 1 Johana 4:14) Na kinya nyuma ya gĩkũũ kĩawe, Jesũ neetĩre na mbere kũũjũria mororia jegie Mesiya.—Zaburi 110:1; Mathithio 2:34-36.

Kĩugo “Mesiya” nĩ kũũga atĩa?
Rĩ, ũroria bwegie Mesiya bũrĩngĩũjũrua nĩ antũ babaingĩ?
Rĩ, Mesiya arĩngĩĩja kaĩrĩ ĩgiita rĩĩjĩte?
Kũrĩna mororia jangʼana jegie Mesiya Bibiriene?
Jaja nĩjo mororia jegie Mesiya jarĩa joojũrĩrue nĩ Jesũ

Kĩugo “Mesiya” nĩ kũũga atĩa?

Kiugo gĩa kĩhĩbirania Ma·shiʹach (Mesiya) na gĩa Kĩgiriki kĩrĩa kĩngʼuanene nakĩo, Khri·stos (Kristũ) bionthe bionanagia “mwĩtũrĩrua maguta.” Kwou, riĩtwa “Jesũ Kristũ” rĩonanagia “Jesũ ũrĩa wetũũrĩrue magũta,” kana “Jesũ ũrĩa nĩwe Mesiya.”

Ĩgiita rĩa karaaja muntũ eetũragĩrua magũta kĩongo rĩrĩa akũthuurwa kaanyene kanna ka ũtongeeria. (Mantu ja Alawi 8:12; 1 Samweli 16:13) Jesũ naathuuri nĩ Mũrungu arĩ Mesiya, kaanya karĩa karĩ ka ĩgũrũ mono. (Mathithio 2:36) Kwou, mwaya na ũrĩa antũ beetũragĩrua maguta kĩongo, Mũrungu naathuurĩre Jesũ gũkũrũkĩĩra kĩrundu gĩkĩtheru .—Mathayo 3:16.

Rĩ, ũroria bwegie Mesiya bũrĩngĩũjũrua nĩ antũ babaingĩ?

Arĩ. O ta ũrĩa kĩrore kia njara kĩthagĩrwa kĩrĩ kĩa o muntũ ũmwe, nou ũroria bwa Bibiria bwegie Mesiya bwojũrĩrue nĩ muntũ ũmwe tawe Kristũ. Amwe nou, Bibiria nĩtũkanagia bwegie, “Kristo ba urongo, o na iroria bia urongo, nabo bakaringa biama biinene, na boonanie mantu ja kurigarania nikenda baatithia kinya antu baria ntaare, kethira buu bwombika.”—Mathayo 24:24.

Rĩ, Mesiya arĩngĩĩja kaĩrĩ ĩgiita rĩĩjĩte?

Arĩ. Bibiria nĩyaroretie atĩ Mesiya arĩngĩĩthĩrwa arĩ wa rũrĩjo rwa Daudi. (Zaburi 89:3, 4) Amwe nou, historĩ yegie rũrĩĩjo rwa Ayahudi mwanka ĩgiita rĩa Daudi, nĩyenyangĩrue rĩrĩa Aroma baithũkĩĩre ntũũra ya Jerusalemu 70 M.J.a Kuuma ĩgiita rĩu, gũtĩũmbĩkĩte kaĩrĩ kinya muntũ ũmwe kũrikithia atĩ wee nĩ ũmwe wa rũrĩjo rwa Daudi. Mwanya nou, kinya kethĩra historĩ ĩu nĩyaarĩ o ĩgiita rĩa Jesũ, anthũ baawe batoombĩre gũkana atĩ Jesũ ataarĩ wa rũrĩjo rwa Daudi.—Mathayo 22:41-46.

Kũrĩna mororia jangʼana jegie Mesiya Bibiriene?

Tĩ ũntũ bũbũũthũ kuuga nĩ mororia jangʼana jarĩ Bibiriene jegie Mesiya. Ngerekano, njĩra cia gũtara mororia jegie Mesiya no ciĩthĩrwe irĩ mwanya kũringana na tũcuncĩ tũrĩa tũrĩ Bibiriene. Gĩcuncĩ gĩkĩ kĩa Isaya 53:2-7, nĩkĩaragĩĩria mororia mwanya mwanya jegie Mesiya. Antũ bamwe no batare gĩcuncĩ gĩkĩ kĩa ũroria kĩrĩ ta kĩmwe, na bangĩ no boone gĩkari ta ũroria mwanya mwanya.

