Nĩmbi Ũkũbatara Nĩkenda Ũciũkĩrwa nĩ Bibiria?

Ũrĩa Bibiria yugaga

Bibiria nĩtwĩraga mantũ jamaingĩ jarĩa tũũmba kũthithia nĩkenda tũciũkĩrwa nĩyo. Kinya gũkethĩrwa nĩkũ uumĩte, Rũteto rwa Mũrungu rũrĩa rũrĩ Bibiriene ‘gũtĩrĩo rũrĩ rũrũũmo mono kĩrĩtwĩ, kana rwĩthĩrwa rũrĩ gatagaaria,’ gũciũkĩrwa nĩru.—Kuriikanithia Maathana 30:11.

Mantũ jarĩa tũkũbatara nĩkenda tũciũkĩrwa nĩ Bibiria

1. Ĩthĩrwa na mwonere jũmwega. Ĩtĩkĩĩria Bibiria ta Rũteto rwa Mũrungu. Ĩthĩrwa ũrĩ mwinyiia tontũ Jehova namenete aikumia. (1 Athesalonike 2:13; Jakubu 4:6) Amwe nou, menya wĩtĩkia jarĩa ũkũthooma ũtĩna mũsingi jũmũriku, Jehova arĩenda ũtumĩra ‘ũũmbi bwaku bwa kũthũgaania.’ kwirikithĩria mantũ.—Aroma 12:1, 2.

2. Romba Jehova nĩkenda akwaa ũũme. Bibiria yugaga ũjũ kĩrĩ Njuno 3:5, “ukeerigiira kirira giaku gwengwa.” Ĩndĩ, ‘romba Mũrungu’ akwee ũũme bwa gũciũkĩrwa nĩ Bibiria.—Jakubu 1:5.

3. Iritane ũtĩgũtĩrĩĩria. Ũkagunĩka mono nĩ jarĩa ũkũthooma Bibiriene kethĩra ũgeeta na mbere kwiritana ũtĩgũtĩrĩĩria.—Joshua 1:8.

4. Iritane mantũ mwanya mwanya. Kwiritana ũrĩna kiongo kĩrĩa ũgũcũnkũũna kuuma Bibiriene nĩ njĩra ĩmwe ĩnjega ya kwiritana maandĩko. Ambia na mantu ja mũsingi, rĩu wĩte na mbere gũkinyĩra ‘mantũ jarĩa mangʼanu mma.’ (Ahibirania 6:1, 2, Easy-to-Read Version) Rĩrĩa wathithia ũu, ũkoona atĩ no ũũmbe kũringithania maandiko na ũkairitana mantũ mwanya mwanya kuuma Bibiriene kinya jarĩa “jatiumba guciurwa na mpwi.”—2 Petero 3:16.

5. Ĩtĩkĩĩria ũtethio kuuma kĩrĩ bangĩ. Bibiria nĩtwĩkagĩra inya atĩ twĩtĩkĩĩrie ũtethio kuuma kĩrĩ barĩa baciũkagĩrwa nĩyo nkũrũki yeetũ. (Mathithio 8:30, 31) Akũũjĩ ba Jehova, nĩbaritanaga antũ Bibiria gũtĩ na marĩi. O ta Akristũ ba karaaja, nĩbatũmagĩra Maandĩko gũtetheria antũ bangĩ, gũciũkĩrwa nĩ jarĩa Bibiria ĩritanaga kamma.—Mathithio 17:2, 3.

Mantũ jarĩa ũtĩkũbatara

1. Ũũme bũbwingĩ kana kĩthoomo kĩa ĩgũrũ. Aritwa ba Jesũ 12, nĩbaaciũkagĩrwa nĩ maandĩko na nĩ baritanaga bangĩ kinya kethĩra kũrĩ antũ baabonaga ta “antu baria batiritani, ningi bataari umenyo bubwingi.”—Mathithio 4:13.

2. Mbeca. No wiritane jarĩa jarĩ Bibiriene ũtĩkũrĩua. Jesũ eerĩre aritwa baawe ũjũ: “bwei o uu na magi nikenda nabwi bucoke bwejanage o uu na magi.”—Mathayo 10:8.