Rĩ, Nkoma nĩ Kĩũmbe Kĩrĩo Kamma?

Ũrĩa Bibiria yugaga

Ĩĩ, Nkoma nĩ kĩũmbe kĩrĩo kamma. Nĩ kĩũmbe kĩa gĩkĩrundu kĩrĩa kĩaregere kwathĩkĩra Mũrungu na nĩkĩo “munene wa nthiguru iji.” (Johana 14:30; Aefeso 6:11, 12) Bibiria nĩyonanagia nkuma cia Nkoma gũkũrũkĩĩra mariĩtwa ta jaja:

• Shaitani, rĩrĩa rĩkwonania atĩ wee nĩ “Mũregani.”—Ayubu 1:6.

• Nkoma, rĩrĩa rĩkwonania atĩ wee nĩ “Mũthũmbania.”—Kugwurirwa 12:9.

• Njoka, rĩrĩa rĩtumĩkaga Bibiriene kwonania atĩ wee nĩ “Mwaĩrania.”—2 Akorintho 11:3.

• Mũgerania.—Mathayo 4:3.

• Mũrongo.—Johana 8:44.

Nkoma tĩ ũthũũku kana nkuma ĩrĩa ĩrĩ ndeene ya muntũ

Antũ bamwe bathũgaanagia Nkoma nĩ ũthũũku, kana nkuma ĩnthũũku ĩrĩa ĩrĩ ndeene ya muntũ. Ĩndĩ rĩ, Bibiria ĩrĩna rwaria rũrĩa rwakarĩkĩre gatĩgatĩ ka Mũrungu na Shaitani. Tontũ Mũrungu nĩ ũmũũjũru, atĩũmba kwĩthĩrwa neka aaragia na ũthuũku bũrĩ ndeene yaawe . (Kuriikanithia Maathana 32:4; Ayubu 2:1-6) Kinya, Shaitani naagererie Jesũ ũrĩa ũtĩĩthagĩrwa na wĩyia. (Mathayo 4:8-10; 1 Johana 3:5) Kwou, Bibiria nĩyonanagia atĩ Nkoma nĩ kĩũmbe kĩrĩo kamma na tĩ ũthũũku bũrĩa bũrĩ ndeene ya muntũ.

Rĩ, nĩtũbuĩrĩte kũrigara tontũ antũ babaingĩ batĩĩtĩkĩtie atĩ Nkoma ĩrĩo kamma? Arĩ, tontũ Bibiria yugaga atĩ Shaitani atumagĩra wayia kũũjũria mĩoroto yaawe. (2 Athesalonike 2:9, 10) Njĩra ĩrĩa nene ethĩrĩtwe agĩtumĩra, nĩ kwaĩĩria antũ beetĩkie atĩ atĩĩthagĩrwa arĩo.—2 Akorintho 4:4.

Morongo jangĩ jegie Nkoma

Ũmma: Kĩrĩ Bibiria imwe riĩtwa rĩa kĩhĩbirania rĩrĩa rĩtaũragwa “Lucifa” rĩonanagia ‘njota ya rũkĩĩrĩ.’ (Isaya 14:12) Ũntũ bũrĩa bũkwarĩĩrua bũrĩonania atĩ kiugo gĩkĩ gĩatumagĩrwa kwarĩĩria aathani, kana rũrĩĩjo rwa anene ba Babiloni, barĩa Mũrungu arĩngĩĩkĩrithia nthao, nĩ ũntũ bwa rwikumio rwao. (Isaya 14:4, 13-20) Kiugo “njota ya rũkĩĩrĩ” gĩatumagĩrwa gũcikũũra anene ba Babiloni bagũtunywa wathani.

Ũmma: Nkoma nĩ mũnthũ wa Mũrungu, tĩ nthũmba yaawe. Shaitani nathangĩkagia barĩa batumĩkagĩra Mũrungu na akabatuĩra morongo.—1 Petero 5:8; Kugwurirwa 12:10.