Jaja nĩjo mororia jegie Mesiya jarĩa joojũrĩrue nĩ Jesũ

Ũroria	Bwonekaga kĩrĩ	Kũũjũrua
Rũciara rwa Iburahimu	Kiambiriria 22:17, 18	Mathayo 1:1
Rũciara rwa Isaka	Kiambiriria 17:19	Mathayo 1:2
Arĩngĩciarwa kuuma kĩrĩ mwĩrĩga jwa Juda	Kiambiriria 49:10	Mathayo 1:1, 3
Kuuma kĩrĩ rũrĩĩjo rwa ũnene rwa Mũnene Daudi	Isaya 9:7	Mathayo 1:1
Arĩngĩciarwa nĩ bikira	Isaya 7:14	Mathayo 1:18, 22, 23
Arĩngĩciarĩrwa Bethilehemu	Mika 5:2	Mathayo 2:1, 5, 6
Arĩngĩgwĩtwa Immanuelib	Isaya 7:14	Mathayo 1:21-23
Arĩngĩciarĩrwa nja ĩtĩna into bibingĩ	Isaya 53:2	Luka 2:7
Twana tũniini nĩtworagĩrwe nyuma ya gũciarwa kwawe	Jeremia 31:15	Mathayo 2:16-18
Nĩbaamatũkĩĩre nthĩ ya Misiri	Hosea 11:1	Mathayo 2:13-15
Neetĩrwe Mũnazaretic	Isaya 11:1	Mathayo 2:23
Johana mũbatithania neejĩre mbere yaawe	Malaki 3:1	Mathayo 11:7-10
Neetũrĩĩrue maguta aratuĩka Mesiya mwakene jwa 29 M.J.d	Danieli 9:25	Mathayo 3:13-17
Mũrungu naamũmenyithanĩrie ta Mũtana waawe	Zaburi 2:7	Mathithio 13:33, 34
Naarĩ na wĩru nyombene ya Mũrungu	Zaburi 69:9	Johana 2:13-17
Mũtũmĩĩria wa nkuma ĩnjega	Isaya 61:1	Luka 4:16-21
Ntũmĩĩri yaawe nĩyaaretere werũ narĩa Galili	Isaya 9:1, 2	Mathayo 4:13-16
Naaringaga biama ta Musa	Kuriikanithia Maathana 18:15	Mathithio 2:22
Naaragia nteto cia Mũrungu	Kuriikanithia Maathana 18:18, 19	Johana 12:49
Noorerie mĩrimo ya antũ babaingĩ	Isaya 53:4	Mathayo 8:16, 17
Ataithũgaanagĩria wengwa nkũrũki ya kĩthimi	Isaya 42:2	Mathayo 12:17, 19
Oonanĩrie kĩao kwerekera barĩa baanyamarĩtue	Isaya 42:3	Mathayo 12:9-20; Mariko 6:34
Noonanĩrie ĩota rĩa Mũrungu	Isaya 42:1, 4	Mathayo 12:17-20
Naaejanaga ũtaaro bũbwega	Isaya 9:6, 7	Johana 6:68
Naatũmĩrĩrie bwegie riĩtwa rĩa Jehova	Zaburi 22:22	Johana 17:6
Naatumagĩra ngerekano kũritana	Zaburi 78:2	Mathayo 13:34, 35
Aarĩ Mũtongeeria	Danieli 9:25	Mathayo 23:10
Antũ babaingĩ batamwĩtĩkagia	Isaya 53:1	Johana 12:37, 38
Antũ babaingĩ nĩbagitaragua nĩwe	Isaya 8:14, 15	Mathayo 21:42-44
Antũ nĩbamũregere	Zaburi 118:22, 23	Mathithio 4:10, 11
Antũ nĩbamũthũũrĩre ũtheri	Zaburi 69:4	Johana 15:24, 25
Jesũ naakamatĩrwe nĩ ntigiri rĩrĩa atonyete Jerusaremu	Zekaria 9:9	Mathayo 21:4-9
Naatumagĩra ĩgiita rĩawe amwe na aana	Zaburi 8:2	Mathayo 21:15, 16
Neetanagĩrua na riĩtwa rĩa Jehova	Zaburi 118:26	Johana 12:12, 13
Naakunyanĩĩrwe nĩ mũcoore wa akuĩ	Zaburi 41:9	Johana 13:18
Neenderue na ũgũri bwa icuncĩ 30 bia fethae	Zekaria 11:12, 13	Mathayo 26:14-16; 27:3-10
Acoore nĩbaamũtiganĩĩrie	Zekaria 13:7	Mathayo 26:31, 56
Antũ nĩbaaritĩre ũkũũjĩ bwa ũrongo kũmwerekera	Zaburi 35:11	Mathayo 26:59-61
Naakirĩre kii mbere ya agambithania	Isaya 53:7	Mathayo 27:12-14
Nĩbaamũtwĩrĩre mata	Isaya 50:6	Mathayo 26:67; 27:27, 30
Nĩbaamũringĩre mũtwe	Mika 5:1	Mariko 15:19
Naaũrĩrwe	Isaya 50:6	Johana 19:1
Atarigĩĩrĩrie barĩa baamũũraga	Isaya 50:6	Johana 18:22, 23
Anene ba nthĩgũrũ nĩbagwatanĩĩre nĩkenda bamũthitanga	Zaburi 2:2	Luka 23:10-12
Naaringĩĩrwe mĩcumarĩ njara na magũrũne jaawe	Zaburi 22:16	Mathayo 27:35; Johana 20:25
Antũ nĩbaaringĩĩre nguo ciawe kuura	Zaburi 22:18	Johana 19:23, 24
Naataranĩĩrue na eeyia	Isaya 53:12	Mathayo 27:38
Naamenererue na ararumwa	Zaburi 22:7, 8	Mathayo 27:39-43
Naathangĩkĩrue tontũ bwa eeyia	Isaya 53:5, 6	1 Petero 2:23-25
Naakaraga teka atiganĩrĩtue nĩ Mũrungu	Zaburi 22:1	Mariko 15:34
Nĩbaamũkundĩrie siki ĩringanĩĩri na nyongo	Zaburi 69:21	Mathayo 27:34
Naaigĩrue nyonta mbere akua	Zaburi 22:15	Johana 19:28, 29
Nainenkanĩĩre kĩrĩ Mũrungu	Zaburi 31:5	Luka 23:46
Naaritĩre mwoyo jwawe	Isaya 53:12	Mariko 15:37
Naaritĩre ĩkũũri rĩa kweberia meeyia	Isaya 53:12	Mathayo 20:28
Mĩrũitũ yaawe ĩtaunangwa	Zaburi 34:20	Johana 19:31-33, 36
Naamuntĩrwe na ĩtumo	Zekaria 12:10	Johana 19:33-35, 37
Naathikĩrwe amwe na itonga	Isaya 53:9	Mathayo 27:57-60
Naariũkĩrue kuuma kĩrĩ akuũ	Zaburi 16:10	Mathithio 2:29-31
Kaanya ka mũkunyanĩri karajũkua nĩ muntũ ũngĩ	Zaburi 109:8	Mathithio 1:15-20
Naakarĩre nthĩ njarene ya ũrĩo ya Mũrungu	Zaburi 110:1	Mathithio 2:34-36

a McClintock na Strong’s Cyclopedia yugaga ũjũ: “Kũrĩna ũrikithia bũngʼanu atĩ mĩĩrĩga ya Daudi na nja ciao nĩciathirĩrue rĩrĩa Jerusalemu yaaithũkĩĩrwe na tĩ au mberene.”

b Riĩtwa rĩa Kĩhĩbirania Immanueli, rĩonanagia “Mũrungu Arĩ Amwe Natuĩ,” na nĩrĩgũtaarĩĩria ngũgĩ ya Jesũ arĩ Mesiya. Ngũgĩ irĩa aaritĩre rĩrĩa aarĩ aja nthĩgũrũne nĩcionanĩrie atĩ Mũrungu arĩ amwe na athathayia baawe.—Luka 2:27-32; 7:12-16.

c Kiugo “Mũnazareti” kiumanĩtie na riĩtwa rĩa Kĩhĩbirania neʹtser, rĩrĩa rĩonanagia ‘kuumĩra.’

d Nĩkenda wona ũtari bwa Bibiria bũrĩa bũkwonania Mesiya arĩngĩĩja mwakene jwa 29 M.J., tega gĩcuuncĩ “Ũrĩa Danieli Aaroretie Bwegie Mesiya.”

e Ũroria bũbũ bũrĩ kĩrĩ iuku rĩa Zekaria, amwe nou, Mathayo mwandĩki wa Bibiria aaugĩre ũjũ “nteto iria cia Jeremia uria wari kiroria iroojura.” (Mathayo 27:9) Nĩtũkwona atĩ magiita jamwe iuku rĩa Jeremia nĩrĩeki rĩrĩ ria mbere kĩrĩ mauku ja “iroria.” (Luka 24:44) Kwombĩka Mathayo aatumĩĩre iuku rĩa “Jeremia” kwarĩĩria mauku jonthe ja iroria kinya iuku rĩa Zekaria.